Be ka se isịnede

Be ka se isịnede

Nte Okpoyomde Akpanikọ

Nte Okpoyomde Akpanikọ

Ndifiọk akpanikọ ekeme ndinyan̄a nnyịn. Ke uwụtn̄kpọ, kere ban̄a ufọn oro idiade ke ntak emi idiọn̄ọde nte mme owo ẹsimende udọn̄ọ.

Ke ata ediwak isua, owo ndomokiet ikọdiọn̄ọke nte mme owo ẹsimende udọn̄ọ, ntre mme owo ẹma ẹsidọn̄ọ ntịme ntịme ẹnyụn̄ ẹkpan̄a nte unen. Nte ini akakade, ntaifiọk ẹma ẹdifiọk se inamde edi ntre. Mmọ ẹma ẹdikụt ke enyene n̄kpri unam udọn̄ọ emi ẹsinamde owo ọdọn̄ọ, ndien ke owo ikemeke ndikụt mmọ ke ata enyịn. Ndifiọk akpanikọ kiet emi anam mme owo isọpke imen udọn̄ọ, onyụn̄ anam ẹkeme ndikọk ediwak udọn̄ọ. Ndien emi anam mme owo isọpke ikpa aba nte ekedide ediwak isua ko ke edem.

Edi nso kaban̄a mme mbụme emi afịnade ata ediwak owo ke ofụri ererimbot? Ndi emekere ke ayadia ufọn edieke ọfiọkde mme ibọrọ mbụme oro ẹtienede mi?

  • Anie edi Abasi?

  • Anie edi Jesus Christ?

  • Nso idi Obio Ubọn̄ Abasi?

  • Nso iditịbe ke ini iso?

Ata ediwak owo ẹfiọk ibọrọ mme mbụme emi, ndien emi etiene anam uwem enem mmọ. Uwem ekeme nditiene nnem fi n̄ko edieke ọfiọkde ibọrọ mme mbụme emi.

 NDI EMEKEME NDIFIỌK AKPANIKỌ?

Emekeme ndikere m̀mê ẹsụk ẹkeme ndidiọn̄ọ se idide akpanikọ aba ke ererimbot emi. Etie nte edi eyo esiere akpanikọ ọsọn̄ ndifiọk akan nte ekesidide. Ntak-a?

Ediwak owo inịmke ikọ mbon ukara, mbon mbubehe, ye mme ọnọ-mbụk n̄kpọntịbe. Ọsọsọn̄ ndidiọn̄ọ ini emi mmọ ẹtịn̄de akpanikọ, ẹtịn̄de ekikere idemmọ, mîtịn̄ke ofụri se iketịbede, m̀mê ẹkam ẹsude nsu. Emi anam ndusụk owo ẹkere ke idụhe nte ẹkemede ndifiọk se idide akpanikọ, ntre ke ufọn idụhe ndiyom akpanikọ.

Kpa ye oro, imekeme ndifiọk akpanikọ. Ke uwụtn̄kpọ, imekeme ndifiọk nnennen ibọrọ mbụme oro afịnade ata ediwak owo. Idisan̄a didie ifiọk? Edi ndinam ukem se isinamde ke usen ke usen ke ini iyomde ndifiọk se ifịnade nnyịn.

NTE AFO OKPOYOMDE AKPANIKỌ

Imekeme ndidọhọ ke isiyom akpanikọ kpukpru usen. Yak ida se ikọwọrọde Jessica inam emi an̄wan̄a. Enye ọdọhọ ete: “Mbansan̄ ifọnke ye eyen mi. Ọkpọkọm ata ekpri mbansan̄ odụk enye inua, oro ekeme ndida enye ibuot.” Ntre, mbemiso Jessica edepde udia ọnọ eyen esie, enye esikụt ete ke n̄kpọ emi ekemede ndifịna enye isịneke ke udia oro. Enye aka iso ete: “Akpa n̄kpọ emi nsinamde esidi nditịm nse se ẹwetde ke idem n̄kpọ emi ndepde man mfiọk se ẹdade ẹnam udia oro. Ekem, mmesidụn̄ọde se ẹwetde ẹban̄a udia oro. Mmesinyụn̄ n̄kot kọmpeni oro ẹnamde udia oro mbụp m̀mê ẹma ẹdue ẹnam mbansan̄ ebe odụk udia oro. Mmesinyụn̄ nyom usụn̄ mfiọk m̀mê kọmpeni oro ẹsitịn̄ akpanikọ.”

Ekeme ndidi akpanikọ oro esiyomde ndifiọk kpukpru usen idịghe n̄kpọ n̄kpa ye uwem nte eke Jessica, edi afo emekeme ndinam ndusụk se enye esinamde ke ini oyomde ndifiọk ibọrọ mbụme emi afịnade fi. Se ndusụk n̄kpọ oro akpanamde mi:

  • Kûnịm kpukpru se okopde.

  • Dụn̄ọde se m̀mê edi nte ekerede oro.

  • Kụt ete ke ẹsiwet nnennen n̄kpọ ke ikpehe Intanet m̀mê ebiet en̄wen emi okotde n̄kpọ.

Ndinam mme n̄kpọ emi ekeme n̄ko ndin̄wam fi ọfiọk ibọrọ mme mbụme emi afịnade ata ediwak owo. Didie?

 N̄WED AKPANIKỌ EMI MÎNYENEKE MBIET

Ke ini Jessica okoyomde ndifiọk se Bible ekpepde, enye akanam ukem se enye esinamde ke ini odomode ndifiọk udia emi mîdifịnake eyen esie. Enye ọdọhọ ete: “Nditịn̄ enyịn n̄kot Bible nnyụn̄ ntịm ndụn̄ọde ikọ Abasi anam mfiọk se Bible ekpepde.” Ukem nte Jessica, ata ediwak owo ẹfiọk nte Bible ọbọrọde mme mbụme emi:

  • Ntak emi nnyịn idude uwem?

  • Nso isitịbe ke ini owo akpade?

  • Ntak emi nnyịn ibọde ufen?

  • Nso ke Abasi anam man kpukpru ufen etre?

  • Nso ke ikpanam man ubon nnyịn enem?

Emekeme ndikụt nnennen ibọrọ mme mbụme emi ye ediwak mbụme en̄wen edieke esikotde Bible onyụn̄ anamde ndụn̄ọde ke ikpehe Intanet www.jw.org.