Jesus—Ntak Emi Enye Akakpade

‘Eyen owo ekedi man anam n̄kpọ ọnọ owo onyụn̄ ọnọ ukpọn̄ [oro edi, uwem] esie nte ufak ke ibuot ediwak owo.’—MARK 10:45.

JESUS ama ọfiọk se iditịbede inọ imọ. Enye ama ọfiọk ke imọ ididụhe uwem ke emem ke isọn̄ emi, edi ke ẹyewot imọ ke ima ikebe isua 30 esisịt. Ndien enye ama enen̄ede eben̄e idem ọnọ emi.

Bible owụt ke n̄kpa Jesus enen̄ede edi ata akpan n̄kpọ. N̄wed kiet ọdọhọ ke ẹsiak n̄kpa Jesus nnennen nnennen utịm ike-175 ke N̄wed Abasi Christian Usem Greek, oro edi, Obufa Testament. Edi ntak emi Jesus ọkọbọde ufen onyụn̄ akpa? Ọkpọfọn ifiọk ibọrọ mbụme emi sia n̄kpa Jesus ekeme ndinen̄ede ntụk uwem nnyịn.

▪ Se Jesus ekeben̄ede idem ndisobo: Ke ama ekekpere ini emi ẹkeyomde ndiwot Jesus, enye ama esitịn̄ ekese ini ọnọ mme mbet esie nte idibọde ufen inyụn̄ ikpa. Isan̄ kiet, nte enye ye mme apostle esie 12 ẹkesụk ẹkade Jerusalem ndidụk akpatre usọrọ Passover oro enye okodụkde, enye ama ọdọhọ mmọ ete: “Ẹyeyak Eyen owo ẹnọ mbọn̄ oku ye mme scribe, ndien mmọ ẹyebiom enye ikpe n̄kpa ẹnyụn̄ ẹyak enye ẹnọ mbon idụt, ndien mmọ ẹyesak enye nsahi ẹnyụn̄ ẹfiari enye etap ẹnyụn̄ ẹmia enye ẹnyụn̄ ẹwot enye.” * (Mark 10:33, 34) Enye akasan̄a didie ọfiọk se idiwọrọde imọ?

Jesus ama ọfiọk ediwak ntịn̄nnịm ikọ ke N̄wed Abasi Usem Hebrew emi aban̄ade nte ẹdiwotde imọ. (Luke 18:31-33) Se ndusụk ntịn̄nnịm ikọ oro mi, ye mme itie N̄wed Abasi oro ẹtịn̄de nte mmọ ẹkesude.

Se iditịbede inọ Messiah

▪ Ẹyeda enye ẹnọ ke mbak silver 30.—ZECHARIAH 11:12; MATTHEW 26:14-16.

▪ Ẹyemia ẹnyụn̄ ẹfiari enye etap.—ISAIAH 50:6; MATTHEW 26:67; 27:26, 30.

▪ Ẹyekọn̄ enye ke eto.—PSALM 22:16; MARK 15:24, 25.

▪ Ẹyesụn̄i ẹnyụn̄ ẹsak enye nsahi ke ini ọkọn̄ọde ke eto.—PSALM 22:7, 8; MATTHEW 27:39-43.

▪ Ẹyewot enye edi owo idibụn̄ke ndomo ọkpọ esie kiet.—PSALM 34:20; JOHN 19:33, 36.

Mme ntịn̄nnịm ikọ emi ye ediwak en̄wen ẹma ẹsu Jesus ke idem. Idụhe nte enye okpokosude mme ntịn̄nnịm ikọ emi ke odudu idemesie. Emi enen̄ede owụt ke Abasi ọkọdọn̄ enye. *

Edi ntak emi Jesus ọkọbọde ufen onyụn̄ akpa?

▪ Jesus akakpa man ebiere mme akpan eneni: Jesus ama ọfiọk mme akpan eneni oro ẹbehede ofụri ererimbot emi ẹkenenide ke In̄wan̄ Eden. Satan ama anam Adam ye Eve ẹsọn̄ ibuot ye Abasi. Nsọn̄ibuot mmọ ama anam ẹkere m̀mê Abasi akam akara ọfọn. Idiọkn̄kpọ mmọ ama anam ẹkere n̄ko m̀mê owo ndomokiet ekeme ndisọn̄ọ nda ye Abasi edieke ẹdomode enye.—Genesis 3:1-6; Job 2:1-5.

Jesus ama ọbọrọ mbụme iba emi edifọn edifọn—owụt ke Jehovah akara ọfọn, ye nte  ke owo ekeme ndisọn̄ọ nda ye Abasi. Ke ndikosụk ibuot nnọ Abasi ‘tutu esịm usen emi enye akpade ke eto ndutụhọ,’ Jesus ama owụt ke ida inọ ukara Abasi. (Philippi 2:8) Enye ama owụt n̄ko nte ke mfọnmma owo ekeme ndisọn̄ọ nda ofụri ofụri ye Jehovah inamke n̄kpọ m̀mê idomo oro ẹsịmde enye ẹsọn̄ didie.

▪ Jesus akakpa man afak ubonowo: Prọfet Isaiah ama etetịn̄ ke Messiah oro ẹken̄wọn̄ọde ọyọbọ ufen onyụn̄ akpa man osio isop idiọkn̄kpọ owo. (Isaiah 53:5, 10) Jesus ama enen̄ede ọfiọk emi, ndien enye ama onyụn̄ enyịme ndinọ “ukpọn̄ esie nte ufak ke ibuot ediwak owo.” (Matthew 20:28) N̄kpa esie anam mme anana-mfọnmma owo ẹkeme ndisan̄a n̄kpere Jehovah onyụn̄ afak mmọ osio ke idiọkn̄kpọ ye n̄kpa. N̄kpa Jesus anam nnyịn ikeme ndifiak nnyene se Adam ye Eve ẹketopde ẹduọk—oro edi, idotenyịn nsinsi uwem ke obufa isọn̄ oro ọfọnde ama. *—Ediyarade 21:3, 4.

▪ Se akpanamde: Ke mme ibuotikọ oro aban̄ade Jesus mi, nnyịn imeneme se Bible etịn̄de aban̄a Jesus—ebiet emi enye okotode, nte enye okodude uwem, ye ntak emi enye akakpade. Ndinen̄ede mfiọk n̄kpọ mban̄a Jesus ayanam iduọn̄ọ kpukpru ukwan̄ ekikere oro ikenyenede iban̄a enye. Edieke inyụn̄ idade se ifiọkde iban̄a enye idu uwem, nnyịn iyọbọ edidiọn̄—oro edi, uwem nnyịn eyenyene se ọwọrọde idahaemi, ndien iyenyene nsinsi uwem ke ini iso. Bible etịn̄ ọnọ nnyịn se ikpanamde man inyene edidiọn̄ emi.

▪ Kpep n̄kpọ ban̄a Jesus Christ ye se enye anamde man uduak Jehovah osu.—JOHN 17:3.

▪ Buọt idem ke Jesus, yak usụn̄ uwem fo owụt ke ada enye nte Andinyan̄a fo.—JOHN 3:36; UTOM 5:31.

Mme Ntiense Jehovah ẹyekop inemesịt ndin̄wam fi ekpep ekese aban̄a Jesus Christ, “ikpọn̄-ikpọn̄ edibon Eyen” Abasi emi anamde ikeme ndinyene “nsinsi uwem.”—John 3:16.

[Mme Ikọ Idakisọn̄]