Be ka se isịnede

Be ka se isịnede

“Mbufo ẹmesọn̄ urua ẹkan ediwak akadan̄abasi.”​—MATTHEW 10:31

Ndi Abasi Ọdọdiọn̄ọ Utọ Owo Nte Ami?

Ndi Abasi Ọdọdiọn̄ọ Utọ Owo Nte Ami?

SE IKPEPDE ITO NTE ABASI OKOBOTDE OWO

Akpa hour emi eyen amanade edi ata akpan ini ke uwem esie sia akamba ukpụhọde odu ke ererimbot oro ẹmande enye ẹsịn ye esịt idịbi emi enye okodude. Ntre, edieke eka afatde eyen esie adian ke idem ke akpa hour oro, oro esinen̄ede enyene ufọn onyụn̄ an̄wam eyen oro ọkọri ọfọn. *

Nso isinam eka ama nsekeyen esie ntem? Ke n̄wed kiet emi ẹkotde The Journal of Perinatal Education, Prọfesọ Jeannette Crenshaw ọkọdọhọ ke idem eka eyen esision̄o mmọn̄ibọk emi ẹkotde oxytocin ke ini enye otụkde, esede, onyụn̄ ọnọde nsekeyen esie eba, ndien mmọn̄ibọk oro esinam enye ọtọn̄ọ ndinam n̄kpọ nte eka. Mmọn̄ibọk en̄wen emi idem eka eyen esision̄ode ndondo oro enye amande eyen esinam ọdọn̄ enye ndinen̄ede nse mban̄a nsekeyen esie onyụn̄ anam mmọ mbiba ẹnen̄ede ẹdiana kiet. Nso ke emi owụt?

Jehovah * Abasi emi okobotde nnyịn akanam eka ye eyen ẹkeme ndidiana kiet ntem. Edidem David ọkọdọhọ ke Abasi ‘okosio imọ ke idịbi’ eka imọ onyụn̄ anam esịt ana imọ sụn̄ ke ini iwapde eba eka imọ. Enye ama ọbọn̄ akam ọnọ Abasi ete: “Ẹkekpọn̄ mi ẹnọ fi ke ini emi n̄kamanade; toto ke idịbi eka mi afo edi Abasi mi.”​—Psalm 22:​9, 10. (NWT, eke Ikọmbakara emi ẹkesiode ke 2013)

KERE ISE: Edieke Abasi okobotde utọ n̄kpọ emi esịn eka eyen ke idem man esidọn̄ enye ndise mban̄a eyen esie nnyụn̄ mma enye, ndi Abasi ke idemesie ikemeke ndise mban̄a nnyịn emi idide nditọ esie?​—Utom 17:29.

BIBLE ANAM IFIỌK KE ABASI EKERE ABAN̄A NNYỊN

Jesus Christ emi enen̄erede ọfiọk Abasi ọkọdọhọ ete: “Nte owo inyamke akadan̄abasi iba ke okudọk okụk kiet? Edi baba kiet ke otu mmọ iduọhọ ke isọn̄ ke Ete mbufo mîfiọkke. Edi ẹbat kpa kpukpru idet ibuot mbufo. Ke ntre ẹkûfehe ndịk: Mbufo ẹmesọn̄ urua ẹkan ediwak akadan̄abasi.”​—Matthew 10:​29-31.

Nnyịn isiwakke ndise se n̄kpri inuen ẹnamde, isinyụn̄ idọn̄ke enyịn ke ini kiet ke mmọ ọduọde ke isọn̄. Edi Ete nnyịn eke heaven ọdiọn̄ọ inuen kiet kiet! Kpa ye oro, idụhe inuen emi ọsọn̄de urua nte owo, ọkpọkọm ẹtan̄ ediwak inuen ẹdian kiet. Nso ke emi ekpep fi? Kûkere ke Abasi idiọn̄ọke utọ owo nte afo. Utu ke oro, nịm ke enye okụt se iwọrọde fi onyụn̄ enen̄ede ekere aban̄a fi!

Abasi enen̄ede ama nnyịn onyụn̄ oyom n̄kpọ ọfọn nnyịn

 N̄wed Abasi ọdọhọ nnyịn ete

  • “Enyịn Jehovah odu ke kpukpru ebiet, ese mme idiọkowo ye nti owo.”​—MME N̄KE 15:3.

  • “Enyịn Jehovah ke ese ndinen owo, enye onyụn̄ ọbiọn̄ utọn̄ ke eseme emi mmọ ẹsemede ẹyom un̄wam.”​—PSALM 34:15.

  • “Ami nyadara nnyụn̄ ndat esịt ke ima-mfọnido fo, koro afo omokụt ukụt mi; afo ọmọfiọk nnanenyịn ukpọn̄ mi.”​—PSALM 31:7.

‘N̄KEKERE KE JEHOVAH IMAHA MI’

Edieke idiọn̄ọde ke Abasi enen̄ede ama nnyịn onyụn̄ ekere aban̄a nnyịn, ndi oro ekeme ndinam uwem enem nnyịn? Ih. Se iketịbede inọ Hannah * emi otode England owụt ke emi edi akpanikọ. Enye ọdọhọ ete:

“Mma nsiwak ndikere ke Jehovah imaha mi, ke enye isinyụn̄ ikopke akam mi ke ntak emi mmenyeneke mbuọtidem. N̄kekere ke enyene se nnamde emi anamde Abasi ọnọ mi ufen, mîdịghe ke enye idaha mi ke n̄kpọ. N̄konyụn̄ n̄kere ke ibeheke Abasi m̀mê utọ owo nte ami akam ododu.”

Edi, Hannah ikereke aba ke Jehovah imaha imọ. Nso inam enye okûkere aba? Enye ọdọhọ ete: “Ikedịghe n̄kpọ usen kiet. Mmeti inikiet ko emi n̄kokopde utịn̄ikọ Bible oro akaban̄ade ufak emi Jesus ekekpede ke ibuot nnyịn. Utịn̄ikọ oro ama enen̄ede otụk mi onyụn̄ anam nnịm ke Jehovah ama mi. Ndien ke ini n̄kụtde nte Jehovah ọbọrọde akam mi, mmọn̄eyet esisiaha mi ke enyịn sia oro esinam mfiọk ke enye ama mi. N̄ko, ke ini n̄kpepde Bible nnyụn̄ ndụkde mme mbono esop Christian, mmesikpep ekese n̄kpọ mban̄a Jehovah, mme edu esie, ye nte enye esede nnyịn. Idahaemi, mmokụt ke Jehovah ama mi, esin̄wam mi, onyụn̄ eben̄e idem ndise mban̄a nnyịn owo kiet kiet.”

Se Hannah etịn̄de emi enen̄ede ọsọn̄ọ nnyịn idem. Edi nso ikeme ndinam fi enịm ke Abasi ọfiọk nte etiede fi ke idem? Ibuotikọ oro etienede ọyọbọrọ mbụme emi.

^ ikp. 3 Isidọn̄ke ndusụk eka emi ẹdọn̄ọde udọn̄ọ emi ẹkotde Postpartum Depression ndifat eyen mmọ ndian ke idem ke ndondo oro eyen oro amanade. Edi ikpanaha mme eka emi ẹnyenede utọ udọn̄ọ emi ẹduọhọ idemmọ. N̄ka emi ẹkotde National Institute of Mental Health ke United States ẹdọhọ ke nsio nsio n̄kpọ ẹsinam owo enyene udọn̄ọ emi, ke idịghe se eka anamde m̀mê mînamke esinam. Edieke oyomde ndifiọk n̄kpọ en̄wen mban̄a udọn̄ọ emi, mbọk kot ibuotikọ emi “Understanding Postpartum Depression” ke Ẹdemede! Ikọmbakara eke June 8, 2003.

^ ikp. 5 Bible ọdọhọ ke Abasi ekere Jehovah.​—Psalm 83:18.

^ ikp. 15 Ẹkpụhọ ndusụk enyịn̄ ke magazine emi.