Be ka se isịnede

Be ka se isịnede

 IBUOTIKỌ MAGAZINE EMI | EWE ENỌ ỌFỌN AKAN?

“Idụhe Enọ Emi Mmade Ntem”

“Idụhe Enọ Emi Mmade Ntem”

Se ekpri eyenan̄wan isua 13 eketịn̄de edi oro ke ini ẹkenọde enye eyen ebua. Mma kiet emi anamde akamba mbubehe ọdọhọ ke kọmputa emi ete imọ ọkọnọde imọ ke ini ikodude ke ufọkn̄wed sekọndri ekedi mfọnn̄kan enọ oro akanam ẹnọde imọ. Ete kiet emi ọdọde n̄wan obufa ọdọhọ ke kad emi n̄wan imọ akanamde ọnọ imọ ke usen emi ndọ mmimọ ọkọyọhọde isua kiet, edi mfọnn̄kan enọ oro akanam ibọde.

Kpukpru isua, ediwak owo ẹsibiat ini ẹyom enọ emi mmọ ẹdinọde ufan m̀mê mbonubon mmọ ke usen akpan edinam. Ndien esinem ediwak owo ndikop mbon oro mmọ ẹkenọde n̄kpọ ẹdọhọde ke imenen̄ede ima se ẹkenọde mmimọ. Nso kaban̄a fi? Ndi akpama ndinọ owo n̄kpọ emi enye edinen̄erede ima m̀mê ndibọ enọ emi afo enen̄erede ama?

Ke ini ọnọde owo n̄kpọ, esịt eyenem fi onyụn̄ enem owo oro. Bible ọdọhọ ke “inemesịt odu ke ndinọnọ akan ke ndibọbọ.” (Utom 20:35) Edi esịt eyenen̄ede enem fi edieke owo oro ọnọde n̄kpọ enen̄erede ama se ọnọde enye oro.

Ntre nso ke akpanam man esịt enem fi onyụn̄ enem owo emi ọnọde n̄kpọ? Ndien edieke afo mûkemeke ndinọ owo n̄kpọ emi enye adade nte mfọnn̄kan enọ, nso ke akpanam man enye enen̄ede ama se ọnọde enye?