Be ka se isịnede

Be ka se isịnede

Nam N̄kpọ Idahaemi Ndiwụt ke Omoyom Obio Ubọn̄ Abasi!

Nam N̄kpọ Idahaemi Ndiwụt ke Omoyom Obio Ubọn̄ Abasi!

Da nte ke ata akamba oyobio ọmọn̄ etịbe ke obio mbufo. Ndien ukara ẹdọhọ kpukpru owo ẹsọsọp ẹwọrọ ẹkpọn̄ obio ẹkedu ke ebiet emi oyobio oro mîdisịmke. Nso ke akpanam? Anaedi ekpetiene efehe ọwọrọ.

Ata akamba afanikọn̄ emi Jesus okokotde “akwa ukụt” ọmọn̄ etetịbe. (Matthew 24:21) Idụhe ebiet ndomokiet emi ididude oro akwa ukụt emi mîdisịmke. Edi enyene se ikemede ndinam man ibọhọ akwa ukụt oro. Nso ke ikpanam?

Jesus Christ ama etịn̄ se ikpanamde ini enye ọkọkwọrọde ikọ ke obot. Enye ọkọdọhọ ete: “Ẹka iso, ndien, ndibem iso nyom obio ubọn̄ [Abasi] ye edinen ido esie.” (Matthew 6:33) Didie ke ikeme ndinam oro?

Bem iso yom Obio Ubọn̄ Abasi. Oro ọwọrọ ke ikpada Obio Ubọn̄ Abasi nte ata akpan n̄kpọ ikan n̄kpọ en̄wen ekededi. (Matthew 6:25, 32, 33) Ntak emi ikpadade Obio Ubọn̄ Abasi ntre? Sia idụhe owo ndomokiet ke isọn̄ emi ekemede nditre mfịna nnyịn. Obio Ubọn̄ Abasi kpọt ekeme.

Yom edinen ido esie. Ikpenyene ndidomo ofụri ukeme ndidu uwem nte Abasi ọdọhọde. Ntak ikpanamde emi? Sia ekpedi akamba ndudue ndidomo ndibiere se idide eti ye idiọk ke idem nnyịn. (Mme N̄ke 16:25) Edi, edieke idude uwem nte Abasi ọdọhọde, iyenem enye esịt, iyonyụn̄ ikop inemesịt.—Isaiah 48:17, 18.

Ka iso ndibem iso nyom Obio Ubọn̄ Abasi ye edinen ido esie. Jesus ama etịn̄ ke ndusụk owo ẹkeme ndikere ke edieke mmimọ inyenede ediwak okụk, ke n̄kpọ idinamke mmimọ. Mbon en̄wen ẹsịn ibuot ẹsịn  itọn̄ ẹn̄wana n̄kpọ tutu inyeneke ini aba iyom Obio Ubọn̄ Abasi.—Matthew 6:19-21, 25-32.

Edi Jesus ọkọdọhọ ke mbon oro ẹyomde Obio Ubọn̄ Abasi ẹyenyene se ẹdade ẹdu uwem idahaemi, ẹnyụn̄ ẹdu uwem nsinsi ke ini iso.—Matthew 6:33.

Kpa ye oro mbet Jesus emi ẹkedude ke eyo mme apostle ẹkeyomde Obio Ubọn̄ Abasi ye edinen ido esie, ubiak ye ufen iketreke ke eyo mmọ. Edi se mmọ ẹkenamde oro ama ekpeme mmọ. Didie?

Mmọ ẹma ẹdu uwem nte Abasi ọkọdọhọde, ndien oro ama anam mmọ ẹkûbọ utọ ufen emi mbon oro mîkokopke uyo Abasi, ẹkebọde. Sia mmọ ẹkenen̄erede ẹnịm ke Obio Ubọn̄ Abasi eyedi, oro ama anam mmọ ẹkeme ndiyọ ikpọ mfịna oro mmọ ẹkenyenede. Abasi ama onyụn̄ ọnọ mmọ “odudu eke ebede ukeme owo” man mmọ ẹkeme ndiyọ.—2 Corinth 4:7-9.

NDI AFO EYEBEM ISO OYOM OBIO UBỌN̄ ABASI?

Mme Christian oro ẹkedude uwem ke eyo mme apostle ẹma ẹbem iso ẹyom Obio Ubọn̄ Abasi nte Jesus ọkọdọhọde. Mmọ ẹma ẹkwọrọ eti mbụk Obio Ubọn̄ ke ofụri ikpehe ererimbot oro mmọ ẹkedụn̄de. (Colossae 1:23) Ndi odu mbon emi ẹnamde ukem utom oro mfịn?

Ih, odu! Mme Ntiense Jehovah ẹdiọn̄ọ ke ekpri ini osụhọ, Obio Ubọn̄ Abasi ọmọn̄ edisobo ererimbot Satan emi. Ntre mmọ ke ẹsịn ofụri ukeme ẹnam utom emi Jesus ọkọnọde mmọ. Jesus ọkọdọhọ ete: “[Ẹyekwọrọ] eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.”—Matthew 24:14.

Nso ke akpanam ke ini okopde eti mbụk emi? Mbọk nam ukem se mbon Beroea ke Macedonia ẹkenamde ke eyo mme apostle. Ke ini apostle Paul ọkọkwọrọde eti mbụk Obio Ubọn̄ ọnọ mmọ, mmọ ẹma “[ẹbọ] ikọ Abasi ye ata ọkpọsọn̄ udọn̄.” Ekem, mmọ ẹma ‘ẹnen̄ede ẹdụn̄ọde N̄wed Abasi’ man ẹse m̀mê se mmimọ ikokopde edi akpanikọ, mmọ ẹma ẹnyụn̄ ẹnanam se ẹkekpepde mmọ.—Utom 17:11, 12.

Se afo okponyụn̄ anamde edi oro. Edieke ebemde iso oyom Obio Ubọn̄ Abasi ye edinen ido esie, Abasi eyekpeme fi, afo oyonyụn̄ enyene ata emem ye ifụre ke ini iso.