Be ka se isịnede

Be ka se isịnede

 UKPEPN̄KPỌ 03

Ndi Emekere ke Se Bible Etịn̄de Edi Se Owo Ekpenịmde?

Ndi Emekere ke Se Bible Etịn̄de Edi Se Owo Ekpenịmde?

Bible ọdọn̄ọ nti un̄wọn̄ọ ye nsio nsio item. Ekeme ndidi emesima se Bible etịn̄de edi ekere m̀mê kpukpru osụk edi akpanikọ. Imọdiọn̄ọ ke Bible edi ata akani n̄wed. Ndi emekere ke un̄wọn̄ọ ye item emi ọyọhọde Bible edi se owo ekpenịmde? Ndi emenịm ke ndinam se Bible ọdọhọde ekeme ndinam owo okop inem uwem idahaemi ye ke ini iso? Ediwak owo ẹdọhọ ke ekeme. Se ise m̀mê edi akpanikọ.

1. Ndi se Bible etịn̄de osụk edi ata ofụri akpanikọ?

Ecclesiastes 12:10 ọdọhọ ke se ẹwetde ke Bible edi ‘ikọ akpanikọ.’ Bible etịn̄ se mme owo nte nnyịn ẹkenamde. (Kot Luke 1:3; 3:1, 2.) Ediwak mbon emi ẹkpepde n̄kpọ ẹban̄a mbụkeset ye mbon emi ẹsidọkde isọn̄ ẹyom n̄kpọeset ẹdọhọ ke mme usenọfiọn̄, mme owo, mme itie, ye mme n̄kpọ emi Bible ọdọhọde ke ama etịbe edi akpanikọ.

2. Nso iwụt ke se Bible etịn̄de osụk ededi akpanikọ onyụn̄ enen?

Bible ama etịn̄ nsio nsio n̄kpọ emi mme owo ẹkedide ẹdidiọn̄ọ, ke ediwak isua ama ekebe, ke edi akpanikọ. Uwụtn̄kpọ kiet aban̄a se ntaifiọk ẹkedide ẹdikụt. Ke ini Bible eketịn̄de mme n̄kpọ oro, ediwak owo ẹkekere ke Bible inenke. Edi se ntaifiọk ẹkedide ẹdikụt owụt ke se Bible eketịn̄de enen. Ikọ Bible edi se owo ‘ekemede ndiberi edem’ ke nsinsi.—Psalm 111:7, 8.

3. Ntak emi ikpenịmde ke se Bible etịn̄de eyetịbe?

Bible ọdọn̄ọ ediwak prọfesi * emi mîtịbeke kan̄a. (Isaiah 46:10) Bible ama onyụn̄ etịn̄ nsio nsio n̄kpọ emi ekeditịbede ata ukem ukem nte enye okonyụn̄ ọdọhọde, kpa ye oro ediwak isua ekebede. Bible ama etịn̄ n̄ko nte n̄kpọ editiede ke ini nnyịn emi. Ke ukpepn̄kpọ emi, iyeneme ndusụk prọfesi Bible. Esinem tutu ndikụt ke kpukpru ekedi ata akpanikọ!

 SỊN IDEM KPEP

Se nte se ntaifiọk ẹtịn̄de owụtde ke Bible enen, nyụn̄ se ndusụk prọfesi Bible emi akpade owo idem.

4. Se ntaifiọk ẹkụtde odụk ye se Bible eketịn̄de

Ke eset, ediwak owo ẹkesikere ke isọn̄ emi odoro ke n̄kpọ. Se VIDIO emi.

Se se ẹkewetde mi ke n̄wed Job n̄kpọ nte isua 3,500 emi ekebede. Kot Job 26:7, ekem ẹbọrọ mbụme emi ẹnyụn̄ ẹneme ẹban̄a enye:

  • Nso inam akpa fi idem ndidiọn̄ọ ke Bible ama etetịn̄ ke isọn̄ ada ufụm?

N̄kpọ nte isua 200 emi osụk ebede mi ke mme owo ẹketọn̄ọ ndidiọn̄ọ nte edịm esisan̄ade edep. Edi se se Bible eketịn̄de mi ediwak tọsịn isua emi ekebede. Kot Job 36:27, 28, ekem ẹbọrọ mbụme emi ẹnyụn̄ ẹneme ẹban̄a mmọ:

  • Nso inam se Bible etịn̄de aban̄a nte edịm esisan̄ade edep akpa fi idem?

  • Ndi itie Bible oro anam fi enen̄ede enịm se Bible etịn̄de?

5. Bible ama etịn̄ mme akpan n̄kpọ emi editịbede

Kot Isaiah 44:27–45:2, ekem ẹbọrọ mbụme emi ẹnyụn̄ ẹneme ẹban̄a enye:

  • Nso ke Bible eketịn̄ aban̄a Babylon isua 200 mbemiso ẹsobode Babylon?

Se VIDIO emi..

 Mbụkeset owụt ke Cyrus edidem Persia ye mbonekọn̄ esie ẹma ẹsobo Babylon ke ọyọhọ isua 539 B.C.E. * Mmọ ẹma ẹdọk isọn̄ ẹwọn̄ọde mmọn̄ emi akakanarede obio oro okụk ẹsịn ke usụn̄ en̄wen. Mmọ ẹma ẹka ẹkekụt inuaotop Babylon anade in̄wan̄ ẹnyụn̄ ẹdụk ẹsobo obio oro, owo ndomokiet inamke isịp. Babylon ana ndon ebe isua 2,500 idahaemi. Se ke idemfo se Bible eketịn̄de aban̄a n̄kpọ emi.

Kot Isaiah 13:19, 20, ekem ẹbọrọ mbụme emi ẹnyụn̄ ẹneme ẹban̄a enye:

  • Didie ke se itịbede inọ Babylon owụt ke prọfesi oro ekedi akpanikọ?

Ndon Babylon ke Iraq

6. Bible ama etetịn̄ se iditịbede ke ini nnyịn emi

Bible okot ini nnyịn emi “mme akpatre usen.” (2 Timothy 3:1) Se se Bible ọkọdọhọde ke eyetịbe ke ini nnyịn mi.

Kot Matthew 24:6, 7, ekem ẹbọrọ mbụme emi ẹnyụn̄ ẹneme ẹban̄a enye:

  • Bible ọkọdọhọ ke n̄kpọ editie didie ke mme akpatre usen?

Kot 2 Timothy 3:1-5, ekem ẹbọrọ mbụme emi ẹnyụn̄ ẹneme ẹban̄a mmọ:

  • Bible ọkọdọhọ ke mme owo ẹditie didie ke mme akpatre usen?

  • Ke otu mme n̄kpọ emi ẹbatde mi, ewe ke afo esikụt?

NDUSỤK OWO ẸSIDỌHỌ ẸTE: “Bible edi n̄wed n̄ke.”

  • Nso inam fi enen̄ede okụt ke ọfọn inịm se Bible etịn̄de?

 SE IKPEPDE

Mbụkeset, se ntaifiọk ẹkụtde, ye mme prọfesi Bible oro ẹsude owụt ke edi se inịm se Bible etịn̄de.

Se M̀mê Emeti

  • Ndi se Bible etịn̄de edi akpanikọ m̀mê edi ekọn̄-n̄ke?

  • Nso ye nso ke Bible eketịn̄ emi ntaifiọk ẹdide ẹdikụt ke edi ntre?

  • Ndi emenịm ke Bible ekeme nditịn̄ se iditịbede ke ini iso? Nso inam ọdọhọ ntre?

Se Afo Edinamde

KPEP N̄KPỌ EN̄WEN

Ndi enyene n̄kpọ emi Bible etịn̄de aban̄a se ntaifiọk ẹkpepde emi mînenke?

“Ndi Se Ntaifiọk Ẹkpepde Ekem ye Bible?” (Odu ke jw.org)

Nso ke Bible ọkọdọhọ ke eyetịbe ke “mme akpatre usen”?

“Ntịn̄nnịm Ikọ Bible 6 Emi Afo Okụtde Osude” (Enyọn̄-Ukpeme, May 1, 2011)

Se nte se Bible eketịn̄de aban̄a ukara Greece okosude.

Yak “Ikọ Mme Prọfet” Ẹsọn̄ọ Nnyịn Idem (5:22)

Se nte prọfesi Bible akanamde ete kiet okpụhọde nte enye ekesidade Bible.

“N̄kenịmke ke Abasi Odu” (Enyọn̄-Ukpeme No. 5 2017)

^ ikp. 9 Prọfesi esịne n̄ko se Abasi aduakde ndinam ke ini iso.

^ ikp. 25 B.C.E. ada ọnọ mbemiso eyo Christ; C.E. ada ọnọ tọn̄ọde ke eyo Christ.