Be ka se isịnede

Be ka se isịnede

Ndi ke Ẹn̄wam Nditọ Mbufo Ẹdot Ndina Baptism?

Ndi ke Ẹn̄wam Nditọ Mbufo Ẹdot Ndina Baptism?

“Ntak anamde ubịghi? Daha ke enyọn̄, kana baptism.” ​—UTOM 22:16.

IKWỌ: 51, 135

1. Nso ke mme ete ye eka ẹsiyom ndifiọk mbemiso nditọ mmọ ẹnade baptism?

SISTA Blossom Brandt ama etịn̄ se iketịbede ini enye okoyomde ndina baptism. Enye ọkọdọhọ ete: “Mma nsidọhọ ete ye eka mi ke ediwak ọfiọn̄ ke mmoyom ndina baptism. Mmọ ẹma ẹsinyụn̄ ẹtie ye ami ẹneme n̄kpọ emi. Mmọ ẹkeyom ndidiọn̄ọ m̀mê mmenen̄ede mfiọk se ọwọrọde owo ndina baptism. Ke akpatre, mma nna baptism ke December 31, 1934. Ndifreke usen oro.” Mme ete ye eka mfịn ẹnyụn̄ ẹyom ndin̄wam nditọ mmọ ẹnam nnennen n̄kpọ. Nditre ndina baptism ke ini eti ntak mîdụhe, m̀mê ndisụk ndọhọ nyana, nyana, edi inaha, ekeme ndinam owo okûdi ufan Jehovah. (Jas. 4:17) Mme ete ye eka oro ẹnyenede ọniọn̄ ẹsiyom ndifiọk m̀mê nditọ mmimọ ẹben̄e idem ndidi mbet Christ mbemiso mmọ ẹnade baptism.

2. (a) Nso ke ndusụk mme esenyịn circuit ẹtịn̄ ẹban̄a ndusụk uyen? (b) Nso ke idineme ke ibuotikọ emi?

2 Esifịna ndusụk mme esenyịn circuit ndikụt ke ndusụk uyen emi ẹdide n̄kpọ nte isua 18 m̀mê ẹbede isua 20 isụk inaha baptism, kpa ye oro mme ete ye eka mmọ ẹdide Mme Ntiense  Jehovah. Ediwak mmọ ẹsidụk mbono esop ẹnyụn̄ ẹka ukwọrọikọ. Mmọ ẹda idemmọ nte Mme Ntiense Jehovah, edi iyakke idem inọ Jehovah inyụn̄ ina baptism. M̀mê nso ikpedi ntak? Ete ye eka ndusụk mmọ iyomke mmọ ẹna baptism kan̄a. Ke ibuotikọ emi, iyeneme n̄kpọ inan̄ emi anamde ndusụk ete ye eka ẹkûn̄wam nditọ mmọ ẹna baptism.

NDI EYEN MI OKPON EKEM NDINA BAPTISM?

3. Ete ye eka Blossom ẹkeyom ndifiọk nso?

3 Ete ye eka Blossom emi iketịn̄de iban̄a ke akpa ikpehe ẹma ẹyom ndifiọk m̀mê eyen mmọ okpon ekem ndifiọk se ndina baptism ọwọrọde, m̀mê enye onyụn̄ ọfiọk ke baptism idịghe n̄kpọ mbubru. Nso idin̄wam mme ete ye eka ẹfiọk m̀mê eyen mmọ eben̄e idem ndiyak idemesie nnọ Jehovah?

4. Didie ke se Jesus eketịn̄de ke Matthew 28:​19, 20 ekeme ndin̄wam mme ete ye eka ke ini mmọ ẹkpepde nditọ mmọ Ikọ Abasi?

4 Kot Matthew 28:​19, 20. Nte ikenemede ke akpa ibuotikọ, Bible isiakke isua emana emi owo akpanade baptism. Edi ọkpọfọn mme ete ye eka ẹnen̄ede ẹkere ẹban̄a se ọwọrọde ndinam owo edi mbet Christ. Ikọ Greek oro ẹkabarede ‘ẹkenam mbet’ ke Matthew 28:19 ọwọrọ ndikpep owo n̄kpọ man enye akabade edi mbet Christ. Owo emi edide mbet Christ esikpep n̄kpọ aban̄a Jesus, ọfiọk se Jesus ekekpepde, onyụn̄ eben̄e idem ndinam se Jesus ọdọhọde. Akpana mme ete ye eka ẹfiọk ke akpan ntak emi ikpekpepde nditọ mmimọ n̄kpọ ekpedi man in̄wam mmọ ẹyak idem ẹnọ Abasi ẹnyụn̄ ẹna baptism. Mmọ ẹkpetọn̄ọ ini nditọ ẹdide nsek ẹnam emi. Imọdiọn̄ọ ke nsekeyen idotke ndina baptism. Edi Bible owụt ke ata n̄kpri nditọ ẹkeme ndifiọk se Bible ekpepde ẹnyụn̄ ẹma se ẹkpepde mmọ ke Bible.

5, 6. (a) Se Bible etịn̄de aban̄a Timothy anam nnyịn idiọn̄ọ ke enye akana baptism ke enye ama akanam nso? (b) Didie ke mme ete ye eka oro ẹnyenede ọniọn̄ ẹkeme ndin̄wam nditọ mmọ?

Timothy ekedi mbet Christ. Enye ọkọtọn̄ọ ke uyen anam n̄kpọ Jehovah. Apostle Paul ọkọdọhọ ke Timothy ọkọfiọk Ikọ Abasi toto ke nsek. Ete Timothy ikokponoke Jehovah, edi eka ye eka eka esie ẹma ẹn̄wam enye ama Ikọ Abasi. Oro akanam enye enen̄ede ọbuọt idem ye Abasi. (2 Tim. 1:5; 3:​14, 15) Ini enye ekedide n̄kpọ nte isua 20, apostle Paul ama emek enye esisan̄a ye imọ anam utom isụn̄utom.​—Utom 16:​1-3.

6 Eyen ye eyen idịghe ukem. Ndusụk nditọwọn̄ ẹsisọp ẹdiọn̄ọ idem ẹkan ndusụk. Ikọ Abasi esisọp an̄wan̄a ndusụk nditọwọn̄; ndusụk mmọ ẹsisọp ẹfiọk ndibiere n̄kpọ ọfọn ẹnyụn̄ ẹyom ndina baptism ini ẹsụk ẹdide n̄kpri. Edi ana ndusụk mmọ ẹbet tutu ẹfiak ẹkponi ekpri mbemiso ẹnade baptism. Mme ete ye eka oro ẹnyenede ọniọn̄ isinyịkke nditọ mmọ ẹna baptism. Utu ke oro, mmọ ẹsin̄wam eyen kiet kiet esịn idem anam n̄kpọ Abasi nte ukeme esie edide. Esịt esinem mme ete ye eka ke ini eyen mmọ anamde se Mme N̄ke 27:11 etịn̄de. (Kot.) Ana mme ete ye eka ẹti ke iyom ndin̄wam nditọ mmimọ ẹdi mbet Christ. Ntre akpana mmọ ẹbụp idemmọ ẹte: ‘Ndi eyen mi ọfiọk Bible ekem ndiyak idem nnọ Abasi nnyụn̄ nna baptism?’

NDI EYEN MI ỌFIỌK BIBLE EKEM?

7. Ndi akpana owo ọfiọk kpukpru n̄kpọ ke Bible kan̄a mbemiso enye odot ndina baptism? Nam an̄wan̄a.

7 Ke ini mme ete ye eka ẹkpepde nditọ mmọ Ikọ Abasi, mmọ ẹyom nditọ mmọ  ẹnen̄ede ẹfiọk Ikọ Abasi man mmọ ẹkeme ndiyak idem nnọ Jehovah. Edi oro iwọrọke ke ana eyen ọfiọk kpukpru se Bible ekpepde mbemiso enye odot ndiyak idem nnọ Abasi nnyụn̄ nna baptism. Ana kpukpru mbet Christ ẹka iso ẹkpep n̄kpọ man ẹnyene nnennen ifiọk Abasi idem ke mmọ ẹma ẹkena baptism. (Kot Colossae 1:​9, 10.) Ntre owo ọkpọdiọn̄ọ Bible adan̄a didie mbemiso enye odot ndina baptism?

8, 9. Nso iketịbe inọ ekpeme ufọk-n̄kpọkọbi ke Philippi, ndien nso ke oro ekpep nnyịn?

8 Se ubon kiet ke eyo mme apostle ẹkenamde ekeme ndin̄wam mme ete ye eka mfịn. (Utom 16:​25-33) Paul ama aka Philippi ini enye akakade udiana isan̄ isụn̄utom esie ke n̄kpọ nte isua 50 eyo mme apostle. Ẹma ẹdori enye ye Silas ikọ do ẹnyụn̄ ẹmụm mmọ ẹdọn̄ ke ufọk-n̄kpọkọbi. Unyekisọn̄ ama etịbe okoneyo oro tutu itiat idakisọn̄ ufọk-n̄kpọkọbi enyek, kpukpru usụn̄ ufọk-n̄kpọkọbi ẹnyụn̄ ẹberede. Idem ama enyek ekpeme ufọk-n̄kpọkọbi tutu enye oyom ndiwot idem sia enye ekekere ke mbon n̄kpọkọbi ẹma ẹbọhọ ẹfen̄e. Edi Paul ikayakke enye owot idem. Paul ye Silas ẹma ẹkwọrọ ikọ ẹnọ enye ye mbonufọk esie. Mmọ ẹma ẹma se ẹkekpepde mmọ ẹban̄a Jesus. Nso ke mmọ ẹkenam? Mmọ ẹma ẹna baptism inikiet inikiet. Nso ke mbụk emi ekpep nnyịn?

9 Etie nte ekpeme ufọk-n̄kpọkọbi oro ekedi akani owoekọn̄. Enye ikọfiọkke Ikọ Abasi. Ntre mbemiso enye akabarede edi Christian, akana ẹkpep enye mme akpan ukpepn̄kpọ Bible ye se ndidi asan̄autom Abasi ọwọrọde. Okonyụn̄ ana enye enyịme ndinam se Jesus ekekpepde. Enye ama ama se ẹkekpepde enye ke ekpri ini oro; oro akanam enye oyom ndina baptism. Imọfiọk ke enye ama aka iso ndikpep Ikọ Abasi ke enye ama akana baptism. Didie ke mbụk emi ekeme ndin̄wam fi ọfiọk se akpanamde ke ini eyen emi amade mme akpan ukpepn̄kpọ Bible, onyụn̄ ọfiọkde se ndiyak idem nnọ Jehovah nnyụn̄ nna baptism ọwọrọde, ọdọhọde fi ke imoyom ndina baptism? Emekeme ndidọhọ enye eketịn̄ ọnọ mbiowo man mmọ ẹse m̀mê enye odot ndina baptism. * Ukem nte kpukpru ikọt Jehovah oro ẹnade baptism, enye ayaka iso ndikpep n̄kpọ ke ofụri eyouwem esie, idem ke nsinsi nsinsi.​—Rome 11:​33, 34.

NDI AKPANA EYEN MI ENEN̄EDE AKA N̄WED KAN̄A?

10, 11. (a) Nso ke ndusụk ete ye eka ẹsikere? (b) Nso ikpebehe mme ete ye eka ikan?

10 Ndusụk ete ye eka ẹsikere ke ọkpọfọn nditọ mmimọ ẹnen̄ede ẹka n̄wed ẹnyụn̄ ẹnyene eti utom kan̄a mbemiso mmọ ẹnade baptism. Mmọ ẹsinam emi sia mmọ ẹmade nditọ mmọ. Edi, ndi oro ayan̄wam eyen fo ọwọrọ n̄kpọ? Ndi se Bible ọdọhọde inam edi oro? Jehovah oyom nnyịn ida uwem nnyịn inam nso?​—Kot Ecclesiastes 12:1.

11 Ọfọn iti ke ererimbot emi ye se idude ke ererimbot idiyakke inam se Jehovah amade inyụn̄ ikere n̄kpọ nte enye esikerede. (Jas. 4:​7, 8; 1 John 2:​15-17; 5:19) Se ikpebehede mme ete ye eka ikan ekpedi ndin̄wam nditọ mmọ ẹnen̄ede ẹkpere Jehovah. Emi idiyakke Satan ye ererimbot esie ẹkan mmọ ubọk, mmọ idinyụn̄ idụhe uwem nte mbon ererimbot. Edieke nditọ mbufo ẹkụtde ke mbufo ẹyom mmọ ẹka n̄wed ẹnyụn̄ ẹnam eti utom kan̄a, mmọ ẹdikere ke mme n̄kpọ ererimbot  emi ẹdi akpan n̄kpọ akan ndidi ufan Jehovah. Emi ekeme ndisịn mmọ ke fehesan̄. Ererimbot ẹkere ke ndika n̄wed nnyụn̄ nnam eti utom edinam owo okop ata inemesịt. Edi ndi ete ye eka oro ẹmade nditọ mmọ ẹkpeyom nditọ mmọ ẹnịm utọ n̄kpọ oro? Ndiyak n̄kpọ Jehovah edi akpa ke uwem nnyịn edi n̄kukụre n̄kpọ emi edinamde nnyịn ikop ata inemesịt.​—Kot Psalm 1:​2, 3.

NSO IDITỊBE EDIEKE EYEN MI ANAMDE IDIỌKN̄KPỌ?

12. Ntak emi ndusụk ete ye eka mîyomke nditọ mmọ ẹna baptism kan̄a?

12 Sista kiet ama etịn̄ ntak emi enye mîkoyomke eyen esie ana baptism kan̄a. Enye ọkọdọhọ ete: “Ata akpan ntak ekedi mbak owo idisio enye ke esop. Anam mi bụt tutu.” Ukem nte Sista oro, ndusụk ete ye eka ẹdọhọ yak eyen mmimọ afiak okpon kan̄a mbemiso anade baptism mbak enye idinam ndisịme emi owo esinamde ke ibuot uyen. (Gen. 8:21; N̄ke 22:15) Mmọ ẹsikere ke sia eyen mmimọ mînaha baptism, ke owo ikemeke ndisio enye ke esop. Owo oro ekerede utọ n̄kpọ oro abian̄a idem. Ndi ọmọfiọk se inamde idọhọ ntre?​—Jas. 1:22.

13. Ndi ọwọrọ ke owo mînaha baptism, ke enye idinamke ibat inọ Jehovah? Nam an̄wan̄a.

13 Idụhe ete ye eka oro okponode Jehovah emi ẹdidọhọde eyen mmọ akana baptism ke ini eyen oro mîdiọn̄ọke idem ikem ndiyak idem nnọ Jehovah. Kpa ye oro, ekpedi ata idiọk ndudue ndikere ke eyen mînaha baptism, ke enye idinamke ibat inọ Jehovah. Ntak idọhọde ntre? M̀mê owo ana baptism m̀mê inaha, enye ayanam ibat ọnọ Jehovah. Eyenọwọn̄ ama ọfọfiọk eti ye idiọk, enye ayanam ibat ọnọ Jehovah ke se ededi oro enye anamde. (Kot James 4:17.) Mme ete ye eka oro ẹnyenede ọniọn̄ isidọhọke nditọ mmọ ẹkûna baptism kan̄a. Utu ke oro mmọ ẹsisịn idem ẹnam se Jehovah amade ẹnyụn̄ ẹsua se enye asuade sia mmọ ẹyom nditọ mmimọ ẹkpebe mmimọ. Mmọ ẹsitọn̄ọ toto ke nsek ẹkpep nditọ mmọ ẹma se Jehovah amade ẹnyụn̄ ẹsua se enye asuade. (Luke 6:40) Edieke nditọ mbufo ẹmade Jehovah, mmọ ẹyesinam se inende kpukpru ini, ndien oro idiyakke mmọ ẹnam akwa idiọkn̄kpọ.​—Isa. 35:8.

MBON EN̄WEN ẸKEME NDIN̄WAM

14. Didie ke mbiowo ẹkeme nditiene mme ete ye eka n̄n̄wam nditọ mmọ ẹdot ndina baptism?

14 Mbiowo ẹkeme nditiene mme ete ye eka n̄n̄wam nditọ mmọ edieke mmọ ẹsitịn̄de nti n̄kpọ ẹban̄a nsio nsio n̄kpọ oro owo ekemede ndinam nnọ Abasi. Sista kiet eti ke Brọda Charles T. Russell ama eneme nneme ye imọ ini imọ ikedide isua itiokiet. Enye ọkọdọhọ ete: “Brọda Russell ama ada minit 15 eneme se n̄kemede ndinam nnọ Abasi.” Nneme oro ama an̄wam Sista oro ọtọn̄ọ utom usiakusụn̄ nte ini akakade. Enye ama asiak usụn̄ ebe isua 70! Omokụt nte eti ikọ enyenede ufọn do! (N̄ke 25:11) Mbiowo ẹkeme n̄ko ndidọhọ mme ete ye eka ẹsan̄a ye nditọ mmọ ẹdi utom Ufọkmbono Obio Ubọn̄. Mbiowo ẹnyụn̄ ẹkeme ndinọ nditọwọn̄ utom oro ekemde ye isua emana mmọ.

15. Nso ke ikpanam man in̄wam nditọwọn̄?

15 Nditọete eken ke esop ẹkeme ndin̄wam nditọwọn̄ edieke mmọ ẹwụtde ke imama mmọ. Domo ndifiọk m̀mê eyenọwọn̄ ke anam n̄kpọ emi owụtde ke enye enen̄ede ekpere Jehovah. Ke uwụtn̄kpọ, ndi enye ọbọrọ mbụme enem ke mbono esop mîdịghe anam se ẹkenọde enye ke Mbono Esop Uwem ye Utom Nnyịn edifọn edifọn? Ndi enye ama ọsọn̄ọ ada ọyọ  idomo, m̀mê ọkwọrọ ikọ ke ufọkn̄wed? Edieke edide ntre, toro enye. Yak emehe fi ndisineme nneme ye eyenọwọn̄ kiet mbemiso mbono esop ọtọn̄ọ m̀mê ke mbono esop ama akasuana. Edieke inamde emi ye mme n̄kpọ eken oro ẹkemede ndin̄wam mmọ, nditọwọn̄ ẹyekụt ke mmimọ itiene isịne ke “akwa esop.”​—Ps. 35:18.

N̄WAM EYEN FO ODOT NDINA BAPTISM

16, 17. (a) Nso ufọn ke ikeme ndibọ edieke inade baptism? (b) Nso idinam esịt enen̄ede enem mme ete ye eka? (Se akpa ndise ibuotikọ emi.)

16 Ata akamba utom kiet emi mme ete ye eka ẹnyenede edi ndibọk nditọ mmọ “ke ntụnọ ye ke item Jehovah.” (Eph. 6:4; Ps. 127:3) Israel eset ẹma ẹyak idem ẹnọ Abasi, ntre nditọ oro ẹkemanade ikenyeneke ndifiak nyak idem nnọ Abasi. Edi idịghe ntre mfịn. Ete ye eka ndima Jehovah ye Ikọ Abasi iwọrọke ke nditọ ẹyetiene ẹma. Ọtọn̄ọde ke usen emi eyen amanade, akpana mme ete ye eka ẹfiọk ke akpan ntak emi ikpekpepde nditọ mmimọ n̄kpọ ekpedi man in̄wam mmọ ẹyak idem ẹnọ Abasi ẹnyụn̄ ẹna baptism. Idụhe se idide akpan n̄kpọ ikan emi! Edieke owo ayakde idem ọnọ Jehovah, anade baptism, onyụn̄ akade iso anam n̄kpọ Jehovah, enye eyesịne ke otu mbon oro Jehovah edinamde ẹbọhọ akwa ukụt.​—Matt. 24:13.

Akpana mme ete ye eka ẹn̄wam eyen mmọ edi mbet Christ (Se ikpehe 16, 17)

17 Ke ini Sista Blossom Brandt okoyomde ndina baptism, ete ye eka esie ẹma ẹyom ndifiọk m̀mê enye enen̄ede eben̄e idem sia baptism idịghe n̄kpọ mbre. Ke ini mmọ ẹkekụtde ke enye eben̄e idem, mmọ ikakpanke enye. Sista Blossom ọdọhọ ke okoneyo oro ekesierede usen emi imọ ikanade baptism, ke ete imọ ama ọdọhọ kpukpru mmimọ itọn̄ọ edọn̄, ndien ke enye ama ọbọn̄ akam. Enye ama ọdọhọ Jehovah ke enem imọ nte ekpri eyen imọ ebierede ndiyak idemesie nnọ enye. Blossom ọdọhọ ke imọ idifreke okoneyo oro tutu amama. Blossom eketịn̄ n̄kpọ emi ke isua 60 ama ekebe tọn̄ọ enye akana baptism. Mme ete ye eka, esịt eyenem mbufo etieti edieke ẹn̄wamde nditọ mbufo ẹyak idem ẹnọ Jehovah ẹnyụn̄ ẹna baptism.

^ ikp. 9 Ẹmekeme nditie ye eyen mbufo nneme se idude ke Mme Mbụme Oro N̄kparawa Owo Ẹbụpde​—Mme Ibọrọ Oro Ẹnyenede Ufọn, Eboho 2, p. 304-310. Ẹse n̄ko “Ekebe Mbụme” ke Utom Obio Ubọn̄ Nnyịn eke April 2011, p. 2.