Ibuot 42

Ntak Oyomde Nnyịn Inam Utom

NSO ke afo ama akan, ndinam utom m̀mê ndibre mbre?— Ke akpanikọ, n̄kpọ ndomokiet idiọkke ye edibre mbre. Bible etịn̄ aban̄a Jerusalem ‘ndiyọhọ ye nditọiren ye nditọiban emi ẹbrede mbre ke an̄wa esie.’—Zechariah 8:5.

Akwa Andikpep ama esima ndise nte nditọwọn̄ ẹbrede mbre. Mbemiso enye ekedide isọn̄, enye ama ọdọhọ ete: ‘N̄kodu Abasi ke n̄kan̄ nte etubom anamutom; ndara ke iso esie kpukpru ini.’ Tịm fiọk nte ke Jesus akanam utom ye Jehovah ke heaven. Ndien ke ini enye okodude do, enye ama ọdọhọ ete: “Idatesịt mi odu ke otu nditọ owo.” Ih, nte nnyịn ima ikekpekpep, Akwa Andikpep ama enen̄ede enyene udọn̄ ke idem kpukpru owo, esịnede nditọwọn̄.—Mme N̄ke 8:30, 31.

 Nte afo emekere ke Jesus ama esibre mbre ke ini enye ekedide eyenọwọn̄?— Ekeme ndidi ama esibre. Edi sia enye ekedide “etubom anamutom” ke heaven, ndi enye n̄ko ama esinam utom ke isọn̄?— Ọfọn, ẹkekot Jesus “eyen anam-usọ.” Edi ẹma ẹkot enye n̄ko “anam-usọ.” Nso ke emi owụt?— Anaedi Joseph emi ọkọbọkde Jesus nte eyen esie ama ọnọ enye ukpep. Ntre Jesus n̄ko ama akabade edi anamusọ eto.—Matthew 13:55; Mark 6:3.

Nso orụk anamusọ eto ke Jesus ekedi?— Sia enye ekedide etubom anamutom ke heaven, nte afo ukereke ke enye ama akabade edi etubom anamusọ eto ke isọn̄?— Kere ban̄a nte ọkọsọn̄de ndidi anamusọ eto ke ini oro. Eyedi Jesus ekenyene ndiwọrọ n̄ka n̄kekpi eto, esịbe  eto oro mbio mbio, obiom eto oro ọnyọn̄ ufọk, ndien ekem ọsọi eto oro ada ọkọn̄ okpokoro, n̄kpọitie, ye mme n̄kpọ eken.

Nte afo emekere ke utom emi ama anam Jesus okop inemesịt?— Ndi afo okpokop inemesịt edieke afo ekpekemede ndinam ndiye okpokoro ye n̄kpọitie ye mme n̄kpọ eken nnọ mme owo?— Bible ọdọhọ ke ọfọn owo ‘ndidat esịt ke se enye anamde.’ Utom esinọ orụk inemesịt oro afo mûkemeke ndinyene nto mbre.—Ecclesiastes 3:22.

Ke akpanikọ, utom esinọ ekikere ye ikpọkidem nnyịn ufọn. Ediwak nditọwọn̄ ẹsikam ẹtie ẹse TV mîdịghe ẹbre mme mbre vidio. Mmọ ẹkpon ubom ẹkaha inyụn̄ ikopke nsọn̄idem, ndien mmọ isitịmke ikop inemesịt. Mmọ inamke mbon en̄wen ẹnem esịt n̄ko. Nso ke oyom nnyịn inam man ikop inemesịt?—

Nnyịn ima ikpep ke Ibuot 17 ke n̄wed emi nte ke ndinọ enọ nnyụn̄ nnam n̄kpọ ndin̄wam mbon en̄wen ẹsida inemesịt ẹdi. (Utom 20:35) Bible okot Jehovah ‘Abasi inemesịt.’ (1 Timothy 1:11) Ndien nte nnyịn ikokotde ke Mme N̄ke, Jesus ama ‘adara kpukpru ini.’ Ntak emi Jesus akadarade?— Ọfọn, enye ama ọnọ ntak kiet ke ini enye ọkọdọhọde ete: “Ete Mi ke ananam utom tutu esịm emi, Ami ke nnyụn̄ nnam.”—John 5:17.

Ke ini Jesus okodude ke isọn̄, enye ikanamke utom nte anamusọ eto ke ofụri uwem esie. Jehovah Abasi ama enyene san̄asan̄a utom ọnọ enye ndinam ke isọn̄. Nte afo ọmọfiọk se utom oro ekedide?— Jesus ọkọdọhọ ete: “Mmenyene ndikwọrọ eti mbụk Ubọn̄ Abasi . . . : koro ẹkedọn̄ Mi ẹte ndinam oro.” (Luke 4:43) Ndusụk idaha ke ini Jesus ọkọkwọrọde ikọ ọnọ mme owo, mmọ ẹma ẹnịm enye ke akpanikọ ẹnyụn̄ ẹtịn̄ se enye ọkọdọhọde ẹnọ mbon en̄wen, nte n̄wan Samaria emi afo okụtde mi akanamde.—John 4:7-15, 27-30.

Didie ke Jesus ekese edinam utom emi? Nte afo emekere ke enye ama oyom ndinam enye?— Jesus ama ọdọhọ ete: “Udia Mi edi ndinam uduak Andidọn̄ Mi, nnyụn̄ mma utom Esie.” (John 4:34)  Adan̄a didie ke afo esima ndidia udia emi afo amade akan?— Emi anam fi ọfiọk nte Jesus akamade utom oro Abasi ọkọnọde enye anam.

Abasi okobot nnyịn ke usụn̄ emi edikpep ndinam utom ekemede ndin̄wam nnyịn ndikop inemesịt. Enye ọdọhọ ke enọ oro Imọ inọde owo edi ‘ndidat esịt ke utom mmọ.’ Ntre edieke afo ekpepde ndinam utom ke ini afo edide eyenọwọn̄, afo oyokop inemesịt ke ofụri eyouwem fo.—Ecclesiastes 5:19.

Oro iwọrọke ite ke eyenọwọn̄ ekeme ndinam utom oro akwa owo akpanamde, edi kpukpru nnyịn imekeme ndinam ndusụk utom. Ete ye eka fo ẹkeme ndiwọrọ n̄ka utom kpukpru usen ndin̄wana okụk man otodo ubon mbufo enyene udia ndidia ye ufọk ndidụn̄. Ndien nte afo ọfiọkde, ekese utom ẹdu oro oyomde ẹnam ke ufọk man enye eye onyụn̄ asana.

Nso utom oro edidade ufọn ọsọk ofụri ubon ke afo ekeme ndinam?— Afo emekeme ndin̄wam nditịm okpokoro, ndiyet usan, ndiduọk mbio, ndinam itienna fo asana, ndinyụn̄ ntịm mme n̄kpọmbre fo mbon. Ekeme ndidi afo ama ananam ndusụk mme n̄kpọ oro. Utom oro enen̄ede enyene ufọn ọnọ ubon.

Yak ise nte utọ utom oro enyenede ufọn. Enyene nditịm mme n̄kpọmbre mbon ke ini afo ebrede mbre ama. Afo ọkpọdọhọ ke nso inam emi edi akpan n̄kpọ?— Enye an̄wam ndinam ufọk eye, ndien enye n̄ko ekeme ndikpan owo ndida unan. Edieke afo mûtịmke mme n̄kpọmbre fo ubon, ke adan̄aemi eka fo ọkọhọde n̄kpọ ke ubọk asan̄a usen kiet enye ekeme ndidori ukot ke kiet ke otu mmọ. Enye ekeme ndifiọnọde nduọ nnyụn̄ nda unan. Ekeme ndikam nyom enye aka ufọkibọk. Ndi oro ikpenyeneke ndịk?— Ntre ke ini afo etịmde mme n̄kpọmbre fo obon ke ama ekebre mbre ama, oro anam ufọn ọnọ kpukpru owo.

Utom en̄wen odu emi nditọwọn̄ ẹkpenamde n̄ko. Uwụtn̄kpọ kiet edi utom ufọkn̄wed. Afo emesikpep nte ekemede ndikot n̄wed ke  ufọkn̄wed. Ndusụk nditọwọn̄ ẹda ukotn̄wed nte n̄kpọ oro ọnọde inemesịt, edi mbon en̄wen ẹdọhọ ke enye ọsọsọn̄. Idem okposụkedi etiede nte ke ọsọsọn̄ ke ntọn̄ọ, afo oyokop idatesịt edieke afo ekpepde ndikot n̄wed ọfọn. Ke ini afo ọfiọkde nte ekemede ndikot n̄wed, ediwak inem inem n̄kpọ ẹdu oro afo ekemede ndikpep. Afo ayakam ekeme ndikot n̄wed Abasi, kpa Bible. Ntre ke ini afo anamde utom ufọkn̄wed fo ọfọn, enye enen̄ede enyene ufọn, nte inyeneke?—

Ndusụk owo ẹdu emi ẹfehede-fehe utom. Ekeme ndidi afo ọmọfiọk owo emi esinamde oro. Edi sia Abasi okobotde nnyịn man inam utom, oyom nnyịn ikpep ndinam utom. Didie ke Akwa Andikpep akama utom esie?— Eketie nte edidia udia oro enye amade akan. Ndien nso utom ke enye eketịn̄ aban̄a?— Nditịn̄ nnọ mbon efen mban̄a Jehovah Abasi ye nte mmọ ẹkemede ndinyene nsinsi uwem.

N̄kpọ oro ekemede ndin̄wam nnyịn man ikop inem utom edi emi. Bụp idemfo, ‘Ntak anade ẹnam utom emi?’ Ke ini afo ọfiọkde ntak emi n̄kpọ edide akpan n̄kpọ, edi mmemmem ndinam n̄kpọ oro. Ndien edide utom oro okpokpon m̀mê ekpekpri, nam enye ọfọn. Edieke afo anamde, afo emekeme ndidat esịt ke ubọkutom fo, kpa nte Akwa Andikpep akadatde.

Bible ekeme ndin̄wam owo ndikabade ndi eti anamutom. Kot se enye ọdọhọde ke Mme N̄ke 10:4; 22:29; Ecclesiastes 3:12, 13; ye Colossae 3:23.

[Ndise ke page 217]

Nso ke Akwa Andikpep akanam mbemiso enye ekedide isọn̄?

[Mme ndise ke page 218]

Nso orụk utom iba ke Jesus akanam ke ini enye okodude ke isọn̄?

[Ndise ke page 221]

Ntak edide akpan n̄kpọ nditịm mme n̄kpọmbre mbon ke afo ama ekebre mbre ama?