Be ka se isịnede

Be ka se isịnede

 IKPEHE 22

Mme Apostle Ẹkwọrọ Ikọ ye Uko

Mme Apostle Ẹkwọrọ Ikọ ye Uko

Esop Christian ọkọri usọp usọp kpa ye ukọbọ

USEN duop ẹkebe tọn̄ọ nte Jesus akafiak ọnyọn̄ heaven, n̄kpọ nte mbet esie 120 ẹma ẹsop idem ke ufọk kiet ke Jerusalem ke ini Usọrọ Pentecost mme Jew ke isua 33 E.N. Ibịghike mmọ ẹma ẹkop uyom emi eketiede nte ọkpọsọn̄ ofụm ke ufọk oro. Mme mbet oro ẹma ẹtọn̄ọ nditịn̄ ikọ ke usem oro mmọ mîkọdiọn̄ọke. Nso iketịbe emi? Abasi ọkọnọ mmọ edisana spirit esie.

Otuowo ẹma ẹdu ke an̄wa sia isenowo ẹketode nsio nsio itie ẹdi usọrọ oro. Idem ama enen̄ede akpa mmọ ndikop mme mbet Jesus ẹsemde usem emana mmọ udọn udọn. Peter ama anam se iketịbede emi an̄wan̄a mme owo ke nditịn̄ mban̄a ntịn̄nnịm ikọ oro prọfet Joel eketịn̄de nte ke Abasi ‘ayan̄wan̄a’ spirit esie ọnọ mme owo, ndien ke spirit emi ayanam mbon oro ẹbọde enye ẹnyene nsio nsio enọ. (Joel 2:28, 29) Okopodudu uyarade edisana spirit emi ama anam mme owo ẹdiọn̄ọ ke akamba n̄kpọ etịbe: mfọn Abasi ọkpọn̄ Israel, edidu idahaemi ye esop Christian oro ẹsiakde obufa obufa do. Ana mbon oro ẹyomde Abasi ẹnyịme utuakibuot mmimọ ẹkabade ẹdi mbet Christ.

Ukọbọ ama enen̄ede ọsọn̄ ubọk, mme asua ẹma ẹnyụn̄ ẹmụm mme mbet ẹdọn̄ ke ufọk-n̄kpọkọbi. Edi angel Jehovah ama aka ekeberede usụn̄ ufọk-n̄kpọkọbi oro ke okoneyo onyụn̄ ọdọhọ mme mbet ẹkeka iso ẹkwọrọ ikọ. Ke eyo ama ekesiere, mmọ ẹma ẹtọn̄ọ ndikwọrọ ikọ. Mmọ ẹma ẹdụk temple ẹkekpep mme owo n̄kpọ ẹban̄a Jesus. Mme adaiso ido ukpono oro ẹkekọbọde mmọ ẹma ẹnen̄ede ẹyat esịt ẹdọhọ mmọ ẹtre ndikwọrọ ikọ. Mme apostle ẹma ẹbọrọ ye uko ẹte: “Nnyịn inyene ndikop uyo Abasi nte andikara utu ke uyo owo.”—Utom 5:28, 29.

Ukọbọ ama enen̄ede ọsọn̄ ubọk. Ndusụk mme Jew ẹma ẹdori Stephen emi ekedide mbet Jesus ikọ ẹte ke enye etịn̄ ikọ isụn̄i, ẹnyụn̄ ẹtọn̄ọ enye ke itiat ẹwot. Akparawa kiet emi ekekerede Saul, owo Tarsus, ama ada do ese onyụn̄ enyịme ẹwot Stephen. Ekem enye adaha aka Damascus man okomụm owo ekededi oro edide mbet Christ. Nte Saul osụk akade ke usụn̄, un̄wana oto heaven ayama akan enye okụk, enye onyụn̄ okop uyo ọdọhọde ete: “Saul, Saul, ntak emi afo ọkọbọde mi?” Sia un̄wana oro ama ekekịm enye enyịn, Saul ama obụp ete: “Afo edi anie?” Uyo oro ama ọbọrọ ete: “Ami ndi Jesus.”—Utom 9:3-5.

Ke usen ita ẹma ẹkebe, Jesus ama ọdọn̄ mbet oro ekerede Ananias akanam Saul okụt usụn̄. Ẹma ẹnịm Saul baptism, ndien enye ọtọn̄ọ ndikwọrọ mban̄a Jesus uko uko. Saul emi ẹkedide ẹdidiọn̄ọ nte apostle Paul ama edisọn̄ idem ke esop Christian.

Mme mbet Jesus ẹkesikwọrọ eti mbụk Obio Ubọn̄ Abasi ẹnọ mme Jew ye mbon Samaria kpọt. Angel ama aka ebịne Cornelius, akwa owo ekọn̄ Rome oro akabakde Abasi, onyụn̄ ọdọhọ enye ọdọn̄ ẹkekot apostle Peter. Peter ama asan̄a ye mbon en̄wen aka ọkọkwọrọ ikọ ọnọ Cornelius ye ikọt ufọk esie. Nte Peter okosụk etịn̄de ikọ, edisana spirit ama edidoro mme Gentile oro ẹkenịmde ke akpanikọ do, ndien Peter ọdọhọ ẹnịm mmọ baptism ke enyịn̄ Jesus. Ẹma ẹberede usụn̄ nsinsi uwem ndien ẹnọ mme owo oro ẹtode kpukpru idụt. Esop ama eben̄e idem ndikwọrọ eti mbụk ke kpukpru ebiet.

—Ẹda ẹto Utom 1:1-11:21.