Be ka se isịnede

Be ka se isịnede

Nso ke Jehovah Oyom Oto Nnyịn?

Nso ke Jehovah Oyom Oto Nnyịn?

 San̄a Kpere Abasi

Nso ke Jehovah Oyom Oto Nnyịn?

Deuteronomy 10:12, 13

ISIMEMKE utom ndikop uyo nnọ owo kpukpru ini. Mme owo ẹsikop uyo mmen̄e mmen̄e ẹnọ akwa owo oro ọsọn̄de ido m̀mê oro ọsọn̄de owo ndinem enye esịt. Edi mme andituak ibuot nnọ Jehovah Abasi ẹsikop uyo esie ke imaesịt. Ntak-a? Man ibọrọ mbụme emi, ẹyak idụn̄ọde se Moses eketịn̄de ke Deuteronomy 10:12, 13. *

Ke ini Moses eketịn̄de se Abasi oyomde ibio ibio, enye ama obụp mbụme emi: ‘Nso ke Jehovah Abasi fo oyom ye afo?’ (Ufan̄ikọ 12) Abasi enyene unen ndidọhọ nnyịn inam se ededi oro enye oyomde. Idem n̄kpọ, n̄kọ enye edi Ọbọn̄ Andikara, Andinọ uwem, ye Enye emi enịmde nnyịn uwem. (Psalm 36:9; Isaiah 33:22) Jehovah enyene unen ndidọhọ nnyịn ikop uyo imọ. Kpa ye oro, enye inyịkke-nyịk nnyịn inam emi. Nso ke enye oyom nnyịn inam? Oyom ‘isụk ibuot ke ofụri esịt.’—Rome 6:17.

Nso ikeme ndinam nnyịn ikop uyo Abasi ke imaesịt? Moses asiak n̄kpọ kiet ete: ‘Bak Jehovah Abasi fo.’ * (Ufan̄ikọ 12) Utọ mbak emi idịghe ndikop ndịk mban̄a utịp idiọkn̄kpọ, edi edi ukpono oro inyenede inọ Abasi ye nte enye esinamde n̄kpọ. Ata uten̄e Abasi idiyakke iyat enye esịt.

Edi nso ikpedi ata akpan ntak oro ikpokopde uyo Abasi? Moses ọdọhọ ete: ‘Ma Jehovah Abasi fo nyụn̄ nam n̄kpọ esie ke ofụri esịt fo, ye ke ofụri ukpọn̄ fo.’ (Ufan̄ikọ 12) Ndima Abasi idịghe ikpîkpu edikekere mban̄a enye. N̄wed ndụn̄ọde kiet ọdọhọ ete: “Ndusụk ini, ikọ Hebrew oro adade ọnọ edikere n̄kpọ ekeme ndida n̄ko nnọ mme n̄kpọ oro ekikere oro anamde owo anam.” N̄wed oro ọdọhọ ke ndima Abasi ọwọrọ “ndinam n̄kpọ” nnọ enye “ke ima.” Ke nditịn̄ ke usụn̄ en̄wen, edieke inen̄erede ima Abasi, iyanam n̄kpọ oro edinemde enye esịt.—Mme N̄ke 27:11.

Adan̄a didie ke ikpokop uyo Abasi? Moses ọdọhọ ete: ‘San̄a ke kpukpru usụn̄ Abasi.’ (Ufan̄ikọ 12) Jehovah oyom nnyịn inam kpukpru n̄kpọ oro enye ọdọhọde inam. Ndi ndikop uyo Jehovah ke kpukpru n̄kpọ ntre edidi ntakurua inọ nnyịn? Baba!

Abasi ọyọdiọn̄ nnyịn edieke ikopde uyo esie ke imaesịt. Moses ewet ete: ‘Nịm mbet emi ami n̄wụkde fi mfịn emi, man ọfọn fi.’ (Ufan̄ikọ 13) Ke akpanikọ, kpukpru mme ewụhọ Jehovah—oro edi, kpukpru se enye oyomde nnyịn inam—ẹdi ke ufọn nnyịn. Idụhe nte mîkpedịghe ke ufọn nnyịn koro Bible ọdọhọ ke “Abasi edi ima.” (1 John 4:8) Ntem, enye ọnọ nnyịn mme ewụhọ oro ẹdinọde nnyịn nsinsi ufọn. (Isaiah 48:17) Ndinam kpukpru se Jehovah oyomde oto nnyịn ayanam ibọhọ ekese afanikọn̄ idahaemi onyụn̄ anam inyene akpakịp edidiọn̄ ke ini emi Obio Ubọn̄ esie edikarade. *

Amaedi ndinam se Jehovah oyomde oto nnyịn, mfọnn̄kan ubiere edi ndida imaesịt n̄kop uyo Jehovah ke kpukpru n̄kpọ. Utọ n̄kopuyo oro ayanam inen̄ede isan̄a ikpere Jehovah, edima Abasi emi esiyomde n̄kpọ ọfọn ye nnyịn kpukpru ini.

[Mme Ikọ Idakisọn̄]

^ ikp. 4 Okposụkedi emi Moses eketịn̄de ikọ emi ọnọ idụt Israel eset, edumbet oro ebehe kpukpru mbon oro ẹyomde ndinam se inemde Abasi esịt mfịn.—Rome 15:4.

^ ikp. 6 Moses etịn̄ ke ediwak itie ke ofụri n̄wed Deuteronomy ete ke ikọt Abasi ẹkpenyene ndibak Abasi ke kpukpru n̄kpọ.—Deuteronomy 4:10; 6:13, 24; 8:6; 13:4; 31:12, 13

^ ikp. 9 Edieke oyomde ntọt efen efen, se ọyọhọ ibuot 3, “Nso Idi Uduak Abasi Kaban̄a Isọn̄?” ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.