Ibuot 22

Ntak Emi Nnyịn Mîkposụhu Nsu

EDIEKE eyenan̄wan ọdọhọde eka esie ete: “Ke akpanikọ, nyọnyọn̄ ndi ufọk ke ndondo oro ufọkn̄wed asuanade.” Edi ekem enye etie ebre mbre ye mme ufan esie ndien ke ọnyọn̄de edi enye ọdọhọ eka esie ete: “Andikpep mi ọkọdọhọ mbet ke ufọkn̄wed ama akasuana.” Nte ọkpọfọn nditịn̄ n̄kpọ ntre?—

Mîdịghe ekeme ndidi eyeneren ọdọhọ ete esie ete: “N̄katịghake bọl ke esịt ufọk.” Edi nso edieke edide enye ama atịgha? Nte ọkpọdiọk ndidọhọ nte ke imọ ikatịghake?—

Akwa Andikpep ama owụt nnyịn nnennen n̄kpọ ndinam. Enye ọkọdọhọ ete: ‘Ẹyak ikọ mbufo Ih edi Ih, ndien Ihih mbufo, edi Ihih; koro n̄kpọ efen ekededi oto andidiọk.’ (Matthew 5:37) Nso ke ikọ Jesus oro ọkọwọrọ?— Enye ọkọwọrọ ete ke nnyịn ikpenyene ndinam se itịn̄de.

Mbụk kiet odu ke Bible emi owụtde nte edide akpan n̄kpọ nditịn̄ akpanikọ. Enye aban̄a  owo iba emi ẹkedọhọde ke mmimọ idi mme mbet Jesus. Yak ise se iketịbede.

Ikesịmke ọfiọn̄ iba ke Jesus ama akakpa, ediwak owo ẹto nsannsan ebiet ẹdi Jerusalem ndidụk akpan usọrọ mme Jew oro ẹkotde Pentecost. Apostle Peter ọnọ n̄wọrọnda utịn̄ikọ aban̄a Jesus, emi Jehovah akanamde eset ke n̄kpa. Emi edi akpa ini ediwak owo oro ẹdide Jerusalem ẹkopde n̄kpọ ẹban̄a Jesus. Idahaemi mmọ ẹyom ndifiọk n̄kpọ efen efen mban̄a enye. Ntre, nso ke mmọ ẹnam?

Mmọ ẹma ẹtie ẹbịghi akan nte mmọ ẹkekerede. Edi ke esisịt ini ebede, okụk ama okụre ndusụk mmọ ke ubọk, ndien mmọ ẹma ẹyom un̄wam man ẹkeme ndidep udia. Mme mbet ke Jerusalem ẹma ẹyom ndin̄wam isenowo oro. Ntre, ediwak mmọ ẹma ẹnyam inyene mmọ ẹnyụn̄ ẹda okụk ẹsọk mme apostle Jesus. Ekem mme apostle ẹma ẹda okụk emi ẹnọ mbon oro ẹkeyomde un̄wam.

Ananias ye Sapphira n̄wan esie, emi ẹkedide mme andibuana ke esop Christian ke Jerusalem, ẹma ẹnyam in̄wan̄ mmọ. Owo ndomokiet ikọdọhọke mmọ ẹnyam. Mmọ ke idemmọ ẹkebiere ndinyam. Edi se mmọ ẹkenamde  ikedịghe koro mmọ ẹkemade mbufa mbet Jesus emi. Ke akpanikọ, Ananias ye Sapphira ẹkeyom ndinam mme owo ẹkere ke mmimọ imenen̄ede ifọn. Ntre mmọ ẹma ẹbiere ndidọhọ nte ke mmimọ inọ kpukpru okụk man ẹda ẹn̄wam mbon en̄wen. Ke akpanikọ mmọ ẹkenọ ubak okụk kpọt edi ẹdọhọ ke mmimọ inọ kpukpru. Nso ke afo ekere aban̄a oro?—

Ọfọn, Ananias edi ndisobo ye mme apostle. Enye ọnọ mmọ okụk oro. Nte ededi, Abasi ọfiọk ete ke enye ikọnọhọ kpukpru. Ntre Abasi anam apostle Peter ọfiọk ke Ananias iketịn̄ke akpanikọ.

Ekem Peter ọdọhọ ete: ‘Ananias, ntak emi afo ayakde Satan esịn fi anam n̄kpọ emi-e? In̄wan̄ ekedi okuo. Owo ikenyịkke fi ndinyam enye. Ndien idem ke ama akanyam in̄wan̄ oro, akana ọnọ fi ndibiere se edidade okụk oro anam. Edi ntak emi anamde n̄kari nte ke inọ kpukpru okụk ke ini afo ọnọde ubak kpọt? Ke emi afo usụhu nsu unọ nnyịn kpọt, edi osu n̄ko ọnọ Abasi.’

Akamba mfịna edi oro. Ananias osu nsu! Enye inamke se enye ọdọhọde ke imanam. Enye n̄kukụre anam n̄kari. Bible etịn̄ ọnọ nnyịn se iketịbede ke oro ebede. Enye ọdọhọ ete: ‘Ke okopde ikọ Peter, Ananias ọduọ ke isọn̄ akpa.’ Abasi owot Ananias! Ekem, ẹmen okpo esie ẹwọrọ ẹkebụk.

 Ke n̄kpọ nte hour ita ẹma ẹkebe, Sapphira odụk edi. Enye ifiọkke se iketịbede inọ ebe esie. Ntre Peter obụp enye ete: ‘Ndi mbufo mbiba ẹkenyam in̄wan̄ oro ke ibat okụk emi mbufo ẹkenọde nnyịn?’

Sapphira ọbọrọ ete: ‘Ih, nnyịn ikanyam in̄wan̄ emi ke ibat okụk oro.’ Edi oro ekedi nsu! Mmọ ẹma ẹnịm ndusụk okụk oro ẹkenyamde in̄wan̄ oro ẹnọ idemmọ. Ntre Abasi owot Sapphira n̄ko.—Utom 5:1-11.

Nso ke nnyịn ikpep ito se iketịbede inọ Ananias ye Sapphira?— Nnyịn ikpep nte ke Abasi imaha mme osu nsu. Enye oyom nnyịn itịn̄ akpanikọ kpukpru ini. Edi ediwak owo ẹdọhọ ke ọfọn ndisu nsu. Nte afo emekere ke mmọ ẹnen?— Nte afo ama ọfiọk ete ke kpukpru udọn̄ọ, ubiak, ye n̄kpa ke isọn̄ ẹketo ke ntak nsu?—

Ti ete ke Devil ama osu nsu ọnọ akpa n̄wan, Eve. Enye ọkọdọhọ Eve ete ke enye idikpaha edieke enye ọsọn̄de ibuot ye Abasi onyụn̄ adiade mfri oro Abasi ọkọdọhọde ke ikpanaha enye adia. Eve ama enịm Devil ke akpanikọ onyụn̄ adia mfri oro. Enye ama anam Adam adia n̄ko. Idahaemi mmọ ẹkedi mme anamidiọk, ndien kpukpru nditọ mmọ ẹdimana nte mme anamidiọk. Ndien sia kpukpru nditọ Adam ẹkedide mme anamidiọk, mmọ ẹma ẹbọ ufen ẹnyụn̄ ẹkpan̄a. Didie ke kpukpru mfịna emi ẹketọn̄ọ?— Mmọ ẹketọn̄ọ ẹto nsu.

Eyịghe idụhe Jesus ọkọdọhọde ke Devil “edi osu-nsu, ye ete nsu”! Enye ekedi akpa owo oro okosude nsu. Ke ini owo ekededi osude nsu, enye anam se Devil ekebemde iso anam. Nnyịn ikpenyene ndikere mban̄a emi ini ekededi oro ẹdomode nnyịn ndisu nsu.—John 8:44.

 Ini ewe ke ekeme nditie fi nte okposu nsu?— Nte idịghe ke ini afo anamde n̄kpọ oro ọdiọkde?— Afo emekeme ndibiat n̄kpọ, idem okposụkedi afo mûkọfiọkke-fiọk unam. Edieke ẹbụpde fi, nte afo ekpenyene ndidọhọ ke eyeneka fo akabiat? Mîdịghe nte afo ekpenyene ndinam nte ke ufiọkke nte n̄kpọ oro akasan̄ade abiara?—

Nso edieke afo ekenyenede utom ndinam ke ufọk edi afo anam ubak ubak? Nte afo ekpenyene ndidọhọ ke imọ ima inam kpukpru, idem ọkpọkọm ukunamke?— Nnyịn ikpenyene nditi Ananias ye Sapphira. Mmọ iketịn̄ke ofụri akpanikọ. Ndien Abasi ama owụt nte oro ọkọdiọkde ebe ke ndiwot mmọ.

Ntre se ededi oro nnyịn inamde, nnyịn ndisu nsu esiwak ndinam mme mfịna ẹkpon ẹkan, nnyịn ikponyụn̄ itịn̄ke se mîdịghe ofụri akpanikọ. Bible ọdọhọ ete: “Ẹtịn̄ akpanikọ.” Enye n̄ko ọdọhọ ete: “Ẹkûsu nsu ẹnọ kiet eken.” Jehovah esitịn̄ akpanikọ kpukpru ini, ndien enye oyom nnyịn inam ukem oro.—Ephesus 4:25; Colossae 3:9.

Nnyịn ikpenyene nditịn̄ akpanikọ kpukpru ini. Oro edi akpan n̄kpọ oro ẹwụtde ke Exodus 20:16; Mme N̄ke 6:16-19; 12:19; 14:5; 16:6; ye Mme Hebrew 4:13.

[Ndise ke page 117]

Nso idiọkn̄kpọ ke eyeneren emi anam?

[Ndise ke page 118]

Nso nsu ke Ananias osu ọnọ Peter?

[Ndise ke page 119]

Nso itịbe inọ Ananias ke ntak emi enye okosude nsu?

[Ndise ke page 120]

Jesus ọkọdọhọ ke anie okosu akpa nsu, ndien nso ikedi utịp?

[Ndise ke page 121]

Ini ewe ke ẹkeme ndidomo fi ndisu nsu?