Be ka se isịnede

Be ka se isịnede

Se Bible Etịn̄de Aban̄a Abasi ye Jesus

Se Bible Etịn̄de Aban̄a Abasi ye Jesus

Okposụkedi emi mme owo ẹkponode nsio nsio abasi, ata Abasi kiet kpọt odu. (John 17:3) Enye edi “N̄kon̄n̄kan Abasi,” enye emi okobotde kpukpru n̄kpọ onyụn̄ ọnọde kpukpru nnyịn uwem. Enye ikpọn̄ ke ikpokpono.—Daniel 7:18; Ediyarade 4:11.

Anie Edi Abasi?

Enyịn̄ Abasi ama odu ke ata akpa Bible N̄KPỌ NTE ITIE 7,000

JEHOVAH Edi enyịn̄ Abasi

ỌBỌN̄, ABASI, ETE—Ndusụk udori-enyịn̄ Jehovah

Abasi Ekere Didie? Abasi ke idemesie ọdọhọ ete: “Ami ndi Jehovah. Enyịn̄ mi edi oro.” (Isaiah 42:8) Enyịn̄ Abasi odu n̄kpọ nte itie 7,000 ke Bible. Edi ediwak Bible ẹsịn udori-enyịn̄, utọ nte “Ọbọn̄,” ke mme itie emi enyịn̄ Abasi ekpesịnede. Se mmọ ẹnamde oro ifọnke. Abasi oyom fi edi ufan imọ, ntre enye ọdọhọ yak ‘eseme okot enyịn̄ imọ.’—Psalm 105:1.

Mme Udori-Enyịn̄ Jehovah. Jehovah enyene nsio nsio udori-enyịn̄, utọ nte “Abasi,” “Ata Ọkpọsọn̄,” “Andibot,” “Ete,” ye “Ọbọn̄.” Ediwak akam ẹdu ke Bible emi ẹkotde Jehovah ke enyịn̄ ẹfiak ẹkot udori-enyịn̄ esie.—Daniel 9:4.

 Nte Abasi Etiede. Abasi edi spirit. (John 4:24) Bible ọdọhọ ke “akananam baba owo kiet ikwe Abasi.” (John 1:18) Bible etịn̄ nte esitiede Abasi ke idem. Mme owo ẹkeme ndinam enye ofụhọ, ẹnyụn̄ ẹkeme ‘ndinem enye esịt.’—Mme N̄ke 11:20; Psalm 78:40, 41.

Mme Edu Abasi. Abasi isisarike owo, inamke n̄kpọ m̀mê enye oto m̀mọ̀n̄ m̀mê n̄kpọ onyụn̄ etie didie ye enye. (Utom 10:34, 35) Enye edi “Abasi mbọm ye mfọn, isọpke iyatesịt edi awak ima-mfọnido ye akpanikọ.” (Exodus 34:6, 7) Edi ke ini ikerede iban̄a mme edu Abasi ye nte enye esinamde n̄kpọ, n̄kpọ inan̄ ẹnen̄ede ẹwọrọ ẹda.

Odudu. Sia enye edide “Ata Ọkpọsọn̄ Abasi,” enye enyene odudu ndinam kpukpru n̄kpọ. Enye ayanam kpukpru se enye ọn̄wọn̄ọde.—Genesis 17:1.

Ọniọn̄. Abasi ọdiọn̄ọ n̄kpọ akan kpukpru owo ke ofụri ekondo, ntak edi oro Bible ọdọhọde ke “enye ikpọn̄-ikpọn̄ [enyene] ọniọn̄.”—Rome 16:27.

Unenikpe. Abasi esinam se inende kpukpru ini. Bible ọdọhọ ke ‘kpukpru usụn̄ esie ẹnen,’ n̄ko ke enye ‘isikpehe ukwan̄ikpe.’—Deuteronomy 32:4.

Ima. Bible ọdọhọ ke “Abasi edi ima,” idọhọke ke enye enyenyene ima. (1 John 4:8) Ima esinam enye anam kpukpru n̄kpọ, imonyụn̄ idia ufọn ima esie ke ediwak usụn̄.

Abasi Oyom Mme Owo Ẹdi Ufan Imọ. Abasi edi edima Ete nnyịn eke heaven. (Matthew 6:9) Edieke ibuọtde idem ye enye, iyedi ufan esie. (Psalm 25:14) Abasi ọdọhọ fi esibọn̄ akam ọnọ imọ man ekpere imọ. Enye ọdọhọ n̄ko ‘otop kpukpru editịmede esịt fo odori imọ ke idem, koro enye ekere aban̄a fi.’—1 Peter 5:7; James 4:8.

Ndi Abasi ye Jesus Ẹdi Ukem?

Jesus Idịghe Abasi. Jesus edi n̄kukụre owo emi Abasi okobotde ke idemesie. Ntak edi oro Bible okotde enye Eyen Abasi. (John 20:31) Ke Abasi ama okobot Jesus ama, enye ama emek enye “ata anamutom” onyụn̄ ada enye obot kpukpru n̄kpọ ye kpukpru owo eken.—Mme N̄ke 8:30, 31; Colossae 1:15, 16.

 Akananam Jesus Christ idọhọke ke idi Abasi. Utu ke oro, enye ọkọdọhọ ke idi ‘andida ke ibuot Abasi, ndien ke Abasi okosio imọ ọdọn̄.’ (John 7:29) Ke ini Jesus eketịn̄de ikọ ye kiet ke otu mbet esie, enye okokot Jehovah “Ete mi ye Ete mbufo, Abasi mi ye Abasi mbufo.” (John 20:17) Ke Jesus ama akakpa, Jehovah ama anam enye eset, emenede enye enịm ke ubọk nnasia esie, onyụn̄ ọnọ enye ofụri odudu ke heaven ye ke isọn̄.—Matthew 28:18; Utom 2:32, 33.

Jesus Christ Ekeme Ndinam Ekpere Abasi

Jesus ekedi isọn̄ man edikpep nnyịn n̄kpọ aban̄a Ete esie. Kop se Jehovah ke idemesie eketịn̄de mi aban̄a Jesus: “Emi edi edima Eyen mi; ẹkpan̄ utọn̄ ẹnọ enye.” (Mark 9:7) Idụhe owo emi ọdiọn̄ọde Abasi nte Jesus. Enye ọkọdọhọ ete: “Baba owo kiet . . . ifiọkke enye emi Ete edide ke mîbọhọke Eyen, ye enye emi Eyen enyịmede ndiyarade enye nnọ.”—Luke 10:22.

Jesus enen̄ede ebiet Abasi. Jesus okodu uwem ata ukem ukem nte Ete esie, ntak edi oro enye ọkọdọhọde ete: “Owo eke okụtde mi okụt Ete n̄ko.” (John 14:9) Nte Jesus eketịn̄de ikọ onyụn̄ anamde n̄kpọ ama owụt ke enye ama mme owo nte Ete esie amade, ndien oro ama anam mme owo ẹkpere Abasi. Jesus ọkọdọhọ ete: “Ami ndi usụn̄ ye akpanikọ ye uwem. Baba owo kiet itieneke Ete ibọhọke ebe ke ami.” (John 14:6) Enye ama ọdọhọ n̄ko ke “ata mme andituak ibuot [ẹdituak] ibuot ẹnọ Ete ke spirit ye ke akpanikọ, koro edi utọ mme owo emi ke Ete oyom ete ẹtuak ibuot ẹnọ imọ.” (John 4:23) Ndi inemke fi ndifiọk ke Jehovah oyom mme owo nte afo ẹdikpep n̄kpọ ẹban̄a imọ?