Ibuot 39

Abasi Eti Eyen Esie

JESUS ama atua ke ini ufan esie Lazarus akakpade. Nte afo emekere ke Jehovah ama okop editịmede esịt ke ini Jesus ọkọbọde ndutụhọ onyụn̄ akpade?— Bible ọdọhọ ke Abasi ekeme ‘ndiyat esịt’ esinyụn̄ akam ‘okop ubiak’ aban̄a mme n̄kpọ oro ẹtịbede.—Psalm 78:40, 41; John 11:35.

Nte afo emekeme ndikere nte akabiakde Jehovah ke ini enye ekesede nte edima Eyen esie akpade?— Jesus ama etịm ọfiọk ete ke Abasi idifreke imọ. Ntak edi oro enye eketịn̄de mme akpatre ikọ emi mbemiso enye akakpade ete: “Ete, mmayak [uwem] Mi nsịn Fi ke ubọk.”—Luke 23:46.

Jesus ama etịm ọfiọk ete ke ẹyenam imọ iset, nte ke owo idikpọn̄ke imọ ‘ke udi.’ Ke ẹma ẹkenam Jesus ẹset, apostle Peter ama okot oto se ẹkewetde ke Bible ẹban̄a Jesus ete: ‘Ikpọn̄ke ukpọn̄ Esie ke udi, obụkidem esie inyụn̄ ikwe mbiara.’ (Utom 2:31; Psalm 16:10) Baba, ikpọkidem Jesus ikenyeneke ndibiara ke udi, oro edi ndibu nnyụn̄ ntebe.

 Ke ini Jesus okodude ke isọn̄, enye ama akam ọdọhọ mme mbet esie ete ke imọ idisịneke ke udi ibịghi. Enye ama anam an̄wan̄a mmọ nte ke ‘ẹyewot imọ, ndien ke Abasi ayanam imọ iset ke ọyọhọ usen ita.’ (Luke 9:22) Ntre, ikpakanaha mme mbet ẹkop ndịk ke ini Jesus ekesetde. Edi nte mmọ ẹma ẹkop ndịk?— Yak ise.

Edi n̄kpọ nte n̄kanika ita uwemeyo Friday ke ini Akwa Andikpep akpade ke eto ndutụhọ. Joseph, owo inyene emi abuanade ke Sanhedrin, edi n̄ko andinịm Jesus ke akpanikọ ke ndịbe. Ke ini enye ọfiọkde ete ke Jesus akpa, enye aka ebịne Pilate, kpa andikara emi ukara Rome emekde. Enye obụp m̀mê imọ imekeme ndikọn̄ọde okpo Jesus mfep ke eto oro nnyụn̄ mbụk enye. Ke oro ebede, Joseph emen okpo Jesus aka in̄wan̄ emi udi odude, kpa ebiet emi ẹsibụkde okpo owo.

Ke ẹma ẹkesịn okpo oro ke udi, ẹma ẹkpat akamba itiat ẹberi ke inua udi oro. Ntre ẹkwi udi oro. Mfịn edi Sunday, emi edide ọyọhọ usen ita. Utịn isiahake kan̄a sia edi tụhi-tụhi usenubọk. Mme owo ẹdu do ẹkpeme udi. Ikpọ oku ẹkedọn̄ mmọ ndinam emi. Nte afo ọmọfiọk ntak?—

Mme oku n̄ko ẹma ẹkop nte ke Jesus ọkọdọhọ ke imọ iyeset. Ntre man mme mbet esie ẹkûyịp okpo oro ndien ekem ẹdọhọ ke Jesus ama eset, mme oku ẹnam mbon ukpeme ẹdu do. Inikiet inikiet, isọn̄ ọtọn̄ọ ndinyek. Un̄wana asiaha ke ekịm. Enye edi angel Jehovah! Mbonekọn̄ ẹnen̄ede ẹkop ndịk tutu mmọ ikemeke ndimenede idem. Angel oro aka udi akakpat itiat efep. Udi ana ukpọk!

Ih, edi nte apostle Peter eketịn̄de ke oro ebede ete: “Abasi akanam Jesus emi eset ke n̄kpa.” (Utom 2:32) Abasi ama anam Jesus eset ye idem oro Jesus ekenyenede mbemiso enye ekedide isọn̄. Ẹkenam enye eset ye idem eke spirit ukem nte mme angel. (1 Peter 3:18) Ntre edieke anade mme owo ẹkụt Jesus, ana enye emen idem eke obụk esịne. Nte enye anam oro?— Yak ise.

 Idahaemi utịn asiaha. Mbonekọn̄ ẹnyọn̄ọ. Mary Magdalene ye iban eken emi ẹdide mme mbet Jesus ke ẹsan̄a ẹka itie udi. Mmọ ẹdọhọ ke otu idemmọ ẹte: ‘Anie edikpat ndodobi itiat oro osio ọnọ nnyịn?’ (Mark 16:3) Edi ke ini mmọ ẹsịmde itie udi, ẹma ẹkpakpat itiat oro ẹfep. Ndien udi ana ukpọk! Okpo Jesus idụhe do aba! Ke ndondo oro, Mary Magdalene efehe aka ndiyom ndusụk mme apostle Jesus.

Iban eken ẹdu ke itie udi oro. Mmọ ẹkere ẹte: ‘Okpo Jesus okpodu mmọn̄?’ Inikiet inikiet, iren iba emi ẹsịnede nsem nsem ọfọn̄idem ẹwọrọ ẹdi. Mmọ ẹdi mme angel! Mmọ ẹdọhọ iban oro ẹte: ‘Ntak emi mbufo ẹyomde Jesus mi? Ẹma ẹnam enye eset. Ẹsọsọp ẹka ẹketịn̄ ẹnọ mme mbet esie.’ Nte ededi, afo emekeme ndikere adan̄a nte iban oro ẹkefehede ẹsọp! Eren kiet osobo ye mmọ ke usụn̄. Nte afo ọmọfiọk owo emi enye edide?—

Enye edi Jesus, emi emende idem eke obụk esịne! Enye ọdọhọ iban oro ete: ‘Ẹka ẹketịn̄ ẹnọ mme mbet Mi.’ Iban oro ẹkop nduaidem. Mmọ ẹkụt mme mbet ẹnyụn̄ ẹdọhọ mmọ ẹte: ‘Jesus odu uwem! Nnyịn ima ikụt enye!’ Mary ama etetịn̄ ọnọ Peter ye John aban̄a nte udi anade ukpọk. Idahaemi mmọ ẹka ndise udi oro, nte afo ekemede ndikụt mi. Mmọ ẹse ọfọn̄ linen oro ẹkewan̄de Jesus, edi mmọ ifiọkke se mmọ ẹkpekerede. Mmọ ẹyom ndinịm ke akpanikọ nte ke Jesus afiak odu uwem, edi etie mmọ nte idịghe akpanikọ.

Nte ini akakade ke Sunday oro, Jesus owụt mbet esie iba idem ke ini mmọ ẹsan̄ade ke usụn̄ ẹka obio-in̄wan̄ Emmaus. Jesus asan̄a ye mmọ eneme nneme, edi mmọ ifiọkke enye koro enye inyeneke ukem idem eke obụk oro enye ekenyenede mbemiso. Mmọ ifiọkke enye ke mîbọhọke ini oro Jesus adiade udia ye mmọ onyụn̄ ọbọn̄de akam. Mme mbet ẹnen̄ede ẹdat esịt tutu mmọ ẹfehe ediwak kilomita ẹka Jerusalem! Ekeme ndidi esisịt ini ke emi ebede ke  Jesus owụt Peter idem man anam enye ọfiọk nte ke Imọ imodu uwem.

Ekem nte ini akade ke mbubịteyo Sunday oro, ediwak mbet ẹsop idem ke ubet kiet. Ẹkọbi usụn̄ufọk oro. Inikiet inikiet, Jesus odu do ke ubet oro ye mmọ! Idahaemi mmọ ẹfiọk ẹte ke Akwa Andikpep ke akpanikọ afiak odu uwem. Kere nte mmọ ẹnemde esịt!—Matthew 28:1-15; Luke 24:1-49; John 19:38–20:21.

Ke usen 40 Jesus ada nsio nsio idem eke obụk owụt idem man mme mbet esie ẹfiọk nte ke imọ imodu uwem. Ekem enye ọkpọn̄ isọn̄ onyụn̄ afiak ebịne Ete esie ke heaven. (Utom 1:9-11) Ibịghike  mme mbet ẹtọn̄ọ nditịn̄ nnọ kpukpru owo nte ke Abasi ama anam Jesus eset ke n̄kpa. Idem ke ini mme oku ẹmiade mmọ ẹnyụn̄ ẹnamde ẹwot ndusụk mmọ, mmọ ẹka iso ndikwọrọ ikọ. Mmọ ẹfiọk ke edieke mmimọ ikpan̄ade, Abasi eyeti mmimọ kpa nte enye eketide Eyen esie.

Akpa mme anditiene Jesus oro ẹkekpụhọde didie ntem ye ediwak owo mfịn! Mme owo emi ẹkere n̄kukụre ẹban̄a oyot Easter ye nsenunen Easter oro ẹyetde ndom ke ini oro ẹkenamde Jesus eset edide edisịm ke isua. Edi Bible itịn̄ke n̄kpọ ndomokiet iban̄a mme oyot ye nsenunen Easter. Enye etịn̄ aban̄a edinam n̄kpọ Abasi.

Nnyịn imekeme nditie nte mme mbet Jesus ebe ke nditịn̄ nnọ mme owo nte ke Abasi ama anam utịben̄kpọ ke ini enye akanamde Eyen esie eset. Iyomke nnyịn idede ikop ndịk, idem ọkpọkọm mme owo ẹdọhọ ke imọn̄ iwot nnyịn. Edieke nnyịn ikpade, Jehovah eyeti nnyịn onyụn̄ anam nnyịn iset, kpa nte enye akanamde Jesus eset.

Nte nnyịn idatke esịt ndifiọk nte ke Abasi esiti mbon oro ẹnamde n̄kpọ ẹnọ enye ndien nte ke enye ayakam anam mmọ ẹset ke n̄kpa?— Ndifiọk mme n̄kpọ emi ekpenyene ndinam nnyịn iyom ndifiọk nte ikemede ndinam Abasi enem esịt. Ndi afo ama ọfiọk nte ke nnyịn ke akpanikọ imekeme ndinam Abasi enem esịt?— Yak ineme iban̄a emi ini efen.

Ndinịm ediset ke n̄kpa Jesus ke akpanikọ ekpenyene ndisọn̄ọ idotenyịn ye mbuọtidem nnyịn. Mbọk kot Utom 2:22-36; 4:18-20; ye 1 Corinth 15:3-8, 20-23.

[Ndise ke page 202]

Ntak emi udi anade ukpọk? Nso itịbe?

[Ndise ke page 205]

Eyedi Peter ye John ẹkere ẹban̄a nso?

[Ndise ke page 206]

Ke ini oro ẹkenamde Jesus eset edide edisịm ke isua, nso ke ediwak owo ẹsikere ẹban̄a? Edi nso ke afo esikere aban̄a?