Ibuot 10

Jesus Enyene Odudu Akan Mme Demon

NTE afo emeti ntak emi kiet ke otu mme angel Abasi akakabarede edi Satan kpa Devil?— Ekedi idiọk udọn̄ esie ndibọ utuakibuot akanam enye ọwọn̄ọde an̄wana ye Abasi. Nte mme angel efen ẹma ẹtiene Satan?— Ih, mmọ ẹma ẹtiene enye. Bible okot mmọ ‘mme angel Satan,’ m̀mê mme demon.—Ediyarade 12:9.

Nte ndiọi angel, m̀mê mme demon, emi ẹnịm ke Abasi odu?— Bible ọdọhọ ete ke ‘mme demon ẹnịm ke akpanikọ ẹte ke Abasi odu.’ (James 2:19) Edi idahaemi mmọ ẹkop ndịk. Emi edi koro mmọ ẹfiọk ẹte ke Abasi ọyọnọ mmimọ ufen ke ntak ndiọi n̄kpọ oro mmimọ inamde. Nso ke mmọ ẹnam ọdiọk?—

Bible ọdọhọ ete ke mme angel oro ẹma ẹkpọn̄ nnennen ebietidụn̄ mmọ ke heaven ẹnyụn̄ ẹdi isọn̄ ẹdidụn̄ nte owo. Mmọ ẹkenam emi koro mmọ ẹkeyom ndinyene ebuana idan̄ ye ndiye iban ke isọn̄. (Genesis 6:1, 2; Jude 6) Nso ke afo ọdiọn̄ọ aban̄a ebuana idan̄?—

 Ebuana idan̄ edi ini oro erenowo ye n̄wan ẹkperede kiet eken ke ata akpan usụn̄. Ke oro ebede, nsekeyen ekeme ndikọri ke esịt idịbi eka. Edi inenke mme angel ndinyene ebuana idan̄. Abasi oyom eren ye n̄wan emi ẹdọde ndọ kpọt ẹnyene ebuana idan̄. Ntre edieke nsekeyen amanade, ebe ye n̄wan ẹkeme ndise mban̄a enye.

Ke ini mme angel ẹkemende idem owo ẹsịne ẹnyụn̄ ẹnyenede ebuana idan̄ ye iban ke isọn̄, nditọ mmọ ẹma ẹkọri ẹkabade ẹdi ata n̄kpọsọn̄ mbon uko. Mmọ ẹma ẹsọn̄ ido eti eti ẹnyụn̄ ẹnọ mme owo unan. Ntre Abasi ama ada akwa ukwọ osobo ata n̄kpọsọn̄ mbon uko oro ye kpukpru ndiọi owo efep. Edi enye ama anam Noah ọkọn̄ akamba ubom man anyan̄a ekpri ibat owo oro ẹkenamde se inende. Akwa Andikpep ọkọdọhọ ete ke edi akpan n̄kpọ nditi se iketịbede ke Ukwọ oro.—Genesis 6:3, 4, 13, 14; Luke 17:26, 27.

Ke ini Ukwọ oro ekedide, nte afo ọmọfiọk se iketịbede inọ ndiọi angel oro?— Mmọ ẹma ẹfọrọde idem owo oro ẹnịm, ndien ẹma ẹfiak ẹka heaven. Edi mmọ ikekemeke aba ndidi mme angel Abasi, ntre mmọ ẹma ẹkabade ẹdi mme angel Satan, m̀mê mme demon. Ndien nso iketịbe inọ  nditọ mmọ, kpa ata n̄kpọsọn̄ mbon uko oro?— Nditọ mmọ ẹma ẹkpan̄a ke Ukwọ oro. Ntre n̄ko ke kpukpru mbon eken oro mîkokopke uyo Abasi ẹkekpan̄a.

Ọtọn̄ọde ke ini Ukwọ oro, Abasi iyakke aba mme demon ẹforo owo. Edi idem okposụkedi nnyịn mîkemeke ndikụt mmọ, mme demon ẹsụk ẹdodomo ndinam mme owo ẹnam ata ndiọi n̄kpọ. Mmọ ẹsịn ntịme eti eti ẹkan nte akanam edide. Emi edi koro ẹma ẹsion̄o mmọ ke heaven ẹduọn̄ọ ke isọn̄.

Nte afo ọmọfiọk ntak emi nnyịn mîkemeke ndikụt mme demon?— Emi edi koro mmọ ẹdi spirit. Edi nnyịn imetịm ifiọk ite ke mmọ ẹdu. Bible ọdọhọ ete ke Satan ke ‘abian̄a mme owo ke ofụri ererimbot,’ ndien mme demon esie ke ẹn̄wam enye.—Ediyarade 12:9, 12.

Nte Devil ye mme demon esie ẹkeme ndibian̄a nnyịn n̄ko?— Ih, mmọ ẹkeme edieke nnyịn mîdụhe ke ukpeme. Edi inaha nnyịn ikop ndịk. Akwa Andikpep ọkọdọhọ ete: ‘Devil inyeneke baba n̄kpọ kiet ke esịt Mi.’ Edieke nnyịn isan̄ade ikpere Abasi, enye eyekpeme nnyịn osio ke ubọk Devil ye mme demon esie.—John 14:30.

Edi akpan n̄kpọ nnyịn ndifiọk ndiọi n̄kpọ oro mme demon ẹdidomode ndinụk nnyịn inam. Ntre kere ban̄a emi. Nso ndiọi n̄kpọ ke mme demon oro ẹkenam ke ini mmọ ẹkedide isọn̄?— Mbemiso Ukwọ oro, mmọ ẹma ẹnyene ebuana idan̄ ye iban, n̄kpọ oro mîkenenke mme angel ndinam. Mfịn mme demon ẹsinem esịt ke ini mme owo mînịmke ibet Abasi aban̄ade edinyene ebuana idan̄. Yak mbụp fi ise, mmanie kpọt ẹkpenyene ebuana idan̄?— Afo emenen, edi mme ọdọ ndọ kpọt.

Mfịn ndusụk n̄kpri nditọ ẹsinyene ebuana idan̄, edi ifọnke mmọ ndinam emi. Bible etịn̄ aban̄a ‘ndido idan̄’ erenowo, m̀mê ekpọrọ. (Leviticus 15:1-3, NW) Ẹkot ndido idan̄ an̄wan, itịt. Jehovah okobot mme ndido idem emi man mme ọdọ ndọ kpọt ẹda ẹnam n̄kpọ ye  akpan uduak. Mme demon ẹsikop inemesịt ke ini mme owo ẹnamde mme n̄kpọ oro Jehovah akpande. Ke uwụtn̄kpọ, mme demon ẹsinem esịt ke ini eyeneren ye eyenan̄wan ẹdade ekpọrọ m̀mê itịt kiet eken ẹbre mbre. Nnyịn iyomke ndinam mme demon ẹkop inemesịt, nte imoyom?—

N̄kpọ en̄wen odu oro mme demon ẹmade edi oro Jehovah asuade. Nte afo ọmọfiọk se enye edide?— Afai. (Psalm 11:5) Afai edi ke ini mme owo ẹsọn̄de ido ẹnyụn̄ ẹnọde mbon en̄wen unan. Ti ete ke oro edi se ata n̄kpọsọn̄ owo oro, kpa nditọ mme demon, ẹkenamde.

Mme demon n̄ko ẹsima ndinam mme owo ẹkop ndịk. Ndusụk ini mmọ ẹsinam nte ke idi mme owo oro ẹma ẹkekpan̄a. Mmọ ẹkeme ndikam ntịn̄ ikọ nte mbon oro ẹma ẹkekpan̄a. Ke usụn̄ emi mme demon ẹbian̄a ediwak owo ndinịm ke akpanikọ nte ke mme akpan̄kpa ke ẹdu uwem ẹnyụn̄ ẹkeme nditịn̄ ikọ ye mme odu uwem. Ke akpanikọ, mme demon ẹnam ediwak owo ẹkere ke odu n̄kpọ ẹkotde ekpo.

 Ntre ana nnyịn idu ke ukpeme mbak Satan ye mme demon esie ẹdibian̄a nnyịn. Bible ọdọhọ ete: ‘Satan odomo nditie nte eti angel, ndien mme asan̄autom esie ẹnam ukem oro.’ (2 Corinth 11:14, 15) Edi mme demon ẹnen̄ede ẹdiọk. Yak ise nte mme demon ẹkemede ndinam nnyịn itie nte mmọ.

M̀mọ̀n̄ ke mme owo ẹsikpep ekese n̄kpọ ẹban̄a afai ye idan̄ oro mîdotke ẹnyụn̄ ẹkpep ẹban̄a mme spirit ye ekpo?— Nte isidịghe ke ndise ndusụk edinam ke ekebe ndise ye ndise senima, edibre mme mbre kọmputa ye vidio, edidụn̄ọde Intanet, ye edikot mme n̄wed mbubru? Nte ndinam mme n̄kpọ emi ẹnam nnyịn isan̄a ikpere Abasi m̀mê ẹnam ikpere Devil ye mme demon esie? Afo ekere didie?—

Afo ekere ke anie oyom nnyịn ikpan̄ utọn̄ inọ inyụn̄ ise ndiọi ndise?— Satan ye mme demon esie. Ntre, nso ke oyom ami ye afo inam?— Oyom nnyịn ikot, ikpan̄ utọn̄ inọ, inyụn̄ ise mme n̄kpọ oro ẹnyenede ufọn ẹnọ nnyịn ndien oro ayan̄wam nnyịn ndinam n̄kpọ Jehovah. Nte afo emekeme ndikere mban̄a ndusụk ke otu nti n̄kpọ oro nnyịn ikemede ndinam?—

Edieke nnyịn inamde se ifọnde, ntak ndomokiet idụhe ndikop ndịk mban̄a mme demon. Jesus enyene odudu akan mmọ, ndien mmọ ẹbabak enye. Usen kiet mme demon ẹma ẹseme ẹnọ Jesus ẹte: “Nte emedi ndisobo nnyịn?” (Mark 1:24) Nte nnyịn idikopke inemesịt ke ini Jesus edisobode Satan ye mme demon esie?— Kan̄a ke emi, nnyịn imekeme ndinịm ke akpanikọ nte ke Jesus eyekpeme nnyịn osio ke ubọk mme demon edieke nnyịn isan̄ade ikpere enye ye Ete esie eke heaven.

Yak ikot iban̄a se oyomde nnyịn inam ke 1 Peter 5:8, 9 ye James 4:7, 8.

[Ndise ke page 57]

Nso idiọkn̄kpọ ke mme angel emi ẹkenam?

[Ndise ke page 58]

Ntak emi ekese ntịme ẹdude ke isọn̄ idahaemi ẹkan nte akanam edide?

[Mme ndise ke page 60]

Nso ikeme nditịbe ke ini nnyịn isede ndise afai?

[Ndise ke page 61]

Ọfọn nnyịn inam nso?