Be ka se isịnede

Be ka se isịnede

 GEORGIA

Ebe Mi Ikamaha Ndiyak Bible Nnịm!

Marina Kopaliani

Ebe Mi Ikamaha Ndiyak Bible Nnịm!
  • AKAMANA KE 1957

  • AKANA BAPTISM KE 1990

  • Marina ye Badri ebe esie ikesikpaha mba ndikwọrọ ikọ, kpa ye oro ẹkenyenede nditọ irenowo iba. Ekem, ẹma ẹmek Brọda Badri ẹsịn ke Kọmiti Idụt; enye ama anam n̄kpọ Abasi esịm usen emi enye akakpade ke 2010.

KE 1989, ami ye Badri ebe mi ima ikụt Mme Ntiense Jehovah ke ufọk mbọhọidụn̄ nnyịn. Brọda Givi Barnadze emi ekekpepde mbọhọidụn̄ nnyịn ikọ Abasi ikenyeneke Bible, sia Bible ama anana etieti ke Georgia ini oro.

Ima ima se ikokopde oro; ama onyụn̄ ọdọn̄ nnyịn ndinyene Bible. Ke ini ebe mi okokụtde eyeneka esie erenowo, ebe mi ama ọdọhọ enye ke imoyom Bible. Idem ama akpa ebe mi ke ini eyeneka esie ọkọdọhọde enye ke ibịghike imọ ikedep obufa Bible usem Georgian, onyụn̄ ọdọhọ ke iyayak Bible oro inọ ebe mi.

Ke ini ebe mi ekedide edisịm ufọk, enye ama etie ke okpokoro okot Bible oro tutu ufọt okoneyo. Ke enye ama ekedemede idap edem usen, enye ama afiak ọtọn̄ọ ndikot Bible oro. Ke ini n̄kọyọn̄de utom ndi, mma n̄kụt enye osụk etiede ke okpokoro okot Bible oro. Enye ikamaha ndiyak Bible  oro nnịm! Mma ndọhọ yak enye eben̄e usen ifan̄ ke itieutom mmọ man ada okot Bible oro ama. Ikebịghike enye ama okot Bible oro ama.

Ke ini Brọda Barnadze ọkọtọn̄ọde ndikpep nnyịn n̄wed Akpanikö oro Adade osim Nsinsi Uwem, esịt ama enem nnyịn etieti sia ima inyene Bible. Nnyịn ikenyeneke n̄wed oro, enye ikonyụn̄ inyeneke Bible. Ekesidi enye ama ada n̄wed esie edi, nnyịn ida Bible nnyịn idi. Ke isua kiet ama ekebe, ami ye Badri ebe mi ima ina baptism.