Be ka se isịnede

Be ka se isịnede

Ntak Emi Mme Owo Mîfiọkke Se Edisana Spirit Edide?

Ntak Emi Mme Owo Mîfiọkke Se Edisana Spirit Edide?

 Ntak Emi Mme Owo Mîfiọkke Se Edisana Spirit Edide?

NSO idi edisana spirit? Mbụme emi edi mmemmem ọkpọsọn̄ mbụme. Pope Benedict XVI ọkọdọhọ otuowo ke Australia ete: “Etie nte nnyịn idikemeke ndifiọk se Spirit enen̄erede edi.”

Ke akpanikọ, mme owo ẹnyene nsio nsio ekikere ẹban̄a se edisana spirit edide, ediwak owo inyụn̄ ifiọkke se enye edide. Ndusụk owo ẹsidọhọ ke edisana spirit edi:

• Ata owo emi esịnede mme mbet Christ ke idem.

• Ibet Abasi oro anamde mme owo ẹnam n̄kpọ.

• Se Abasi adade owụt ke imọ do ke ererimbot.

• Ọyọhọ owo ita ke Abasi-Ita-ke-Kiet.

Ntak emi mme owo ẹnyenede utọ nsio nsio ekikere emi? Kpukpru emi ọkọtọn̄ọ ke n̄kpọ nte isua 1,700 emi ẹkebede, ke ini emi mme ekpep ukpepn̄kpọ ido ukpono ẹkedọhọde ke edisana spirit edi owo emi edide n̄ka ye Abasi. Edi N̄wed Abasi itịn̄ke utọ ikọ oro, akpa mme mbet Christ ikonyụn̄ ikpepke utọ n̄kpọ emi. New Catholic Encyclopedia ọdọhọ ete: “Akani Testament idọhọke ke spirit Abasi edi owo . . . Spirit Abasi edi odudu Abasi.” N̄wed oro adian do ete: “Ata ediwak itie ke Obufa Testament ẹdọhọ ke spirit Abasi edi n̄kpọ, idịghe owo; inen̄ede ikụt emi ke nte spirit ebietde odudu Abasi.”

In̄wan̄ake mme owo nte odudu asan̄ade edi owo. Ntem, ndụn̄ọde oro ẹkenamde ke United States ke ndondo emi owụt ke ediwak owo inịmke ke edisana spirit edi owo m̀mê “odu-uwem n̄kpọ.” Ndi mmọ ẹnen? Mîdịghe, ndi ikpenịm se mme ekpep ukpepn̄kpọ ido ukpono ẹdọhọde ke “Edisana Spirit edi ata isio isio Owo ye Ete ye Eyen”?

Man inyene eti ibọrọ, ana ikot Ikọ Abasi, kpa Bible, emi etịn̄de se edisana spirit enen̄erede edi. Apostle Paul ekewet ete: “Abasi ọkọnọ odudu ẹda ẹwet ofụri N̄wed Abasi ndien enye ọfọn ndida nnọ ukpep, nsua nnọ owo.”—2 Timothy 3:16.

Ntak emi okpodụn̄ọrede ọfiọk se edisana spirit enen̄erede edi? Koro emi ekeme ndinam ọbọ un̄wam Abasi. Ndi enyene ndusụk ini emi esitiede nte ke unyeneke ukeme ndinam n̄kpọ ke idemfo? Jesus ama ọn̄wọn̄ọ ọnọ mme mbet esie ete: “Ẹka iso ẹben̄e, ndien ẹyenọ mbufo . . . Edieke mbufo . . . ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak edisana spirit ọnọ mbon oro ẹben̄ede enye!”—Luke 11:9, 13.

N̄wed Abasi ayasian nnyịn se edisana spirit edide ke ibuotikọ oro etienede. Iyonyụn̄ ikụt nte enye ekemede ndifori uwem nnyịn.

[Se ẹwetde ke ikpọ abisi ke page 3]

N̄wed Abasi asian nnyịn se edisana spirit edide