Be ka se isịnede

Be ka se isịnede

 IKPEHE 25

Item Oro Ẹnọde Ẹban̄a Mbuọtidem, Ido Uwem, ye Ima

Item Oro Ẹnọde Ẹban̄a Mbuọtidem, Ido Uwem, ye Ima

James, Peter, John, ye Jude ẹwet leta ndisịn udọn̄ nnọ nditọete

JAMES ye Jude ẹkedi nditọeka Jesus. Peter ye John ẹkesịne ke otu mme apostle Jesus 12. Irenowo inan̄ emi ẹkewet leta itiaba ke otu mme leta oro ẹdude ke N̄wed Abasi Christian Usem Greek. Mme leta emi kiet kiet ekere enyịn̄ andiwet. Ẹkenọ mme item eke odudu spirit oro ẹdọn̄ọde ke mme leta emi man ẹn̄wam mme Christian ẹka iso ẹnam akpanikọ ẹnọ Jehovah ẹnyụn̄ ẹyom Obio Ubọn̄ Abasi.

Wụt ke emenyene mbuọtidem. Ikụreke ke owo ndidọhọ ke imenyene mbuọtidem. Ẹsinanam ata mbuọtidem ẹwụt. James ewet ete: “Ke akpanikọ, . . . mbuọtidem eke mîsan̄ake ye utom akpa.” (James 2:26) Ndinyene mbuọtidem ke ini owo osobode idomo anam enye enyene ime. Man Christian okụt unen, oyom enye eben̄e Abasi eti ibuot onyụn̄ enyene mbuọtidem ke Abasi ọyọnọ imọ. Ime anam Abasi ama owo. (James 1:2-6, 12) Jehovah Abasi ọyọdiọn̄ andituak ibuot nnọ enye oro akade iso anam akpanikọ ke ntak mbuọtidem. James ọdọhọ ete: “Ẹsan̄a ẹkpere Abasi, ndien enye ayasan̄a ekpere mbufo.”—James 4:8.

Ana mbuọtidem Christian enen̄ede ọsọn̄ man enye ekeme ndibiọn̄ọ idomo ye oburobụt ido. Idiọk idaha ido uwem eyo esie akanam Jude esịn udọn̄ ọnọ nditọete esie ete “ẹn̄wana ọkpọsọn̄ en̄wan kaban̄a mbuọtidem.”—Jude 3.

Du edisana uwem. Jehovah oyom mme andituak ibuot nnọ enye ẹsana ke kpukpru usụn̄. Peter ewet ete: “Mbufo ẹkabade ẹsana ke ofụri edu uwem mbufo, koro ẹwet ẹte: ‘Ana mbufo ẹdi edisana koro ami ndide edisana.’” (1 Peter 1:15, 16) Mme Christian ẹnyene uwụtn̄kpọ emi odotde ẹkpebe. Peter ọdọhọ ete: “Christ ama akam okụt ukụt kaban̄a mbufo, ọkpọn̄de uwụtn̄kpọ enịm ọnọ mbufo man ẹtiene nde ikpat esie ketket.” (1 Peter 2:21) Okposụkedi emi mme Christian ẹkemede ndibọ ufen ke ntak emi mmọ ẹdade edumbet Abasi ẹdu uwem, emi esinam mmọ ẹnyene “eti ubieresịt.” (1 Peter 3:16, 17) Peter esịn udọn̄ ọnọ mme Christian ete ẹdu edisana uwem ẹnyụn̄ ẹnam mme edinam uten̄e Abasi nte mmọ ẹsụk ẹbetde usen ikpe Abasi ye obufa ererimbot oro Abasi ọn̄wọn̄ọde, emi ‘edinen ido edidụn̄de.’—2 Peter 3:11-13.

“Ẹsan̄a ẹkpere Abasi, ndien enye ayasan̄a ekpere mbufo.”—James 4:8

Ma ima. John ewet ete: “Abasi edi ima.” Apostle oro ama etịn̄ nte Abasi okowụtde akwa ima emi enye amade nnyịn ke ndidọn̄ Jesus edikpa nte “uwa usio-isop kaban̄a mme idiọkn̄kpọ nnyịn.” Mme Christian ẹkpenam n̄kpọ didie ẹban̄a emi? John ọbọrọ ete: “Ndima, edieke emi edide nte Abasi amade nnyịn, do obiomo nnyịn ke idem nnyịn ndima kiet eken.” (1 John 4:8-11) Usụn̄ kiet ndiwụt ke imenyene utọ ima oro edi ndifọn ido ye nditọete nnyịn.—3 John 5-8.

Didie ndien ke mme andituak ibuot nnọ Jehovah ẹkeme ndiwụt ke mmimọ imama enye? John ọbọrọ ete: “Koro emi edi se ndima Abasi ọwọrọde, ete nnyịn inịm ibet esie; ndien ibet esie idobike owo mbiomo.” (1 John 5:3; 2 John 6) Ẹnam mbon oro ẹkopde uyo Abasi ẹtịm ẹfiọk nte ke Abasi ayaka iso ama mmọ onyụn̄ ọnọ mmọ “nsinsi uwem” nte utịp.—Jude 21.

Ẹda ẹto James; 1 ye 2 Peter1, 2, ye ọyọhọ John 3; Jude.