San̄a Kpere Abasi

Jehovah Ọnọ Nnyịn Ukeme Ndimek Se Imade

Deuteronomy 30:11-20

“M MA nsinyene idiọk ekikere ke ndikemeke ndisọn̄ọ nda ye Jehovah.” Christian an̄wan kiet emi se ikọwọrọde enye ke ini uyen ẹkenamde enye ekere ke imọ ikemeke ndinam se ifọnde, eketịn̄ ikọ oro. Ndi edi akpanikọ? Ndi ọwọrọ ke nnyịn ikemeke ndinam eti n̄kpọ? Baba. Jehovah ọnọ nnyịn ukeme ndimek se imade, ntre imekeme ndimek nte ididude uwem. Jehovah oyom imek ndinam nti n̄kpọ, ndien Ikọ esie, kpa Bible, eteme nnyịn nte ikpanamde oro. Kere ban̄a se Moses eketịn̄de ke Deuteronomy ibuot 30.

Ndi ọsọn̄ ndifiọk nnyụn̄ nnam se Abasi oyomde oto nnyịn? * Moses ọkọdọhọ ete: ‘Mme ewụhọ emi ami n̄wụkde fi mfịn emi, isọn̄ke ikan fi, inyụn̄ iyomke usụn̄.’ (Ufan̄ikọ 11) Jehovah isidọhọke nnyịn inam mme n̄kpọ oro ẹsọn̄de ẹkan nnyịn. Mme n̄kpọ oro enye ọdọhọde inam iwakke ikaha, ẹnyụn̄ ẹdi se ikemede ndinam. Imonyụn̄ ikeme ndifiọk mmọ. Iyomke ‘idọk enyọn̄’ m̀mê ika “edem inyan̄ oko” man ikpep se Abasi oyomde oto nnyịn. (Ufan̄ikọ 12, 13) Bible asian nnyịn in̄wan̄-in̄wan̄ nte ikpodude uwem.—Micah 6:8.

Edi Jehovah inyịkke-nyịk nnyịn ikop uyo imọ. Moses ọkọdọhọ ete: “Mmada uwem, ye nti n̄kpọ, ye n̄kpa, ye idiọk, nnịm fi ke iso mfịn emi.” (Ufan̄ikọ 15) Imenyene ifụre ndimek uwem m̀mê n̄kpa, eti m̀mê idiọk. Imekeme ndimek ndituak ibuot nnọ Abasi nnyụn̄ n̄kop uyo esie man ibọ edidiọn̄, mîdịghe imek ndisọn̄ ibuot ye enye, inyụn̄ ibọ utịp nsọn̄ibuot. Nnyịn inyene ndimek enye emi iyomde.—Ufan̄ikọ 16-18; Galatia 6:7, 8.

Ndi se imekde ebehe Jehovah? Ih, ebehe enye! Abasi ama ọnọ Moses odudu spirit ada etịn̄ ete: “Mek uwem.” (Ufan̄ikọ 19) Edi didie ke ikeme ndimek uwem? Moses ọkọdọhọ ete: “Man afo ama Jehovah Abasi fo onyụn̄ okop uyo esie, onyụn̄ eyịre ye enye.” (Ufan̄ikọ 20) Edieke imade Jehovah, ọyọdọn̄ nnyịn ndikop uyo esie nnyụn̄ nyịre ye enye, inamke n̄kpọ m̀mê nso itịbe. Ndinam ntre owụt ke imemek uwem—emi edide mfọnn̄kan usụn̄ uwem idahaemi, emi asan̄ade ye idotenyịn nsinsi uwem ke obufa ererimbot Abasi oro edide.—2 Peter 3:11-13; 1 John 5:3.

Se Moses eketịn̄de asian nnyịn akpanikọ oro ọnọde owo ndọn̄esịt. Inamke n̄kpọ m̀mê nso ke afo osobo ke idiọk ererimbot emi, oro iwọrọke ke afo ukemeke ndinam se inende. Jehovah ọmọnọ fi ukeme ndimek se amade. Ih, emekeme ndimek ndima Jehovah, ndikop uyo esie, ndinyụn̄ n̄ka iso nnam akpanikọ nnọ enye. Edieke emekde ndinam emi, Jehovah ọyọdiọn̄ fi.

Ndifiọk ke imekeme ndimek ke idem nnyịn ndima nnyụn̄ nnam n̄kpọ Jehovah ama ọdọn̄ n̄wan oro iketịn̄de iban̄a ke ntọn̄ọ, esịt. Enye ọdọhọ ete: “Mmama Jehovah. Mmesifre ndusụk ini ke se idide ata akpan n̄kpọ edi ke ami mmama Jehovah. Ntre mmekeme ndisọn̄ọ nda.” Jehovah ayan̄wam fi ọsọn̄ọ ada n̄ko.

[Ikọ Idakisọn̄]