Be ka se isịnede

Be ka se isịnede

Nte Afo Ekpenyene Ndidụn̄ọde Mme Ido Ukpono Efen?

Nte Afo Ekpenyene Ndidụn̄ọde Mme Ido Ukpono Efen?

 Nte Afo Ekpenyene Ndidụn̄ọde Mme Ido Ukpono Efen?

“MMA nsidụk mme mbono esop Christian ke se ikekperede ndisịm isua kiet, ndien mma nsikop inem nditịn̄ nnọ mbon en̄wen mban̄a Obio Ubọn̄ Abasi,” ntem ke Miguel, emi idahaemi edide kiet ke otu Mme Ntiense Jehovah ke Edem Usụk America ọdọhọ. “Ekem mma ntọn̄ọ ndikpan̄ utọn̄ nnọ mme edinam ido ukpono ke ekebe ukopikọ ndinyụn̄ nse mme ọkwọrọikọ ido ukpono ke ekebe ndise. Mma n̄kere nte ke mme utọ edinam oro ẹkeme ndin̄wam mi nditịm mfiọk mbon ido ukpono efen. Mma mfiọk nte ke mme ukpepn̄kpọ mmọ ikodụhe ke n̄kemuyo ye Bible, edi mma nnyene ọkpọsọn̄ udọn̄.”

Kpa ke idụt oro, Jorge ama esịn ifịk ke ndikpep mbon efen mban̄a utuakibuot akpanikọ. Edi, ke idaha kiet, enye n̄ko ama ọtọn̄ọ ndisikpan̄ utọn̄ nnọ mme edinam ido ukpono ke ekebe ukopikọ ye ekebe ndise. Enye ekesidọhọ ete: “Oyom afo ọfiọk se mbon en̄wen ẹkerede.” Ke ini ẹbụpde ẹban̄a mme n̄kpọndịk oro ẹkemede ndidu ke utọ edisio idem nnyan nnọ mme nsunsu ukpepn̄kpọ oro, enye ọyọbọrọ ete: “N̄kpọ ndomokiet ikemeke ndinam mbuọtidem owo oro ọfiọkde akpanikọ Bible.” Mme ifiọkutom emi ẹdemede akpan mbụme kiet, Ndi owụt eti ibuot ndikpan̄ utọn̄ nnọ se mbon efen ẹnịmde ke akpanikọ?

Ndidiọn̄ọ Ata Ido Ukpono Christ

Ke mme apostle ẹma ẹkekpan̄a, ediwak orụk nsunsu Ido Ukpono Christ ndikọwọrọ ndi ama asabade utuakibuot akpanikọ. Ke ebemde iso ada okụt emi, Jesus ama ayarade usụn̄ kiet ndifiọk mme nsunsu Ido Ukpono Christ ye ata Ido Ukpono Christ. Akpa, enye ama ọtọt ete: “Ẹkpeme idem ẹbak prophet abian̄a emi ẹfọrọde ikpa erọn̄ ẹdi ke ọtọ mbufo, kpa ke ini mmọ ẹdide anawụri-ekpe ke esịt mmọ.” Ekem enye ama adian do ete: “Mbufo ẹyeda mfri mmọ ẹfiọk mmọ.” (Matthew 7:15-23) Mme ata anditiene Jesus ẹnam se enye ekekpepde, ndien ẹda nti  mfri mmọ ẹdiọn̄ọ mmọ mmemmem mmemmem. Kpa nte Jesus ke idemesie akanamde, mmọ ẹsika ẹbịne mme owo man ẹkeda N̄wed Abasi ẹnam Obio Ubọn̄ Abasi an̄wan̄a mmọ. Ke ẹtienede uwụtn̄kpọ Jesus, mmọ ẹda san̄asan̄a ẹkpọn̄ mme mbre ukara ererimbot ye mme en̄wan n̄kaowo. Mmọ ẹnyịme Bible nte Ikọ Abasi ẹnyụn̄ ẹkpono enye nte akpanikọ. Mmọ ẹnam ẹdiọn̄ọ enyịn̄ Abasi. Ndien sia mmọ ẹdomode ndinanam ima oro Abasi ekpepde n̄wụt, mmọ ibuanake ke mme ekọn̄. Utu ke oro, mmọ ẹnam n̄kpọ ye kiet eken nte nditọete.—Luke 4:43; 10:1-9; John 13:34, 35; 17:16, 17, 26.

Nte N̄wed Abasi ọdọhọde, ẹkeme ‘ndikụt nte eti ye idiọk ẹsan̄ade isio, ye nte anam n̄kpọ Abasi ye owo eke mînamke n̄kpọ esie ẹsan̄ade isio.’ (Malachi 3:18) Mme ata andituak ibuot mfịn ẹdiana kiet ke ekikere ye edinam, kpa nte mme Christian akpa isua ikie ẹkedianade kiet. (Ephesus 4:4-6) Ke ndondo oro afo ama ọkọfiọk utọ otu mme ata Christian oro, ntak emi afo akpanamde ndụn̄ọde m̀mê ekpenyenede ọkpọsọn̄ udọn̄ aban̄a mme edinịm ke akpanikọ mbon en̄wen?

Kpeme Idem ye Mme Nsunsu Andikpep

Bible ọdọhọ ete idem ke owo ama ekekpep akpanikọ Bible, n̄kpọndịk odu aban̄a edidi se ẹsabarede ke n̄kan̄ eke spirit ebe ke mme nsunsu ukpepn̄kpọ. Apostle Paul ama ọtọt ete: “Ẹkpeme mbak owo ekededi edidu, eke adade ifiọk owo ye ikpîkpu abian̄a eke asan̄ade ye se owo ekpepde obụme mbufo; nte asan̄ade ekekem ye mme enyene-odudu eke ẹkarade ererimbot, mînyụn̄ isan̄ake ikekem ye Christ.” (Colossae 2:8) Nso in̄wan̄în̄wan̄ ndise ke itien̄wed emi owụt ntem! Ukem nte mme idiọk unam oro ẹyomde ndimụm nnyụn̄ nta fi, mme nsunsu andikpep ẹkeme ndidi ata n̄kpọndịk.

Edi akpanikọ, Paul ama esitịn̄ enyịn ke se mbon en̄wen ẹnịmde ke akpanikọ. Inikiet enye ama ọtọn̄ọ nneme ke ndidọhọ: “Mbufo mbio Athens, mmokụt nte ke kpukpru usụn̄ mbufo ẹdi mme andibak mme abasi eti-eti. Koro nte nsan̄ade mbe nse mme n̄kpọ eke mbufo ẹkponode, n̄kụt itie-uwa kiet n̄kọrọ do, emi ẹwetde ke esịt ẹte, Emi Enyene Abasi Emi Owo Mîfiọkke.” (Utom 17:22, 23) Nte ededi, Paul ikọbọkke ekikere esie kpukpru ini ye mme ukpepn̄kpọ akwaifiọk mbon Greece.

Edi n̄kpọ kiet afo ndifiọk mban̄a mme ntọn̄ọ ye mme edinịm ke akpanikọ eke mme nsunsu ido ukpono edi edi ata n̄kpọ efen ndida mmọ mbọk ekikere fo. * Jehovah emek “asan̄autom emi anamde akpanikọ, onyụn̄ enyenede ọniọn̄” ndinọ ukpep oro ọkọn̄ọde ke Ikọ esie. (Matthew 4:4; 24:45) Paul ke idemesie ama ewet ete: “Mbufo ikemeke nditiene ndia n̄kpọ ke okpokoro Ọbọn̄, nnyụn̄ ndia ke okpokoro mme demon. M̀mê, nte nnyịn inanam Ọbọn̄ efịbe ufịp?”—1 Corinth 10:20-22.

Ekeme ndidi ndusụk nsunsu andikpep ẹma ẹdi mme ata Christian ke mbemiso, edi ke idaha kiet mmọ ẹma ẹwọn̄ọde ẹkpọn̄ akpanikọ ẹbịne idiọkn̄kpọ. (Jude 4, 11) Emi ikpenyeneke ndikpa nnyịn idem. Ke ama eketịn̄ aban̄a “asan̄autom emi anamde akpanikọ, onyụn̄ enyenede ọniọn̄” oro adade ke ibuot otu Christian oro ẹyetde aran, Jesus ama etịn̄ aban̄a “idiọk asan̄autom,” kpa otu oro esemede ete, “Ete mi ebịghi edidi,” onyụn̄ ọtọn̄ọ ndimia mme ekemmọ asan̄autom. (Matthew 24:48, 49) Ediwak ini, mme owo emi ye mme anditiene mmọ isinyeneke in̄wan̄în̄wan̄ ukpepn̄kpọ idemmọ; mmọ n̄kukụre ẹsinyene udọn̄ ke ndiwụri mbuọtidem mbon en̄wen. Apostle John ekewet aban̄a mmọ ete: “Edieke owo ekededi edide ke ọtọ mbufo, mînyụn̄ idaha ukpep-n̄kpọ emi idi, ẹkûda enye ẹsịn ke ufọk, ẹkûnyụn̄ ẹkọm enye.”—2 John 10; 2 Corinth 11:3, 4, 13-15.

Mbon esịt akpanikọ oro ẹdụn̄ọrede ẹyom akpanikọ ẹyenam ọfọn nditịm n̄kere mban̄a se mmọ ẹkopde ẹto mme nsio nsio ido ukpono. Nte ini akade, Abasi ọyọdiọn̄ mbon esịt akpanikọ oro ẹyomde akpanikọ. Bible etịn̄ aban̄a ọniọn̄ Abasi ete: ‘Ama oyom enye nte silver, onyụn̄ odụn̄ọde enye nte n̄kpọ-uto eke edịbede; ndien afo eyesịme ifiọk Abasi.’ (Mme N̄ke 2:4, 5) Ke ẹma ẹkekụt ifiọk Abasi emi ebe ke Bible ye esop Christian ẹnyụn̄ ẹkụt nte Jehovah ọdiọn̄de mbon oro ifiọk oro adade usụn̄, mme ata Christian ikaha iso ndikpan̄ utọn̄ nnọ mme nsunsu ukpepn̄kpọ ido ukpono.—2 Timothy 3:14.

[Mme Ikọ idakisọn̄]

^ ikp. eki. 10 N̄wed oro Mankind’s Search for God, emi Watchtower Bible and Tract Society of New York, Inc., osiode, ọnọ akpan ntọt aban̄a ntọn̄ọ ye mme ukpepn̄kpọ ediwak ido ukpono ererimbot.