Be ka se isịnede

Be ka se isịnede

Ini Ewe ke Utịt Edidi? Se Jesus Eketịn̄de

Ini Ewe ke Utịt Edidi? Se Jesus Eketịn̄de

Nte ikokụtde ke ibuotikọ oro osụk okụrede do, ke ini Bible etịn̄de aban̄a utịt ererimbot, oro iwọrọke ke ẹyesobo kpukpru owo ẹfep, inyụn̄ iwọrọke ke ẹyesobo isọn̄ ofụri ofụri. Utu ke oro, ọwọrọ ke ẹyesobo ndiọi owo ẹfep ẹnyụn̄ ẹnam ndiọi n̄kpọ oro akade iso ke ererimbot ẹtre. Edi ndi Bible asiak ini emi idiọk ererimbot emi edisịmde utịt?

YAK INEME N̄KPỌ IBA EMI JESUS EKETỊN̄DE ABAN̄A UTỊT ERERIMBOT EMI:

“Ẹdu ke ukpeme, ndien, koro mbufo mîfiọkke usen m̀mê hour oro.”—MATTHEW 25:13.

“Ẹka iso ẹse, ẹdu ke edidemede, koro mbufo mîfiọkke edikem ini.”—MARK 13:33.

Emi owụt ke idụhe owo ndomokiet ke isọn̄ emi ọdiọn̄ọde nnennen ini emi utịt edidide. Edi Abasi enịm nnennen “usen ye hour” emi utịt edidide. (Matthew 24:36) Ndi emi ọwọrọ ke idụhe n̄kpọ ndomokiet emi ikemede ndida ndiọn̄ọ ke utịt ererimbot emi ekpere? Iwọrọke ntre. Enyene nsio nsio n̄kpọ emi Jesus ọkọdọhọde ke ẹyetịbe, emi mme mbet esie ẹdidade idiọn̄ọ ke utịt ekpere.

SE JESUS ỌKỌDỌHỌDE KE ẸYETỊBE

Mme n̄kpọ oro Jesus akasiakde ẹdi idiọn̄ọ “akpatre ini editịm n̄kpọ emi,” oro edi, idiọn̄ọ utịt ererimbot emi. Jesus ọkọdọhọ ete: “Idụt ayadaha an̄wana ye idụt, obio ubọn̄ kiet oyonyụn̄ adaha an̄wana ye obio ubọn̄ en̄wen, ndien akan̄ ye unyekisọn̄ ẹyedu ke nsio nsio ebiet.” (Matthew 24:3, 7) Enye ama ọdọhọ n̄ko ke ndiọi udọn̄ọ ẹyedu. (Luke 21:11) Ndi omokụt nte prọfesi Jesus emi osude?

Mme owo ẹnen̄ede ẹbọ ufen mfịn ke ntak ekọn̄, biọn̄, unyekisọn̄, ye nsio nsio udọn̄ọ. Ke uwụtn̄kpọ, ke 2004, ata akamba unyekisọn̄ ama etịbe ke Inyan̄ibom India onyụn̄ osio mmọn̄ ofụk obio, ndien oro ama owot n̄kpọ nte owo 225,000. Ke ufan̄ isua kiet ye n̄kpọ, udọn̄ọ COVID-19 owot n̄kpọ nte owo miliọn ita. Jesus ọkọdọhọ ke mme n̄kpọ ntem ẹdiwụt ke utịt ererimbot enen̄ede ekpere.

 “MME AKPATRE USEN”

Bible okot ini emi ekperede utịt ererimbot emi “mme akpatre usen.” (2 Peter 3:3, 4) Udiana Timothy 3:1-5 ọdọhọ ke mme owo ẹyenen̄ede ẹdiọk ke mme akpatre usen emi. (Se ekebe oro “ Mbemiso Utịt Edide.”) Ndi omokụt ke mme owo mfịn ẹwak ndikere mban̄a idemmọ kpọt, ẹdiọk itọn̄, ẹtie afai afai, inyụn̄ imaha mme owo? Emi n̄ko owụt ke utịt enen̄ede ekpere.

Mme akpatre usen emi ẹdibịghi didie? Bible owụt ke idinen̄ekede ibịghi. Ekem, Abasi oyosobo “mbon oro ẹbiatde isọn̄” efep.—Ediyarade 11:15-18; 12:12.

 IBỊGHIKE ISỌN̄ EDIDI PARADISE!

Abasi enenịm usen ye ini emi utịt edidide. (Matthew 24:36) Edi enye iyomke “baba owo kiet atak.” (2 Peter 3:9) Enye ọnọ kpukpru owo ifet ndikpep n̄kpọ mban̄a enye nnyụn̄ n̄kop uyo esie. Ntak? Sia enye oyom nnyịn ibọhọ utịt ererimbot emi inyụn̄ idu uwem ke obufa ererimbot esie emi ofụri isọn̄ edidide Paradise.

Abasi anam ikọt esie ẹkpep mme owo ke ofụri ererimbot se mmọ ẹkpenamde man ẹdu uwem ke obufa ererimbot esie. Jesus ọkọdọhọ ke ẹyekwọrọ eti mbụk Obio Ubọn̄ Abasi “ke ofụri isọn̄.” (Matthew 24:14) Ke 2019, Mme Ntiense Jehovah ẹma ẹda se ibede hour biliọn iba ẹkwọrọ ikọ ẹnyụn̄ ẹkpep mme owo Bible ke ofụri ererimbot. Jesus ọkọdọhọ ke ẹdikwọrọ ikọ emi ke ofụri isọn̄ mbemiso utịt edide.

Ibịghike owo idikarake owo aba. Edi afo emekeme ndibọhọ utịt ererimbot emi onyụn̄ etiene odụn̄ ke isọn̄ emi Abasi ọn̄wọn̄ọde ndinam edi Paradise. Ibuotikọ oro etienede eyetịn̄ se akpanamde man etiene odụn̄ ke obufa ererimbot Abasi.

Prọfesi emi Jesus eketịn̄de aban̄a “mme akpatre usen” anam inyene idotenyịn