Be ka se isịnede

Be ka se isịnede

Yak Mbọm “Kpukpru Orụk Owo” Esinam Fi

Yak Mbọm “Kpukpru Orụk Owo” Esinam Fi

INI Jesus ekekpepde mme mbet esie ndikwọrọ ikọ, enye ama ọdọhọ mmọ ke idịghe kpukpru owo ẹdima ndikop. (Luke 10:​3, 5, 6) Ke ini ikwọrọde ikọ, imekeme ndikụt mbon oro mîmaha ndikop, mîdịghe ẹkam ẹsụn̄ide nnyịn. Utọ n̄kpọ oro ekeme ndinam ọsọn̄ nnyịn ndiyak mbọm mbon oro ikwọrọde ikọ inọ anam nnyịn.

Owo oro esikopde owo mbọm esifiọk ini emi owo enyenede mfịna, onyụn̄ oyom usụn̄ ndin̄wam enye. Edi edieke nnyịn mîyakke mbọm mbon oro ikwọrọde ikọ inọ anam nnyịn, imekeme nditre ndisịn idem n̄kwọrọ ikọ, oyonyụn̄ ọsọn̄ ndin̄wam mmọ. Nnyịn ndisiyak mbọm mme owo anam nnyịn ayanam ika iso isịn idem ikwọrọ ikọ ukem nte ndisịn ifia ke ikan̄ mîdiyakke ikan̄ enịme!​—1 Thess. 5:19.

Nso idin̄wam nnyịn isitua owo mbọm idem ke ini mîmemke inọ nnyịn? Ẹyak ineme nte ikemede nditua owo mbọm nte Jehovah, Jesus, ye apostle Paul.

SITUA OWO MBỌM NTE JEHOVAH

Jehovah ọyọ esuene oro ẹsuenede enyịn̄ esie ke ata ediwak tọsịn isua. Kpa ye oro, ‘enye ọfọn ido ye mme anana-esịtekọm ye mme idiọkowo.’ (Luke 6:35) Enye ndinyene ime owụt ke enye ọfọn ido. Jehovah oyom “kpukpru orụk owo ẹnyene edinyan̄a.” (1 Tim. 2:​3, 4) Kpa ye oro enye asuade idiọkn̄kpọ, enye ama mme owo inyụn̄ iyomke owo ndomokiet atak.​—2 Pet. 3:9.

Jehovah ọfiọk ke Satan enen̄ede abian̄a mbon oro mîfiọkke imọ. (2 Cor. 4:​3, 4) Nsu ye idiọk uwem oro ẹkpepde ediwak owo toto ke edet iba esinam ọsọn̄ mmọ ndikpono Jehovah. Ọdọn̄ Jehovah ndin̄wam mmọ. Inam didie ifiọk?

Yak ise nte Jehovah akadade mbon Nineveh. Kpa ye oro mmọ ẹkedide mbon afai, Jehovah ama ọdọhọ Jonah ete: “Nte ami ndien n̄kpokopke mbọm mban̄a Nineveh akwa obio, emi enyenede se iwakde ibe owo tọsịn ikie ye edịp eke mîfiọkke ukpụhọde ke ufọt ubọk nnasia ye ufien mmọ?” (Jonah 4:11) Mbọm mbon Nineveh ama anam Jehovah sia enye ama okụt ke mmọ ifiọkke imọ. Oro akanam enye ọdọn̄ Jonah okodụri mmọ utọn̄.

Nnyịn n̄ko iyomke owo ndomokiet atak ukem nte Jehovah mîyomke. Didie ke ikeme ndikpebe Jehovah? Edi ndisịn idem n̄kwọrọ ikọ nnọ owo ekededi, ekpededi etie nte enye idimaha ndidi ndikpono Jehovah.

SITUA OWO MBỌM NTE JESUS

Mbọm mbon oro mîfiọkke Jehovah ama esinam Jesus ukem nte esinamde Jehovah. Matthew 9:36 ọdọhọ ete: “Ke ini enye okụtde otuowo mbọm mmọ anam enye, koro ẹfiomode ẹnyụn̄ ẹsuande mmọ nte erọn̄ eke mînyeneke andikpeme.” Jesus ama ọfiọk se ikanamde mmọ ẹtie ntre. Enye ama ọfiọk ke mme adaiso ido ukpono mmọ ẹkekpep mmọ nsu ikonyụn̄ ituaha mmọ mbọm. Ntre enye ama “ekpep mmọ ediwak n̄kpọ” kpa ye oro enye ọkọfiọkde ke ediwak mmọ ẹyeyak nsio nsio n̄kpọ akpan mmọ ndidi mbet esie.​—Mark 4:​1-9.

Kûyak idem emem fi edieke mme owo mîmaha ndikop ukwọrọikọ ke nsonso oro

N̄kpọ ekeme nditịbe emi anamde mmọ ẹma ndikop

 Ke ini mme owo mîmaha ndikop ukwọrọikọ nnyịn, ana idomo ndifiọk se inamde mmọ ẹkûma ndikop. Ekeme ndidi se mbon oro ẹdọhọde ke idi Christian ẹsinamde anam mmọ ẹsua Bible mîdịghe ẹsua mme Christian. Ekeme ndidi ndusụk mmọ idiọn̄ọke ke se ẹtịn̄de ẹban̄a nnyịn idịghe akpanikọ. Idem ekeme ndinyek ndusụk owo n̄ko ke edieke mmimọ ikopde ukwọrọikọ nnyịn, ke mbon mmimọ m̀mê mbon obio mmimọ ẹyesak mmimọ.

Se ikọwọrọde ndusụk owo anam mmọ ẹkûyoyom ndida utọn̄ n̄kop n̄kpọ mban̄a Abasi. Isụn̄utom emi ekerede Kim ọdọhọ ete: “Odu n̄kan̄ kiet ke efakutom nnyịn emi ekọn̄ akanamde kpukpru se ediwak owo ẹkenyenede atak. Emi anam mme owo do ẹkere ke eke mmimọ okụre. Mmọ ẹditie ekikọhọ ekikọhọ, inyụn̄ imaha ndinịm se mbon en̄wen ẹtịn̄de. Mme owo do isimaha ndikop ukwọrọikọ nnyịn. Ini n̄kosụk n̄kwọrọde ikọ usen kiet, owo kiet ama amia mi onyụn̄ emen ofụt ete ke imọn̄ iwot mi.”

Nso in̄wam Sista Kim aka iso atua mme owo ke efakutom mmọ mbọm kpa ye se ẹkenamde enye? Enye ọdọhọ ete: “Ke ini ẹnamde mi se mîfọnke, mmesiti ke Mme N̄ke 19:11 ọdọhọ ke ‘ikike owo iyakke enye ọsọp iyatesịt.’ Nditi se ikọwọrọde mme owo ke efakutom oro esiyak mbọm mmọ anam mi. Idịghe kpukpru owo do ẹsua ukwọrọikọ nnyịn. Enyene mbon oro ẹsikam ẹtiede-tie ẹbet ifiak idikpep mmọ Bible.”

Ọfọn ibụp idem nnyịn ite: ‘Ekpedi ami ndi mbon oro nsikwọrọde ikọ nnọ, n̄kpesinam n̄kpọ didie?’ Yak idọhọ ke ẹsiwak ndisu nsu nnọ nnyịn mban̄a Mme Ntiense Jehovah. Ekeme ndidi nnyịn n̄ko ikpamaha ndikop ukwọrọikọ mmọ. Mbọm nnyịn okponyụn̄ anam mmọ. Jesus ọkọdọhọ yak inam n̄kpọ ye mme owo ukem nte ikpamade mmọ ẹnam ye nnyịn. Ndisiti emi ayan̄wam nnyịn itua mme owo mbọm idem ke ini mîmemke.​—Matt. 7:12.

SITUA OWO MBỌM NTE APOSTLE PAUL

Mbọm mbon oro ẹkebiọn̄ọde apostle Paul ama esikam anam enye. Ntak emi mbọm mmọ akanamde enye? Enye ikefreke nte enye ekesitiede. Enye ọkọdọhọ ete: “[N̄kedi] osụn̄i isụn̄i ye andikọbọ ye owo emiom ke mbemiso. Edi, ẹma ẹtua mi mbọm, koro n̄kananade ifiọk n̄konyụn̄ nnamde n̄kpọ ke unana mbuọtidem.” (1 Tim. 1:13) Enye ama ọfiọk ke Jehovah ye Jesus ẹma ẹnen̄ede ẹtua enye mbọm. Ekeme ndidi enye ama okụt ke ndusụk mbon emi enye ọkwọrọde ikọ ọnọ ẹtie nte enye ekesitiede.

Nso ke Paul ekesinam ini enye ekesikụtde  mbon emi ẹkesatde ẹyịre ke nsu oro ẹkekpepde mmọ? Utom 17:16 ọdọhọ ke ‘esịt ama ayat enye ndikụt nte ndem ọyọhọde obio’ Athens. Kpa ye oro akabiakde enye ndikụt mmọ ẹkponode ndem, se enye akadade ọtọn̄ọ ndikwọrọ ikọ nnọ mmọ ekedi oro. (Utom 17:​22, 23) Enye ama ọfiọk ndikwọrọ ikọ nnọ nsio nsio owo ‘man enye akpanyan̄a ndusụk mmọ.’​—1 Cor. 9:​20-23.

Imekeme ndinam se Paul akanamde oro edieke ikwọrọde ikọ inọ mbon oro mîmaha ndikop m̀mê mbon oro ẹsatde ẹyịre ke nsu oro ẹkekpepde mmọ. Imekeme ndida se ifiọkde iban̄a mmọ n̄n̄wam mmọ ẹma ndikop “eti mbụk eti n̄kpọ.” (Isa. 52:7) Sista Dorothy ọdọhọ ete: “Ẹkpep ediwak owo ke efakutom nnyịn ke Abasi ọsọn̄ ido etieti, ke inyụn̄ idụhe se nnyịn inamde yak ọfọn enye ke enyịn. Mmesikọm mmọ nte mmọ ẹnen̄erede ẹnịm ke Abasi do. Ekem n̄wụt mmọ nti n̄kpọ emi Bible etịn̄de aban̄a Jehovah ye se enye aduakde ndinam nnọ nnyịn.”

“ẸKA ISO ẸDA NTI EDINAM ẸKAN IDIỌK UBỌK”

Nte utịt ererimbot emi enen̄erede ekpere, imọfiọk ke ndusụk mbon oro isikwọrọde ikọ inọ “ẹyedọdiọn̄ ẹdiọk ẹka iso.” (2 Tim. 3:​1, 13) Edi inaha iyak oro anam mbọm mmọ okûnam nnyịn, mîdịghe anam nnyịn ikûkop idatesịt ke utom nnyịn. Jehovah ayan̄wam nnyịn ‘ika iso ida nti edinam ikan idiọk ubọk.’ (Rome 12:21) Asiakusụn̄ kiet emi ekerede Jessica ọdọhọ ete: “Mmesiwak ndikụt mbon emi ẹkohorede idem mîsinyụn̄ idaha nnyịn ye ukwọrọikọ nnyịn ke n̄kpọ. Utọ n̄kpọ oro esibiak owo. Ke ini ntọn̄ọde ndikwọrọ ikọ nnọ owo, mmesiben̄e Jehovah nte an̄wam mi nda owo oro nte enye adade. Oro isiyakke esịt ayat mi, edi esinam n̄kere nte n̄kpan̄wamde owo oro.”

Imesika iso iyom mbon oro ẹdimade ndikpep Bible

Nte ini akade, ndusụk owo ẹsidinyịme ndikpep Bible

Akpana ikere n̄ko nte ikpan̄wamde nditọete oro isan̄ade kiet ikwọrọ ikọ. Jessica ọdọhọ ke edieke ẹnamde eyenete oro isan̄ade kiet ikwọrọ ikọ n̄kpọ, ke imọ isikọbọke nditịn̄ n̄kpọ oro. Enye ọdọhọ ke imesikpụhọ nneme itịn̄ n̄kpọ emi enemde-nem, utọ nte ufọn oro ukwọrọikọ nnyịn enyenede kpa ye oro ndusụk owo mîmaha ndikop.

Jehovah etịm ọfiọk ke idịghe kpukpru owo ẹsima ndikop ukwọrọikọ nnyịn. Ntre esịt esinem enye ke ini ituade mme owo mbọm nte enye esituade! (Luke 6:36) Imọfiọk ke mbọm mme owo idinamke Jehovah ke nsinsi. Imonyụn̄ inịm ke enye ọfiọk nnennen ini emi enye edisobode idiọk ererimbot emi. Edi inaha isịn ifu ke ukwọrọikọ nnyịn tutu ini oro edisịm. (2 Tim. 4:2) Ẹyak ika iso isịn ifịk ikwọrọ ikọ, inyụn̄ iyak mbọm “kpukpru orụk owo” anam nnyịn.