Be ka se isịnede

Be ka se isịnede

Alisa

Mmọ Ẹma Ẹka Ẹkenam N̄kpọ Abasi​—ke Turkey

Mmọ Ẹma Ẹka Ẹkenam N̄kpọ Abasi​—ke Turkey

MME Christian eyo mme apostle ẹma ẹsisịn idem ẹkwọrọ “eti mbụk obio ubọn̄” ẹnọ ata ediwak owo. (Matt. 24:14) Ndusụk mmọ ẹma ẹsikam ẹka idụt en̄wen ẹkekwọrọ ikọ. Ke uwụtn̄kpọ, apostle Paul ama aka n̄kan̄ emi Turkey odude idahaemi ọkọkwọrọ ikọ ọnọ ata ediwak owo ke ini enye akanamde utom isụn̄utom. * Ke 2014, ke n̄kpọ nte isua 2,000 ama ekebe tọn̄ọ Paul ọkọkwọrọ ikọ ke Turkey, ikọt Abasi ẹma ẹfiak ẹdiomi san̄asan̄a utom ukwọrọikọ do. Ntak ẹkenamde emi? Mmanie ẹketiene ẹkwọrọ ikọ do?

“NSO ITETỊBE?”

Owo miliọn 79 ẹdu ke Turkey, edi mme asuanetop ẹbe 2,800 do. Emi ọwọrọ ke asuanetop kiet enyene ndikwọrọ ikọ nnọ n̄kpọ nte owo 28,000. Akpana an̄wan̄a fi ke mmọ idikemeke ndikwọrọ ikọ nnọ ata ediwak owo ke idụt oro. Oro akanam ẹdiomi san̄asan̄a utom ukwọrọikọ do man ẹkeme ndida urua ifan̄ kpọt n̄kwọrọ ikọ nnọ ata ediwak owo. N̄kpọ nte nditọete 550 oro ẹsemde usem Turkish ẹma ẹto nsio nsio idụt ẹka Turkey ẹketiene nditọete do ẹkwọrọ ikọ. Ndi ufọn ama odu?

Ẹma ẹkwọrọ ikọ ẹnọ ata ediwak owo. Esop kiet emi odude ke Istanbul ẹkewet ẹte: “Ke ini mme owo ẹkụtde nnyịn, mmọ ẹma ẹsibụp ẹte: ‘Ndi mbufo ẹnyene san̄asan̄a mbono mi? Ebiet eke idodụk, ana ikụt Mme Ntiense Jehovah!’” Esop kiet ke Izmir ẹma ẹwet ẹte: “Ete kiet emi anamde utom ke itie emi mbon taksi ẹsidade ẹmen owo ama okobụp ebiowo kiet ete, ‘Nso itetịbe mi? Etie nte ẹmekwọrọ ikọ ẹkan nte ẹsikwọrọde?’” Omokụt do ke mme owo ẹma ẹkụt se ikanamde ke idụt oro.

Steffen

Ukwọrọikọ ama enem nditọete emi ẹketode idụt en̄wen ẹdi etieti. Steffen, emi otode Denmark ọkọdọhọ ete: “Kpukpru usen, mma nsikwọrọ ikọ nnọ mme owo emi mîkokopke n̄kpọ iban̄a Jehovah akpa. Ama enem mi ndinam mme owo ẹdiọn̄ọ enyịn̄ Jehovah.” Jean-David emi okotode France aka do ekewet ete: “Ima ikwọrọ ikọ ke ediwak hour ke efak kiet kpọt. Ama enem nnyịn tutu! Ata ediwak owo ikọdiọn̄ọke Mme Ntiense Jehovah akpa. Iwakke ufọk emi owo mîkakpan̄ke utọn̄ inọ nnyịn; ima isibre vidio iwụt mmọ inyụn̄ inọ mmọ n̄wed nnyịn.”

Jean-David (esịne ufọt)

Nditọete 550 oro ẹma ẹnọ mme owo n̄kpọ nte  n̄wed 60,000 ke ufan̄ urua iba kpọt! San̄asan̄a ukwọrọikọ oro ama anam ediwak owo ẹkop eti mbụk.

Ama anam nditọete ẹnen̄ede ẹma ukwọrọikọ. San̄asan̄a ukwọrọikọ oro ama anam nditọete ke Turkey ẹnen̄ede ẹma ukwọrọikọ. Ediwak mmọ ẹma ẹkere ke akpana inam utom usiakusụn̄ ofụri ini. Owo 82 ẹma ẹtọn̄ọ utom usiakusụn̄ ofụri ini ke ufan̄ isua kiet emi eketienede.

Şirin

Nditọete emi ẹketode idụt en̄wen ẹka Turkey ẹtịn̄ nte mmọ ndikaka do an̄wamde mmọ ke utom ukwọrọikọ. Eyenete an̄wan kiet emi ekerede Şirin, emi okotode Germany aka do ekewet ete: “Isọn̄ke-sọn̄ nditọete ke Turkey ndikwọrọ ikọ nnọ mme owo ke ini mmọ ẹnamde n̄kpọ idemmọ. Bụt isiyakke mi nsọp n̄kwọrọ ikọ ke ini emi nnamde mbubehe idemmi. Edi se n̄kekpepde nto nditọete ke Turkey ye akam oro mbọn̄de nnọ Jehovah anam emem mi utom idahaemi ndikwọrọ ikọ ke ini nnamde n̄kpọ idemmi. Mma n̄kam n̄kwọrọ ikọ nnyụn̄ nnọ mme owo tract ke usụn̄ tren idakisọn̄! Bụt inen̄ekede inam mi aba.”

Johannes

Johannes emi okotode Germany aka do ọkọdọhọ ete: “Mma n̄kpep n̄kpọ emi edin̄wamde mi ke utom ukwọrọikọ. Nditọete ke Turkey ẹnen̄ede ẹyom ndikwọrọ ikọ nnọ ediwak owo. Mmọ ẹsikwọrọ ikọ ini ekededi. Mma mbiere ke nyanam ntre mma nnyọn̄ Germany. Ndien idahaemi mmesikwọrọ ikọ nnọ ediwak owo n̄kan akpa.”

Zeynep

Zeynep emi okotode France aka do ọkọdọhọ ete: “San̄asan̄a utom ukwọrọikọ emi enen̄ede an̄wam mi. Enye anam mi nnen̄ede nnyene uko nnyụn̄ mbuọt idem ye Jehovah.”

Ama anam nditọete ẹnen̄ede ẹkpere kiet eken. Owo idisọpke ifre nte nditọete ẹkedianade kiet ẹnyụn̄ ẹmade idemmọ kpa ye emi mmọ ẹketode nsio nsio idụt. Jean-David emi ikasiakde akpa ọkọdọhọ ete: “Nditọete ẹma ẹkama nnyịn tutu. . . . Mmọ ẹkeda nnyịn nte ufan ye nte mbonubon mmọ. Mmọ ẹma ẹda nnyịn ẹsịn ke ufọk. Mma ndọdiọn̄ọ ke nnyịn idi kiet ke ofụri ererimbot; mmesikot ntre ke mme n̄wed nnyịn. Edi mma n̄kokụt ke enyịn. Emi ama anam etetịm enem mi ndidi Ntiense Jehovah.  Mmọkọm Jehovah nte enye anamde ndi Ntiense esie.”

Claire (esịne ufọt)

Claire emi okotode France aka ọkọdọhọ ete: “Kpukpru nnyịn ikedi ubon kiet inamke n̄kpọ m̀mê owo okoto Denmark, France, Germany, m̀mê Turkey. Eketie nte n̄kpọ eke Jehovah owụride kpukpru adan̄a obio.”

Stéphanie (esịne ufọt)

Stéphanie emi okotode France aka do ọkọdọhọ ete: “San̄asan̄a utom ukwọrọikọ oro ama anam mi ndiọn̄ọ ke nnyịn ndima Jehovah anam idiana kiet, idịghe usem m̀mê nte ẹsinamde n̄kpọ ke n̄kan̄ nnyịn.”

UTOM MMỌ KE ENYENYENE UFỌN

Ke ini ediwak mbon emi ẹketienede ẹka Turkey ẹkekụtde ke utom okpon ke idụt oro, mmọ ẹma ẹkere ke akpana iwọrọ ikodu do in̄wam. Owo ifan̄ ẹma ẹwọrọ ẹka. Nditọete ke Turkey ẹma se mmọ ẹnamde ata etieti.

Ke uwụtn̄kpọ, enyene otu kiet emi odude oyom usụn̄ ọkpọn̄ mme esop en̄wen, emi mme asuanetop 25 ẹdude. Ebiowo kiet kpọt okodu ke otu oro ke ediwak isua. Kere nte esịt ekenemde mmọ ke ini nditọete itiokiet ẹketode Germany ye Netherlands ẹka do ke 2015!

NDIKA EBIET EMI ẸNEN̄EREDE ẸYOM MME ỌKWỌRỌIKỌ

Nditọete oro ẹwọrọde ẹkedu ke Turkey ẹkwọrọ ikọ ẹdọhọ ke uwem etie didie do? Imọdiọn̄ọ ke isimemke inọ mmọ ndusụk ini, edi Jehovah ọdiọn̄ mmọ etieti. Kop se ndusụk mmọ ẹtịn̄de mi:

Federico

Federico ebe isua 40 onyụn̄ ọdọ n̄wan. Mmọ ẹketo Spain ẹka Turkey. Enye ọkọdọhọ ete: “Sia mmenyeneke enyọn̄ ye isọn̄, idụhe se ibọde mi ini, emi anam nnyene ini nnam se idide akpan n̄kpọ ikan.” Ke ini ẹkebụpde enye m̀mê enye ọkpọdọhọ mbon en̄wen ẹtiene ẹnam se enye anamde, enye ama ọdọhọ ete: “Ih! Ke ini owo ọwọrọde aka idụt en̄wen man akan̄wam mme owo ẹdiọn̄ọ Jehovah, enye ayak idemesie esịn Jehovah ke ubọk. Enye eyenen̄ede okụt nte Jehovah esede aban̄a enye.”

Rudy

 Rudy emi okotode Netherlands aka do ekpere ndisịm isua 60, onyụn̄ ọdọ n̄wan. Enye ọkọdọhọ ete: “Esịt esinem nnyịn etieti ndikaka Turkey n̄kọkwọrọ ikọ nnọ ediwak owo emi mîkopke eti mbụk akanam. Ndikụt nte enemde mmọ ndikpep akpanikọ esidat nnyịn esịt tutu.”

Sascha

Sascha ebe isua 40 onyụn̄ ọdọ n̄wan. Mmọ ẹketo Germany ẹka do. Enye ọdọhọ ete: “Kpukpru ini emi n̄kade ukwọrọikọ, mmesikụt mbon emi akanam mîkopke eti mbụk. Esinen̄ede enem mi ndin̄wam mmọ ẹdiọn̄ọ Jehovah.”

Atsuko

Atsuko emi okotode Japan aka do ye ebe esie edi n̄kpọ nte isua 35. Enye ọdọhọ ete: “N̄kesiyom Armageddon ọsọsọp edi. Edi ke mma n̄kọwọrọ n̄ka Turkey, mmọkọm Jehovah nte enye osụk enyenede ime. Ndikụt nte Jehovah an̄wamde ikọt esie ẹkwọrọ ikọ ke ofụri ererimbot anam ọdọn̄ mi ndinen̄ede n̄kpere enye.”

Sista Alisa emi okotode Russia aka do onyụn̄ ebede isua 30 ọkọdọhọ ete: “Ndika do n̄kanam n̄kpọ Jehovah anam mi ntabi kpukpru mfọn esie.” (Ps. 34:8) Enye ama ọdọhọ n̄ko ete: “Jehovah idịghe ete mi kpọt, enye edi ata ufan mi. Ndien nsio nsio n̄kpọ oro ẹtịbede anam nnen̄ede ndiọn̄ọ enye. Enyene ediwak n̄kpọ emi ẹsinamde uwem enem mi, Jehovah onyụn̄ ọdiọn̄ mi etieti.”

“ẸMENEDE ENYỊN ẸSE IN̄WAN̄”

San̄asan̄a utom ukwọrọikọ oro ẹkediomide ke Turkey ama anam ẹkwọrọ ikọ ẹnọ ediwak owo do. Edi ediwak obio osụk ododu ke idụt oro emi owo mîkwọrọke ikọ kan̄a. Idụhe usen emi mbon emi ẹwọrọde ẹka Turkey ẹkekwọrọ ikọ mîsikwe owo oro akanam mîkopke n̄kpọ iban̄a Jehovah. Ndi akpama ndiwọrọ n̄ka Turkey? Edieke akpamade, idọhọ fi ite: ‘Menede enyịn se in̄wan̄, oyokụt ke n̄kpọ adat se ẹkpen̄ede.’ (John 4:35) Ndi emekeme ndika n̄kan̄wam ke idụt ekededi oro ‘n̄kpọ adatde se ẹkpen̄ede’? Edieke edide ntre, tọn̄ọ ndinam mme n̄kpọ emi ẹdin̄wamde fi ekeme ndika. Se idude edi ke Jehovah ọyọdiọn̄ fi ata etieti edieke esịnde idem anam mme owo ẹkop eti mbụk “tutu esịm ata utịt ikpehe isọn̄”!​—Utom 1:8.

^ ikp. 2 Se ediye ekpri n̄wed oro ‘Kụt Eti Isọn̄’, page 32-33.