Be ka se isịnede

Be ka se isịnede

Ke Ini Owo Fo Akpade

Ke Ini Owo Fo Akpade

Vanessa emi odụn̄de ke Australia ọdọhọ ete: “Ibuot ama oyon̄ mi ini eyeneka mi akakpade. Idem ke ediwak ọfiọn̄ ama ekebe, ekesidi mma nti enye, n̄kpa esie abiak mi nte ẹda ikwa ẹkịm mi esịt. Ndusụk ini esịt ama esiyat mi ke ini n̄kerede m̀mê nso ikanam enye akpa. Esịt ama esinyụn̄ afịna mi sia n̄kekere ke akpakana nsinen̄ede ndu ye enye ke ini enye okodude ke uwem.”

EDIEKE edide akanam owo fo akpa, anaedi n̄kpa oro ama enen̄ede abiak fi onyụn̄ anam ofụhọ. Anaedi esịt ama ayat fi, esịt afịna fi, ndịk onyụn̄ anam fi. Ekeme ndidi uwem ama onyụn̄ odorode fi. 

Fiọk ete ke idiọkke ndifụhọ n̄kpa owo fo. Edieke ofụhọde, oro owụt ke ama enen̄ede ama owo oro. Edi, ndi enyene se ikemede ndin̄wam fi ke ini ofụhọde n̄kpa owo fo?

MME N̄KPỌ ORO ẸKEMEDE NDIN̄WAM FI

Kpa ye oro n̄kpa owo fo ekemede ndibiak fi mbịghi, enyene ndusụk n̄kpọ oro isiakde mi oro ẹkemede ndin̄wam fi:

KÛKOP BỤT NDITUA EYET

Mme owo isifụhọke ukem ukem, ndusụk owo ẹsinyụn̄ ẹfụhọ ẹbịghi akan mbon en̄wen. Edi nditua eyet ekeme ndinam ubiak n̄kpa oro afiak efịghede fi ke esịt. Vanessa oro iketịn̄de iban̄a ọdọhọ ete: “Mma nsitua etieti. N̄koyom efịghede mi ke esịt.” Sofía emi eyeneka esie akakpade ọkpọn̄ enye ọdọhọ ete: “Esinen̄ede abiak mi ke ini n̄kerede se iketịbede. Esitie nte ndiyet owo enyịn unan. Okposụkedi emi esinen̄erede abiak owo, enye esitiene anam unan oro ọsọp akpa.”

TỊN̄ NTE ETIEDE FI KE IDEM NỌ OWO

Imọdiọn̄ọ ke enyene mme ini emi akpamade ndidu ikpọn̄. Edi nditie ikpọn̄ mfụhọ etie nte ndibiom  mbiomo emi odobide akan fi. Kop se Jared emi edide isua 17 eketịn̄de mi aban̄a ini ete esie akakpade: “Mma ntịn̄ nte eketiede mi ke idem nnọ mbon en̄wen. N̄kereke ke se n̄ketịn̄de ama esịne ifiọk, edi ama ọfọn nte n̄ketịn̄de mfịna mi nnọ owo.” Janice oro iketịn̄de iban̄a ke akpa ibuotikọ etịn̄ ufọn en̄wen oro odude ke nditịn̄ nte etiede fi ke idem nnọ owo. Enye ọdọhọ ete: “Ndineme nneme ye mbon en̄wen esinen̄ede ọdọn̄ mi esịt. Emi ama anam ndiọn̄ọ ke mbon en̄wen ẹfiọk se iwọrọde mi ye nte ke mmọ ẹyen̄wam mi.”

NYỊME MBON EN̄WEN ẸN̄WAM FI

Dọkta kiet ọdọhọ ete: “Edieke mbon emi ẹfụhọde n̄kpa owo mmọ ẹyakde mme ufan ye mbonubon mmọ ẹn̄wam mmọ ke ndondo oro owo mmọ akpade, emi esin̄wam ediwak mmọ ẹkeme ndiyọ se iwọrọde mmọ utu ke ndiyak mfụhọ emen mmọ emen.” Ntre, nam mme ufan fo ẹdiọn̄ọ nte mmọ ẹkpen̄wamde fi. Etie nte mmọ ẹkpema ndin̄wam fi, edi idiọn̄ọke se ẹkpenamde.—Mme N̄ke 17:17.

SAN̄A KPERE ABASI

Tina ọdọhọ ete: “Ke ini kansa okowotde ebe mi, n̄kenyeneke aba owo emi ntịn̄de mfịna mi nnọ. Ntre n̄kesitịn̄ kpukpru se ifịnade mi nnọ Abasi! Ata akpa n̄kpọ emi n̄kesinamde eyo ama esiere ekedi ndiben̄e enye an̄wam mi n̄keme ndiyọ. Abasi ama an̄wam mi akan nte n̄kekerede.” Tarsha, emi ekedide isua 22 ke ini eka esie akakpade, ọdọhọ ete: “Ndisikot Bible kpukpru usen ama ọdọn̄ mi esịt tutu. Ikọ Abasi esinam n̄kere mme n̄kpọ emi ẹsisọn̄ọde mi idem.”

KERE NTE EDISET KE N̄KPA EDITIEDE

Tina afiak ọdọhọ ete: “Ke nsonso oro, idotenyịn ediset ke n̄kpa ikenyeneke ufọn ndomokiet inọ mi sia n̄koyom ndikụt ebe mi idahaoro, nditọ mi ẹnyụn̄ ẹyom ete mmọ idahaoro. Edi idahaemi isua inan̄ ama ekebe mi, idotenyịn oro enen̄ede ọsọn̄ọ mi idem. Se inịmde mi uwem edi oro. Mmesitie n̄kere ini emi ndifiakde n̄kụt enye, ndien emi esinen̄ede enem mi onyụn̄ anam esịt ana mi sụn̄!”

Iwọrọke ke edieke anamde mme n̄kpọ oro itịn̄de mi ke n̄kpa owo fo idibiakke fi aba. Edi se iketịbede inọ Vanessa ekeme ndisọn̄ọ fi idem. Enye ọdọhọ ete: “Emekeme ndikere ke imọ idikemeke ndiyọ, edi nte ini akade oyokụt ke unen̄ekede ufụhọ aba.”

Ti ke kpa ye oro owo fo akpade, oro iwọrọke ke okwo okụre. Abasi ekeme ndin̄wam fi enyene nti ufan onyụn̄ okop inem uwem. Ndien ke mîbịghike Abasi ayanam mme akpan̄kpa ẹset. Enye oyom fi afiak okụt owo fo oro akakpade. Ndien udûfụhọke aba ke nsinsi nsinsi!