Be ka se isịnede

Be ka se isịnede

Ke Ini Etiede Nte N̄kpa Fo Ọfọn Akan Uwem

Ke Ini Etiede Nte N̄kpa Fo Ọfọn Akan Uwem

Adriana emi otode Brazil ọdọhọ ete: “N̄kpọ emi ama afịna mi tutu n̄kere ndiwot idem.”

NDI akanam n̄kpọ afịna fi tutu afo oyom ndiwot idem? Edieke edide ntre, anaedi an̄wan̄a fi nte eketiede Adriana ke idem. Esịt ekesitetịmede enye kpukpru ini. Enye ama esinyụn̄ ofụhọ, inyụn̄ inyeneke idotenyịn. Ke ini enye akakade ufọkibọk, ẹma ẹdikụt ke enye ọdọn̄ọ udọn̄ọ emi esinamde owo ofofụhọ kpukpru ini.

Kere n̄ko se iketịbede inọ ete kiet ke Japan emi ekerede Kaoru. Enye ekesise aban̄a ete ye eka esie oro ẹma ẹkesọn̄. Enye ọdọhọ ete: “Ini oro, utom ama efịk mi tutu. Nte ini akakade, udia ama odorode mi, n̄konyụn̄ n̄kemeke ndide idap ọfọn. Mma ntọn̄ọ ndikere ke nyọbọhọ kpukpru emi edieke n̄wotde idem.”

Ojebode emi otode Nigeria ọdọhọ ete: “Mma nsifụhọ tutu ntua, ntre mma n̄kere ndiwot idem.” Edi Ojebode, Kaoru, ye Adriana ikowotke idem. Kpa ye oro, n̄kpọ nte owo 800,000 ẹsiwot idem kpukpru isua.

NSO IKEME NDIN̄WAM MBON EMI ẸFỤHỌDE?

Ata ediwak mbon oro ẹsiwotde idem ẹsidi irenowo, sia bụt isiyakke ediwak mmọ ẹtịn̄ mfịna mmọ ẹnọ owo man ẹn̄wam mmọ. Jesus ọkọdọhọ ke mbon emi idem mîsọn̄ke ẹsiyom abiausọbọ. (Luke 5:31) Ntre, edieke ofụhọde tutu ekere ndiwot idem, mbọk kûyak bụt anam fi etre nditịn̄ nnọ owo man ẹn̄wam fi. Ediwak mbon oro ẹdọn̄ọde udọn̄ọ emi esinamde owo ofụhọ kpukpru ini ẹsika ufọkibọk, ndien ẹsin̄wam mmọ. Ojebode, Kaoru, ye Adriana ẹma ẹka ẹkekụt dọkta, ndien ẹma ẹn̄wam mmọ ẹkeme ndiyọ mfịna mmọ.

Ke ini owo emi ọdọn̄ọde udọn̄ọ emi esinamde owo ofụhọ kpukpru ini akade ufọkibọk, dọkta ekeme ndinọ enye ibọk mîdịghe etie ye enye eneme se enye akpanamde man mfụhọ esie osụhọde. Esiyom mbonubon ye mme ufan ẹnyene ime ye mbon emi ẹdọn̄ọde utọ udọn̄ọ emi ẹnyụn̄ ẹn̄wam mmọ. Mfọnn̄kan ufan emi owo ekemede ndinyene edi Jehovah Abasi, emi adade Bible an̄wam nnyịn.

NDI ENYENE INI EMI UDỌN̄Ọ MÎDIDỤHE ABA?

Idịghe usen kiet ke ẹsida ẹsọbọ owo emi ọdọn̄ọde udọn̄ọ emi esinamde owo ofụhọ kpukpru ini. Esinyụn̄ oyom mbon oro ẹdọn̄ọde utọ udọn̄ọ emi ẹkpụhọde nte ẹdude uwem man ẹkeme ndiyọ. Edi, edieke ọdọn̄ọde utọ udọn̄ọ emi, tie kere ban̄a ini emi udọn̄ọ mîdidụhe aba. Se Ojebode esinamde edi oro. Enye ọdọhọ ete: “Ke mbet ini emi se idude ke Isaiah 33:24 edisude, emi ọdọhọde ke ini ke edi emi owo ndomokiet mîdidọhọke ite ‘ndọdọn̄ọ.’” Yak un̄wọn̄ọ Abasi emi aban̄ade “obufa isọn̄” emi “ubiak” mîdidụhe aba, ọdọn̄ fi esịt nte ọdọn̄de Ojebode. (Ediyarade 21:1, 4) Un̄wọn̄ọ Abasi emi ọwọrọ ke editịmede esịt ye mfụhọ ididụhe aba. N̄kpọ ndomokiet idifịnake fi aba. Udutịghi aba se iwọrọde fi, utọ n̄kpọ oro idinyụn̄ idụkke fi esịt.—Isaiah 65:17.