Be ka se isịnede

Be ka se isịnede

 IKPEHE 24

Paul Ewet Leta Ọnọ Mme Esop

Paul Ewet Leta Ọnọ Mme Esop

Leta Paul ọsọn̄ọ mme Christian akpa isua ikie idem

ESOP Christian oro ẹkesiakde ke akpa isua ikie eyenen̄ede enyene ubọk ke ndinam uduak Jehovah osu. Edi ikebịghike ẹma ẹtọn̄ọ ndikọbọ mme Christian akpa isua ikie. Ndi mmọ ẹyesọn̄ọ ẹda ẹnam akpanikọ ẹnọ Abasi ke ini mbon oro mîdụhe ke esop ẹkọbọde mmọ, nditọete mmọ ke esop ẹnyụn̄ ẹdomode ndibiat mbuọtidem mmọ? Leta 21 emi ẹnọde nti item ye nsịnudọn̄ kaban̄a emi, ọdọn̄ọ ke N̄wed Abasi Christian Usem Greek.

Apostle Paul ekewet 14 ke otu leta emi, oro edi, ọtọn̄ọde ke N̄wed Mbon Rome esịm Mme Hebrew. Mme leta emi ẹkere enyịn̄ owo m̀mê enyịn̄ esop oro ẹkewetde mmọ ẹnọ. Ẹyak ineme iban̄a ndusụk n̄kpọ oro Paul ekewetde ke leta esie.

Item aban̄ade ido uwem ye edu. Mbon use, mme okpono ndem, ye mbon oro ẹnamde ndiọi n̄kpọ eken “ididaha Obio Ubọn̄ Abasi inyene.” (Galatia 5:19-21; 1 Corinth 6:9-11) Ana mbon oro ẹtuakde ibuot ẹnọ Abasi ẹdiana kiet inamke n̄kpọ m̀mê mmọ ẹto m̀mọ̀n̄. (Rome 2:11; Ephesus 4:1-6) Mmọ ẹkpenyene nditat esịt n̄n̄wam nditọete mmọ oro ẹnanade n̄kpọ. (2 Corinth 9:7) Paul ọdọhọ ete: “Ẹkûdop ndibọn̄ akam.” Ke akpanikọ, ẹsịn udọn̄ ẹnọ mme andituak ibuot nnọ Abasi ndin̄wan̄a esịt mmọ nnọ Jehovah. (1 Thessalonica 5:17; 2 Thessalonica 3:1; Philippi 4:6, 7) Ana inyene mbuọtidem man Abasi okop akam nnyịn.—Mme Hebrew 11:6.

Nso ke ubon ẹkpenam man ẹkop inemesịt? Mme ebe ẹkpenyene ndima iban mmọ nte idem mmọ. Ana ibanndọ ẹnyene ntotụn̄ọ ukpono ẹnọ mme ebe mmọ. Nditọwọn̄ ẹnyene ndikop uyo mme ete ye eka mmọ, sia oro ayanam Abasi okop inemesịt. Mme ete ye eka ẹkpenyene ndida item N̄wed Abasi n̄kpep nditọ mmọ n̄kpọ ke ima nnyụn̄ nnọ mmọ ndausụn̄.—Ephesus 5:22–6:4; Colossae 3:18-21.

Anam uduak Abasi etetịm an̄wan̄a mme Christian. Ediwak n̄kpọ ke Ibet Moses ẹma ẹkpeme nditọ Israel ẹnyụn̄ ẹnọ mmọ ndausụn̄ tutu Christ edi. (Galatia 3:24) Edi mme Christian inyeneke ndinịm Ibet Moses emi mbemiso ẹkeme ndituak ibuot nnọ Abasi. Ke ini Paul ekewetde leta ọnọ mme Hebrew—oro edi, mme Christian oro ẹkedide mme Jew—enye ama anam se Ibet oro akadade aban̄a an̄wan̄a ye nte uduak Abasi osude ke Christ. Paul ama anam an̄wan̄a nte ke  ediwak n̄kpọ ke Ibet oro ẹkeda ẹban̄a se iditịbede ke ini iso. Ke uwụtn̄kpọ, uwa unam oro ẹkesiwade akada aban̄a n̄kpa uwa Jesus oro ẹdidade ẹsọhi idiọkn̄kpọ nnyịn ẹfep. (Mme Hebrew 10:1-4) Abasi ama ada n̄kpa Jesus abiat Ibet ediomi oro efep sia Ibet emi ikenyeneke ufọn aba.—Colossae 2:13-17; Mme Hebrew 8:13.

Ẹnọ ndausụn̄ ke nte ẹkpetịmde esop. Ana irenowo oro ẹyomde ndinyene ifetutom ke esop ẹnyene nti ido uwem ye mme edu oro ẹsiakde ke Bible. (1 Timothy 3:1-10, 12, 13; Titus 1:5-9) Ana mme andituak ibuot nnọ Jehovah Abasi ẹsisop idem ọtọkiet kpukpru ini ye nditọete mmọ ẹnyụn̄ ẹsịn udọn̄ ẹnọ kiet eken. (Mme Hebrew 10:24, 25) Se ẹkpepde ke mme mboho oro ekpenyene ndinam mme owo ẹtetịm ẹsọn̄ idem ẹnyụn̄ ẹdiọn̄ọ n̄kpọ.—1 Corinth 14:26, 31.

Paul ama afiak aka Rome ke ini enye ekewetde udiana leta esie ọnọ Timothy, edi enye okodu ke ufọk-n̄kpọkọbi do ebet nte ẹdibierede ikpe esie. Owo ifan̄ kpọt ẹkenyene uko ẹkese enye ke ufọk-n̄kpọkọbi oro. Paul ama ọfiọk ke ẹmọn̄ ẹsọp ẹwot imọ. Enye ọkọdọhọ ete: “Mman̄wana eti en̄wan, mmefehe mbuba nsịm utịt, mmomụm mbuọtidem n̄kama.” (2 Timothy 4:7) Etie nte ekedi Paul ewewet leta oro ama, ẹwot enye ke ntak mbuọtidem esie. Edi mme leta oro enye ekewetde ke osụk ọnọnọ ata mme andituak ibuot nnọ Abasi ndausụn̄ tutu esịm emi.

—Ẹda ẹto N̄wed Mbon Rome; 1 ye 2 Corinth; Galatia; Ephesus; Philippi; Colossae; 1 ye 2 Thessalonica; 1 ye 2 Timothy; Titus; Philemon; Mme Hebrew.