Ibuot 7

N̄kopitem Ekpeme Fi

NTE afo akpama edieke ekemede ndinam n̄kpọ ekededi oro afo oyomde? Nte mme ini ẹsidu oro afo ekerede ete ke baba owo kiet ikpetịn̄ke inọ imọ se ikpanamde? Idahaemi, tịn̄ akpanikọ, nyụn̄ tịn̄ nọ mi se afo ekerede.—

Edi ewe ọfọn ye afo akan? Nte enen̄ede ọfọn ndinam n̄kpọ ekededi oro afo oyomde? Mîdịghe nte mme n̄kpọ ẹsifọn ẹkan ke ini afo okopde item ete ye eka fo?— Abasi ọdọhọ ete ke afo ekpenyene ndikop item nnọ ete ye eka fo, ntre anaedi eti ntak odu ndinam oro. Yak ise m̀mê nnyịn imekeme ndikụt ntak.

Afo edi isua ifan̄?— Nte afo ọmọfiọk isua emana ete fo?— Eka fo m̀mê eka eka m̀mê ete ete fo edi isua ifan̄?— Mmọ ẹdu uwem ẹnen̄ede ẹbịghi ẹkan fi. Ndien adan̄a nte owo odude uwem ebịghi, ntre ke enye enyene ini ndikpep mme n̄kpọ. Enye okop ediwak n̄kpọ onyụn̄ okụt ediwak n̄kpọ onyụn̄ anam ediwak n̄kpọ kpukpru isua. Ntre n̄kpri owo ẹkeme ndikpep n̄kpọ nto ikpọ owo.

Nte afo ọmọfiọk owo oro ekpride akan fi?— Nte afo ọmọfiọk n̄kpọ akan enye?— Ntak emi afo ọfiọkde n̄kpọ akan enye?— Edi koro afo ọmọsọn̄ọ enye. Afo emenyene ekese ini ndikpep mme n̄kpọ n̄kan owo oro ekpride akan.

Anie odu uwem ebịghi akan mi m̀mê akan fi m̀mê owo efen ekededi? — Jehovah Abasi. Enye ọfiọk n̄kpọ akan mi, onyụn̄ ọfiọk akan fi. Ke ini enye ọdọhọde nnyịn inam n̄kpọ ekededi, nnyịn imekeme ndinịm ke akpanikọ nte ke oro edi nnennen n̄kpọ ndinam, idem okposụkedi n̄kpọ oro ekemede ndisọn̄ ndinam. Nte afo ama ọfiọk ete ke ini kiet Akwa Andikpep ama akam okụt ete ke imemke ndikop item?—

Ini kiet Abasi ama ọdọhọ Jesus anam n̄kpọ oro ekenen̄erede ọsọn̄. Jesus ama ọbọn̄ akam aban̄a n̄kpọ oro, nte nnyịn ikụtde mi. Enye ọkọbọn̄ akam ete: “Edieke Afo enyịmede, men Mi cup emi fep.” Ke ndibọn̄ akam emi, Jesus okowụt ete ke ikedịghe mmemmem n̄kpọ kpukpru ini ndinam uduak Abasi. Edi didie ke Jesus eketre akam esie? Nte afo ọmọfiọk?—

Jesus eketre ke ndidọhọ ete: “Okûdi nte Ami nnyịmede, yak edi nte Afo enyịmede.” (Luke 22:41, 42) Ih, enye okoyom ẹnam uduak Abasi, idịghe uduak idemesie. Ndien enye ama aka iso anam se Abasi okoyomde utu ke ndinam se enye ekekerede ke ọkpọfọn akan.

Nso ke nnyịn ikeme ndikpep nto emi?— Nnyịn ikpep ite ke enen kpukpru ini ndinam se Abasi ọdọhọde, idem okposụkedi ekemede nditre ndidi mmemmem n̄kpọ ndinam. Edi nnyịn imekpep n̄kpọ efen. Nte afo ọmọfiọk se enye edide?— Nnyịn ikpep ite ke Abasi ye Jesus idịghe ukem, nte ndusụk owo ẹdọhọde. Jehovah Abasi ọsọn̄ọ onyụn̄ ọfiọk n̄kpọ akan Eyen esie, Jesus.

Ke ini nnyịn ikopde item Abasi, nnyịn iwụt ke nnyịn imama enye. Bible ọdọhọ ete: “Ndima Abasi edi emi, ete, nnyịn inịm mbet Esie.” (1 John 5:3) Ntre afo omokụt ete ke oyom kpukpru nnyịn ikop item Abasi. Afo omoyom ndikop item esie, nte uyomke?—

 Yak ikụbọde Bible nnyịn inyụn̄ ise se Abasi ọdọhọde nditọwọn̄ ẹnam. Nnyịn iyom ndikot se Bible ọdọhọde ke Ephesus ibuot 6, ufan̄ikọ 1 esịm 3. Enye ọdọhọ ete: “Nditọ, ẹkop uyo mme ete ye mme eka mbufo ke Ọbọn̄; koro emi enende. Kpono usọ ye uka (emi edi akpa ibet eke asan̄ade ye un̄wọn̄ọ), man ọkpọfọn ye afo, afo okponyụn̄ odu uwem ebịghi ke isọn̄.”

N̄kọ omokụt do, edi Jehovah Abasi ke idemesie ọdọhọ fi okop uyo ọnọ ete ye eka fo. Nso ke ‘ndikpono’ mmọ ọwọrọ? Enye ọwọrọ ete ke afo enyene nditen̄e mmọ. Ndien Abasi ọn̄wọn̄ọ ete ke edieke afo okopde uyo ete ye eka fo, ke ‘ọyọfọn ye afo.’

Yak nnọ fi mbụk mban̄a ndusụk owo oro ẹkenyan̄ade uwem mmọ koro mmọ ẹkekopde item. Mme owo emi ẹkedu uwem ke anyan ini emi ekebede ke akwa obio Jerusalem. Ediwak mmọ ikakpan̄ke utọn̄ inọ Abasi, ntre Jesus ama odụri mmọ utọn̄ ete ke Abasi ọmọn̄ anam ẹsobo obio mmọ. Jesus n̄ko ama asian mmọ nte mmọ ẹkpekemede ndibọhọ edieke mmọ ẹkemade se inende. Enye ọkọdọhọ ete: ‘Ke ini mbufo ẹkụtde nte mbon-ekọn̄ ẹkanarede Jerusalem ẹkụk, mbufo ẹyefiọk ẹte ke nsobo esie asan̄a ekpere. Idahaoro edidi ini ndiwọrọ n̄kpọn̄ Jerusalem nnyụn̄ mfehe n̄ka ikpọ obot.’—Luke 21:20-22.

Kpa nte Jesus ọkọdọhọde, mbonekọn̄ ẹma ẹdi ndin̄wana ye Jerusalem. Mbonekọn̄ Rome ẹma ẹkanade enye ẹkụk. Ekem, ke ndusụk ntak mbonekọn̄ oro ẹma ẹnyọn̄ọ. Ediwak owo ẹkekere ẹte ke n̄kpọndịk ama ebe. Ntre mmọ ẹma ẹsọn̄ọ ẹtie ke obio oro. Edi Jesus ọkọdọhọ ke mmọ ẹkpenam nso?— Nso ke afo akpakanam edieke afo okpokodụn̄de ke Jerusalem?— Mbon oro ẹkenen̄erede ẹnịm ikọ Jesus ke akpanikọ ẹma ẹkpọn̄ mme ufọk mmọ ẹnyụn̄ ẹfen̄e ẹka ikpọ obot oro oyomde usụn̄ ọkpọn̄ Jerusalem.

Ke ofụri isua kiet, n̄kpọ ndomokiet iketịbeke inọ Jerusalem. Ke ọyọhọ isua iba, n̄kpọ ndomokiet iketịbeke. Ke ọyọhọ isua ita n̄ko,  n̄kpọ ndomokiet iketịbeke. Ekeme ndidi ndusụk owo ẹma ẹkere nte ke mbon oro ẹkekpọn̄de obio oro ẹkedi ndisịme. Edi ekem ke ọyọhọ isua inan̄, mbonekọn̄ Rome ẹma ẹfiak ẹdi. Mmọ ẹma ẹfiak ẹkanade Jerusalem ẹkụk. Idahaemi ini ama ebe akaha ndifehe mbọhọ. Isan̄ enye emi mbonekọn̄ ẹma ẹsobo obio oro. Ediwak owo oro ẹkedude ke esịt ẹma ẹkpan̄a, ndien ẹma ẹmụm mbon eken nte mbon ntan̄mfep.

Edi nso iketịbe inọ mbon oro ẹkenamde item Jesus?— Mmọ ẹma ẹbọhọ. Mmọ ẹma ẹdu oyom usụn̄ ọkpọn̄ Jerusalem. Ntre owo ikọnọhọ mmọ unan. N̄kopitem ama ekpeme mmọ.

Edieke afo okopde item, nte oro eyekpeme fi n̄ko?— Ete ye eka fo ẹkeme ndidọhọ fi okûdede ebre mbre ke efak. Ntak mmọ ẹdọhọde ntre?— Edi koro moto ekeme nditọ fi. Edi usen kiet afo emekeme ndikere: ‘Moto ndomokiet idụhe idahaemi. Ndidaha unan.  Nditọwọn̄ eken ẹsibre mbre ke efak, ndien akanam n̄kwe nte mmọ ẹdade unan.’

Oro edi usụn̄ nte ediwak owo ke Jerusalem ẹkekerede n̄kpọ. Ke mbonekọn̄ Rome ẹma ẹkenyọn̄ọ, eketie nte ke mfịna ikodụhe. Sia ndusụk owo ẹkesọn̄ọde ẹtie ke obio oro. Ntre mmọ ẹma ẹsọn̄ọ ẹtie n̄ko. Ẹma ẹdụri mmọ utọn̄, edi mmọ ikokopke. Nte utịp, mmọ ẹma ẹkpan̄a.

Yak ikere iban̄a uwụtn̄kpọ efen. Nte akanam afo amada udaikan̄ ebre mbre?— Ekeme ndiye ndikụt ikan̄ ke ini afo akwakde udaikan̄. Edi ndibre mbre ye udaikan̄ ekeme ndidi n̄kpọndịk. Ikan̄ ekeme ndita ofụri ufọk, ndien afo emekeme ndikpa!

Ti ete ke ndikop item ke ndusụk ini kpọt ikemke. Edi edieke afo okopde item kpukpru ini, oro eyenen̄ede ekpeme fi. Ndien anie owo ọdọhọ fi, “Nditọ, ẹkop uyo mme ete ye mme eka mbufo”?— Edi Abasi. Ndien ti ete ke enye etịn̄ oro koro enye amade fi.

Idahaemi kot mme itien̄wed Abasi emi ẹwụtde nte n̄kopitem edide akpan n̄kpọ: Mme N̄ke 23:22; Ecclesiastes 12:13; Isaiah 48:17, 18; ye Colossae 3:20.

[Ndise ke page 42]

Ntak emi afo akpakpan̄de utọn̄ ọnọ ikpọ owo?

[Ndise ke page 43]

Nso ke nnyịn ikeme ndikpep nto akam Jesus?

[Ndise ke page 45]

Didie ke n̄kopitem nnọ ewụhọ Jesus akanyan̄a mme owo emi?

[Mme ndise ke page 46]

Ntak emi afo okpokopde item ke ini afo mûkwe n̄kpọndịk ndomokiet?