Ibuot 26

Ntak Ọsọn̄de Ndinam Eti N̄kpọ

ANIE ekenem esịt ke ini Saul akanamde ndiọi n̄kpọ?— Satan kpa Devil. Edi mme adaiso ido ukpono mme Jew ẹma ẹnem esịt n̄ko. Ekem ke ini Saul akakabarede edi mbet Akwa Andikpep ẹkenyụn̄ ẹkotde enye Paul, mme adaiso ido ukpono oro ẹma ẹtọn̄ọ ndisua enye. Ntre, nte afo emekeme ndikụt ntak emi ọsọn̄de mbet Jesus ndinam eti n̄kpọ?—

Ini kiet akwa oku emi ekekerede Ananias ama ọdọhọ mme owo ẹyịbi Paul ufia ke iso. Ananias ama akam odomo ndinam ẹsịn Paul ke ufọk-n̄kpọkọbi. Paul ama ọbọ ufen etieti ke ini enye akakabarede edi mbet Jesus. Ke uwụtn̄kpọ, mme idiọkowo ẹma ẹtịm Paul ẹnyụn̄ ẹdomo ndida ikpọ itiat ntọn̄ọ enye n̄wot.—Utom 23:1, 2; 2 Corinth 11:24, 25.

Ediwak owo ẹyedomo ndinam nnyịn inam mme n̄kpọ oro ayatde Abasi esịt. Ntre mbụme edi-o, Adan̄a didie ke afo ama se ifọnde? Nte afo emenen̄ede ama enye  tutu afo ebiere ndinam se ifọnde idem ke ini mbon en̄wen ẹsuade fi ke ndinam emi? Ndinam oro oyom uko, nte iyomke?—

Afo emekeme ndikere, ‘Ntak emi mme owo ẹdisuade nnyịn ke ndinam eti n̄kpọ? Nte mmọ ikpenemke-nem esịt?’ Afo emenen ndikere ntre. Ediwak ini mme owo ẹma ẹma Jesus ke nti n̄kpọ oro enye akanamde. Ini kiet, kpukpru owo ke obio kiet ẹma ẹsop idem ke enyịnusụn̄ ufọk emi enye okodude. Mmọ ẹkedi koro Jesus ama esikọk mme owo udọn̄ọ.—Mark 1:33.

Edi ndusụk ini mme owo ikamaha se Jesus ekekpepde. Idem okposụkedi enye ekesikpepde se inende kpukpru ini, ndusụk owo  ẹma ẹnen̄ede ẹsua enye koro enye eketịn̄de akpanikọ. Emi ama etịbe usen kiet ke Nazareth, obio emi Jesus ọkọkọride. Enye ama aka synagogue, ebiet emi mme Jew ẹkesisopde idem man ẹtuak ibuot ẹnọ Abasi.

Do Jesus ama ada N̄wed Abasi ọnọ inem inem utịn̄ikọ. Mme owo ẹma ẹma utịn̄ikọ oro ke akpa. Mmọ ẹma ẹkop n̄kpaidem ke ndinem ikọ oro ẹkewọn̄ọde enye ke inua. Ama ọsọn̄ mmọ ndinịm ke akpanikọ nte ke emi ekedi ekpri akparawa emi ọkọkọride ke obio mmọ.

Edi ekem Jesus ama etịn̄ ikọ efen. Enye ama etịn̄ aban̄a mme ini oro Abasi okowụtde mme owo oro mîkedịghe mme Jew san̄asan̄a mfọn. Ke ini Jesus eketịn̄de emi, mbon oro ẹkedude ke synagogue ẹma ẹyat esịt. Nte afo ọmọfiọk ntak?— Mmọ ẹkekere ẹte ke mmimọ idi n̄kukụre mbon oro ikenyenede san̄asan̄a mfọn Abasi. Mmọ ẹkekere ke mmimọ imọfọn ikan mbon en̄wen. Ntre mmọ ẹma ẹsua Jesus ke ntak ikọ esie. Ndien nte afo ọmọfiọk se mmọ ẹkedomode ndinam enye?—

Bible ọdọhọ ete: ‘Mmọ ẹmụm Jesus ẹnyụn̄ ẹda enye ẹwọrọ ke obio. Mmọ ẹda enye ẹka mben obot ẹnyụn̄ ẹyom nditop enye nsịn ke ebeden̄ nnyụn̄ n̄wot enye! Edi Jesus ọbọhọ mmọ efehe.’—Luke 4:16-30.

Edieke oro eketịbede ọnọ fi, nte afo akpafiak eketịn̄ ikọ aban̄a Abasi ọnọ mme owo oro?— Oro okpoyom uko, ndi ikpoyomke?— Nte ededi, ke n̄kpọ nte isua kiet ke ukperedem, Jesus ama afiak aka Nazareth. Bible ọdọhọ ete: “[Enye] ekpep mmọ n̄kpọ ke synagogue mmọ.” Jesus iketreke nditịn̄ akpanikọ ke ntak ndịk mme owo oro mîkamaha Abasi.—Matthew 13:54.

Usen efen, ke sabbath, Jesus ama okụt owo emi ubọk esie akakpade, m̀mê okobiomode ndo. Abasi ama ọnọ Jesus odudu ndinam owo oro okop nsọn̄idem. Edi ndusụk owo oro ẹkedude do ẹma ẹdomo  ndisịn ntịme ye Jesus. Nso ke Akwa Andikpep akanam?— Akpa enye ama obụp ete: ‘Edieke mbufo ẹnyenede erọn̄ kiet emi ọduọde odụk akamba obube ke Sabbath, nte mbufo ẹkpesio enye?’

Ih, mmọ ẹkpesio erọn̄ oro, idem ke Sabbath, kpa usen emi akpanade mmọ ẹduọk odudu. Ntre Jesus ama ọdọhọ ete: ‘Akam ọfọn ndin̄wam owo ke Sabbath, sia owo ọsọn̄de urua akan erọn̄!’ Akana in̄wan̄-in̄wan̄ didie ntem nte ke Jesus ekpenyene ndin̄wam owo emi ebe ke ndinam enye okop nsọn̄idem!

Jesus ama ọdọhọ owo oro anyan ubọk esie. Ubọk esie ama ọfọn ke ndondo oro. Owo oro ekenem esịt didie ntem! Edi nso kaban̄a mbon eken? Nte mmọ ẹma ẹnem esịt?— Baba. Mmọ ẹkekam ẹdọdiọn̄ ẹsua Jesus. Mmọ ẹma ẹwọrọ ẹkedụk ediomi ndiwot enye!—Matthew 12:9-14.

Ukem oro ke edi mfịn. Inamke n̄kpọ m̀mê nso ke nnyịn inam, nnyịn ikemeke ndinem kpukpru owo esịt. Ntre ana nnyịn ibiere m̀mê anie ke nnyịn inen̄ede iyom ndinem esịt. Edieke edide Jehovah Abasi ye Eyen esie, Jesus Christ, do ana nnyịn inam se mmọ ẹkpepde kpukpru ini. Edi anie edisua nnyịn edieke inamde? Anie edinam ọsọn̄ nnyịn ndinam eti n̄kpọ?—

Satan kpa Devil. Edi anie efen edinam?— Mbon emi Devil abian̄ade ndinịm ndiọi n̄kpọ ke akpanikọ. Jesus ọkọdọhọ mme adaiso ido ukpono eyo esie ete: “Mbufo ẹdi nditọ ete mbufo, kpa Satan, ẹnyụn̄ ẹyom ndinam obukpo udọn̄ ete mbufo.”—John 8:44.

Mme owo emi Devil amade ẹwak. Jesus okot mmọ “ererimbot.” Afo ekere ke nso idi “ererimbot” emi Jesus etịn̄de aban̄a?— Ọfọn, yak ise John ibuot 15, ufan̄ikọ 19. Do ke nnyịn ikot mme ikọ Jesus emi: “Edieke mbufo ẹkpedide mbon ererimbot, ererimbot akpama ikọt esie: edi sia mbufo mîdịghe mbon ererimbot, edi Ami n̄kemekde mbufo nsio ke ererimbot, ke ntak oro ererimbot asua mbufo.”

 Ntre ererimbot oro asuade mme mbet Jesus esịne kpukpru owo oro mîdịghe mme anditiene Jesus. Ntak emi ererimbot asuade mme mbet Jesus?— Kere ban̄a emi. Anie edi andikara ererimbot?— Bible ọdọhọ ete: “Ofụri ererimbot onyụn̄ esịne ke ubọk andidiọk.” Andidiọk oro edi Satan kpa Devil.—1 John 5:19.

Idahaemi nte afo omokụt ntak emi enen̄erede ọsọn̄ ndinam eti n̄kpọ?— Satan ye ererimbot esie ẹdi ntak. Edi ntak efen odu. Nte afo emeti?— Ke Ibuot 23 ke n̄wed emi, nnyịn ima ikpep nte ke kpukpru nnyịn idada idiọkn̄kpọ imana. Nte ididịghe utịben̄kpọ ke ini idiọkn̄kpọ, Devil, ye ererimbot esie ẹbede ẹfep?—

Bible ọn̄wọn̄ọ ete: “Ererimbot ke ebebe efep.” Emi ọwọrọ ke kpukpru mbon oro mîdịghe mme anditiene Akwa Andikpep ididụhe aba. Owo idiyakke mmọ ẹdu uwem ke nsinsi. Nte afo ọmọfiọk owo emi edidude uwem ke nsinsi?— Bible aka iso ọdọhọ ete: “Owo eke anamde se Abasi amade odudu ke nsinsi.” (1 John 2:17) Ih, mme owo oro ẹnamde nti n̄kpọ kpọt, emi ẹnamde “se Abasi amade,” ẹdidu uwem ke nsinsi ke obufa ererimbot Abasi. Ntre idem okposụkedi ọsọn̄de, nnyịn iyom ndinam nti n̄kpọ, nte nnyịn iyomke?—

Yak ikot mme itien̄wed Abasi emi ẹwụtde ntak emi mîdịghe mmemmem n̄kpọ ndinam se inende: Matthew 7:13, 14; Luke 13:23, 24; ye Utom 14:21, 22.

[Ndise ke page 137]

Nso ke Paul okosobo ke ini enye akanamde eti n̄kpọ?

[Ndise ke page 138]

Ntak emi mme owo emi ẹdomode ndiwot Jesus?

[Ndise ke page 141]

Ke ini ererimbot emi edibede efep, nso iditịbe inọ mbon oro ẹnamde nti n̄kpọ?