Be ka se isịnede

Be ka se isịnede

Nso Idi Edisana Spirit?

Nso Idi Edisana Spirit?

 Nso Idi Edisana Spirit?

INI kiet, Jesus ama obụp mme mbet esie ete: “Ewe ete odu ke otu mbufo eke edinọde eyen urụkikọt utu ke iyak ke ini eyen esie eben̄ede enye iyak? M̀mê edinọde eyen ikpeyen ke ini eyen eben̄ede enye nsenunen?” (Luke 11:11, 12) Nditọwọn̄ Galilee ẹma ẹsima ndita nsenunen ye iyak; mmọ ẹma ẹfiọk se ẹkeben̄ede.

Jesus ọkọdọhọ ika iso iben̄e edisana spirit, kpa nte emi ekpri eyen oro biọn̄ ọdọn̄de eben̄ede udia. (Luke 11:9, 13) Ndifiọk se edisana spirit edide ayanam nnyịn ifiọk akpan n̄kpọ oro enye ekemede ndinam nnọ nnyịn. Ntre, ẹyak ibem iso idụn̄ọde se Bible ekpepde nnyịn aban̄a edisana spirit.

“Odudu Ata Edikon̄”

N̄wed Abasi ọdọhọ ke edisana spirit edi odudu emi Abasi esidade anam uduak esie. Ke ini angel Gabriel akasiande Mary ke enye ayaman eyeneren okposụkedi emi enye mîfiọkke erenowo, angel oro ọkọdọhọ enye ete: “Edisana spirit oyodoro fi ke idem, odudu Ata Edikon̄ oyonyụn̄ ofụk fi. Ke ntak oro n̄ko se idimanade edikere edisana, Eyen Abasi.” (Luke 1:35) Nte Gabriel ọkọdọhọde, edisana spirit ye “odudu Ata Edikon̄” ẹnyene ebuana.

Ukem ikọ emi odu ke ebiet en̄wen ke Bible. Prọfet Micah ọkọdọhọ ete: ‘Odudu emi otode spirit Jehovah ọyọhọ mi ke idem.’ (Micah 3:8) Jesus ama ọn̄wọn̄ọ ọnọ mme mbet esie ete: “Mbufo ẹyebọ odudu ke ini edisana spirit edide edidoro mbufo ke idem.” (Utom 1:8) Apostle Paul ama onyụn̄ etịn̄ aban̄a “odudu edisana spirit.”—Rome 15:13, 19.

Ke ini ikerede iban̄a kpukpru se itịn̄de emi, ikpọdọhọ ke edisana spirit edi nso? Edisana spirit enen̄ede enyene ebuana ye odudu Abasi. Jehovah esida edisana  spirit owụt odudu esie. Ke nditịn̄ ibio ibio, edisana spirit edi anamutom odudu Abasi, m̀mê odudu Abasi oro esinamde utom kpukpru ini. Ndien nso utịbe utịbe odudu ke enye edi ntem! Ọsọsọn̄ ndifiọk udomo odudu oro ẹkedade ẹbot ofụri ekondo. Jehovah ama ada prọfet Isaiah asian nnyịn ete: “Ẹmenede enyịn mbufo ke enyọn̄, ẹnyụn̄ ẹse! Anie okobot mme mmọ emi? Anie ada otu mmọ ọwọrọ ke ibat mmọ? Enye osio kpukpru mmọ enyịn̄: koro nsọn̄idem esie okponde, enye onyụn̄ ọsọn̄ odudu; baba owo mmọ kiet isopke.”—Isaiah 40:26.

Ntem, Bible ọdọhọ ke Ata Ọkpọsọn̄ Abasi akada “odudu” esie obot ekondo onyụn̄ anam kpukpru n̄kpọ ẹsan̄a ke nde ke nde. Ana in̄wan̄-in̄wan̄ ke odudu  Abasi emi esinamde utom kpukpru ini edi ọkpọsọn̄ odudu, enye onyụn̄ enịm nnyịn uwem.—Se ekebe oro, “Se Edisana Spirit Anamde.”

Jehovah ekeme ndida edisana spirit esie nnam ata akamba n̄kpọ, nte akadade obot ekondo. Edi enye ekeme n̄ko ndida enye n̄n̄wam mme owo. Bible etịn̄ aban̄a ediwak asan̄autom Abasi oro edisana spirit Abasi ọkọnọde odudu.

“Spirit Jehovah Odoro Mi ke Idem”

Utom ukwọrọikọ Jesus ọfọi nnyịn owụt nte edisana spirit Abasi ekemede ndinọ mme asan̄autom Abasi odudu. Jesus ama ọdọhọ mbon Nazareth ete: “Spirit Jehovah odoro mi ke idem.” (Luke 4:18) Jesus akada “odudu spirit” emi anam nso? (Luke 4:14) Enye ama ada ọkọk kpukpru orụk udọn̄ọ, anam oyobio odobo, ada uyo ye iyak ifan̄ ọbọk ediwak tọsịn owo, onyụn̄ akam anam mme akpan̄kpa ẹset. Apostle Peter ọkọdọhọ ke Jesus edi “owo emi Abasi okowụtde . . . an̄wan̄wa ebe ke mme utom odudu ye mme utịben̄kpọ ye mme idiọn̄ọ oro Abasi akadade enye anam.”—Utom 2:22.

Edisana spirit inọhọ mme owo ukeme ndinam mme utọ utịben̄kpọ oro idahaemi. Edi enye ekeme ndinam ikpọ n̄kpọ nnọ nnyịn. Jehovah ọnọ ikọt esie edisana spirit ke unyịmesịt, kpa nte Jesus akasiande mme mbet esie. (Luke 11:13) Ntak edi oro apostle Paul ọkọdọhọde ete: “Ke kpukpru n̄kpọ mmenyene ukeme ebe ke enye emi ọnọde mi odudu.” (Philippi 4:13) Ndi edisana spirit ekeme ndinyene utọ odudu emi ke idemfo? Ibuotikọ oro etienede ọyọbọrọ mbụme oro.

[Ekebe/Ndise ke page 5]

Ntak Emi Edisana Spirit Mîdịghe Owo

Bible emen edisana spirit odomo ye mmọn̄. Ke ini Abasi ọkọn̄wọn̄ọde ke iyọdiọn̄ ikọt imọ, enye ọkọdọhọ ete: “Nyan̄wan̄a mmọn̄ nnọ owo nsat-itọn̄, nyan̄wan̄a idịm ke edisat isọn̄; nyan̄wan̄a spirit mi nditọ fo ke idem, nyan̄wan̄a nti n̄kpọ mi nnọ ubon fo.”—Isaiah 44:3.

Abasi ama an̄wan̄a spirit esie ọnọ mme asan̄autom esie, mmọ “ẹyọhọ ye edisana spirit.” Bible ọdọhọ ke mme owo emi ẹma ẹyọhọ ye edisana spirit: Jesus, John Andinịm Owo Baptism, Peter, Paul, Barnabas, ye mme mbet oro ẹkesopde idem ke usen Pentecost 33 E.N.—Luke 1:15; 4:1; Utom 4:8; 9:17; 11:22, 24; 13:9.

Kere ise: Ndi ẹkeme ‘ndin̄wan̄a’ owo nduọk ediwak owo? Ndi ọkpọdọhọ ke owo kiet ekeme ‘ndiyọhọ’ ofụri otuowo idem? Oro iwụtke ifiọk. Bible esidọhọ ke mme owo ẹyọhọ ye ọniọn̄, asian, ye nnennen ifiọk, edi akanam idọhọke ke owo ọyọhọ owo en̄wen.—Exodus 28:3; 1 Ndidem 7:14; Luke 2:40; Colossae 1:9.

Ikọ Greek oro pneu’ma, emi ẹkabarede “spirit” ọnọ n̄ko ekikere aban̄a odudu oro enyịn mîkwe. Expository Dictionary of New Testament Words, emi Vine ewetde, ọdọhọ ke pneu’ma “ọwọrọ ofụm . . . ibifịk, onyụn̄ enen̄ede ọwọrọ spirit, emi owo mîkemeke ndikụt onyụn̄ okopde odudu nte ofụm.”

Mmọdo, edisana spirit idịghe owo. *

[Ikọ Idakisọn̄]

^ ikp. 19 Edieke oyomde ntọt efen efen, se ibuotikọ emi, “Akpanikọ Aban̄ade Ete, Eyen, ye Edisana spirit,” ke page 201-204, ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.

[Ebiet Ẹdade N̄kpọ Ẹto]

Photodisc/SuperStock