Ibuot 20

Nte Afo Esiyom Ndidi Akpa Kpukpru Ini?

NTE afo ọmọfiọk owo ekededi emi esiyomde ndidi akpa kpukpru ini?— Enye ekeme ndinụk owo nsio ke udịm man enye ekeme ndida akpa itie. Nte afo emesikụt oro etịbede?— Akwa Andikpep ama akam okụt ikpọ owo oro ẹkedomode ndida akpa m̀mê akamba itie. Ndien enye ikamaha oro. Yak ise se iketịbede.

Bible etịn̄ ọnọ nnyịn ete ke ẹma ẹkot Jesus usọrọ ke ufọk Pharisee kiet, emi ekedide akwa adaiso ido ukpono. Ke Jesus esịmde do, enye ama ọtọn̄ọ ndise isenowo eken ẹdụkde ẹdi ẹnyụn̄ ẹmekde mme mfọnn̄kan itie. Ntre enye ama obụk mbụk kiet ọnọ mbon oro ẹkenọde ikot. Nte afo akpama ndikop mbụk oro?—

 Jesus ọkọdọhọ ete: ‘Ke ini owo okotde fi usọrọ ndọ, kûmek mfọnn̄kan m̀mê akamba itie.’ Nte afo ọmọfiọk ntak emi Jesus eketịn̄de oro?— Enye ama anam an̄wan̄a nte ke ekeme ndidi ẹma ẹkot owo oro okponde akan. Ntre, nte afo ekemede ndikụt ke ndise emi, owo emi okotde usọrọ edi edidọhọ ete: ‘Nọ owo emi itie, ndien afo ka ko.’ Editie esenowo oro didie ke idem?— Bụt ayanam enye koro kpukpru isenowo eken ẹyekụt enye ọkpọn̄de aka usụhọde itie.

Jesus okowụt ete ke ifọnke ndiyom n̄kponn̄kan itie. Ntre enye ọkọdọhọ ete: ‘Ke ini ẹkotde fi usọrọ ndọ, ka ketie ke ata usụhọde itie. Ekem owo emi okotde fi ekeme ndidi edidọhọ ete, “Ufan, dọk di.” Idahaemi afo eyenyene ukpono ke iso kpukpru isenowo eken nte afo ọkpọn̄de aka mfọnn̄kan itie.’—Luke 14:1, 7-11.

Nte mbụk Jesus emi an̄wan̄a fi?— Yak nnọ uwụtn̄kpọ kiet man nse m̀mê an̄wan̄a fi. Yak idọhọ ke afo odụk bọs emi mme owo ẹwakde etieti. Nte afo ekpenyene ndisọsọp n̄ketetie nnyụn̄ nyak akwa owo adada?— Nte Jesus ekpenem esịt edieke afo anamde oro?—

Owo ekeme ndidọhọ ke se nnyịn inamde ibeheke Jesus. Edi nte afo emenịm oro ke akpanikọ?— Ke ini Jesus okodude ke itie usọrọ oro ke ufọk Pharisee, enye ama ese nte mme owo ẹkemekde itie mmọ. Nte afo ukereke ke enye enyene ukem udọn̄ oro ke se nnyịn inamde mfịn?— Idahaemi Jesus odude ke heaven, enye enen̄ede odu ke eti idaha ndise nnyịn.

Ke ini owo odomode ndidi akpa, emi ekeme ndida mfịna ndi. Ediwak ini utọk esidu, ndien mme owo ẹsiyat esịt. Ndusụk ini emi  esitịbe ke ini nditọwọn̄ ẹyomde ndidụk bọs. Ke ndondo oro ẹbererede usụn̄ bọs oro, nditọwọn̄ esinyan̄a man ẹdi akpa. Mmọ ẹyom mfọnn̄kan itie, kpa mme itie emi ẹkperede window. Nso ikeme nditịbe do?— Ih, mmọ ẹkeme nditọhọ ye kiet eken.

Ndiyom ndidi akpa ekeme ndida ekese mfịna ndi. Enye ama akam ada mfịna edi ke otu mme apostle Jesus. Nte nnyịn ikekpepde ke Ibuot 6 ke n̄wed emi, mmọ ẹma ẹneni ke otu idemmọ ẹban̄a m̀mê anie ekedi n̄kponn̄kan. Ntem, nso ke Jesus akanam?— Enye ama enen̄ede mmọ. Edi ke ukperedem mmọ ẹma ẹfiak ẹtọhọ. Ẹyak ise nte utọk emi ọkọtọn̄ọde.

Mme apostle, ọkọrọ ye mbon en̄wen, ẹkenam akpatre isan̄ ye Jesus ẹka Jerusalem. Jesus ama esitịn̄ ọnọ mmọ aban̄a Obio Ubọn̄ esie, ntre James ye John ẹma ẹsikere ẹban̄a edikara nte ndidem ye enye. Mmọ ẹma ẹkam ẹtịn̄ ẹnọ Salome eka mmọ  ẹban̄a emi. (Matthew 27:56; Mark 15:40) Ntre ke ini mmọ ẹsan̄ade ẹka Jerusalem, Salome ama edi ebịne Jesus, atuak ibuot ọnọ enye, onyụn̄ eben̄e enye n̄kpọ.

Jesus obụp ete: “Oyom nso?” Enye ọbọrọ ete ke imọ ikpama Jesus ayak nditọ imọ ẹtie ẹkpere enye ke Obio Ubọn̄ esie, kiet ke ubọk nnasia ndien eken ke ubọk ufien. Ọfọn, ke ini mme apostle duop eken ẹkefiọkde se James ye John ẹkedọhọde ẹka mmọ eben̄e, afo ekere ke eketie mmọ didie ke idem?—

Mmọ ẹma ẹnen̄ede ẹyat esịt ye James ye John. Ntre Jesus ama ọnọ kpukpru mbet esie nti ikọ item. Jesus ama etịn̄ ọnọ mmọ ete ke mme andikara ererimbot ẹsima ndiyom ukpono ye akamba itie. Mmọ ẹsiyom ndinyene n̄kokon̄ itie emi kpukpru owo ẹsụkde ibuot ẹnọ mmọ. Edi Jesus ama ọdọhọ mme anditiene enye ete ke mmọ ikpenyeneke  nditie ntre. Utu ke oro, Jesus ọkọdọhọ ete: “Owo ekededi eke onyụn̄ oyomde ndidi ebe-iso owo ke otu mbufo oyodụk ufụn ọnọ mbufo.” Kere ban̄a oro!—Matthew 20:20-28.

Nte afo ọmọfiọk se ofụn esinamde?— Enye esinam n̄kpọ ọnọ mbon efen, iyomke mbon efen ẹnam n̄kpọ ẹnọ imọ. Enye esida ata usụhọde itie, idịghe akpa itie. Enye esinam n̄kpọ nte ata usụhọde owo, utu ke ndinam n̄kpọ nte ata akpan owo. Ndien ti, Jesus ọkọdọhọ ete ke owo emi oyomde ndidi akpa ekpenyene ndinam n̄kpọ nte ofụn nnọ mbon en̄wen.

Idahaemi, afo ekere ke oro ọwọrọ nso ọnọ nnyịn?— Nte ofụn akpafan̄a ye eteufọk esie aban̄a owo emi editiede ke mfọnn̄kan itie? Mîdịghe nte enye akpafan̄a aban̄a owo emi edibemde iso adia udia? Afo ekere nso?— Jesus ama anam an̄wan̄a nte ke ofụn esibem iso oyom ufọn eteufọk esie kpukpru ini.—Luke 17:7-10.

Ntre utu ke ndidomo ndidi akpa, nso ke nnyịn ikpanam?— Ih, nnyịn ikpenyene nditie nte ofụn nnọ mbon en̄wen. Ndien oro ọwọrọ ndibem iso nyom ufọn mbon en̄wen. Enye ọwọrọ ndikere nte ke mbon en̄wen ẹfọn ẹkan nnyịn. Nte afo emekeme ndikere mban̄a mme usụn̄ oro afo ekemede ndibem iso nyom ufọn mbon en̄wen?— Ntak mûfiakke uka page 40 ye 41 unyụn̄ ufiak use ndusụk usụn̄ oro afo ekemede ndibem iso nyom ufọn mbon en̄wen ebe ke ndinam n̄kpọ nnọ mmọ.

Afo eyeti nte ke Akwa Andikpep ama ebem iso oyom ufọn mbon en̄wen ebe ke ndinam n̄kpọ nnọ mmọ. Ke akpatre mbubịteyo oro enye okodude ye mme apostle esie, enye ama akam ọtọn̄ọ edọn̄ eyet mmọ ukot. Edieke nnyịn n̄ko ibemde iso iyom ufọn mbon efen ebe ke ndinam n̄kpọ nnọ mmọ, nnyịn iyenem Akwa Andikpep ye Ete esie, kpa Jehovah Abasi, esịt.

Yak ikot ndusụk itie Bible efen efen emi ẹsịnde udọn̄ ẹnọ nnyịn ndibem iso nyom ufọn mbon en̄wen: Luke 9:48; Rome 12:3; ye Philippi 2:3, 4.

[Ndise ke page 107]

Nte afo emesikụt mme owo oro ẹdomode ndidi akpa?

[Mme ndise ke page 108, 109]

Nso ukpepn̄kpọ ke Jesus ekekpep ke ini enye eketịn̄de aban̄a mbon oro ẹmekde mfọnn̄kan, m̀mê akpa itie?

[Ndise ke page 110]

Nso ke Salome ekeben̄e Jesus, ndien nso ikedi utịp?