Be ka se isịnede

Be ka se isịnede

 IKPEHE 6

Job Ọsọn̄ọ Ada

Job Ọsọn̄ọ Ada

Satan amia ata ye Abasi aban̄a Job, edi Job ọsọn̄ọ ada anam akpanikọ ọnọ Jehovah

NDI owo ndomokiet ekeme ndisọn̄ọ nda nnam akpanikọ nnọ Abasi edieke enye osobode ata ọkpọsọn̄ idomo m̀mê etiede nte ke enye ndisụk ibuot nnọ Abasi idinọhọ enye ufọn ndomokiet? Ẹma ẹbụp mbụme emi ẹban̄a Job, ndien nte enye akanamde n̄kpọ ama onyụn̄ ọbọrọ mbụme emi.

Ke ini nditọ Israel ẹkesụk ẹdude ke Egypt, Job emi ekedide iman Abraham okodụn̄ ke obio oro ẹkotde Arabia idahaemi. Mme angel ke heaven ẹma ẹsop idem ke iso Abasi, Satan owo nsọn̄ibuot ama onyụn̄ etiene odu do. Ke iso kpukpru mmọ emi ke Jehovah eketịn̄ nte imọ inyenede mbuọtidem ke idem anam-akpanikọ asan̄autom imọ Job. Ke nditịm ntịn̄, Jehovah ọkọdọhọ ke idụhe owo ndomokiet emi ọsọn̄ọde ada nte Job. Edi Satan ọkọdọhọ ke Job okpono Abasi ke ntak emi Abasi ọdiọn̄de onyụn̄ ekpemede enye. Satan ọkọdọhọ ke edieke kpukpru inyene Job ataharede, ke enye ayakan̄ Abasi.

Abasi ama ayak Satan ebem iso osobo inyene Job onyụn̄ owot nditọ esie, ekem enye ọtọ Job idiọk udọn̄ọ. Sia Job mîkọfiọkke ke Satan ọdọk kpukpru ubi emi, enye ama ekere m̀mê nso inam Abasi ayak utọ idomo emi esịm imọ. Kpa ye oro, Job ikosụn̄ike Abasi.

Ufan abian̄a ita ẹma ẹdi ndise Job. Mmọ ẹma ẹtịn̄ ata ediwak ikọ oro ẹwetde ke n̄wed Job, ẹdọhọ ke Abasi amia Job ufen idiọkn̄kpọ oro enye akanamde ke ndịbe. Mmọ ẹkekam ẹdọhọ ke Abasi inemke esịt ke se mme asan̄autom esie ẹnamde, inyụn̄ ibuọtke idem ye mmọ. Job ikenyịmeke ukwan̄ ikọ mmọ. Enye ama etịn̄ uko uko ete ke imọ iyaka iso isọn̄ọ ida tutu ikpa!

Edi se ikenen̄ede ibehe Job ekedi ndiwụt mme owo ke imọ iduehe. Akparawa emi ekekerede Elihu, emi okosụk akpan̄de utọn̄ ọnọ ofụri nneme emi, ama esịn uyo man enen̄ede Job ye mme ufan abian̄a esie. Elihu ama asua ọnọ Job ke ntak emi Job mîkọfiọkke ke ndinam mme owo ẹdiọn̄ọ ke Jehovah Abasi enyene unen ndikara enen̄ede edi akpan n̄kpọ akan ndimenede uku owo ndomokiet. Elihu ama onyụn̄ ọsọn̄ọ asua ọnọ mme ufan Job oro.

Jehovah Abasi ama etịn̄ ikọ ye Job, onyụn̄ enen̄ede enye. Jehovah ama odụri Job ntịn̄enyịn owụt mme n̄kpọ oro Enye obotde onyụn̄ anam Job okụt nte owo ekpride ye nte Abasi okponde. Job ama osụhọde idem enyịme edinen̄ede oro. Sia Jehovah “enen̄ede enyene esịt ima onyụn̄ okop mbọm,” enye ama anam idem ọsọn̄ Job, ọnọ enye inyene emi awakde utịm ikaba akan se enye ekenyenede, onyụn̄ ọnọ enye nditọ duop. (James 5:11) Job ndikọsọn̄ọ nda ye Jehovah ke ini oro ẹkedomode enye ama ekịbi Satan inua ke ata oro enye akamiade ete ke owo ndomokiet idisọn̄ọke ida inam akpanikọ inọ Abasi edieke ẹdomode enye.

—Ẹda ẹto n̄wed Job.