Be ka se isịnede

Be ka se isịnede

 UKPEPN̄KPỌ 01

Bible Ekeme Ndin̄wam Fi

Bible Ekeme Ndin̄wam Fi

Ediwak owo ẹnen̄ede ẹyom ndidiọn̄ọ ntak emi uwem emi etiede ntem, ntak emi mme owo ẹbọde ufen ntem, ẹkpan̄ade ntem, ye se iditịbede ke ini iso. N̄kpọ en̄wen emi esifịnade ediwak nnyịn esidi nte idinamde inyene se ididiade ke usen ke usen, ye nte idinamde mme owo ke ubon nnyịn ẹkop inemesịt ke usen ke usen. Ediwak owo ẹkụt ibọrọ mbụme emi esifịnade mmọ ke Bible, ẹnyụn̄ ẹkụt ke item Bible esin̄wam mmimọ ke usen ke usen. Ndi emekere ke Bible ekeme ndin̄wam fi m̀mê owo en̄wen ekededi?

1. Utọ mbụme ewe ke Bible esibọrọ?

Bible esibọrọ utọ mbụme nte: Uwem ọkọtọtọn̄ọ didie? Nso ikada nnyịn idi ererimbot emi? Nso idi ufọn uwem emi? Ntak emi nti owo ẹsitienede ẹbọ ufen? Owo ama akpa esika m̀mọ̀n̄? Nso inam utọk, en̄wan, ye ekọn̄ okpon ntem ke ererimbot ke ini edide kpukpru owo ẹyom emem? Ndi ererimbot emi ọyọfọn tutu amama? Bible owụt ke idiọkke ndibụp mme utọ mbụme oro; ediwak owo ẹkụt ibọrọ utọ mbụme oro ke Bible.

2. Didie ke Bible ekeme ndinam uwem enem nnyịn?

Bible ọnọ nnyịn nti item. Ke uwụtn̄kpọ, enye etịn̄ se ikpanamde man ubon nnyịn enen̄ede enem, se ikpanamde esịt ama etịmede nnyịn, ye se ikpanamde man ikop inem utom nnyịn. Nte isụk inemede n̄kpọ ke n̄wed emi ika, oyokụt se Bible etịn̄de aban̄a mme n̄kpọ emi, oyonyụn̄ ekpep ediwak n̄kpọ eken. Oro ekeme ndinam fi okụt ke “ofụri N̄wed Abasi [kpukpru se idude ke Bible] . . . ọfọn.”2 Timothy 3:16.

N̄wed emi idịghe Bible. Edi enye ekeme ndin̄wam fi enen̄ede ekpep Bible. Mbọk sikot mme itie Bible oro okụtde ke n̄wed emi, nyụn̄ da mmọ domo ye se afo ekpepde mi.

 SỊN IDEM KPEP

Se nte Bible an̄wamde mme owo; se n̄ko se akpanamde man esinenem fi ndikot enye, ye ntak emi ọfọnde ayak ẹnam enye enen̄ede an̄wan̄a fi.

3. Bible ekeme ndin̄wam nnyịn idiọn̄ọ se ikpanamde

Bible etie nte un̄wana. Enye ekeme ndin̄wam nnyịn ifiọk nnennen n̄kpọ emi ikpanamde, onyụn̄ ekeme ndin̄wam nnyịn idiọn̄ọ se iditịbede ke ini iso.

Kot Psalm 119:105, ekem ẹbọrọ mbụme emi ẹnyụn̄ ẹneme ẹban̄a mmọ:

  • Ekere ke owo emi ekewetde psalm emi akada Bible didie?

  • Afo ada Bible didie?

4. Bible ekeme ndibọrọ nsio nsio mbụme nnyịn

Mma kiet ama edikụt ke ibọrọ mbụme emi akafịnade enye ke ata ediwak isua odu ke Bible. Se VIDIO emi, ekem ẹbọrọ mbụme emi ẹnyụn̄ ẹneme ẹban̄a mmọ.

  • Ke vidio oro, nso ye nso ikafịna mma oro?

  • Didie ke ndikpep Bible akan̄wam enye?

Bible owụt ke ọfọn isibụp mbụme. Kot Matthew 7:7, ekem ẹbọrọ mbụme emi ẹnyụn̄ ẹneme ẹban̄a enye:

  • Ndi emenyene mbụme ndomokiet emi ekerede ke Bible ekeme ndibọrọ?

 5. Emekeme ndinam esinenem fi ndikot Bible

Esinem ediwak owo ndikot Bible, mmọ ke ẹnyụn̄ ẹkụt ufọn. Se VIDIO emi, ekem ẹbọrọ mbụme emi ẹnyụn̄ ẹneme ẹban̄a mmọ.

  • N̄kparawa ye mme n̄kaiferi ke vidio oro ẹkedọhọ ke mmimọ isida ukot n̄wed didie?

  • Nso ikanam enem mmọ ndisikot Bible?

Bible ekeme ndidọn̄ nnyịn esịt onyụn̄ ekeme ndinam inyene idotenyịn. Kot Rome 15:4, ekem ẹbọrọ mbụme emi ẹnyụn̄ ẹneme ẹban̄a enye:

  • Ndi akpama ndifiọk n̄kpọ en̄wen mban̄a ndọn̄esịt ye idotenyịn oro Bible etịn̄de aban̄a?

6. Mbon en̄wen ẹkeme ndin̄wam nnyịn man Bible enen̄ede an̄wan̄a nnyịn

Ediwak owo ẹsima ndikot Bible, edi mmọ ẹdọhọ ke ndisitie ye owo en̄wen nneme se mmimọ ikotde esinen̄ede an̄wam mmimọ. Kot Utom 8:26-31, ekem ẹbọrọ mbụme emi ẹnyụn̄ ẹneme ẹban̄a enye:

Owo Ethiopia ama ayak ẹnam se enye okotde ke N̄wed Abasi an̄wan̄a enye. Ediwak owo ẹdọhọ ke ndisitie ye mbon en̄wen nneme n̄kpọ ke Bible esin̄wam mmimọ

NDUSỤK OWO ẸSIDỌHỌ ẸTE: “Ndikpep Bible edi ubiatini.”

  • Nso ke ọkpọbọrọ utọ owo oro? Nso inam ọdọhọ ntre?

 SE IKPEPDE

Bible ọnọ nnyịn nti item emi esin̄wamde owo ke usen ke usen, enye ọbọrọ mbụme emi afịnade ediwak owo, ọdọn̄ nnyịn esịt, onyụn̄ anam inyene idotenyịn.

Se M̀mê Emeti

  • Nso utọ item ke Bible esinọ nnyịn?

  • Utọ mbụme ewe ke Bible esibọrọ?

  • Nso ke akpama ndikpep ke Bible?

Se Afo Edinamde

KPEP N̄KPỌ EN̄WEN

Se n̄kpọ emi owụtde ke item Bible osụk enyenyene ufọn.

“Item Bible Osụk Enyenyene Ufọn” (Enyọn̄-Ukpeme No. 1 2018)

Toto ke ini eyenọwọn̄, ete kiet ama esikere ke uwem imọ inyeneke ufọn. Se nte Bible akan̄wamde enye.

Ini Uwem Ọkọtọn̄ọde Ndinem Mi (2:53)

Se nte item Bible ekemede ndinam ubon enen̄ede enem.

“N̄kpọ 12 Emi Ẹsinamde Ubon Enem” (Ẹdemede! No. 2 2018)

Se nte Bible anamde ediwak owo ẹdiọn̄ọ ata owo emi akarade ererimbot emi.

Ntak Emi Ekpekpepde Bible?—Akamba Esie (3:14)