Be ka se isịnede

Be ka se isịnede

 IKPEHE 23

Eti Mbụk Asuana

Eti Mbụk Asuana

Paul asan̄a ke inyan̄ ye obot aka ukwọrọikọ

KE Paul ama akakabade edi Christian, enye ama enen̄ede esịn idem ọkwọrọ eti mbụk Obio Ubọn̄ Abasi, ndien emi ama anam ẹkọbọ enye, emi ekesikọbọde mbon en̄wen. Apostle emi ama enen̄ede esịn idem ọkwọrọ ikọ ke nsio nsio itie, aka nnyan ebiet akasuan eti mbụk Obio Ubọn̄ oro Abasi edidade osu akpa uduak esie kaban̄a ubonowo.

Ke ini Paul akakade akpa isan̄ ukwọrọikọ esie ekesịm Lystra, enye ama anam ete kiet emi akamanade mbụn̄ọ, asan̄a. Otuowo oro ẹkekụtde ẹma ẹfiori n̄kpo ẹte ke Paul ye Barnabas nsan̄autom esie ẹdi mme abasi. Ama enen̄ede ọsọn̄ mmọ ndikpan mme owo ẹte ẹkûfọp uwa ẹnọ mmimọ. Edi kpa mme owo emi ẹketiene nsọk oro mme asua Paul ẹkesịnde, ẹtọn̄ọ Paul ke itiat tutu ẹkere ke enye akpa. Paul ikakpaha, ekem enye ama afiak aka obio oro man ọkọsọn̄ọ nditọete esie idem.

Ndusụk Christian emi ẹdide mme Jew ẹma ẹsọn̄ọ ẹtịn̄ ẹte ke ana mme andinịm ke akpanikọ oro mîdịghe mme Jew ẹnam ndusụk n̄kpọ oro Ibet Moses etemede. Paul ama emen n̄kpọ emi ebịne mme apostle ye mbiowo ke Jerusalem. Ke mme apostle ye mbiowo ẹma ẹkesịn idem ẹdụn̄ọde N̄wed Abasi, edisana spirit Abasi onyụn̄ adade mmọ usụn̄, mmọ ẹma ẹwet n̄wed ẹnọ ẹsọk mme esop ẹte ẹbet mme n̄kpọ oro ẹwade ẹnọ ndem, ẹbet iyịp, ẹkûta unam oro owo mîyọkke itọn̄ iduọk iyịp, ẹkûnyụn̄ ẹnam use. Mme n̄kpọ emi ẹkedi akpan n̄kpọ, edi ikoyomke ẹnenịm Ibet Moses mbemiso ẹkeme ndinam mme n̄kpọ emi.—Utom 15:28, 29.

Ke ini Paul akakade udiana isan̄ ukwọrọikọ esie, enye ama aka Beroea emi odude ke Greece eyomfịn. Mme Jew oro ẹkedụn̄de ke obio oro ẹma ẹdara ndikop Ikọ Abasi, ẹnyụn̄ ẹdun̄ọde N̄wed Abasi ke usen ke usen man ẹkụt m̀mê se Paul ekpepde mmimọ ẹdi akpanikọ. Ẹma ẹfiak ẹkọbọ enye, ndien enye ama ọkpọn̄ do aka Athens. Paul ama ada ke iso mme ọfiọkn̄wed mbon Athens ọkwọrọ ata okopodudu ikọ Abasi, ndien nte enye eketịn̄de ikọ owụt nte owo akpadade usọ ye eti ibuot etịn̄ ikọ.

Ke Paul ama ọkọnyọn̄ isan̄ ukwọrọikọ esie ọyọhọ ita edi, enye ama edika Jerusalem. Ke ini enye akakade temple, ndusụk mme Jew ẹma ẹtọn̄ọ ntịme ẹnyụn̄ ẹyom ndiwot enye. Mbonekọn̄ Rome ẹma ẹdinyan̄a enye ẹnyụn̄ ẹbụp enye mbụme. Sia enye ekedide amanaisọn̄ eyen Rome, ẹma ẹda enye ẹka iso Felix emi ekedide owo ukara Rome ini oro. Mme Jew ikenyeneke n̄kpọ ndomokiet nditịn̄ nsọn̄ọ ofụri ikọ oro mmọ ẹkedoride Paul. Edi Paul ikoyomke Festus emi okonyụn̄ edide owo ukara Rome ini oro ayak imọ ọnọ mme Jew, ntre enye ama ọdọhọ ete: “Mmeben̄e nte ẹda mi ẹsọk Caesar!” Festus ama ọbọrọ ete: “Ayaka ebịne Caesar.”—Utom 25:11, 12.

Ntre ẹma ẹmen Paul ke ubom ẹka Italy man ẹkekpe ikpe esie. Ubom oro ama esịp, ndien enye ama odu ke isuo Malta ke ini etuep oro. Ke enye ama ekesịm Rome ke akpatre, ẹma ẹkpe ufọk ẹnọ enye odụn̄ ofụri isua iba ẹnyụn̄ ẹnịm mbonekọn̄ ẹsikpeme enye. Edi kpa ye oro, enye ama esịn ifịk ọkwọrọ eti mbụk Obio Ubọn̄ Abasi ọnọ kpukpru mbon oro ẹkekade ẹkese enye.

—Ẹda ẹto Utom 11:22–28:31.