Be ka se isịnede

Be ka se isịnede

Sierra Leone: Owo ke eteme Crystal ufọk emi inan odude

 NTE ẸKWỌRỌDE IKỌ ẸNYỤN̄ ẸKPEPDE MME OWO N̄KPỌ KE OFỤRI ISỌN̄

Africa

Africa
  • IDỤT 58

  • IBATOWO 1,109,511,431

  • MME ASUANETOP 1,538,897

  • UKPEPN̄KPỌ BIBLE 4,089,110

Enye Ama Ọbọn̄ Akam Oyom Mme Inan

Isụn̄utom emi ekerede Crystal ke Sierra Leone odu ke esop usem idiọn̄ọ. Usen kiet mbemiso enye akade ukwọrọikọ, enye ama ọbọn̄ akam ete Abasi an̄wam imọ ikụt mme inan. Usenubọk oro enye ama asan̄a usụn̄ efen aka ndise owo emi enye ọkọkwọrọde ikọ ọnọ. Enye ama obụp mme owo ke usụn̄ oro m̀mê inan ndomokiet  odụn̄ ke usụn̄ oro. Ẹma ẹnyan ubọk ẹwụt enye ufọk kiet. Enye ama okokụt n̄kaiferi kiet do. N̄kaiferi oro ama ama ukwọrọikọ esie onyụn̄ ọdọhọ ke ikpama ndidụk mbono esop ke usem idiọn̄ọ. Mme owo ke ufọk oro ẹma ẹbụp Crystal m̀mê enye akpama mmimọ iwụt enye inan efen. Owo enye oro ama ama ukwọrọikọ esie n̄ko. Kpa ye edide Crystal ama esikwọrọ ikọ ke efak oro ediwak ini, akananam enye ikwe inan iba oro enye okokụtde usenubọk oro. Crystal enịm ke Jehovah akan̄wam imọ ikụt inan iba oro.

“Ami ke Ẹkekwọrọ Ikọ Oro Ẹnọ!”

Usen kiet ke ini Emmanuel emi odude ke Liberia akawatde aka mbono esop ke Ufọkmbono Obio Ubọn̄, enye ama okụt akparawa kiet nte esịnede ediye ọfọn̄ ada ke mbenusụn̄. Iso ama abiara akparawa oro. Ntre Emmanuel ama atuak ada oyom ndin̄wam enye. Akparawa oro ama ọdọhọ enye ke imọ ikere Moses, ke ẹma ẹyịp kpukpru okụk imọ okoneyo oro osụk ebede, ke ọdọn̄ imọ ndiwot idem. Emmanuel ama akpan̄ utọn̄ okop se Moses etịn̄de, ekem ọdọhọ enye etiene imọ edi Ufọkmbono Obio Ubọn̄. Mmọ mbiba ẹma ẹsan̄a ntre ẹka. Se Moses okokopde do ama anam enye atua. Ke ẹma ẹkekụre utịn̄ikọ ofụri owo, Moses ama ọdọhọ ete: “Ami ke ẹkekwọrọ ikọ oro ẹnọ! Mme Ntiense Jehovah ẹdi ata isio isio.” Ke mbono esop ama akasuana, Moses ama ọdọhọ ẹsikpep imọ Bible. Idahaemi enye esidụk mbono esop kpukpru ini.

 “Ndịghe Okpono Ndem”

Enyene ekpri eyenan̄wan kiet emi edide isua 15 ke Guinea-Bissau, enye ekere Aminata. Ini enye ekedide isua 13, titia mmọ ama ọdọhọ yak mmọ ẹdrọ n̄kpọ emi ẹsifụhọde ke iso ke kanival ye mme n̄kpọ eken emi ẹsidade ẹnam kanival. Aminata ikọdrọke utọ n̄kpọ oro, enye ọkọdrọ ediye ebiet emi unam ye flawa ẹdude onyụn̄ ewet do, “Paradise.” Ke ini kpukpru mmọ ẹkemende se mmọ ẹkedrọde ẹkenọ titia mmọ, enye ama ọdọhọ Aminata ke idịghe se imọ ikọdọhọde ke enye ọdrọ, onyụn̄ ọnọ enye ikpîkpu. Ke ete oro ama ọkọwọrọ ke klas, Aminata ama aka ebịne enye okobụp enye m̀mê mmanie ikọtọn̄ọ kanival.

Ete oro ama ọdọhọ ete, “Mme okpono ndem.”

Guinea-Bissau: Aminata ke ọdrọ “Paradise”

Aminata ama ọdọhọ enye ete: “Nsitieneke nnam utọ usọrọ oro sia ndịghe okpono ndem. Nnịm ke Abasi ayanam isọn̄ emi edi Paradise, oro akanam ndrọ se n̄kọdrọde oro.” Titia oro ama ọdọhọ ke iyọnọ enye test en̄wen, emi edide mbụme kpọt. Aminata ama ewet test oro onyụn̄ enyene mbụme 18 ke otu mbụme 20.

Ata Ediwak Owo Ẹma Ẹdi

Ke ekpri obio kiet ke Malawi, mme asuanetop itiaba kpọt ẹdu ke ekpri otu emi odude do. Ebiet emi mmọ ẹsisopde idem edi efe emi ẹdade eto, mbiet, ye mbri ẹnam. Esenyịn circuit ama ekese mmọ ke ini Editi, ntre mmọ ẹma ẹsịn idem ẹkwọrọ ikọ ẹnyụn̄ ẹkot ediwak owo ẹdi Editi n̄kpa Christ. Ẹkekọn̄ utuenikan̄ ke enyọn̄ ẹnọ etịn̄ikọ ada okụt usụn̄ ọkwọrọ ikọ. Mme owo ẹma ẹwak tutu  ẹkpere nditie nsịm itie emi etịn̄ikọ akadade. Ama enem mme asuanetop 7 oro etieti ndikop ke owo 120 ẹdụk Editi oro!

Malawi: Owo 120 ẹkedụk Editi mi

Ekpri N̄wed Kiet Akanam Ndọ Esie Ọfọn

Ndikwọrọ ikọ ke ebiet emi mme owo ẹwakde an̄wam ata ediwak owo, kpa ye oro owo mîsisọpke idiọn̄ọ mbon emi ukwọrọikọ emi an̄wamde. Ke Lomé emi edide ibuot obio Togo, mma kiet ama asan̄a mmen̄e mmen̄e aka itie emi ẹkebonde n̄wed nnyịn ekemen ekpri n̄wed emi ẹkotde, Emekeme Ndinam Ubon Fo Ẹkop Inemesịt. Ẹma ẹneme se idude ke Ephesus 5:3 ye enye ekpri ekpri. Enye ama ọnọ nditọete oro nọmba fon esie onyụn̄ ọbọ eke mmọ. Ke urua iba ama ekebe, enye ama okot onyụn̄ ọdọhọ ete: “Kpa ye emi mmen̄kesinen̄ekede mma Mme Ntiense Jehovah, mma n̄kot n̄wed oro. N̄wed oro ọfọn tutu. Enye an̄wam mi n̄kọk ndusụk mfịna ke ndọ mi, mmonyụn̄ nda enye n̄n̄wam ebe ye n̄wan iba. Mmedikụt ke se n̄kesikerede mban̄a Mme Ntiense Jehovah ikenenke. Mbọk ẹdi ẹdikpep mi Bible.” Ẹma ẹketọn̄ọ ndikpep enye Bible ẹnyụn̄ ẹkpep ebe ye n̄wan kiet emi enye akadade n̄wed oro an̄wam.

Enye Ama Akabade Ekpri N̄wed Kiet

Ke ekpri obio kiet emi ekerede Ankasie ke Ghana, owo ifan̄ ẹsibon n̄kpọurua mmọ ke mben akamba efak kiet ke obio oro ẹnyam. Kpukpru Monday, nditọete nnyịn ẹsidọn̄ n̄wed nnyịn ke n̄kpọ ẹda ẹkwọrọ ikọ ke efak oro n̄ko. Eyenete nnyịn emi ekerede Samuel ama ọkwọrọ ikọ ọnọ akparawa kiet emi ekerede Enoch ke itie oro onyụn̄ ọnọ enye ekpri n̄wed emi ẹkotde Kpan̄ Utọn̄ Nọ Abasi. Enoch ama ọbọ onyụn̄ obụp Samuel m̀mê enye enyene n̄wed ke usem Kusaal.

Ghana: Enye akakabade ekpri n̄wed oro esịn ke usem Kusaal

 Samuel ama ọdọhọ ke idụhe, edi ke imenyene n̄wed ke usem Frafra emi ebietde usem Kusaal. Ekem ko, Enoch ama aduak ndika obio mmọ, edi mbemiso enye akade enye ama edidọhọ ẹnọ imọ n̄wed ida isọk mme iman imọ.

Ini Enoch afiakde ọnyọn̄ edi Ankasie, enye ama ọnọ Samuel n̄wed kiet emi ẹwetde n̄kpọ ẹyọhọ. N̄wed Kpan̄ Utọn̄ Nọ Abasi emi enye ama akakabade esịn ke usem Kusaal ke ekedi! Enoch ke esidụk mbono esop, ke esinyụn̄ ekpep n̄kpọ ke ubọk ke ubọk.