Anaedi esịt esinem fi ke ini okopde eti mbụk. Ke akpanikọ odu eti mbụk emi edinemde fi ye mme ufan fo ye iman fo ndikop.

Eti mbụk emi odu ke Bible, ndien Jehovah Abasi, kpa Andibot ofụri ekondo akanam ẹwet Bible ke ediwak isua emi ẹkebede. Iyom ndida n̄wed emi nneme n̄wed Bible inan̄ emi ẹdọn̄ọde ata eti mbụk emi kpukpru owo ẹdimade ndikop. Ẹkot n̄wed mbinan̄ emi Matthew, Mark, Luke, ye John. Emi onyụn̄ edi enyịn̄ owo inan̄ emi Abasi ọkọnọde edisana spirit esie ẹda ẹwet mme n̄wed emi.

Ediwak owo ẹsima ndidọhọ ke Gospel inan̄ ẹdu. N̄wed Bible mbinan̄ emi ẹbụk eti mbụk ẹban̄a Jesus. Mme n̄wed emi ẹdọhọ ke Jesus ke Abasi ada anyan̄a owo, ẹdọhọ n̄ko ke enye edi Edidem oro Abasi emekde ete akara ke Obio Ubọn̄ Abasi ke heaven, ẹnyụn̄ ẹdọhọ ke Jesus ayada akpakịp edidiọn̄ ọsọk kpukpru mbon oro ẹbuọtde idem ye enye.—Mark 10:17, 30; 13:13.

Afo emekeme ndikere ntak emi Abasi akanamde owo inan̄ ẹwet ẹban̄a uwem Jesus ye se enye ekekpepde.

Enen̄ede ọfọn nte nsio nsio owo ẹwetde n̄kpọ ẹban̄a se Jesus eketịn̄de onyụn̄ anamde. Ke uwụtn̄kpọ, da nte ke owo inan̄ ẹdu ẹkpere akwa andikpep kiet. Owo kiet emi adade enye ke iso edi ọbọ a-tax. Owo emi adade enye ke nnasia edi abiausọbọ. Enye emi adade enye ke ufien edi ọkọiyak, enye ke andikpep emi onyụn̄ ama akan. Ndien ọyọhọ owo inan̄ ekpri akan kpukpru mmọ, enye ada ke edem ese onyụn̄ okop se ikade iso. Mmọ mbinan̄ ẹdi mbon akpanikọ, ndien odu nsio nsio n̄kpọ emi mmọ kiet kiet ẹnen̄erede ẹma. Edieke mmọ kiet kiet ẹwetde se andikpep emi eketịn̄de onyụn̄ anamde, mmọ mbinan̄ idiwetke ata ukem ukem n̄kpọ. Sia idiọn̄ọde ke mme andiwet Gospel emi ẹkema ẹnyụn̄ ẹkere n̄kpọ nsio nsio, nnyịn ndikot Gospel mbinan̄ ayan̄wam nnyịn itịm idiọn̄ọ se andikpep emi eketịn̄de onyụn̄ anamde. Uwụtn̄kpọ emi anam idiọn̄ọ nte owo inan̄ ndiwet mbụk uwem Jesus emi ekedide Akwa Andikpep ọfọnde akan owo kiet ndiwet.

Yak ifiak itịn̄ iban̄a uwụtn̄kpọ oro: Ọbọ a-tax oro ediwet se mme Jew ẹdimade ndikot. Emi anam enye ewet ndusụk n̄kpọ emi Jesus ekekpepde ye ndusụk n̄kpọ emi enye akanamde ke usụn̄ emi edin̄wamde  mme Jew. Abiausọbọ oro edima ndiwet n̄kpọ mban̄a nte Jesus ọkọkọkde mme owo udọn̄ọ m̀mê akanamde mme mbụn̄ọ ẹsan̄a isan̄. Emi anam enye asana ndusụk n̄kpọ emi ọbọ a-tax ekewetde ayak mîdịghe ewet mmọ enịm ke usụn̄ efen. Enye oro edide ufan andikpep oro edima ndiwet mban̄a edu andikpep oro ye nte enye esinamde n̄kpọ. Se akparawa oro ediwetde edidi ibio ibio, enye idiwetke n̄kpọ awawak akaha. Kpa ye kpukpru emi isụk itịn̄de mi, se kpukpru mmọ ẹwetde enenen. Emi owụt nte owo inan̄ ndiwet n̄kpọ mban̄a uwem Jesus an̄wamde nnyịn nditịm ndiọn̄ọ se enye akanamde, ekekpepde, ye nte enye okodude uwem.

Mme owo ẹsidọhọ ‘Gospel Matthew’ mîdịghe ẹdọhọ ‘Gospel John.’ Se mmọ ẹsitịn̄de emi idiọkke, sia n̄wed emi kiet kiet esịne “eti mbụk emi aban̄ade Jesus Christ.” (Mark 1:1) Edi ke nditịm ntịn̄, mbụk mbinan̄ emi ẹdi gospel m̀mê eti mbụk kiet emi aban̄ade Jesus.

Ediwak mbon oro ẹkpepde Ikọ Abasi ẹsikot Matthew, Mark, Luke, ye John ẹnyụn̄ ẹtan̄ kpukpru se mmọ ẹkụtde ẹdian, ẹbụk ke adiana ke adiana. Ke n̄kpọ nte isua 170 eyo Christ, Tatian, eyen Syria oro ekedide ewetn̄wed ama onyụn̄ odomo ndinam ukem n̄kpọ oro. Enye ama okụt ke Abasi ọkọnọ edisana spirit esie ẹda ẹwet gospel mbinan̄, ke mmọ ẹnyụn̄ ẹnen. Tatian ndien ama ewet n̄wed emi ẹkotde Diatessaron, emi aban̄ade uwem ye utom ukwọrọikọ Jesus.

Se inyụn̄ inamde edi emi ke n̄wed Jesus Edi Usụn̄ ye Akpanikọ ye Uwem. Edi se inamde mi enen akan onyụn̄ awak. Se inamde ikeme ndinam emi edi sia itịmde idiọn̄ọ nte ediwak prọfesi oro Jesus eketịn̄de ẹsude ye se mme uwụtn̄kpọ oro enye ọkọnọde ẹwọrọde. Ndidiọn̄ọ emi anam se enye eketịn̄de onyụn̄ anamde an̄wan̄a nnyịn onyụn̄ an̄wam nnyịn idiọn̄ọ ini emi enye akanamde mmọ. Se mme ọdọkisọn̄ nyom n̄kpọeset ẹkụtde anam ndusụk n̄kpọ oro ẹkewetde ke Bible etịm an̄wan̄a nnyịn onyụn̄ anam itịm idiọn̄ọ se mme andiwet gospel oro ẹkewetde. Edi idụhe owo ndomokiet emi ekemede ndisọn̄ọ ntịn̄ nte ke emi ekebem oko iso etịbe ke kpukpru se Jesus akanamde. Edi n̄wed Jesus Edi Usụn̄ ye Akpanikọ ye Uwem anam ikeme ndidiọn̄ọ ndusụk n̄kpọ emi ẹketịbede mbemiso mbon eken.

Nte afo okotde onyụn̄ amade n̄wed emi, ti akpan etop emi odude ke n̄wed emi, oro edin̄wamde fi ye mme ufan ye iman fo. Kûfre ke Jesus Christ ke idemesie ọkọdọhọ apostle Thomas ete: “Ami ndi usụn̄ ye akpanikọ ye uwem. Baba owo kiet itieneke Ete ibọhọke ebe ke ami.”—John 14:6.

N̄wed Jesus Edi Usụn̄ ye Akpanikọ ye Uwem ayan̄wam fi enen̄ede ọdiọn̄ọ nte Jesus edide “usụn̄.” Enyịn̄ esie ikpọn̄-ikpọn̄ ke afo edikeme ndida mbọn̄ akam nnọ Jehovah Abasi man enye okop. Ke adianade ye emi, Jesus edi n̄kukụre usụn̄ emi ikemede ndisan̄a ndu ke emem ye Abasi. (John 16:23; Rome 5:8) Ntem, Jesus ikpọn̄ ekeme ndin̄wam nnyịn idi ufan Abasi.

Jesus edi “akpanikọ.” Enye ekesitịn̄ akpanikọ onyụn̄ ada akpanikọ odu uwem. Enye ama osu ediwak prọfesi Bible, emi ẹkekabarede “ẹdi ‘Ih’ ebe ke enye.” (2 Corinth 1:20; John 1:14) Mme utọ prọfesi emi ẹn̄wam nnyịn ndikụt akpan utom emi Jesus anamde man ẹnam uduak Abasi osu.—Ediyarade 19:10.

Jesus Christ onyụn̄ edi “uwem.” Enye ama ọnọ mfọnmma uwem ye iyịp esie nte uwa ufak man nnyịn ikeme ndinyene “ata uwem,” oro onyụn̄ edide “nsinsi uwem.” (1 Timothy 6:12, 19; Ephesus 1:7; 1 John 1:7) Enye n̄ko edidi “uwem” ọnọ ediwak miliọn owo emi ẹkekpade, edi oro ẹdinamde ẹset ẹdidu uwem ke nsinsi ke Paradise ke isọn̄.—John 5:28, 29.

Ana kpukpru nnyịn idiọn̄ọ se Jesus anamde man ẹnam uduak Abasi osu. Mbọk nen̄ede sịn idem kpep n̄kpọ efen efen ban̄a Jesus emi edide “usụn̄ ye akpanikọ ye uwem.”