Ibuot 15

Ukpepn̄kpọ Aban̄ade Mfọnido

NTE afo ọmọfiọk se asari edide?— Asari edi ndisua owo n̄kukụre koro enye edide isio m̀mê esemde isio isio usem. Ntre ndinam asari edi ndinyene idiọkesịt m̀mê idiọk ekikere mban̄a owo mbemiso afo enen̄erede edi edifiọk enye.

Nte afo ekere ke ọfọn ndisua owo mbemiso afo enen̄erede ọfiọk utọ owo emi enye edide m̀mê n̄kukụre koro enye edide isio?— Baba, asari ifọnke, inyụn̄ iwụtke mfọnido. Nnyịn ikpenyeneke ndisọn̄ ido ye owo n̄kukụre koro enye mîtiehe nte nnyịn.

Kam kere. Nte afo ọmọfiọk owo ekededi emi ikpọkidem esie edide isio ye okuo m̀mê esemde usem oro edide isio ye okuo?— Ekeme ndidi afo amakam ọfiọk mme owo oro ẹdide isio koro mmọ ẹkedade unan m̀mê ẹdọn̄ọde udọn̄ọ. Nte afo ọmọfọn ido onyụn̄ ama mbon oro ẹdide isio ye afo?—

Edieke nnyịn ikpan̄de utọn̄ inọ Akwa Andikpep, kpa Jesus Christ, nnyịn iyọfọn ido ye kpukpru owo. Obio oro owo otode m̀mê ikpọkidem esie ikpenyeneke ndidi akpan n̄kpọ nnọ nnyịn. Nnyịn ikpenyene ndifọn ido ye enye. Okposụkedi kpukpru owo mînịmke emi ke akpanikọ, enye edi ukpepn̄kpọ oro Jesus ekekpepde. Yak itịn̄ iban̄a enye.

Owo Jew kiet emi akanamde asari ye mbon efen ama edi edibụp Jesus ete, ‘Nso ke nnyene ndinam man ndu uwem ke nsinsi?’ Jesus ama ọfiọk ete ke ekeme ndidi owo oro okodomo ndinam imọ itịn̄ ke nnyịn ikpenyene ndifọn ido ye mme owo oro ẹtode ekpụk m̀mê idụt nnyịn kpọt. Ntre utu ke ndibọrọ mbụme oro, Jesus ama obụp owo oro ete: ‘Nso ke Ibet Abasi ọdọhọ ete inam?’

Owo emi ama ọbọrọ ete: ‘Afo enyene ndima Jehovah Abasi fo  ke ofụri esịt fo, onyụn̄ ama mbọhọidụn̄ fo nte idem fo.’ Jesus ama ọdọhọ ete: ‘Afo ọmọbọrọ enen. Ka iso nam emi ndien afo eyenyene nsinsi uwem.’

Nte ededi, owo oro ikoyomke ndifọn ido m̀mê ndima mbon oro ẹdide isio ye enye. Ntre enye ama oyom usụn̄ ndifan̄a. Enye ama obụp Jesus ete: “Anie edi mbọhọidụn̄ mi?” Ekeme ndidi enye okoyom Jesus ọdọhọ ete: “Mme mbọhọidụn̄ fo ẹdi mme ufan fo” mîdịghe, “Mmọ ẹdi mbon oro etiede nte afo.” Man ọbọrọ mbụme emi, Jesus ama ọnọ mbụk kiet aban̄a owo Jew ye owo Samaria. Mbụk oro aka ntem:

Owo kiet akasan̄a ke usụn̄ otode obio Jerusalem osụhọde aka Jericho. Owo emi ekedi owo Jew. Nte enye akasan̄ade aka, mbon n̄wo ẹma ẹmụm enye. Mmọ ẹma ẹnụk enye ẹtọ, ẹnyụn̄ ẹbọ okụk ye ọfọn̄ esie. Mbon n̄wo emi ẹma ẹmia enye tutu enye ekpere ndikpa ẹnyụn̄ ẹkpọn̄ enye ke mbenusụn̄.

Esisịt ini ke oro ebede, oku kiet ama asan̄a ke usụn̄ oro ebe. Enye ama okụt owo emi, oro ẹkenọde unan idiọk idiọk. Nso ke afo akpakanam?— Ọfọn, oku oro ama akam asan̄a n̄kan̄ n̄kan̄ ebe. Enye ikakam ituakke ida. Enye ikanamke baba n̄kpọ kiet ndin̄wam owo emi.

 Ndien owo efen emi edide ata owo ido ukpono ama asan̄a ke usụn̄ oro ebe. Enye ekedi owo Levite emi akanamde utom ke temple ke Jerusalem. Nte enye ama atuak ada man ọnọ un̄wam?— Baba. Enye ama anam ata ukem n̄kpọ oro oku akanamde.

Ke akpatre, owo Samaria ama asan̄a edi. Nte afo emekeme ndikụt enye asan̄ade edi ke inụk usụn̄ oro?—Enye ama okụt owo Jew emi ẹkenọde unan idiọk idiọk anade do. Idahaemi, ekese mbon Samaria ye mme Jew ikamaha kiet eken ke usụn̄ ndomokiet. (John 4:9) Ntre nte owo Samaria emi ayadaha ọkpọn̄ owo emi onyụn̄ etre ndin̄wam enye? Nte enye oyobụp idemesie ete: ‘Ntak emi n̄kpan̄wamde owo Jew emi-e? Enye ikpan̄wamke mi edieke ami n̄kpadade unan!’

 Ọfọn, owo Samaria emi ama ese owo oro anade ke mbenusụn̄, ndien enye ama okop mbọm etieti aban̄a enye. Enye ikekemeke ndikpọn̄ owo oro do nnyụn̄ nyak enye akpa. Ntre enye ama osụhọde ke enan̄ esie, asan̄a ekpere owo oro, onyụn̄ ọtọn̄ọ ndibọp mme unan esie. Enye ama ada aran ye wine eyet ke enyịn unan oro. Emi ayan̄wam mme unan emi ndikpan̄a. Ndien enye ama ada ọfọn̄ ọbọp mme unan oro.

Owo Samaria emi ama emen owo emi ẹkenọde unan do sụn̄sụn̄ odori ke enan̄ esie. Ndien mmọ ẹma ẹsan̄a ẹsụhọde sụn̄sụn̄ tutu mmọ ẹdisịm ufọkisen, m̀mê ekpri ufọk mme akaisan̄. Owo Samaria emi ama ọbọ itie do ọnọ owo emi ndidu, ndien enye ama etịm ese aban̄a enye.

Idahaemi Jesus ama obụp owo emi enye eketịn̄de ikọ ọnọ, ete: ‘Anie ke otu owo ita emi ke afo ekere ke ekedi eti mbọhọidụn̄?’ Nso ke afo ọkpọbọrọ? Ndi ekedi oku, Levite, m̀mê owo Samaria?—

Owo emi ama ọbọrọ ete: ‘Owo emi akatuakde ada onyụn̄ esede aban̄a owo emi ẹkenọde unan ekedi eti mbọhọidụn̄.’ Jesus ama ọdọhọ ete: ‘Afo emenen. Ka kanam ukem oro.’—Luke 10:25-37.

Nte oro ikedịghe inem inem mbụk? Enye anam an̄wan̄a mmọ emi mme  mbọhọidụn̄ nnyịn ẹdide. Mmọ idịghe sụk mme n̄kpet n̄kpet ufan nnyịn. Mmọ inyụn̄ idịghe sụk mme owo oro ẹnyenede ukem uduot ikpọkidem nnyịn m̀mê esemde ukem usem. Jesus ama ekpep nnyịn ndifọn ido ye mme owo inamke n̄kpọ m̀mê mmọ ẹto m̀mọ̀n̄, m̀mê mmọ ẹtie didie, m̀mê ewe usem ke mmọ ẹsem.

Jehovah Abasi etie ntre. Enye inamke asari. Jesus ọkọdọhọ ete: ‘Ete mbufo emi odude ke heaven anam utịn esie asiaha ọnọ ndiọi owo ye nti owo, enye onyụn̄ anam edịm edep ọnọ nti owo ye ndiọi owo.’ Ntre, ndien, nnyịn ikpenyene ndifọn ido ye kpukpru owo, kpa nte Abasi ọfọnde.—Matthew 5:44-48.

Ntre edieke afo okụtde owo oro adade unan, nso ke afo edinam?— Nso edieke owo oro otode idụt efen m̀mê enyenede uduot ikpọkidem emi edide isio ye okuo? Enye osụk edi mbọhọidụn̄ fo, ndien afo ekpenyene ndin̄wam enye. Edieke afo ekerede ke imekpri ikaha ndin̄wam, do afo emekeme ndidọhọ akwa owo an̄wam. Mîdịghe afo emekeme ndikot bodisi m̀mê andikpep. Oro edi ndiwụt mfọnido, ukem nte owo Samaria oro.

Akwa Andikpep oyom nnyịn ifọn ido. Enye oyom nnyịn in̄wam mbon efen, inamke n̄kpọ m̀mê mmọ ẹdi mmanie. Ntak edi oro enye ọkọnọde mbụk owo Samaria emi ọkọfọnde ido.

Ke ukpepn̄kpọ aban̄ade ediwụt mme owo mfọnido inamke n̄kpọ m̀mê mmọ ẹto ewe ekpụk m̀mê idụt, kot Mme N̄ke 19:22; Utom 10:34, 35; ye Ut 17:26.

[Mme ndise ke page 83]

Didie ke nnyịn ikpanam n̄kpọ ye mbon oro ẹdide isio ye nnyịn?

[Mme ndise ke page 84, 85]

Ntak emi owo Samaria ekedide eti mbọhọidụn̄?

[Ndise ke page 86]

Didie ke afo ekeme ndidi eti mbọhọidụn̄?