Ibuot 40

Nte Ẹkemede Ndinam Abasi Enem Esịt

NSO ke nnyịn ikeme ndinam man inem Abasi esịt? Nte nnyịn imekeme ndinọ enye n̄kpọ ekededi?— Jehovah ọdọhọ ete: ‘Kpukpru mme unam akai ẹdi okịm.’ Enye n̄ko ọdọhọ ete: “Silver edi okịmmọ, gold onyụn̄ edi okịmmọ.” (Psalm 24:1; 50:10; Haggai 2:8) Edi, odu n̄kpọ oro nnyịn ikemede ndinọ Abasi. Nso ke enye edi?—

Jehovah ayak nnyịn imek m̀mê nnyịn iyanam n̄kpọ esie m̀mê idinamke. Enye inyịkke nnyịn ndinam se enye oyomde nnyịn inam. Yak idomo ndifiọk ntak emi Abasi okobotde nnyịn ye ukeme ndimek m̀mê iyanam n̄kpọ esie m̀mê idinamke.

Ekeme ndidi afo ọmọfiọk se owo ukwak edide. Enye edi masịn oro ẹtịmde man anam se ededi emi andidiọn̄ enye oyomde enye anam. Ntre owo ukwak ikemeke ndimek nnọ idemesie se enye edinamde. Jehovah ekpekekeme ndinam kpukpru nnyịn itie nte owo ukwak. Enye ekpekekeme ndinam nnyịn man ikeme ndinam sụk se enye oyomde nnyịn inam. Edi Abasi ikanamke oro. Nte afo ọmọfiọk ntak?— Ọfọn, ndusụk n̄kpọmbre ẹtie nte owo ukwak. Ke ini ẹfịkde, mmọ ẹnam sụk se andidiọn̄ n̄kpọmbre oro okobotde mmọ ndinam. Ndi akanam afo omokụt utọ n̄kpọmbre  oro?— Ediwak ini mme owo ẹsikpa mba ye n̄kpọmbre oro ẹnamde sụk se ẹketịmde, m̀mê ẹkediọn̄de enye ndinam. Abasi iyomke nnyịn isụk ibuot inọ enye nte n̄kpọ eke idide mme owo ukwak oro ẹbotde ndinam n̄kpọ nnọ enye. Jehovah oyom nnyịn inam n̄kpọ inọ imọ koro nnyịn imade enye inyụn̄ iyomde ndisụk ibuot nnọ enye.

Afo ekere ke esitie Ete nnyịn eke heaven didie ke idem ke ini nnyịn isụkde ibuot inọ enye koro nnyịn iyomde ndinam emi?— Ọfọn, tịn̄ nọ mi, usụn̄ oro afo esinamde n̄kpọ esitie ete ye eka fo didie ke idem?— Bible ọdọhọ ete ke enyene-ibuot eyen “adat ete [esie] esịt” edi ndisịme eyen “edi mfụhọ eka esie.” (Mme N̄ke 10:1) Ndi afo omokụt nte ke ete ye eka fo ẹsinem esịt ke ini afo anamde se mmọ ẹdọhọde fi anam?— Edi esitie mmọ didie ke idem ke ini afo ọsọn̄de ibuot ye mmọ?—

Idahaemi yak ikere iban̄a Ete nnyịn eke heaven, kpa Jehovah. Enye etịn̄ ọnọ nnyịn nte ikemede ndinam enye enem esịt. Mbọk men Bible fo di nyụn̄ kụbọde ka Mme N̄ke 27:11. Abasi etịn̄ ikọ ọnọ nnyịn do ete: ‘Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.’ Nte afo ọmọfiọk se ndisụn̄i owo ọwọrọde?— Ọfọn, owo ekeme ndisụn̄i fi ebe ke ndisak fi nsahi nnyụn̄ ndọhọ ke afo ukemeke ndinam se afo ọkọdọhọde ke imọ imekeme ndinam. Didie ke Satan osụn̄i Jehovah?— Yak ise.

Ti ke ima ikpep ke Ibuot 8 ke n̄wed emi nte ke Satan oyom ndidi Akpa ye nte ke enye oyom kpukpru owo ẹsụk ibuot ẹnọ imọ. Satan  ọdọhọ ke mme owo ẹtuak ibuot ẹnọ Jehovah n̄kukụre koro Jehovah ọyọnọ mmọ nsinsi uwem edieke mmọ ẹtuakde ibuot ẹnọ enye. Ke Satan ama akanam Adam ye Eve ẹsọn̄ ibuot ye Jehovah, Satan ama amia ata ye Abasi. Enye ama ọdọhọ Abasi ete: ‘Mme owo ẹnam n̄kpọ ẹnọ fi ke ntak se mmọ ẹnyenede ẹto fi. Kam nọ mi ifet, ndien mmekeme ndiwọn̄ọde owo ekededi n̄kpọn̄ fi.’

Edi akpanikọ nte ke owo ikwe mme iko oro ata ukem ukem ntre ke Bible. Edi ana in̄wan̄-in̄wan̄ nte ke Satan ama etịn̄ n̄kpọ ntre ye Abasi ke ini nnyịn ikotde iban̄a Job. Job ndinam akpanikọ nnọ Abasi m̀mê nditre ndinam ekenen̄ede edi akpan n̄kpọ ọnọ Satan ye Jehovah. Yak ikụbọde Bible nnyịn ika Job ibuot 1 ye 2 man ise se iketịbede.

Tịm fiọk ke Job ibuot 1 nte ke Satan odu do ke heaven ke ini mme angel ẹdide ndikụt Jehovah. Ntre Jehovah obụp Satan ete: “Afo oto mmọn̄?” Satan ọbọrọ ete ke imọ isasan̄a ke isọn̄  ikanade. Ntre Jehovah obụp ete: ‘Nte afo omokụt Job, nte ke enye anam n̄kpọ ọnọ mi inyụn̄ inamke idiọkn̄kpọ ndomokiet?’—Job 1:6-8.

Satan ama ọnọ ntak inikiet inikiet. ‘Job n̄kukụre atuak ibuot ọnọ fi koro enye mînyeneke mfịna ndomokiet. Edieke afo etrede ndikpeme nnyụn̄ ndiọn̄ enye, enye ọyọkpọn̄ fi an̄wa-an̄wa.’ Ntre Jehovah ọbọrọ ete: ‘Ọfọn, Satan, afo emekeme ndinam enye n̄kpọ ekededi oro afo oyomde ndinam, edi kûnọ Job unan.’—Job 1:9-12.

Nso ke Satan anam?— Enye anam mme owo ẹyịp enan̄ Job ẹnyụn̄ ẹwot mbon oro ẹsede ẹban̄a mmọ. Ekem emịnen̄mịnen̄ asiaha, owot mme erọn̄ ye mme andikpeme mmọ. Ke oro ebede, mme owo ẹdi ẹdiyịp mme camel ẹnyụn̄ ẹwot mbon oro ẹkpemede mmọ. Ke akpatre, Satan anam oyobio owụri ufọk oro nditọ Job duop ẹdude, ndien kpukpru mmọ ẹkpan̄a. Kpa ye kpukpru emi, Job osụk ananam n̄kpọ Jehovah.—Job 1:13-22.

Ke ini Jehovah afiakde okụt Satan, Jehovah etịn̄ nte ke Job osụk ananam akpanikọ. Satan ọdọhọ ete: ‘Edieke afo akam ayakde mi nnọ enye unan, enye ọyọkpọn̄ fi an̄wa-an̄wa.’ Ntre Jehovah ayak Satan ọnọ Job unan edi ọsọn̄ọ ọdọhọ enye ete okûwot Job.

 Satan anam inia ọtọn̄ọ ndita Job ofụri idem. Inia emi ama enen̄ede etebe tutu owo ndomokiet iyomke ndidu n̄kpere enye. Idem n̄wan Job ọdọhọ enye ete: “Kpọn̄ Abasi, ndien kpa n̄kpa.” Mbon oro ẹkenamde nte ke idi mme ufan Job ẹdi ẹdise enye ẹnyụn̄ ẹnam enye enen̄ede okop mfụhọ ebe ke ndidọhọ nte ke anaedi enye enyene ofụri mfịna emi ke ntak ndiọi n̄kpọ oro enye akanamde. Nte ededi, kpa ye kpukpru mfịna ye ubiak oro Satan adade etiene Job, enye aka iso ọsọn̄ọ ada anam n̄kpọ Jehovah.—Job 2:1-13; 7:5; 19:13-20.

Afo ekere ke nsọn̄ọnda Job eketie Jehovah didie ke idem?— Emi ama anam enye enem esịt koro Jehovah ama ekeme ndidọhọ Satan ete: ‘Sese Job! Enye anam n̄kpọ ọnọ mi koro oyomde ndinam.’ Nte afo eyetie nte Job, kpa owo emi Jehovah ekemede ndinyan ubọk n̄wụt nte uwụtn̄kpọ oro ọsọn̄ọde nte ke Satan edi osu nsu?— Ke akpanikọ, edi n̄kpọ ukpono ndinọ ibọrọ ke ikọ Satan oro nte ke imọ imekeme ndiwọn̄ọde owo ekededi n̄kpọn̄ edinam n̄kpọ Jehovah. Jesus ekenen̄ede ada emi nte n̄kpọ ukpono.

Akananam Akwa Andikpep iyakke Satan anam Enye anam n̄kpọ ekededi oro ọdiọkde. Kam kere nte uwụtn̄kpọ esie akanamde Ete esie enem esịt! Jehovah ekeme ndinyan ubọk n̄wụt Jesus onyụn̄ ọbọrọ Satan ete: ‘Sese Eyen mi! Enye ọsọn̄ọ ada ọnọ mi koro enye ama mi!’ Kere n̄ko ban̄a idatesịt oro Jesus enyenede ke ndinam esịt Ete esie adat. Ke ntak idatesịt oro, Jesus ama akam ọyọ n̄kpa ke eto ndutụhọ.—Mme Hebrew 12:2.

Nte afo omoyom nditie nte Akwa Andikpep nnyịn nnyụn̄ nnam Jehovah enem esịt?— Do ka iso ndikpep mban̄a se Jehovah oyomde fi anam, nyụn̄ nam enye enem esịt ebe ke ndinam emi!

Kot se Jesus akanamde man enem Abasi esịt ye se oyomde nnyịn n̄ko inam, ke Mme N̄ke 23:22-25; John 5:30; 6:38; 8:28; ye 2 John 4.

[Ndise ke page 207]

Ntak emi Abasi mîkanamke nnyịn itie nte owo ukwak emi?

[Ndise ke page 208]

Didie ke afo ekeme ndinam Jehovah ye ete ye eka fo ẹnem esịt?

[Ndise ke page 209]

Ke Adam ye Eve ẹma ẹkenam idiọkn̄kpọ, didie ke Satan akamia ata ye Jehovah?

[Ndise ke page 210]

Nso ke Job ọkọyọ, ndien ntak emi akanamde Abasi enem esịt?