Be ka se isịnede

Be ka se isịnede

 IBUOTIKỌ UKPEPN̄KPỌ 29

“Ẹka Ẹkenam Mme Owo . . . Ẹdi Mbet Mi”

“Ẹka Ẹkenam Mme Owo . . . Ẹdi Mbet Mi”

“Ẹka ẹkenam mme owo ke kpukpru idụt ẹdi mbet mi.”—MATT. 28:19.

ỌYỌHỌ IKWỌ 60 Iyom Mme Owo Ẹbọhọ

SE IDIKPEPDE *

1-2. (a) Ewụhọ emi Jesus ọkọnọde ke Matthew 28:18-20 owụt ke nso idi akpan utom emi esop Christian ẹnyenede? (b) Ewe mbụme inan̄ ke idibọrọ ke ibuotikọ emi?

KE JESUS ama ekeset, enye ama ọdọhọ mme apostle esie ẹdisobo ye imọ ke obot kiet ke Galilee. Anaedi mme apostle esie ẹma ẹkere m̀mê nso iyom nditịbe. (Matt. 28:16) Etie nte ini oro ke Jesus okowụt “nditọete emi ẹwakde ẹbe owo ikie ition idem ini kiet.” (1 Cor. 15:6) Nso ikanam Jesus ọdọhọ mme mbet esie ẹdisop idem do? Enye okoyom ndinọ mmọ akpan utom. Enye ọkọdọhọ mmọ ete: “Ẹka ẹkenam mme owo ke kpukpru idụt ẹdi mbet mi.”—Kot Matthew 28:18-20.

2 Mme mbet emi ẹkedude ini Jesus etịn̄de ikọ emi ẹkeditiene ẹnam esop Christian eyo mme apostle. Akpan utom emi ẹkenọde mmọ ekedi ndinam mme owo efen efen ẹdi mbet Christ. * Esop mbon emi ẹdide ata mme Christian idahaemi ẹdi ke tọsịn ke tọsịn ke ofụri ererimbot, ndien akpan utom mmọ osụk edi ndinam mme owo ẹdi mbet Christ. Imọn̄ ibọrọ mbụme inan̄ ke ibuotikọ emi: Ntak emi ndinam mme owo ẹdi mbet Christ edide ata akpan utom? Nso ye nso ke ikpanam man inam mme owo ẹdi mbet Christ? Ndi kpukpru Christian ẹkeme ndin̄wam nnam owo edi mbet Christ?  Ntak emi oyomde inyene ime man inam mme owo ẹdi mbet Christ?

NTAK EMI NDINAM MME OWO ẸDI MBET CHRIST EDIDE ATA AKPAN UTOM?

3. John 14:6 ye 17:3 ẹwụt ke nso inam ndinam mme owo ẹdi mbet Christ edi ata akpan utom?

3 Ntak emi ndinam mme owo ẹdi mbet Christ edide ata akpan utom? Sia mme mbet Christ kpọt ẹkeme ndidi mme ufan Abasi. N̄kpọ en̄wen edi ke mme mbet Christ ẹdu eti uwem ẹnyụn̄ ẹdori enyịn ndidu inem inem uwem ke nsinsi ke ini iso. (Kot John 14:6; 17:3.) Kpa ye oro Jesus ọnọde nnyịn ata akpan utom, nnyịn inamke utom emi ikpọn̄. Apostle Paul ekewet aban̄a idemesie ye ndusụk n̄kpet n̄kpet nsan̄a esie ete: “Nnyịn idi nsan̄autom Abasi.” (1 Cor. 3:9) Ata akwa ifet ke Jehovah ye Christ ẹnọ nnyịn emi kpa ye oro nnyịn mîfọnke ima!

4. Nso ke ikeme ndikpep nto uwụtn̄kpọ Ivan ye Matilde?

Ndinam mme owo ẹdi mbet Christ ekeme ndinam esịt enen̄ede adat nnyịn. Da Ivan ye Matilde an̄wan esie emi ẹdude ke Colombia ke uwụtn̄kpọ. Mmọ ẹma ẹkwọrọ ikọ ẹnọ akparawa kiet emi ekerede Davier. Davier ama ọdọhọ mmọ ete: “Mmoyom ndikpụhọde, edi n̄kemeke.” Enye ekesitop ita adia n̄kpọ, esida n̄kpọsọn̄ ibọk, esin̄wọn̄ mmịn ebe ubọk, ikonyụn̄ inamke ndọ ye Erika emi enye okodụn̄de kiet. Ivan ọdọhọ ete: “Ima itọn̄ọ ndikpep enye Bible. Obio esie ama oyom usụn̄ etieti, ikesinyụn̄ iwat ediwak hour ke enan̄ukwak ke usụn̄ emi etiede okpụk okpụk. Ke Erika ama okokụt ke Davier ọtọn̄ọ ndikpụhọde edu ye ido esie, enye n̄ko ama etiene ekpep Bible.” Nte ini akakade, Davier ama etre ndida n̄kpọsọn̄ ibọk, etre ndin̄wọn̄ mmịn mbe ubọk, onyụn̄ ọkpọn̄ utopita. Enye ama onyụn̄ anam ndọ ye Erika. Matilde ọdọhọ ete: “Ini Davier ye Erika ẹkenade baptism ke 2016, ima iti ke Davier ekesidọhọ, ‘Mmoyom ndikpụhọde, edi n̄kemeke.’ Mmọn̄eyet idatesịt ama ọwọrọ nnyịn ke enyịn.” Esịt iditreke ndinen̄ede ndat nnyịn ke ini in̄wamde owo edidi mbet Christ.

NSO YE NSO KE IKPANAM MAN INAM MME OWO ẸDI MBET CHRIST?

5. Nso idi akpa n̄kpọ emi ikpanamde man in̄wam mme owo ẹdidi mbet Christ?

5 Akpa n̄kpọ emi ikpanamde man in̄wam mme owo ẹdidi mbet Christ edi ‘ndiyom’ mbon emi ẹmade ndikpep n̄kpọ mban̄a Jehovah. (Matt. 10:11) Iwụt ke idi ata Ntiense Jehovah ke ini ikwọrọde ikọ inọ kpukpru mbon oro ikụtde. Iwụt n̄ko ke idi ata mme Christian ke ini ikwọrọde ikọ nte Christ okowụkde.

6. Nso ke ikeme ndinam man mme owo ẹkpan̄ utọn̄ ẹnọ nnyịn ke ini ikwọrọde ikọ?

6 Esidọn̄ ndusụk owo ndikpep Bible, edi esitie nte ediwak mbon emi ikwọrọde ikọ inọ idọn̄ke enyịn ke nsonso oro. Ekeme ndiyom inam ọdọn̄ mmọ ndikpep Bible. Ana itịm idem ọfọn man ikeme ndikụt unen. Mek mme ibuotikọ emi mme owo ẹkemede ndima, nyụn̄ kere nte editọn̄ọde nneme.

7. Didie ke afo ekeme nditọn̄ọ ukwọrọikọ, ndien nso inam afo ekere ke ọfọn akpan̄ utọn̄ ọnọ mme owo okûnyụn̄ uda se mmọ ẹnịmde unam n̄kpọ mbubru?

7 Ke uwụtn̄kpọ, emekeme ndidọhọ enyeneufọk: “Ndi mmekeme ndibụp fi n̄kpọ? Ediwak mfịna emi inyenede mfịn ẹtiene ẹsịm mme owo ke ofụri ererimbot. Ndi emekere ke ekpedi ukara kiet akara ofụri ererimbot, ke kpukpru mfịna ererimbot ẹkpetre?” Ekem, emekeme ndineme se idude ke Daniel 2:44 ye enye. Mîdịghe, emekeme ndibụp owo ete: “Afo ekere ke nso idin̄wam owo ekpep nditọ esie ndinyene nti edu? N̄kpama ndikop ekikere fo.” Ekem, neme se idude ke  Deuteronomy 6:6, 7 ye enye. Inamke n̄kpọ m̀mê ewe ibuotikọ ke afo emek, bem iso kere ban̄a mbon emi afo oyomde ndikwọrọ ikọ nnọ. Kere nte mmọ ndifiọk se Bible enen̄erede ekpep edin̄wamde mmọ. Ndien ke ini enemede nneme ye mmọ, ọfọn akpan̄ utọn̄ ọnọ mmọ, kûnyụn̄ uda se mmọ ẹnịmde unam n̄kpọ mbubru. Oro ayanam fi ọfiọk mmọ ọfọn, onyụn̄ ekeme ndinam mmọ ẹma ndikpan̄ utọn̄ nnọ fi.

8. Ntak emi ikpesikade ediwak ini ibịne mbon emi ikọkwọrọde ikọ inọ?

8 Mbemiso owo ebierede ndikpep Bible, ekeme ndiyom afo aka ebịne enye ediwak ini. Ntak edide ntre? Sia ekeme ndidi mmọ ididụhe ke ufọk ini ifiakde ika ibịne mmọ. Onyụn̄ ekeme ndiyom fi aka ediwak ini mbemiso owo oro emehe ye afo onyụn̄ enyịme ndikpep Bible ye afo. Ti ke enen̄ede etie nte se ẹtọde ọyọkọri ọfọn edieke ẹsiduọkde mmọn̄ ke ubọk ke ubọk. Ukem ntre n̄ko, enen̄ede etie nte owo emi oyomde ndikpep Bible ọyọtọn̄ọ ndinen̄ede mma Jehovah edieke isikpepde enye Ikọ Abasi ke ubọk ke ubọk.

NDI KPUKPRU CHRISTIAN ẸKEME NDIN̄WAM NNAM OWO EDI MBET CHRIST?

Mme Ntiense Jehovah ke ofụri ererimbot ẹnyene ubọk ke ndiyom mbon emi ẹdimade ndidi mbet Christ (Se ikpehe 9-10) *

9-10. Nso inam idọhọ ke kpukpru nnyịn emi isikwọrọde ikọ imesitiene iyom mbon emi ẹkemede ndidi mbet Christ?

9 Kpukpru nnyịn emi isikwọrọde ikọ imenyene ubọk ke ndiyom mbon emi ẹdimade ndidi mbet Christ. Imekeme ndimen utom nnyịn ndomo ye mme owo ndisan̄a nyom eyenọwọn̄ emi osopde. Didie? Kop se iketịbede ini ekpri eyen erenowo isua ita okosopde. N̄kpọ nte owo 500 ẹma ẹtiene ẹyom enye. Ke ẹma ẹkeyom enye ke n̄kpọ nte hour 20, owo kiet ama okokụt enye ke in̄wan̄ ibokpot. Owo oro ikenyịmeke mme owo ẹtoro imọ ke ndikụt eyen oro. Enye ọkọdọhọ  ke kpukpru mmimọ ikadian ubọk iyom enye ikụt.

10 Ediwak owo ẹtie nte eyen oro, esitie mmọ nte imosop. Mmọ inyeneke idotenyịn, edi ẹyom un̄wam. (Eph. 2:12) Se ibede nnyịn owo miliọn itiaita ke isan̄a iyom utọ mbon emi. Ekeme ndidi udûkwe owo emi edimade ndikpep Bible. Edi nditọete en̄wen emi ẹtienede ẹkwọrọ ikọ ke efakutom mbufo ẹkeme ndikụt owo emi oyomde ndikpep akpanikọ emi odude ke Ikọ Abasi. Ke ini eyenete okụtde owo emi akabarede edi mbet Christ, kpukpru mbon emi ẹketienede ẹsan̄a ẹyom owo oro ẹnyene eti ntak ndidat esịt.

11. Ekpededi ukpepke owo Bible, nso ye nso en̄wen ke ekeme ndinam n̄n̄wam mme owo ẹdi mbet Christ?

11 Ekpededi ukpepke owo Bible idahaemi, enyene se ekemede ndinam n̄n̄wam mme owo ẹdi mbet Christ. Ke uwụtn̄kpọ, emekeme ndidara mbufa mbon emi ẹdide mbono esop onyụn̄ anam ufan ye mmọ. Oro ekeme ndin̄wam mmọ ẹkụt ke nnyịn idi ata mme Christian sia imama kiet eken. (John 13:34, 35) Nte afo ọbọrọde mbụme ke mbono esop, ekpededi ekpri ekpri, ekeme ndikpep mbufa owo nditịn̄ se mmọ ẹnịmde ke ofụri esịt ye ke ido ukpono. Omonyụn̄ ekeme ndisan̄a ye obufa asuanetop ke ukwọrọikọ onyụn̄ an̄wam enye ọfiọk ndida Bible n̄kpep mme owo n̄kpọ. Ama anam emi, afo eyekpep enye ndikpebe Christ.—Luke 10:25-28.

12. Ndi ana inen̄ede ifiọk n̄kpọ mbemiso ikemede ndinam owo edi mbet Jesus? Nam an̄wan̄a.

12 Ikpanaha nnyịn owo ndomokiet ikere ke ana inen̄ede ifiọk n̄kpọ mbemiso ikemede ndinam owo edi mbet Jesus. Ntak-a? Kop uwụtn̄kpọ Sista Faustina emi odụn̄de ke Bolivia. Enye ikekemeke ndikot n̄wed akpa ini emi Mme Ntiense Jehovah ẹkekwọrọde ikọ ẹnọ enye. Tọn̄ọ oro, enye ekpep ndikot n̄wed ekpri. Enye ama ana baptism, esinyụn̄ ama ndikpep mme owo Bible. Enye esikpep owo ition Bible kpukpru urua. Kpa ye emi Faustina mîkemeke ndikot n̄wed ọfọn kan̄a nte ediwak mbon emi enye esikpepde Bible, enye an̄wam owo itiokiet tutu mmọ ẹna baptism.—Luke 10:21.

13. Kpa ye emi inyenede ediwak n̄kpọ ndinam, nso idi ndusụk edidiọn̄ emi ikemede ndibọ edieke inamde mme owo ẹdi mbet Christ?

13 Ediwak nditọete inyeneke ini sia mmọ ẹnyene ediwak akpan n̄kpọ ndinam. Kpa ye oro, mmọ ẹsiyom ini ẹkpep mme owo Bible, emi esinyụn̄ anam esịt enen̄ede adat mmọ. Da Sista Melanie ke uwụtn̄kpọ. Enye ọkọbọk eyenan̄wan isua itiaita ikpọn̄ ke Alaska. Enye ekesinam utom tọn̄ọ ke Monday esịm Friday, esinyụn̄ ese aban̄a ete esie emi ọkọdọn̄ọde kansa. Obio emi Melanie okodụn̄de ikekpereke mme obio eken, enye kpọt okonyụn̄ edi Ntiense Jehovah do. Sia enye  ekenen̄erede oyom ndikụt owo emi enye edikpepde Bible, enye ama esibọn̄ akam ọdọhọ Jehovah an̄wam imọ ikeme ndika ukwọrọikọ kpa ye emi n̄kan̄ oro ekenen̄erede ebịt. Ke akpatre, enye ama okụt Sara; ama enem Sara etieti ndifiọk ke Abasi enyene enyịn̄. Nte ini akakade, Sara ama enyịme ndikpep Bible. Melanie ọdọhọ ete: “Ama esikak mi ke idem ama esịm mbubreyo Friday, edi ami ye eyen mi ima isisụk ika ikekpep enye n̄kpọ, ima isinyụn̄ ibọ ufọn. Ama esinem nnyịn ndinam ndụn̄ọde man ikeme ndibọrọ mme mbụme emi Sara ekesibụpde, ndien esịt ama enem nnyịn utọ oro idụhe ndikụt enye edide ufan Jehovah.” Sara ama ọsọn̄ọ ada ọyọ ukọbọ emi mbon ufọkabasi esie ye iman esie ẹkekọbọde enye, ọkpọn̄ ufọkabasi oro, onyụn̄ ana baptism.

NTAK EMI OYOMDE INYENE IME MAN INAM MME OWO ẸDI MBET CHRIST

14. (a) Didie ke ndinam mme owo ẹdi mbet etie nte ukọiyak? (b) Nso ke se Paul eketịn̄de ke 2 Timothy 4:1, 2 anam fi anam?

14 Ekpededi ukwe kan̄a owo emi oyomde ndidi mbet Christ, ka iso yom, kûkpa mba. Ti ke Jesus ekemen ndinam mme owo ẹdi mbet imọ odomo ye ukọiyak. Mme ọkọiyak ẹkeme ndikpa utom ediwak hour mbemiso ẹmụmde iyak. Mmọ ẹsiwak ndikọ iyak tutu ko ke ata okoneyo mîdịghe ẹka ata usiere, ndien ndusụk ini mmọ ẹsiwat ata anyan usụn̄ ke mmọn̄. (Luke 5:5) Ukem ntre n̄ko, ndusụk mme asuanetop ẹsinyene ime ẹda ediwak hour ẹkwọrọ ikọ ke nsio nsio ini ye ke nsio nsio itie. Ntak-a? Man ẹkeme ndikụt ediwak owo. Mbon emi ẹsịnde idem ntem ẹsidia ufọn sia mmọ ẹsikụt mme owo emi ẹmade  ndikpep Bible. Ndi afo emekeme ndidomo ndikwọrọ ikọ ke ebiet ye ini emi ekemede ndinen̄ede n̄kụt mme owo?—Kot 2 Timothy 4:1, 2.

Nyene ime n̄wam mbon emi afo esikpepde Bible ẹfiọk Jehovah, ẹma enye, ẹnyụn̄ ẹkop uyo esie (Se ikpehe 15-16) *

15. Ntak emi ndikpep owo Bible oyomde ime?

15 Ntak emi ndikpep owo Bible oyomde ime? Ntak kiet edi ke ikụreke ke ndin̄wam owo ọfiọk onyụn̄ ama se Bible ekpepde. Ana in̄wam owo emi ikpepde Bible ọfiọk onyụn̄ ama Jehovah emi edide Andinyene Bible. N̄ko, ikụreke ke ndikpep owo se Jesus oyomde mme mbet esie ẹnam, ana in̄wam enye ọfiọk nte enye okpodude uwem nte ata Christian. Ana inyene ime in̄wam enye nte enye osụk odomode ndida item Bible ndu uwem. Ndusụk owo ẹsikeme ndikpụhọde ke ufan̄ ọfiọn̄ ifan̄ kpọt, edi esida mbon en̄wen anyan ini ndikpụhọde.

16. Nso ke mbụk Raúl ekpep fi?

16 Isụn̄utom kiet ke Peru ama ọbọ ufọn ke ntak emi enye ekenyenede ime. Enye ọdọhọ ete: “Mma n̄kpep n̄wed iba ye eyen ukpepn̄kpọ mi emi ekekerede Raúl. Edi enye okosụk enyenyene ikpọ mfịna. Mfịna ama okpon etieti ke ndọ esie, enye ama esinyụn̄ ọdiọk inua ikọ, ama esinyụn̄ ọsọn̄ nditọ esie ndikpono enye ke ntak idiọk uwem esie. Edi enye ikesifiakke mbono esop, ntre mma n̄ka iso n̄kpep enye n̄kpọ man n̄n̄wam enye ye ubon esie. Ke se ibede isua ita tọn̄ọ n̄kokụt enye, enye ama odot ndina baptism.”

17. Nso ke idineme ke ibuotikọ emi etienede?

17 Jesus ọkọdọhọ yak ‘ika ikanam mme owo ke kpukpru idụt ẹdi mbet imọ.’ Ke ini inamde utom emi, imesikụt mme owo emi ẹnịmde ata isio isio n̄kpọ ye se nnyịn inịmde. Ndusụk owo ikam ikaha-ka ufọkabasi ndomokiet mîdịghe ikam inịmke ke Abasi odu. Ibuotikọ emi etienede ayanam ikụt nte ikemede ndikwọrọ eti mbụk nnọ utọ mme owo emi.

ỌYỌHỌ IKWỌ 68 Di Tiene Nam Utom Ọbọn̄ Nnyịn

^ ikp. 5 Akpan utom kiet emi esop Christian ẹnyenede edi ndin̄wam mme owo ẹdi mbet Christ. Ibuotikọ emi ọmọn̄ etịn̄ nti usụn̄ emi ikpanamde emi.

^ ikp. 2 SE ẸNAMDE AN̄WAN̄A: Mme mbet Christ isikpepke-kpep se Jesus ekekpepde kpọt. Mmọ ẹsinanam se mmọ ẹkpepde. Mmọ ẹsidomo nditiene nde ikpat Jesus, oro edi, ẹkpebe enye nte mmọ ẹkekeme.—1 Pet. 2:21.

^ ikp. 52 MME NDISE: Ete kiet ọbọ Ntiense Jehovah n̄wed ke itiembehe ubomofụm ini enye akade nduọkodudu. Ekem, ini enye asan̄ade ese n̄kpọ ke ebiet emi enye akakade, enye okụt Mme Ntiense Jehovah en̄wen ẹkwọrọde ikọ ke ebiet emi mme owo ẹsiwakde. Ke enye ama ọkọnyọn̄ edi, nditọete ẹkekwọrọ ikọ ẹnọ enye ke ufọk esie.

^ ikp. 54 MME NDISE: Ete oro ọkọbọde Mme Ntiense n̄wed do enyịme ẹkpep imọ Bible. Ke akpatre, enye odot ndina baptism.