Be ka se isịnede

Be ka se isịnede

 SE ẸKENAMDE ISUA OKO

Mbụk Ikpe ke 2016

Mbụk Ikpe ke 2016

Kpa ye ikpọ mfịna ye nsio nsio ikpe ke esop, nditọete nnyịn irenowo ye iban ke ẹwụt ke mmimọ ida ye Jehovah Abasi. Uwụtn̄kpọ mmọ anam kpukpru nnyịn ibiere ndisọn̄ọ nda ye Jehovah, inyụn̄ inịm ke enye “ayadian̄ade owo emi ọsọn̄ọde ada ye enye enịm.”​—⁠Ps. 4:⁠3.

ARGENTINA | Unen Ndikpep Eyen N̄kpọ Mban̄a Abasi

Ete ye eka Ruth ekedi Ntiense Jehovah ẹnyụn̄ ẹkpep enye akpanikọ, edi enye ama etre ndidụk mbono esop ini edide n̄kaiferi. Ekem enye ama enyene ufan erenowo onyụn̄ aman eyen an̄wan ọnọ ufan oro. Usen kiet Ruth ama okụt Mme Ntiense ẹbonde n̄wed ke okpokoro ẹkwọrọ ikọ ke itie emi mme owo ẹwakde ke obio La Plata, onyụn̄ eti se ete ye eka esie ẹkesikpepde enye. Emi ama anam enye afiak ọtọn̄ọ mbono esop onyụn̄ ọtọn̄ọ ndikpep ekpri adiaha esie Bible. Ete eyen esie ama ayat esịt sia Ruth esidụk mbono esop onyụn̄ ekpep eyen mmọ Bible. Enye ama esịn ikpe ke esop man Ruth etre ndikpep adiaha mmọ Bible m̀mê ndimen enye n̄ka mbono esop.

Ke esopikpe, ekpeibet Ruth ama ọdọhọ ke mmọ mbiba ẹnyene unen ndikpep eyen mmọ mban̄a Abasi, ke esop ikemeke ndidọhọ owo kiet kpọt ekpep ibọhọke ẹkụt ke se owo enye eken ekpepde ababiat eyen oro. Esop ẹma ẹdọhọ mmọ ke okposụkedi emi eyen oro edide isua inan̄ kpọt, ke enye enyene unen ndika ido ukpono ekededi! Ruth ama osio ikpe aka esop en̄wen man ẹsọn̄ọ se akpa esop oro ẹketịn̄de sia eyen oro ikponke ikem nditịn̄ ikọ idemesie. Esop emi ẹma ẹdọhọ ke eyen ekpri akaha ndibiere m̀mê idika ewe ido ukpono, ke ete ye eka ẹnyene unen ndikpep enye n̄kpọ mban̄a Abasi.

Ekpri adiaha Ruth esikot Bible kpukpru okoneyo, esinyụn̄ odụk mbono esop ye eka esie. Enye aduak ndikese Bethel ke Buenos Aires.

 AZERBAIJAN | Unen Nditịn̄ Se Owo Enịmde Nnọ Mbon En̄wen

Apostle Paul ọkọdọhọ ke edieke asan̄autom Abasi kiet ‘okụtde ukụt, kpukpru mbon eken ẹyetiene enye ẹkụt ukụt.’ (1 Cor. 12:26) Nte eketiede Mme Ntiense Jehovah ke ofụri ererimbot edi oro ini Sista Irina Zakharchenko ye Sista Valida Jabrayilova ẹkebọde ufen ke Azerbaijan. Ke February 2015, ẹma ẹkot mmọ ikpe ẹte ke ẹnam utom ufọkabasi emi ukara ẹkpande. Ebiereikpe ama ọdọhọ ẹkọbi mmọ tutu usen ikpe. Mmọ ẹma ẹsịne ke ufọk-n̄kpọkọbi n̄kpọ nte isua kiet sia ekedide ẹdori usen ikpe, ẹdorode. Ẹma ẹnọ mmọ ufen, owo ikonyụn̄ iyakke mmọ ẹnyene ndusụk n̄kpọ emi mmọ ẹkeyomde.

Azerbaijan: Valida Jabrayilova ye Irina Zakharchenko

Ẹma ẹdikpe ikpe oro ndien ke January 2016. Ebiereikpe ama ọdọhọ ke ikpe etịp mmọ onyụn̄ adia mmọ isop, edi enye ama abiat isop oro efep sia mmọ ẹma ẹsesịne ke ufọk-n̄kpọkọbi ẹbịghi mbemiso ẹkpede ikpe mmọ. Sista iba oro ikenyịmeke ubiereikpe oro, mmọ ẹma ẹmen ikpe ẹka Esop Usion̄o Ikpe ke Baku. Esop enye oro ẹkeda ke se akpa esop ẹkebierede; ntre mmọ ẹma ẹsio ikpe ẹka N̄kponn̄kan Esopikpe. Mmọ ẹma ẹnyụn̄ ẹnam Kọmiti Esop Edidiana Mme Idụt emi ẹsisede ẹban̄a unen owo ẹdiọn̄ọ, ke ntak ufen emi ẹkenọde mmọ ke ufọk-n̄kpọkọbi ye ke ntak emi ẹkenamde n̄kpọ ye  mmọ nte mmọ inyeneke unen nditịn̄ se mmọ ẹnịmde nnọ mbon en̄wen.

Idịghe ekpri ufen ke nditọete iban oro ẹkebọ, mmọ ke ẹnyụn̄ ẹdomo ndifiak n̄kot idem ndọn̄. Mmọ ẹma ẹkọm kpukpru ikọt Abasi ke akam ye ke mme n̄kpọ eken emi ẹkenamde ẹnọ mmọ. Sista Jabrayilova ama ewet ọdọhọ Otu Emi Ẹsede Ẹban̄a Utom Nnyịn ete: “Akam mbufo ama an̄wam nnyịn iyọ afanikọn̄ oro, mma nnyụn̄ n̄kụt ufọn akam mbufo ke idem mi. Tutu amama ndifreke nte mbufo, Jehovah, ye nditọete nnyịn ke ofụri ererimbot ẹkewụtde ke imama nnyịn inyụn̄ ikere iban̄a nnyịn.”

ERITREA | Ẹkọbi ke Ntak Mbuọtidem Mmọ

Mme Ntiense Jehovah emi ukara Eritrea ẹkekọbide ke ntak mbuọtidem mmọ ẹma ẹsịm 55 ke July 2016. Ẹsịn Paulos Eyassu, Isaac Mogos, ye Negede Teklemariam ke ufọk-n̄kpọkọbi toto ke September 1994. Enyene nditọete usụkkiet efen emi ukara ẹkọbide ke isua duop idahaemi.

Enyene eti n̄kpọ emi eketịbede ke Eritrea ke January 2016. Esop ẹma ẹkpe ikpe Mme Ntiense emi ẹkemụmde ke ini Editi ke Asmara ke April 2014. Akpa ini ukara ẹkemende Mme Ntiense Jehovah emi mmọ ẹdọhọde ke “ẹbiat ibet” ẹka esop yak ẹkekan̄ idem ekedi oro. Ikakpaha nnyịn idem ini esop ẹkedọhọde ke ikpe etịp ediwak nditọete oro, ke mmọ ẹkenịm mboho emi “ukara ẹkpande.” Ẹma ẹdia mmọ isop ẹnyụn̄ ẹyak mmọ ẹnyọn̄ọ. Edi esịt Sista Saron Gebru ikayakke enye enyịme ndikpe isop emi ẹkedọhọde enye ekpe. Ntre, ẹma ẹnọ enye aka n̄kpọkọbi ọfiọn̄ itiokiet. Ẹma ẹsiyak mme owo ẹdụk ẹkese enye ini kiet ke urua, enye okonyụn̄ ọdọhọ ke owo idiọkke imọ ukama ke ufọk-n̄kpọkọbi. Enye ye nditọete 54 eken ke ufọk-n̄kpọkọbi ẹkop inemesịt ke kpukpru akam emi ibọn̄de isịn mmọ, sia ‘imesiti mmọ emi ẹdude ke n̄kpọkọbi nte n̄kpọ eke ẹkọbide nnyịn ye mmọ.’​—⁠Heb. 13:⁠3.

 GERMANY | Ẹsịn Enyịn̄ Nnyịn ke Otu Ikpọ Ido Ukpono Emi Mînaha Ẹkpe Tax

Ke December 21, 2015, stet Bremen ke Germany ẹma ẹsịn enyịn̄ Mme Ntiense Jehovah ndien ke otu ikpọ ido ukpono emi mînaha ẹkpe tax. Ini oro ndien ke ikpe isua inan̄ emi ikasan̄ade ke nsio nsio esopikpe ke Germany ke ntak n̄kpọ emi eketre. Ke ini akwa esopikpe kiet ke Berlin ẹkebierede ẹte ẹsịn enyịn̄ ido ukpono Mme Ntiense Jehovah ke otu oro, ata ediwak Stet ke otu Stet 16 ke Germany ẹma ẹnam oro, edi stet Bremen ikenyịmeke ke ntak nsu emi mme asua ẹkesude ẹdori nnyịn.

Ke 2015, Akwa Esop Ibet Ukara ke Germany ẹma ẹdọhọ ke mmọ nditre ndisịn enyịn̄ Mme Ntiense ke otu oro ọwọrọ ke mmọ ikponoke unen Mme Ntiense Jehovah nte ibet ọdọhọde. Se esop oro eketịn̄de owụt ke ibet Germany enyịme Mme Ntiense Jehovah ẹnyene ifụre ndinam n̄kpọ Abasi ke Bremen. Ẹsịn enyịn̄ esop Mme Ntiense Jehovah do idahaemi ke otu ikpọ ido ukpono emi mînaha ẹkpe tax, mmọ ẹnyụn̄ ẹtiene ẹbọ ufọn emi utọ ido ukpono ntre ẹsibọde ẹto ukara.

KYRGYZSTAN | Unen Nditịn̄ Se Owo Enịmde Nnọ Mbon En̄wen

Ke March 2013, mbon ukara ke Osh ke Kyrgyzstan, ẹma ẹsu nsu ẹdori Sista Oksana Koriakina ye Nadezhda Sergienko eka esie, ẹnyụn̄ ẹkot mmọ ikpe. Ekpeibet ọkọdọhọ ke mmọ ẹkebian̄a mme owo ẹbọ okụk ke ini ẹsan̄ade ẹkwọrọ ikọ ẹnọ mbọhọidụn̄ mmọ. Ebiereikpe ama ọdọhọ ẹkûyak mmọ ẹkpọn̄ ufọk mmọ tutu ẹtọn̄ọ ikpe oro ke esop. Ke October 2014, esop ẹma ẹkụt ke mbon emi ẹketiede ntiense ke esop ẹketetịbi ikọ ẹtịn̄ ẹdian mmọ, ke mme okot-ikpe iketieneke se ibet etịn̄de, ẹnyụn̄ ẹdọhọ ke nditọete oro iduehe. Esop en̄wen emi ẹkesiode ikpe oro ẹka ẹma ẹsọn̄ọ ubiereikpe oro ke October 2015.

Edi ekpeibet emi obio Osh ẹkedade ama afiak osio ikpe oro aka N̄kponn̄kan Esopikpe Kyrgyzstan. Esop oro ẹma ẹbiat se akpa esop ẹkebierede, ẹnyụn̄ ẹdọhọ ẹfiak ẹtọn̄ọ ikpe oro ke  akpa. Ke ufọkesop oro ke April 2016, mme ekpeibet nditọete iba oro ẹma ẹdọhọ yak ẹbiat ikpe oro ẹfep, ke ini ikpe oro ama ebe nte ibet ọdọhọde. Ebiereikpe ikekemeke ndinyan̄a, akana enye abiat ikpe oro efep. Nte ẹkesan̄ade ẹbiat ikpe oro ẹfep ofụri ofụri ekedi oro.

Ofụri ini ndusịghede oro, nditọete emi ẹkesụk ẹkokop inemesịt. Sista Sergienko ọkọdọhọ ete, “Mme owo ẹsiyat esịt ke ini ẹfịkde mmọ, edi mma n̄kụt nte Jehovah adade nditọete mi owụt mi ke imama mi, ke imọ ifreke mi. Ima ikụt ke enye do ye nnyịn.” Se iketịbede oro ama anam mmọ ẹkụt ke Jehovah ke ananam se enye ọkọn̄wọn̄ọde ke Isaiah 41:​10, ete: “Kûkop ndịk . . . Ami nditreke ndida ubọk nnasia edinen ido mi nsọn̄ọ mmụm fi n̄kama.”

KYRGYZSTAN | Esop Ẹdọhọ ke Imenyene Unen Ndinam N̄kpọ Abasi

Ke August 9, 2015, bodisi duop ẹma ẹbụmede ẹdụk ebiet emi ẹkenịmde mbono esop ke Osh ke Kyrgyzstan. Mbon emi ẹkedụkde mbono esop oro ẹma ẹbe 40. Mmọ ẹma ẹdọhọ nditọete ẹtre mboho oro ke “ukara ẹkpan” utọ mboho oro, ẹnyụn̄ ẹdọhọ ke imọn̄ itop kpukpru mmọ. Mme bodisi oro ẹma ẹmụm nditọete irenowo duop ẹka ọfis mmọ; mmọ ẹma ẹnyụn̄ ẹmịgha owo usụkkiet do idiọk idiọk, ẹsuene mmọ, ẹkem ẹyak mmọ ẹnyọn̄ọ. Ke usen iba ama ekebe, bodisi ẹma ẹfiak ẹkemụm Nurlan Usupbaev, emi ẹkesịnede ke otu mbon emi ẹma ẹkemomụm ẹmia, ẹnyụn̄ ẹkot enye ikpe ẹte ke ama abiat ibet ke ndikenịm mbono esop oro.

Ini ẹkekpede ikpe Brọda Usupbaev ke esopikpe obio Osh, ebiereikpe ama ọdọhọ ke imọ ikwe se ete mbon eduede onyụn̄ abiat ikpe oro efep. Ekpeibet emi okokotde eyenete oro ikpe ama osio ikpe oro aka esop usion̄o ikpe, kpa ke Osh oro. Esop enye oro n̄ko ẹma ẹbiat ikpe oro ẹfep, ẹnyụn̄ ẹdọhọ ke Brọda Usupbaev iduehe sia ẹma ẹsịn enyịn̄ ido ukpono Mme Ntiense Jehovah ke n̄wed ke Kyrgyzstan.

 Ekpeibet emi okokotde eyenete oro ikpe ikosụk inyịmeke; enye ama afiak osio ikpe oro aka N̄kponn̄kan Esopikpe ke Kyrgyzstan. N̄kponn̄kan Esopikpe oro ẹma ẹbiat ikpe oro ẹfep ke March 2016, ẹsọn̄ọ ubiereikpe esop iba eken, ẹnyụn̄ ẹwụt ke Mme Ntiense Jehovah ẹnyene unen ndinịm mbono esop ke Kyrgyzstan. Ikpe en̄wen emi nditọete nnyịn ẹkekotde mme bodisi obio Osh odu ke esop, owo itọn̄ọke kan̄a.

RUSSIA | Esop Ẹdọhọ ke Imenyene Ifụre Ndinam N̄kpọ Abasi Nnyịn

Kpa ye ofụri ntịme emi ukara Russia ẹnamde mme owo ẹsịn ye Mme Ntiense Jehovah, eti mbụk osụk odu. Ke October 2015, ekpeibet kiet ama esịn ikpe ke esop ete ẹsio enyịn̄ ido ukpono Mme Ntiense Jehovah ẹfep ke Tyumen. Tyumen odu n̄kpọ nte itiat 1,300 ọkpọn̄ Moscow. Kpa ye emi esop ke Tyumen ẹkekụtde ke se mme bodisi ẹketịn̄de ẹdian Mme Ntiense Jehovah ẹdi nsu, esop mmọ ẹma ẹdọhọ ke ikpe etịp  mmọ. Edi ke April 15, 2016, N̄kponn̄kan Esopikpe ke Russia ẹma ẹkpụhọ ubiereikpe ekpri esop oro, ẹnyụn̄ ẹdọhọ ke “eti ntak ndomokiet idụhe ndisio enyịn̄ ido ukpono Mme Ntiense Jehovah mfep ke n̄wed ke Obio Tyumen.” Ini ebiereikpe okokotde ubiereikpe oro, nditọete irenowo ye iban 60 emi ẹkedude ke ufọkesop oro ẹma ẹdaha ẹda ẹkwak ubọk etieti.

Ikọt Jehovah ke Russia ẹbiere ke mmimọ idikpọn̄ke Jehovah kpa ye ‘nsio nsio n̄kpọekọn̄ emi ẹbotde ẹban̄a mmọ.’​—⁠Isa. 54:⁠17.

RWANDA | Unen Nditọ Ufọkn̄wed ke N̄kpọ Ido Ukpono

Isua ifan̄ emi ebede, ẹbịn nditọ Mme Ntiense ke ufọkn̄wed ke Rwanda sia mmọ isịnke idem ke n̄kpọ ido ukpono efen m̀mê ke pọlitiks ke ufọkn̄wed. Ke December 14, 2015, ukara ẹma ẹnọ ibet emi edinamde ẹtre ndifịna owo ke ntak n̄kpọ ido ukpono ke ufọkn̄wed. Ibet emi ọdọhọ yak kpukpru ufọkn̄wed ẹyak nditọ ufọkn̄wed ẹnam n̄kpọ ẹtiene se ido ukpono mmọ ẹkpepde.

Ke June 9, 2016, ẹma ẹsịn ibuotikọ emi, “Rwanda Acts to Counter Religious Discrimination in Schools” ke Mbụk N̄kpọntịbe ke jw.org. Mme andinyene ọwọrọetop n̄wed mbụk n̄kpọntịbe kiet ke Intanet ke Rwanda ẹma ẹmen ibuotikọ oro ẹsịn ke mbụk n̄kpọntịbe mmọ. Mbon emi ẹkekotde enye do ẹma ẹbe 3,000, ediwak mmọ ẹma ẹnyụn̄ ẹtoro se ukara ẹkenamde oro. Ibet oro enem Mme Ntiense ke Rwanda, sia emi ọwọrọ ke owo idifịnake nditọ mmọ aba ke ufọkn̄wed ite ẹsịn idem ke n̄kpọ ido ukpono efen.

Rwanda: Nditọ ufọkn̄wed emi ẹma ẹfiak ẹtọn̄ọ n̄wed

SOUTH KOREA | Unen Mbon Emi Esịt Mmọ Mîyakke Ẹdụk Ekọn̄

Esop Ibet Ukara ke idụt oro ẹma ẹbiere ikaba ẹte ke ibet ọdọhọ irenowo ẹdụk ekọn̄, edi n̄kpri n̄kpri esopikpe do ye mbon emi ukara ẹkọbide ke ntak emi esịt mîyakke mmọ ẹdụk ekọn̄ ẹma ẹdọhọ yak mmọ ẹfiak ẹse n̄kpọ oro. N̄kpọ oro ama anam esop oro ẹnyịme yak mbon emi mîkamaha ndidụk ekọn̄ ẹdikan̄ idem ke July 9, 2015. Brọda Min-hwan Kim, emi ekesịnede isua kiet ye ubak ke n̄kpọkọbi ke ntak emi esịt esie mîyakke enye odụk ekọn̄, ọdọhọ ete: “Ẹma ẹkọbi mi, ekem ẹsana mi ẹyak. Edi akam mi edi yak owo okûnam mbon efen utọ n̄kpọ emi. Edieke ẹkpenọde mmọ utom en̄wen emi mîdịghe utom ekọn̄ ẹnam, mmọ ẹkpenam ufọn ẹnọ obio emi.” Ibịghike, esop oro ẹmọn̄ ẹnọ ubiereikpe mmọ.

TURKMENISTAN | Bahram Hemdemov

Brọda Hemdemov emi edide isua 53 enyene n̄wan ye nditọ irenowo inan̄. Enye esisịn idem anam n̄kpọ Abasi etieti onyụn̄ edi owo emi ẹkponode-kpono ke obio. Ke May 2015, esop ẹma ẹbiere n̄kpọkọbi isua inan̄ emi asan̄ade ye ọkpọsọn̄ ufen ẹnọ enye, ẹte ke enye enịm mboho emi ukara ẹkpande ke ufọk esie. Ẹsịn enye ke ntaha ntaha ufọk-n̄kpọkọbi kiet emi ẹsinọde owo nsat ufen. Ikpọ owo ufọk-n̄kpọkọbi ẹsifak enye mbụme ke ubọk ke ubọk ẹnyụn̄ ẹtịm enye n̄kpa n̄kpa. Kpa ye kpukpru emi, enye ye n̄wan ye nditọ mmọ imaha ndikan̄ Jehovah. Gulzira n̄wan esie esika ekese enye ndusụk ini onyụn̄ ọsọn̄ọ enye idem.

Imesibọn̄ akam isịn nsio nsio ikọt Jehovah emi ikopde nte ẹsọn̄ọde ẹda ye Jehovah. Uwụtn̄kpọ mmọ esinam ika iso isọn̄ọ ida ye Jehovah inyụn̄ inịm ke enye “idikpọn̄ke mbon emi ẹsọn̄ọde ẹda ye enye,” nte enye ọn̄wọn̄ọde ke Psalm 37:⁠28.