Be ka se isịnede

Be ka se isịnede

Mme Ndutịm Ubọ Ukpep

Mme Ndutịm Ubọ Ukpep

Ẹdiọn̄ọ Mme Ntiense Jehovah ke ofụri ererimbot kaban̄a utom unọ ukpep Bible mmọ.

KE NTAK edida oro mmọ ẹdade utom unọ ukpep Bible mmọ ke ata akpan n̄kpọ, ndusụk owo ẹkeme ndikere ke mmọ inyeneke udọn̄ ke ubọ ukpep ererimbot. Edi idịghe ntre. Man ekpep mbon en̄wen, ana andikpep ebem iso ọbọ ukpep, ndien emi oyom nnennen ukpep ye item. Ntre ke adianade ye edida ubọ ukpep ererimbot nnam n̄kpọ nte ọfọnde, Mme Ntiense Jehovah ke  ediwak isua ẹmebọ ufọn ẹto nsio nsio ndutịm ubọ ukpep ye mme ufọkn̄wed ẹmi Watch Tower Bible Society onịmde. Mmọemi ẹmen̄wam Mme Ntiense ye mbon en̄wen ndifori idemmọ ke n̄kan̄ eke ekikere, eke ido uwem, ye eke spirit.

Ke uwụtn̄kpọ, ke ediwak idụt Mme Ntiense Jehovah ẹkere nte ikpan̄wamde mbon emi mîkakaha n̄wed, m̀mê mbon emi mîdiọn̄ọke ndikot m̀mê ndiwet n̄kpo. Man ẹn̄wam utọ mbon emi, mmọ ẹma ẹbiere ndisiak ufọkn̄wed emi ẹdikpepde mmọ nte ẹkpekotde ẹnyụn̄ ẹwetde n̄kpọ.

Ama enyene ini emi ediwak Mme Ntiense Jehovah ke Nigeria mîkekemeke ndikot n̄wed nte nditọ Nigeria eken, edi ufọkn̄wed emi anam ata ediwak mmọ ẹkeme ndikot n̄wed idahaemi. Mme Ntiense Jehovah ke Mexico ẹketọn̄ọ ndinịm ufọkn̄wed emi ke 1946, ndien ke ufan̄ isua kiet kpọt, n̄kpọ nte owo 6,500 ẹma ẹdiọn̄ọ ndikot n̄wed nnyụn̄ n̄wewet n̄kpọ. Idahaemi, ibat owo emi ufọkn̄wed emi an̄wamde ẹdiọn̄ọ ndikot n̄wed nnyụn̄ n̄wewet n̄kpọ ebe 100,000. Ẹnịm ufọkn̄wed emi n̄ko ke ediwak isua idahaemi ke nsio nsio idụt nte Bolivia, Cameroon, Nepal, ye Zambia. Mme Ntiense Jehovah ẹsio n̄wed emi ẹsidade ẹnịm ufọkn̄wed emi. Ẹkot enye Apply Yourself to Reading and Writing. Ibat n̄wed emi ebe miliọn itiaba, ẹnyụn̄ ẹsio enye ebe usem 100.

Mme andise n̄kpọ mban̄a ukpepn̄wed ediwak ini ẹsitịn̄ nti nkpọ ẹban̄a ufọknwed nnyịn emi ke mme idụt ẹmi ẹnịmde mmọ. Ke uwụtn̄kpọ, ke Mexico, anamutom ukara kiet ekewet ete: “Mmadat esịt ke mbufo ndidiana ye nnyịn, ndien ke ibuot ukara stet mmọnọ mbufo itoro ofụri esịt mmọ kaban̄a akwa utom mbufo oro akade-ka iso ke ufọn mme owo ke ndida un̄wana ifiọk nsọk mbon oro mîfiọkke ndikot nnyụn̄ n̄wet n̄wed. . . . Mbufo ẹkpekam ẹkụt unen ke utom unọ ukpep mbufo.”

Mme Ufọkn̄wed Eken

Ẹsikpep nditọ ufọkn̄wed ndikot n̄wed nnyụn̄ nda ke iso owo ntịn̄ ikọ

Mme Ntiense Jehovah idaha mbre isịn ke utom edikpep mme owo Bible emi mmọ ẹnamde. Ntak edi oro mmọ ẹsịnde idem ẹnam se ẹkekeme ndikpep mme owo Bible edifọn edifọn. Ke uwụtn̄kpọ, ke kpukpru esop Mme Ntiense Jehovah ke ofụri ererimbot emi edide awak ebe 119,000, ẹsikpep mme owo nte ẹkpekotde n̄wed ọfọn ẹnyụn̄ ẹtịn̄ ikọ an̄wan̄a owo. Idem nditọwọn̄, ke ndondo oro mmọ ẹdiọn̄ọde ndikot n̄wed, ẹkeme ndisịn enyịn̄ nnyụn̄ mbọ ukpep emi, emi enyenede ufọn ọnọ mmọ n̄ko ke mme ikpehe efen, esịnede uka n̄wed ererimbot mmọ. Ediwak mme andikpep ẹma ẹdọhọ ẹte ke nditọ ufọkn̄wed ẹdide Mme Ntiense ẹsitịn̄ ekikere mmọ ata mfọn mfọn.

Ẹsịn udọn̄ ufiop ufiop ẹnọ edikot n̄wed ke mme esop mmọ, ẹnyụn̄ ẹsịn udọn̄ ẹnọ ubon kiet kiet kpasụk ntre ẹte ẹnyene itie ubonn̄wed ubon emi ọdọn̄ọde ediwak n̄wed ndiyụhọ udọn̄ nditọwọn̄ ye ikpọ owo

Adianade do, ẹsịn udọn̄ ẹnọ esop Mme Ntiense Jehovah kiet kiet ndinyene itie ubonn̄wed ọdọn̄ọde mme un̄wam ukpep Bible, mme n̄wed ukabadeikọ, ye mme n̄wed ndụn̄ọde eken  ke Ufọkmbono Obio Ubọn̄, m̀mê itie mbonoesop, esie. Itie ubonn̄wed emi odu ọnọ kpukpru owo ẹmi ẹsidụkde mbonoesop ke Ufọkmbono Obio Ubọn̄ oro. Ẹsịn udọn̄ ufiop ufiop ẹnọ edikot n̄wed ke mme esop mmọ, ẹnyụn̄ ẹsịn udọn̄ ẹnọ ubon kiet kiet kpasụk ntre ẹte ẹnyene itie ubonn̄wed ubon emi ọdọn̄ọde ediwak n̄wed ndiyụhọ udọn̄ nditọwọn̄ ye ikpọ owo.

Ikpọ Ufọkn̄wed

Watch Tower Society n̄ko onịm mme ufọkn̄wed ẹmi ẹnọde mme isụn̄utom ẹdide iren ye iban ukpep, ọkọrọ ye mme ufọkn̄wed ndida nnọ iren ẹmi ẹnyenede  mme mbiomo ke esop n̄kann̄kụk ukpep. Mme ufọkn̄wed ẹmi ẹdi mme uyarade efen efen nte ke Mme Ntiense Jehovah ẹda ubọ ukpep ke ata akpan n̄kpọ.