Be ka se isịnede

Be ka se isịnede

 MME ANDIKOT N̄WED NNYỊN ẸBỤP ẸTE . . .

Ndi Akpana Mme Christian Ẹsidia Christmas?

Ndi Akpana Mme Christian Ẹsidia Christmas?

Ata ediwak owo ke ofụri ererimbot ẹnịm ke Christmas edi usọrọ usen emana Jesus Christ. Edi ndi akanam emekere m̀mê mme Christian eyo mme apostle, emi ẹkekam ẹkperede Jesus ẹkan nnyịn, ẹma ẹsidia Christmas? N̄ko, ndi ọmọfiọk se Bible etịn̄de aban̄a usọrọ usen emana? Ndifiọk ibọrọ mbụme emi ayanam idiọn̄ọ m̀mê akpana mme Christian ẹsidia Christmas.

Akpa kan̄a, Bible idọhọke ke Jesus m̀mê asan̄autom Abasi ekededi ama esinịm usọrọ usen emana esie. Owo iba kpọt ke Bible ọdọhọ ke ẹma ẹnịm usọrọ usen emana mmọ. Mmọ mbiba ikokponoke Jehovah Abasi. N̄ko, se iketịbede ke usọrọ oro ama ọdiọk etieti. (Genesis 40:20; Mark 6:21) N̄wed oro ẹkotde Encyclopædia Britannica ọdọhọ ke mme Christian eyo mme apostle ikesitieneke mme okpono-ndem inịm usọrọ usen emana.

Nso usen ke Jesus akamana?

Bible isiakke usenọfiọn̄ emi Jesus akamanade. Cyclopedia emi McClintock ye Strong ẹkewetde ọdọhọ ke ‘Obufa Testament isiakke usen emi Jesus akamanade, inyụn̄ idụhe n̄wed en̄wen emi asiakde.’ Edieke Jesus okoyomde mbet esie ẹsinịm usọrọ usen emana esie, enye akpakanam mmọ ẹfiọk usenọfiọn̄ emi enye akamanade.

Ọyọhọ iba, Bible idọhọke ke Jesus m̀mê mbet esie ekededi ẹma ẹdia Christmas. N̄wed emi ẹkotde New Catholic Encyclopedia ọdọhọ ke akpa ini oro ẹtịn̄de n̄kpọ ẹban̄a ndidia Christmas edi ke n̄wedisua mbon Rome emi Philocalus ekewetde ke isua 336 C.E. Emi ekedi ke ediwak isua ama ekebe tọn̄ọ ẹkekụre ndiwet Bible, ye anyan ini ke Jesus ama akafiak ọnyọn̄ heaven. Ntak edi oro Cyclopedia emi McClintock ye Strong ẹkewetde ọdọhọde ke “idịghe Abasi ọkọdọhọ ẹsidia Christmas, ke usọrọ emi inyụn̄ idụhe ke Obufa Testament.” *

Ewe edinam ke Jesus ọkọdọhọ mbet esie ẹsiti?

Jesus emi edide Akwa Andikpep ama etịn̄ nnennen se enye oyomde mbet esie ẹnam, ndien se enye ẹketịn̄de emi odu ke Bible. Edi ndidia Christmas isịneke ke otu n̄kpọ emi enye okoyomde mmọ ẹnam. Kpa nte andikpep mîsiyomke nditọ ufọkn̄wed esie ẹnam n̄kpọ emi enye mîdọhọke mmọ ẹnam, ntre n̄ko ke Jesus mîyomke mme Christian ẹnam “n̄kpọ ẹbe se ẹwetde” ke Edisana N̄wed Abasi.—1 Corinth 4:6.

Edi enyene akpan edinam emi mme Christian eyo mme apostle ẹkesinamde, oro edi, nditi n̄kpa Jesus. Jesus ama ọdọhọ mbet esie ini emi mmọ ẹkpenịmde edinam emi, onyụn̄ ananam owụt mmọ. Bible etịn̄ nte Jesus oyomde mbet esie ẹti n̄kpa esie, onyụn̄ asiak usenọfiọn̄ emi enye akakpade.—Luke 22:7, 19; 1 Corinth 11:25.

Se inemede emi owụt ke Christmas edi usọrọ usen emana, ndien mme Christian eyo mme apostle ikesitieneke mme okpono-ndem idia usọrọ usen emana. N̄ko, Bible idọhọke ke Jesus m̀mê owo ekededi ama adia Christmas. Ntak edi oro ediwak mme Christian ke ofụri ererimbot ẹbierede ke mmimọ ididiaha Christmas.

^ ikp. 6 Edieke oyomde ndifiọk n̄kpọ en̄wen mban̄a nte ediwak n̄kpọ emi ẹsinamde ke ini Christmas ẹketọn̄ọde, mbọk kot ibuotikọ oro “Mme Andikot N̄wed Nnyịn Ẹbụp Ẹte . . . Nso ke Ikpọfiọk Iban̄a Christmas?” ke Enyọn̄-Ukpeme December 1, 2014. Ibuotikọ emi odu n̄ko ke ikpehe Intanet emi www.jw.org/efi.