Ibuot 19

Nte Ọfọn Ndin̄wana En̄wan?

NTE afo ọmọfiọk n̄kpri nditọ ekededi oro ẹsinamde n̄kpọ n̄wụtidem n̄wụtidem ẹnyụn̄ ẹsọn̄de ido?— Nte afo emesima ndidu ye mmọ? Mîdịghe nte afo esima ndidu ye owo emi ọfọnde ido onyụn̄ oyomde emem?— Akwa Andikpep ọkọdọhọ ete: “Ọfọfọn ọnọ mme anam emem: koro ẹyekot mmọ nditọ Abasi.”—Matthew 5:9.

Edi ndusụk ini mbon en̄wen ẹsinam mme n̄kpọ oro ayatde nnyịn esịt. Nte isinamke?— Ntem ekeme nditie nnyịn nte ikpososio mmọ usiene. Emi ama etịbe ini kiet ọnọ mme mbet Jesus ke ini mmọ ẹkesan̄ade ye Jesus ẹka Jerusalem. Yak mbụk enye nnọ fi.

Ke ini mmọ ẹma ẹkesan̄a ẹka anyan, Jesus ama osio ibat ibat mbet esie ọdọn̄ ete ẹbem iso ẹka obio-in̄wan̄ Samaria kiet man ẹkeyom ebiet emi mmọ ẹdiduọkde odudu. Edi mme owo oro ẹkedụn̄de do ikoyomke mmọ, sia mbon Samaria ẹkenyenede isio isio ido ukpono. Ndien  mmọ ikamaha owo ekededi oro akakade obio Jerusalem ndikatuak ibuot.

Edieke oro eketịbede ọnọ fi, nso ke afo akpakanam? Nte afo akpakayat esịt? Nte afo okpokoyom ndisio mmọ usiene?— Oro edi se mme mbet oro James ye John ẹkeyomde ndinam. Mmọ ẹma ẹdọhọ Jesus ẹte: “Nte emenyịme nnyịn ikot ikan̄ oto ke enyọn̄ osụhọde edita mmọ?” Eyịghe idụhe Jesus okokotde mmọ Nditọ Obuma! Edi Jesus ama ọdọhọ mmọ ke ifọnke ndinam n̄kpọ ye mbon en̄wen ntre.—Luke 9:51-56; Mark 3:17.

Edi akpanikọ nte ke mme owo ẹkeme ndisọn̄ ido ye nnyịn ke ndusụk ini. Ekeme ndidi nditọwọn̄ efen idiyomke nnyịn itiene mmọ ibre mbre. Mmọ ẹkam ẹkeme ndidọhọ: “Nnyịn iyomke fi mi.” Ke ini n̄kpọ ntre etịbede, esịt ekeme ndiyat nnyịn, nte ikemeke? Ekeme nditie nnyịn nte akpana isio mmọ usiene. Edi nte akpana isio mmọ usiene?—

Ntak mûmenke Bible fo udi-e? Yak ikụbọde ika Mme N̄ke ibuot 24, ufan̄ikọ 29. Enye okot ntem ete: “Kûdọhọ, ete, ‘Nyanam enye kpa nte enye anamde mi: nyọnọ owo oro kpa nte utom esie edide.’”

Nso ke emi ọwọrọ?— Enye ọwọrọ ke nnyịn ikpodomoke ndisio usiene. Ikpanaha nnyịn isọn̄ ido ye owo n̄kukụre koro enye ọkọsọn̄de ido ye nnyịn. Edi nso edieke owo odomode ndin̄wana ye afo? Enye ekeme ndidomo ndinam esịt ayat fi ke ndikot fi ndiọi enyịn̄. Enye ekeme ndisak fi nsahi onyụn̄ ọdọhọ ke ndịk anam fi. Yak idọhọ ke enye okot fi idek. Nso ke afo akpanam? Nte afo ekpenyene nditọn̄ọ en̄wan?—

N̄ko-n̄ko, yak ise se Bible ọdọhọde. Kụbọde ka Matthew ibuot 5, ufan̄ikọ 39. Jesus ọdọhọ do ete: “Ẹkûn̄wana ye anam-idiọk: edi owo ama eyịbi fi ke mfụk nnasia, kabade mfụk eken nọ enye.” Afo ekere ke ikọ Jesus oro ọkọwọrọ nso? Nte ikọ esie ọkọwọrọ ke edieke owo amiade fi ke mfụk kiet, ke afo ekpenyene ndiyak enye amia mfụk enye eken?—

 Baba, ikọ Jesus ikọwọrọke ntre ke baba usụn̄ kiet. Ndimia owo ufia itiehe nte editọ ita. Enye enen̄ede etie nte ediberi m̀mê edinụk ke odudu. Owo ekeme ndimia nnyịn ufia man ọtọn̄ọ en̄wan. Enye oyom nnyịn iyat esịt. Ndien edieke nnyịn iyatde esịt inyụn̄ iberi m̀mê inụk owo oro usiene, nso iditịbe?— Nnyịn imekeme ndin̄wana en̄wan.

Edi Jesus ikoyomke mme anditiene enye ẹn̄wana en̄wan. Ntre enye ọkọdọhọ ete edieke owo amiade nnyịn ufia, nnyịn ikpenyeneke ndimia enye usiene. Nnyịn ikpenyeneke ndiyat esịt nnyụn̄ n̄n̄wana en̄wan. Edieke nnyịn inamde ntre, nnyịn iwụt ke nnyịn idi ukem ye owo emi ọkọtọn̄ọde en̄wan oro.

Edieke mfịna ọtọn̄ọde, afo ekere ke nso idi mfọnn̄kan n̄kpọ ndinam?— Edi ndikpọn̄ do. Owo enye eken ekeme ndiberi m̀mê ndinụk fi ediwak ini. Edi ekeme ndidi enye eyetre do. Ke ini afo ọkpọn̄de do,  oro iwọrọke ite ke afo unyeneke odudu. Enye ọwọrọ ke afo ọmọsọn̄ọ ada anam se inende.

Edi nso edieke afo an̄wanade en̄wan onyụn̄ akan ke en̄wan oro? Nso ikeme nditịbe?— Enye emi afo akamiade ekeme ndisan̄a ye ndusụk ufan esie afiak edi. Mmọ ẹkam ẹkeme ndida akamba eto mmia fi mîdịghe ẹda ikwa ẹkịm fi. Ntre, nte afo idahaemi emekeme ndikụt ntak emi Jesus mîkoyomke nnyịn in̄wana en̄wan?—

Nso ke nnyịn ikpanam edieke ikụtde nte mbon en̄wen ẹn̄wanade en̄wan? Nte nnyịn ikpenyene ndida nnọ kiet m̀mê eken?— Bible etịn̄ ọnọ nnyịn se ifọnde. Kụbọde ka Mme N̄ke ibuot 26, ufan̄ikọ 17. Enye ọdọhọ ete: “Owo eke asan̄ade ebe, ndien ọnọhọ ke utọk eke mîdịghe esiemmọ, ebiet owo eke omụmde ebua utọn̄.”

Nso ikpetịbe edieke afo omụmde ebua utọn̄? Akpabiak ebua oro, ndien enye akpanyamade fi, nte idịghe ntre? Nte ebua oro odomode ndibọhọ, ntre ke ediyom afo ọsọn̄ọ omụm utọn̄ esie akama ndien ebua oro ọyọdọdiọn̄ ayat esịt. Edieke afo asanade enye ayak, enye ekeme ndinen̄ede ndom fi. Edi nte afo emekeme ndisụk nda do mmụm utọn̄ esie n̄kama ke nsinsi?—

Ọfọn, utọ mfịna emi ke nnyịn idinyene edieke nnyịn itienede ibuana ke en̄wan mbon en̄wen. Ekeme ndidi nnyịn ifiọkke owo emi ọkọtọn̄ọde en̄wan oro m̀mê ntak emi mmọ ẹn̄wanade. Ẹkeme ndimia owo kiet, edi ekeme ndidi enye ekeyịp n̄kpọ owo enye eken. Edieke nnyịn in̄wamde enye, nnyịn idin̄wam inọ. Oro ikpọfọnke, nte ọkpọfọn?

 Ntre, nso ke afo akpanam edieke afo okụtde nte ẹn̄wanade ẹn̄wan?— Edieke edide ke ufọkn̄wed, afo emekeme ndifehe n̄ketịn̄ nnọ andikpep. Ndien edieke mîdịghe ke ufọkn̄wed, afo emekeme ndikot ete m̀mê eka fo m̀mê bodisi. Ih, idem ke ini mbon efen ẹyomde ndin̄wana en̄wan ye nnyịn, nnyịn ikpenyene nditie emem emem.

Mme ata mbet Jesus ẹsinam kpukpru se mmọ ẹkekeme man ẹfep ndin̄wana en̄wan. Ke usụn̄ emi nnyịn iwụt ite ke nnyịn imọsọn̄ọ ida inam se inende. Bible ọdọhọ ke mbet Jesus ‘inyeneke ndin̄wana en̄wan, edi enyene ndinyene sụn̄sụn̄ ido ye kpukpru owo.’—2 Timothy 2:24.

Idahaemi yak ise nti item efen efen oro ẹdin̄wamde nnyịn ndifep en̄wan: Rome 12:17-21 ye 1 Peter 3:10, 11.

[Ndise ke page 102]

Nso ke James ye John ẹkeyom ndinam man ẹsio mbon Samaria usiene?

[Ndise ke page 104]

Nso ke nnyịn ikpanam edieke owo odomode nditọn̄ọ en̄wan ye nnyịn?

[Ndise ke page 105]

Didie ke editiene mbuana ke en̄wan mbon en̄wen etie nte edimụm ebua utọn̄? Afo emekeme ndida unan, ntre kûtiene ubuana!

[Ndise ke page 106]

Nso ke afo akpanam edieke afo okụtde nte ẹn̄wanade ẹn̄wan?