Ibuot 13

Mbon Oro Ẹkekabarede Ẹdi Mme Mbet Jesus

ANIE edi mfọnn̄kan asan̄autom Abasi oro akanam odude uwem?— Afo emenen, edi Jesus Christ. Nte afo emekere ke nnyịn imekeme nditie nte enye?— Ọfọn, Bible ọdọhọ ete ke enye ekenịm uwụtn̄kpọ ọnọ nnyịn nditiene. Ndien enye ọdọhọ nnyịn ete idi mme mbet imọ.

Nte afo ọmọfiọk se ndidi mbet Jesus ọwọrọde?— Enye ọwọrọ ediwak n̄kpọ. Akpa, ana nnyịn ikpep n̄kpọ ito enye. Edi ikụreke ke oro. Ana nnyịn n̄ko inen̄ede inịm se enye etịn̄de ke akpanikọ. Edieke nnyịn inịmde, nnyịn iyanam se enye ọdọhọde nnyịn inam.

Ediwak owo ẹdọhọ ẹte ke mmimọ imenịm Jesus ke akpanikọ. Nte afo ekere ke kpukpru mmọ ẹnen̄ede ẹdi mme mbet esie?— Baba, ekese mmọ idịghe. Mmọ ẹkeme ndika ufọkabasi. Edi akananam ediwak mmọ idaha ini idụn̄ọde se Jesus ekekpepde. Ke akpanikọ, sụk mbon oro ẹtienede uwụtn̄kpọ Jesus ẹdi mme mbet esie.

Ẹyak nnyịn itịn̄ iban̄a ndusụk mbon oro ẹkedide mme mbet Jesus ke ini enye ekedide owo ke isọn̄. Kiet ke otu akpa mbon oro ẹkabarede ẹdi mbet edi Philip. Philip aka okokot ufan esie Nathanael (ẹkotde n̄ko Bartholomew), emi afo okụtde etiede mi ke idak eto. Ke ini Nathanael edide ebịne Jesus, Jesus ọdọhọ ete: ‘Sese, owo akpanikọ edi emi, ata eyen Israel.’ Nathanael okop n̄kpaidem onyụn̄ obụp ete: ‘Afo asan̄a didie ọdiọn̄ọ mi?’

Jesus ọbọrọ ete: ‘Ke ini Philip mîkokotke fi kan̄a, ke  adan̄aemi afo eketiede ke idak eto fig, mma n̄kokụt fi.’ Nathanael enen̄ede okop n̄kpaidem nte ke Jesus ama ọfiọk nnennen itie emi imọ ikodude, ntre Nathanael ọdọhọ ete: “Afo edi Eyen Abasi; Afo edi Edidem Israel.”—John 1:49.

Mbon en̄wen ẹma ẹkabade ẹdi mme mbet Jesus mbemiso usen oro Philip ye Nathanael ẹkekabarede ẹdi mme mbet. Mmọ emi ẹdi Andrew ye Peter eyeneka esie ọkọrọ ye John; eyedi James eyeneka John esịne ke otu emi. (John 1:35-51) Nte ededi, ke esisịt ini ebede, mmọ mbinan̄ ẹfiak ẹka ukọiyak mmọ. Ekem usen kiet ke adan̄aemi Jesus asan̄ade ke mben Inyan̄ Galilee, enye okụt Peter ye Andrew nte ẹduọn̄ọde iyịre ke inyan̄. Jesus okot mmọ ete: “Ẹtiene Mi.”

Ke asan̄ade aka iso esisịt, Jesus okụt James ye John. Mmọ ẹdu ke ubom ye ete mmọ, ẹdiọn̄de iyịre ukọiyak mmọ. Jesus ọdọhọ mmọ ete  ẹtiene imọ n̄ko. Nso ke afo akpakanam edieke Jesus okpokokotde fi? Nte afo ekpeketiene enye iwiwa?— Iren emi ẹfiọk owo emi Jesus edide. Mmọ ẹfiọk ẹte ke Abasi ọkọdọn̄ enye edi. Ntre inikiet inikiet mmọ ẹkpọn̄ mbubehe ukọiyak mmọ ẹnyụn̄ ẹtiene Jesus.—Matthew 4:18-22.

Ke ini iren emi ẹkekabarede ẹdi mme anditiene Jesus, nte emi ọwọrọ ete ke mmọ ẹkesinam se ifọnde kpukpru ini ọtọn̄ọde ke ini oro?— Baba. Afo emekeme nditi nte ke mmọ ẹma ẹkam ẹneni ke otu idemmọ ẹban̄a m̀mê anie ke otu mmimọ edi andikpon n̄kan. Edi mmọ ẹma ẹkop item Jesus, ẹnyụn̄ ẹnyịme ndinam mme ukpụhọde. Edieke nnyịn inyịmede ndinam mme ukpụhọde, nnyịn n̄ko imekeme ndidi mme mbet Jesus.

Jesus ama ọnọ kpukpru orụk owo ikot ete ẹdi mme mbet imọ. Ini kiet, akparawa kiet emi edide owo inyene ye andikara ama edi ebịne Jesus onyụn̄ obụp m̀mê imọ idisan̄a didie inyene nsinsi uwem. Ke ini andikara oro ekedide owo inyene do ọkọdọhọde ete ke imọ ima inenịm ibet Abasi toto ke uyen imọ, Jesus ama ọdọhọ enye ete: “Di disan̄a ye Ami.” Nte afo ọmọfiọk se iketịbede?—

Ọfọn, ke ini eren oro ọkọfiọkde ete ke ndidi mbet Jesus ekenyene ndidi akpan n̄kpọ n̄kan edinyene inyene, enye ikenemke esịt. Enye ikakabakede idi mbet Jesus koro enye ama ama okụk esie akan nte enye akamade Abasi.—Luke 18:18-25.

Ke Jesus ama ọkọkwọrọ ikọ ke se ikperede isua kiet ye ubak, enye ama emek owo 12 ke otu mme mbet esie ndidi mme apostle. Mme apostle ẹkedi irenowo emi enye ọkọdọn̄de ẹka ẹkenam akpan utom. Nte afo ọmọfiọk enyịn̄ mmọ?— Ẹyak ise m̀mê nnyịn imekeme ndifiọk mmọ. Se ndise mmọ mi, nyụn̄ se m̀mê afo emekeme ndikot enyịn̄ mmọ. Ekem domo ndikot enyịn̄ mmọ ke ibuot.

Nte ini akakade, kiet ke otu apostle 12 oro ama akabade ọdiọk. Enye ekedi Judas Iscariot. Ke oro ebede, ẹma ẹmek mbet efen ndidi  apostle. Nte afo ọmọfiọk enyịn̄ esie?— Enye ekekere Matthias. Ke ukperedem, Paul ye Barnabas n̄ko ẹma ẹkabade ẹdi mme apostle, edi mmọ ikodụhe ke otu apostle 12 oro.—Utom 1:23-26; 14:14.

Nte nnyịn ikekpepde ke Ibuot 1 ke n̄wed emi, Jesus ama ama n̄kpri nditọ. Ntak emi enye akamade mmọ?— Koro enye ama ọfiọk ete ke mmọ ẹkeme ndikabade ndi mme mbet imọ n̄ko. Ke nditịm ntịn̄, ediwak ini nditọwọn̄ ẹkeme nditịn̄ ikọ ke usụn̄ oro akam ekemede ndinam ikpọ owo ẹkpan̄ utọn̄ ẹnyụn̄ ẹyom ndikpep ekese n̄kpọ efen efen mban̄a Akwa Andikpep.

Ediwak iban n̄ko ẹma ẹkabade ẹdi mme mbet Jesus. Ndusụk mmọ ẹma ẹsan̄a ye enye ke ini enye  akakade mme obio efen ndikwọrọ ikọ. Mary Magdalene, Joanna, ye Susanna ẹma ẹnam ntre. Ekeme ndidi mmọ n̄ko ẹma ẹn̄wam ke nditem udia nnyụn̄ nyet ọfọn̄ esie.—Luke 8:1-3.

Nte afo omoyom ndidi mbet Jesus?— Ti ete ke ndikam ndọhọ nte ke nnyịn idi kiet ke otu mme mbet esie inamke nnyịn idi mbet esie. Ana nnyịn inam n̄kpọ nte mme mbet esie ke ebiet ekededi oro nnyịn idude, idịghe ke ini nnyịn ikade mme mbono esop Christian kpọt. Nte afo emekeme ndikere mban̄a ndusụk itie emi edide akpan n̄kpọ nnyịn ndinam n̄kpọ nte mbet Jesus?—

Ih, nnyịn ikpenyene ndinam ntre ke ufọk. Edi itie en̄wen n̄ko edi ke ufọkn̄wed. Se mîkpanaha ami ye afo ifre edi nte ke man idi ata mbet Jesus, ana nnyịn inam n̄kpọ nte enye akanamde kpukpru ini, kpukpru usen, inamke n̄kpọ m̀mê nnyịn idu ke m̀mọ̀n̄.

Idahaemi kot se Bible etịn̄de aban̄a mme mbet Jesus ke Matthew 28:19, 20; Luke 6:13-16; John 8:31, 32; ye 1 Peter 2:21.

[Ndise ke page 72]

Anie edi emi, ndien enye asan̄a didie edidi mbet Jesus?

[Ndise ke page 73]

Mmanie ke Jesus okot ete ẹdidi mme mbet imọ?

[Mme ndise ke page 75]

Peter

Andrew

James (eyeneka John)

John

Philip

Nathanael

Matthew

Thomas

James (eyen Alphaeus)

Simon

Judas (ẹkotde n̄ko Thaddaeus)

Judas Iscariot

[Mme ndise ke page 76]

Mmanie ẹkedi iban emi ẹken̄wamde Jesus ke ini enye akakade ukwọrọikọ?

[Ndise ke page 76]

Itie ewe ke edi akpan n̄kpọ nnyịn ndinam n̄kpọ nte mbet Jesus?