Ibuot 12

Jesus Ekpep Nnyịn Ndibọn̄ Akam

NTE afo emesitịn̄ ikọ ọnọ Jehovah Abasi?— Enye oyom fi etịn̄ ikọ ọnọ imọ. Ke ini afo etịn̄de ikọ ọnọ Abasi, ẹkot emi akam. Jesus ama esiwak nditịn̄ ikọ nnọ Ete esie eke heaven. Ndusụk ini enye ekesiyom ndidu ikpọn̄ ke ini enye etịn̄de ikọ ọnọ Abasi. Bible ọdọhọ ete ke idaha kiet ‘Enye ama ọdọk ke edikon̄ obot ke Idem Esie ikpọn̄ ndibọn̄ akam: edi ke ini esịmde mbubịteyo, Enye odu do ikpọn̄.’—Matthew 14:23.

M̀mọ̀n̄ ke afo ekeme ndika man ọkọbọn̄ akam ikpọn̄ ọnọ Jehovah?— Ndusụk afo emekeme ndidu ikpọn̄ man etịn̄ ikọ ọnọ Jehovah mbemiso afo odụkde idap ke okoneyo. Jesus ọkọdọhọ ete: “Ke ini ọbọn̄de akam, dụk ke esịt ubet fo, beri usụn̄, bọn̄ akam nọ Ete fo.” (Matthew 6:6) Nte afo emesibọn̄ akam ọnọ Jehovah kpukpru okoneyo mbemiso afo odụkde idap?— Afo ekpenyene ndinam oro.

 Jesus n̄ko ama ọbọn̄ akam ke ini mbon en̄wen ẹkedude ye enye. Ke ini ufan esie Lazarus akakpade, Jesus ama ọbọn̄ akam ye mbon en̄wen ke ebiet oro ẹkenịmde Lazarus. (John 11:41, 42) Ndien Jesus n̄ko ama ọbọn̄ akam ke ini enye okodude ye mme mbet esie. Nte afo emesika mme mbono esop oro ẹsibọn̄de akam?— Akamba owo esiwak ndibọn̄ akam do. Nen̄ede nọ n̄kpan̄utọn̄ ke se enye etịn̄de koro enye etịn̄ ikọ ọnọ Abasi ke ibuot fo. Ekem afo eyekeme ndidọhọ “Amen” ke akam oro. Nte afo ọmọfiọk se ọwọrọde ndidọhọ “Amen” ke utịt akam?— Enye ọwọrọ ete ke afo amama akam oro. Enye ọwọrọ ke afo emenyịme enye ye nte ke afo omoyom enye edi akam fo n̄ko.

Jesus n̄ko ama esibọn̄ akam ke ini udia. Enye ama esikọm Jehovah ke ndinọ enye udia. Nte afo emesibọn̄ akam kpukpru ini mbemiso afo adiade udia?— Ọfọn nnyịn ndikọm Jehovah ke ndinọ nnyịn udia mbemiso nnyịn itọn̄ọde ndidia. Edieke afo adiade udia ọtọkiet ye owo, enye ekeme ndibọn̄ akam. Edi nso edieke afo adiade udia ikpọn̄? Mîdịghe nso edieke afo adiade udia ye mme owo oro mîkọmke Jehovah?— Do afo enyene ndibọn̄ akam ke idemfo.

Nte afo enyene ndibọn̄ akam uyo ọwọrọ kpukpru ini? Mîdịghe nte Jehovah ekeme ndikop akam oro afo ọbọn̄de ke esịt?— Nnyịn imekeme ndifiọk ibọrọ ebe ke se iketịbede inọ Nehemiah. Enye ekedi andituak  ibuot nnọ Jehovah emi akanamde utom ke ufọk ubọn̄ Edidem Artaxerxes eke Persia. Usen kiet Nehemiah ama enen̄ede ofụhọ koro enye ama okop ete ke ibibene Jerusalem, kpa akpan obio ikọt imọ, ẹma ẹwụre.

Ke ini edidem okobụpde Nehemiah ntak emi enye ofụhọde, Nehemiah ama ebem iso ọbọn̄ akam ke esịt. Ekem Nehemiah ama etịn̄ ntak emi enye ofụhọde ọnọ edidem onyụn̄ obụp enye m̀mê imọ imekeme ndika Jerusalem man ifiak ikọbọp ibibene oro. Nso iketịbe?—

Ke akpanikọ, Abasi ama ọbọrọ akam Nehemiah. Edidem oro ama ọdọhọ ke enye ekeme ndika! Edidem oro ama akam ọnọ Nehemiah ediwak eto ndida mbọp ibibene oro. Ntre Abasi enen̄ede ekeme ndibọrọ akam nnyịn, idem ke ini ibọn̄de mmọ ke esịt.—Nehemiah 1:2, 3; 2:4-8.

 Idahaemi kere ban̄a emi. Nte afo ekpenyene ndinụk ibuot fo ke ini afo ọbọn̄de akam? Nte afo ekpenyene nditọn̄ọ edọn̄? Nso ke afo ekere?— Ndusụk ini Jesus ama esitọn̄ọ edọn̄ ke ini enye ọkọbọn̄de akam. Ke mme ini efen enye ekesidada. Ndien ke ndusụk ini enye ama esimenede enyịn ese heaven ke ini enye ọbọn̄de akam, nte enye akanamde ke ini enye ọkọbọn̄de akam aban̄a Lazarus.

Ntre, nso ke emi owụt?— Emi owụt ke nte afo enịmde idem idịghe akpan n̄kpọ. Ndusụk ini esifọn afo ndinụk ibuot nnyụn̄ mbọp enyịn. Ke mme idaha efen afo amakam ekeme nditọn̄ọ edọn̄, nte Jesus ọkọtọn̄ọde. Edi ti ete ke nnyịn imekeme ndibọn̄ akam nnọ Abasi ke ini ekededi ke uwemeyo m̀mê okoneyo, ndien enye ayakpan̄ utọn̄ ọnọ nnyịn. Akpan n̄kpọ kaban̄a akam edi nnyịn ndinen̄ede nnịm ke akpanikọ nte ke Jehovah ke akpan̄ utọn̄. Nte afo emenịm ke akpanikọ ete ke Jehovah okop akam fo?—

Nso ke nnyịn ikpetịn̄ ke akam nnyịn inọ Jehovah?— Tịn̄ nọ mi: Ke ini afo ọbọn̄de akam, nso ke afo esitịn̄ ọnọ Abasi?— Jehovah ọnọ nnyịn ata ediwak nti n̄kpọ, ndien ọfọn ndikọm enye, nte ifọnke?— Nnyịn imekeme ndikọm enye kaban̄a udia oro nnyịn idiade. Nte akanam afo ọmọkọm enye aban̄a blublu ikpaenyọn̄, mme awawa eto, ye ndiye flawa?— Enye akanam mmọ oro n̄ko.

Ini kiet, mme mbet Jesus ẹma ẹdọhọ enye ekpep mmimọ nte ẹkpebọn̄de akam. Ntre Akwa Andikpep ama ekpep mmọ, ndien enye ama owụt mmọ se ikedide mme akpan n̄kpọ ikan, oro ẹkpebọn̄de akam ẹban̄a. Nte afo ọmọfiọk se  mme n̄kpọ emi ẹdide?— Men Bible fo, nyụn̄ kụbọde Matthew ibuot 6. Ke Mt 6 ufan̄ikọ 9 esịm 13, nnyịn ikụt se ediwak owo ẹkotde Akam Ọbọn̄. Yak ikot enye ọtọkiet.

Mi nnyịn imekpep nte ke Jesus ama etịn̄ ọnọ nnyịn ete ibọn̄ akam iban̄a enyịn̄ Abasi. Enye ọkọdọhọ ibọn̄ akam ite ẹnam enyịn̄ Abasi asana. Nso idi enyịn̄ Abasi?— Enye edi Jehovah ndien nnyịn ikpenyene ndima enyịn̄ oro.

Ọyọhọ iba, Jesus ama ekpep nnyịn ndibọn̄ akam nte yak Obio Ubọn̄ Abasi edi. Obio Ubọn̄ emi edi akpan n̄kpọ koro enye ayada emem ọsọk isọn̄ onyụn̄ anam enye edi paradise.

Ọyọhọ ita, Akwa Andikpep ama ọdọhọ ẹbọn̄ akam ẹte yak ẹnam uduak Abasi ke isọn̄ kpa nte ẹnamde ke heaven. Edieke nnyịn ibọn̄de akam iban̄a emi, do nnyịn ikpenyene ndinam se Abasi oyomde.

Ekem, Jesus ama ekpep nnyịn ndibọn̄ akam mben̄e udia oro nnyịn iyomde ke usen. Enye n̄ko ama ọdọhọ ete ke nnyịn ikpenyene ndisian Abasi ke imatua n̄kpọfiọk ke ini nnyịn inamde mme n̄kpọ oro mîfọnke. Ndien nnyịn ikpenyene ndiben̄e Abasi efen ọnọ nnyịn. Edi mbemiso enye efende ọnọ nnyịn, ana nnyịn ifen inọ mbon efen edieke mmọ ẹduede nnyịn. Nte oro edi mmemmem n̄kpọ ọnọ fi ndinam?—

Ke akpatre, Jesus ọkọdọhọ ete ke nnyịn ikpenyene ndibọn̄ akam ite Jehovah Abasi ekpeme nnyịn osio ke ubọk andidiọk, Satan kpa Devil. Ntre kpukpru emi ẹdi nti n̄kpọ ndibọn̄ akam nnọ Abasi mban̄a.

Nnyịn ikpenyene ndinịm ke akpanikọ nte ke Jehovah okop akam nnyịn. Ke adianade ye ediben̄e enye ete an̄wam nnyịn, nnyịn ikpenyene ndika iso n̄kọm enye. Enye esikop inemesịt ke ini nnyịn itịn̄de akpanikọ ke akam, ye ke ini nnyịn iben̄ede enye nti n̄kpọ. Ndien enye ọyọnọ nnyịn mme n̄kpọ emi. Nte afo emenịm oro ke akpanikọ?—

Ẹkụt nti item efen efen kaban̄a akam ke Rome 12:12; 1 Peter 3:12; ye 1 John 5:14.

[Mme ndise ke page 67]

Jesus ama ọbọn̄ akam ke ini enye okodude ikpọn̄ . . . ye ke ini okodude ye mbon en̄wen

[Ndise ke page 68]

Ntak emi afo ekpenen̄erede akpan̄ utọn̄ ọnọ akam oro ẹbọn̄de ke mme mbono esop?

[Mme ndise ke page 69]

Ini ewe ke afo ekeme ndibọn̄ akam ke esịt, nte Nehemiah ọkọbọn̄de?

[Ndise ke page 70]

Nso ke afo ekeme nditịn̄ nnọ Abasi ke akam?