Be ka se isịnede

Be ka se isịnede

Se Mme Prọfet Ẹkpepde Nnyịn Ẹban̄a Abasi

Se Mme Prọfet Ẹkpepde Nnyịn Ẹban̄a Abasi

Ke eset, Abasi ama esitịn̄ akpan n̄kpọ ọnọ mme prọfet, ndien mmọ ẹmen ẹtịn̄ ẹnọ mme owo. Nso ke etop oro Abasi ọkọnọde mme prọfet ekpep nnyịn aban̄a Abasi? Ẹyak ise se ikemede ndikpep nto prọfet Abasi ita.

ABRAHAM

Abasi ama kpukpru owo onyụn̄ oyom ndidiọn̄ mmọ.

Abasi ọkọdọhọ Abraham ete: “Kpukpru ubon ke isọn̄ ẹyebọ edidiọn̄ ke ntak fo.”—Genesis 12:3.

Nso ke emi ekpep nnyịn? Abasi ama nnyịn etieti onyụn̄ oyom ndidiọn̄ kpukpru mbon oro ẹkopde uyo esie, edide erenowo, n̄wan, m̀mê eyenọwọn̄.

MOSES

Abasi esitua nnyịn mbọm onyụn̄ ọdiọn̄ mbon oro ẹsịnde ukeme ẹyom ndifiọk enye.

Ata Ọkpọsọn̄ Abasi ama ọnọ Moses odudu ndinam ikpọ utịben̄kpọ. Kpa ye oro, Moses ama eben̄e Abasi ete: “Nam mi mfiọk usụn̄ fo, man mfiọk fi, man nnyụn̄ n̄kụt mfọn ke iso fo.” (Exodus 33:13) Se Moses ekeben̄ede ama enem Abasi tutu enye anam Moses enen̄ede ọfiọk enye onyụn̄ ọdiọn̄ọ mme edu esie. Ke uwụtn̄kpọ, enye ọkọdọhọ Moses ke imọ idi “Abasi mbọm ye mfọn.”—Exodus 34:6, 7.

Nso ke emi ekpep nnyịn? Abasi ọyọdiọn̄ kpukpru mbon oro ẹyomde ndinen̄ede ndiọn̄ọ enye, edide irenowo, iban, m̀mê nditọwọn̄. Abasi etịn̄ ke Bible nte iyomde ẹkpono imọ, onyụn̄ etịn̄ ke imenen̄ede iyom ndidiọn̄ nnyịn.

 JESUS

Jesus ama atua mme owo mbọm onyụn̄ ọkọk kpukpru orụk udọn̄ọ

Abasi ọyọdiọn̄ nnyịn ke nsinsi edieke ikpepde Bible man idiọn̄ọ Jesus inyụn̄ idiọn̄ọ se enye ekekpepde onyụn̄ anamde.

Bible etịn̄ nte Jesus okodude uwem ye se enye ekekpepde. Abasi ama ọnọ Jesus odudu ndinam ediwak utịben̄kpọ, utọ nte ndinam nnan okụt usụn̄, inan okop ikọ, mbụn̄ọ onyụn̄ asan̄a. Enye ama akam anam mme akpan̄kpa ẹset. Se Jesus akanamde oro okowụt se Abasi edinamde inọ kpukpru owo ke ini iso. Jesus ama etịn̄ se ikpanamde man itiene idu ini Abasi edinamde emi. Enye ọkọdọhọ ete: “Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet, ye enye emi afo okosiode ọdọn̄, kpa Jesus Christ.”—John 17:3.

Jesus ama esitua mme owo mbọm onyụn̄ ọfọn ido. Irenowo, iban, ye nditọwọn̄ ẹma ẹsika ẹbịne enye, sia enye ọkọdọhọde ete: “Ẹkpebe mi, koro ami mmenyene ifụre ifụre ido nnyụn̄ nsụhọde idem, ndien mbufo ẹyekụt nduọkodudu ẹnọ ukpọn̄ mbufo.” (Matthew 11:29) Jesus iketiehe nte mbon eyo esie, utu ke oro, enye ama esifọn ido ye iban onyụn̄ okpono mmọ.

Nso ke emi ekpep nnyịn? Jesus ama enen̄ede ama mme owo, onyụn̄ owụt nte nnyịn ikpanamde n̄kpọ ye kiet eken.

JESUS IDỊGHE ABASI

Bible ọdọhọ ke nnyịn “inyene Abasi kiet” ye nte ke Jesus Christ ekedi isụn̄utom Abasi. (1 Corinth 8:6) Jesus ama ọdọhọ ke Abasi okpon akan imọ ye nte ke enye ọkọdọn̄ imọ idi isọn̄.—John 11:41, 42; 14:28. *

^ ikp. 17 Edieke oyomde ndifiọk n̄kpọ en̄wen mban̄a Jesus Christ, mbọk kot ọyọhọ ukpepn̄kpọ 4 ke n̄wed oro Eti Mbụk Emi Otode Abasi! N̄wed emi odu ke Intanet ke www.jw.org/efi.