Ibuot 9

Oyom Nnyịn Ibiọn̄ọ Mme Idomo

NTE akanam owo ekededi ọdọhọ fi anam n̄kpọ oro mîfọnke?— Nte enye ama amia ata ye afo man anam enye? Mîdịghe nte enye ama ọdọhọ ke edidi mbre ye nte ke mfịna idụhe ndinam emi?— Ke ini owo anamde emi ye nnyịn, enye an̄wana ndidomo nnyịn.

Nso ke nnyịn ikpanam ke ini ẹdomode nnyịn? Nte nnyịn ikpenyene ndinyịme nnyụn̄ nnam n̄kpọ oro mîfọnke?— Oro ikpenemke Jehovah Abasi esịt. Edi nte afo ọmọfiọk owo emi esịt ekpenemde?— Satan kpa Devil.

Satan edi asua Abasi, ndien Satan n̄ko edi asua nnyịn. Nnyịn ikemeke ndikụt enye koro enye edi spirit. Edi enye ekeme ndikụt nnyịn. Usen kiet Devil ama etịn̄ ikọ ye Jesus, kpa Akwa Andikpep, onyụn̄ an̄wana ndidomo enye. Ẹyak nnyịn ise se Jesus akanamde. Ndien nnyịn iyọfiọk nnennen n̄kpọ oro ikpanamde ke ini ẹdomode nnyịn.

Jesus ama esiyom ndinam uduak Abasi kpukpru ini. Enye ama owụt emi in̄wan̄-in̄wan̄ ebe ke ndina baptism ke Akpa Jordan. Ekedi ke ndondo oro Jesus ama akana baptism ama ke Satan akan̄wana ndidomo Enye. Bible ọdọhọ ete ke ‘enyọn̄ ama eberede’ ọnọ Jesus. (Matthew 3:16) Emi ekeme ndiwọrọ nte ke Jesus idahaemi ama ọtọn̄ọ nditi kpukpru n̄kpọ aban̄ade nte enye okodude uwem ke heaven ye Abasi.

 Jesus ama aka wilderness ke ama akana baptism man ekere aban̄a mme n̄kpọ oro enye ọkọtọn̄ọde nditi. Uwemeyo ye okoneyo aba ẹma ẹbe. Ke kpukpru ini emi Jesus ikadiaha n̄kpọ ndomokiet, ntre biọn̄ ama enen̄ede ọdọn̄ enye idahaemi. Idahaoro ke Satan akan̄wana ndidomo Jesus.

Devil ọkọdọhọ ete: “Edieke afo edide Eyen Abasi, wụk mme itiat emi ẹkabade ẹdi uyo.” Ndusụk uyo oro ẹkpekenem didie ntem! Edi nte Jesus ekpekekeme ndinam mme itiat oro ẹkabade ẹdi uyo?— Ih, enye ekpekekeme. Ntak-a? Koro Jesus, Eyen Abasi, ama enyene san̄asan̄a odudu.

Nte afo akpakanam itiat akabade edi uyo edieke Devil ọkpọkọdọhọde fi anam emi?— Biọn̄ ama ọdọn̄ Jesus. Ntre nte ikpọkọfọnke ndinam emi ini kiet kpọt?— Jesus ama ọfiọk ete ke ọdiọk ndida odudu imọ nnam n̄kpọ ke utọ usụn̄ oro. Jehovah ọkọnọ enye odudu emi man ada odụri mme owo ọnọ Abasi, idịghe man ada anam n̄kpọ ọnọ idemesie.

Ntre, utu ke oro, Jesus ama etịn̄ se ẹwetde ke Bible ọnọ Satan ete: ‘Idịghe uyo ikpọn̄ ke owo edida idu uwem, edi edida kpukpru ikọ eke ẹwọrọde Jehovah ke inua odu.’ Jesus ama ọfiọk ete ke ndinam se inemde Jehovah esịt akam edi ata akpan n̄kpọ akan ndinyene udia ndia.

 Edi Devil ama afiak odomo. Enye ama ada Jesus aka Jerusalem onyụn̄ okodori enye ke n̄kokon̄ ikpehe temple. Ekem Satan ama ọdọhọ ete: ‘Edieke afo edide Eyen Abasi, sio idem fo mi duọk ke isọn̄. Koro ẹma ẹwet ẹte ke mme angel Abasi ẹyekpeme fi mbak afo ududa unan.’

Ntak emi Satan eketịn̄de emi?— Enye eketịn̄ emi man odomo Jesus ndinam n̄kpọ oro edide ndisịme. Edi Jesus ikosụk ikpan̄ke utọn̄ inọ Satan. Enye ọkọdọhọ Satan ete: ‘Ẹma ẹwet ẹte, kûdomo Jehovah Abasi fo.’ Jesus ama ọfiọk ete ke ama ọdiọk ndidomo Jehovah ebe ke ndisịn uwem imọ ke itiendịk.

Kpa ye oro, Satan ikosion̄oke idem ifep. Ekem enye ama ada Jesus aka ata n̄kokon̄ obot. Do enye ama owụt enye kpukpru obio ubọn̄, m̀mê ukara ererimbot ye ubọn̄ mmọ. Ekem Satan ama ọdọhọ Jesus ete: “Nyọnọ Fi kpukpru n̄kpọ emi, edieke ọduọde ke isọn̄ atuak ibuot ọnọ Mi.”

Kere ban̄a se Devil ọkọnọde. Nte kpukpru obio ubọn̄, m̀mê ukara owo emi, ẹnen̄ede ẹnyene Satan?— Nte ededi, Jesus ikafan̄ake ite ke idịghe Satan enyene mmọ. Enye akpakafan̄a edieke mîkpedịghe Satan enyene mmọ. Ih, Satan enen̄ede edi andikara kpukpru idụt ererimbot. Bible akam okot enye “Ọbọn̄ ererimbot emi.”—John 12:31.

Nso ke afo akpanam edieke Devil ọn̄wọn̄ọde ndinọ fi n̄kpọ edieke afo atuakde ibuot ọnọ enye?— Jesus ama ọfiọk ete ke ifọnke ndituak ibuot nnọ Devil inamke n̄kpọ m̀mê nso ke imọ idinyene. Ntre Jesus ọkọdọhọ ete: ‘Daha mi ke usụn̄, Satan! Koro Bible ọdọhọ ete, Tuak ibuot nọ Jehovah Abasi fo nyụn̄ nam n̄kpọ nọ enye ikpọn̄-ikpọn̄.’—Matthew 4:1-10; Luke 4:1-13.

Nnyịn n̄ko imesisobo mme idomo. Nte afo ọmọfiọk ndusụk mmọ?— Uwụtn̄kpọ kiet edi emi. Eka fo ekeme nditem edesi m̀mê maimai oro enemde eti eti. Enye ekeme ndidọhọ fi okûdia enye tutu ini udia ekem. Edi biọn̄ enen̄ede ọdọn̄ fi, ntre idomo ekeme ndisịm fi  ndidia enye. Nte afo oyokop uyo eka fo?— Satan iyomke fi okop uyo eka fo.

Ti Jesus. Biọn̄ ama ọdọn̄ enye eti eti n̄ko. Edi enye ama ọfiọk ete ke ndinem Abasi esịt ekedi akpan n̄kpọ akan ndidia udia. Afo owụt ke imọ itie nte Jesus ke ini afo anamde se eka fo ọdọhọde.

Ekeme ndidi nditọwọn̄ eken ẹyedọhọ fi emen ndusụk n̄kpasịp ibọk. Mmọ ẹkeme ndidọhọ fi nte ke emi ayanam fi enen̄ede okop idem inem. Edi  n̄kpasịp ibọk emi ẹkeme ndidi n̄kpọsọn̄ ibọk. Mmọ ẹkeme ndinam fi enen̄ede ọdọn̄ọ ẹnyụn̄ ẹkam ẹkeme ndiwot fi. Mîdịghe owo ekeme ndinọ fi sika, emi n̄ko esịnede n̄kpọsọn̄ ibọk, onyụn̄ ọdọhọ fi ọn̄wọn̄ enye. Nso ke afo edinam?—

Ti Jesus. Satan ama odomo ndinam Jesus esịn uwem esie ke itiendịk ebe ke ndidọhọ enye ọfrọ ke temple ọduọ ke isọn̄. Edi Jesus ikanamke oro. Nso ke afo edinam edieke owo onụkde fi ndinam n̄kpọ oro ekemede ndinọ fi unan?— Jesus ikokopke uyo Satan. Ntre afo unyeneke ndikop uyo owo ekededi oro odomode ndinam fi anam idiọkn̄kpọ.

Usen kiet, ẹkeme ndidọhọ fi atuak ibuot ọnọ edisọi mbiet, n̄kpọ oro Bible ọdọhọde ke inaha nnyịn inam. (Exodus 20:4, 5) Emi ekeme ndidi ke ini usọrọ ufọkn̄wed. Ẹkeme ndidọhọ fi ẹte ke afo udukaha ufọkn̄wed aba edieke afo esịnde ndinam emi. Nso ke afo edinam?—

Esidi mmemmem n̄kpọ ndinam se inende ke ini kpukpru owo ẹnamde. Edi ndinam se inende ekeme ndidi ọkpọsọn̄ n̄kpọ ke ini mbon en̄wen ẹdomode ndinụk nnyịn ndinam idiọk. Mmọ ẹkeme ndidọhọ nte ke se mmimọ inamde inen̄ekede idiọk. Edi akpan mbụme kiet edi-o, nso ke Abasi etịn̄ aban̄a enye? Enye ọfiọk n̄kpọ ọfọn akan.

Inamke n̄kpọ m̀mê nso ke mbon en̄wen ẹtịn̄, nnyịn ikpedehede inam mme n̄kpọ oro Abasi ọdọhọde ke ifọnke. Ke utọ usụn̄ oro nnyịn kpukpru ini iyanam Abasi enem esịt, ndien nnyịn tutu amama idinamke Devil enem esịt.

Ẹkeme ndikụt ntọt efen efen ke nte ẹkemede ndibiọn̄ọ mme idomo ndinam idiọk ke Psalm 1:1, 2; Mme N̄ke 1:10, 11; Matthew 26:41; ye 2 Timothy 2:22.

[Ndise ke page 52]

Nso ke ekeme ndidi Jesus ama ọtọn̄ọ nditi ke ini enye akanade baptism?

[Ndise ke page 53]

Didie ke Devil akada mme itiat odomo Jesus?

[Ndise ke page 55]

Ntak emi Satan ekekemede ndinọ Jesus kpukpru obio ubọn̄ emi?

[Mme ndise ke page 55]

Nso ke afo edinam edieke ẹdomode fi?

[Ndise ke page 56]

Ntak akwan̄ade ndituak ibuot nnọ ndisọi mbiet?