Be ka se isịnede

Be ka se isịnede

 IBUOTIKỌ UKPEPN̄KPỌ 5

Ndidụk Mbono Esop Owụt Utọ Owo Emi Nnyịn Idide

Ndidụk Mbono Esop Owụt Utọ Owo Emi Nnyịn Idide

“Ẹkwọrọ n̄kpa Ọbọn̄, tutu enye edisịm.” —1 COR. 11:26.

ỌYỌHỌ IKWỌ 18 Kọm Abasi ke Ndikọnọ Jesus Edifak Nnyịn

SE IDIKPEPDE *

1-2. (a) Nso ke Jehovah esikụt ini ediwak miliọn owo ẹdụkde Udia Mbubreyo Ọbọn̄? (Se ndise ikpaedem Enyọn̄-Ukpeme emi.) (b) Nso ke idineme ke ibuotikọ emi?

KERE se Jehovah esikụtde ini ediwak miliọn owo ẹdụkde Udia Mbubreyo Ọbọn̄. Idịghe ibat owo emi ẹdụkde kpọt ke enye esikụt; enye esikụt nsio nsio owo emi ẹdụkde. Ke uwụtn̄kpọ, enye esikụt mbon emi ẹsidụkde kpukpru isua. Ndusụk ke otu oro ẹsidụk kpa ye emi ẹkọbọde mmọ idiọk idiọk. Enyene mbon en̄wen emi mîsiwakke ndidụk mbono esop emi isinịmde kpukpru urua, edi mmọ isitreke ndidụk Editi kpukpru isua. Jehovah esinyụn̄ okụt mbon emi edide akpa ini mmọ ndidụk Editi edi oro; ekeme ndidi mmọ ẹnyụn̄ ẹdọhọ idi idise nte esitiede.

2 Imọdiọn̄ọ ke esinem Jehovah ndikụt adan̄a ediwak owo ntre ẹdụkde Editi. (Luke 22:19) Edi idịghe ibat owo emi ẹdụkde enen̄ede ebehe enye. Se inen̄erede ibehe enye edi se inamde mmọ ẹdụk. Imọn̄ ineme akpan mbụme kiet ke ibuotikọ emi. Mbụme oro edi: Ntak emi isidụkde Editi kpukpru isua ifiak idụk mbono esop emi Jehovah odiomide ọnọ mbon emi ẹmade enye kpukpru urua?

(Se ikpehe 1-2) *

NSỤHỌDEIDEM ESINAM IDỤK

3-4. (a) Ntak emi isidụkde mbono esop? (b) Nnyịn ndidụk mbono esop owụt nso? (c) Didie ke 1 Corinth 11:23-26 owụt ntak emi nnyịn mîkpetreke ndidụk Editi?

3 Ata akpan ntak emi isidụkde mme mbono esop edi ke usụn̄ kiet emi ituakde ibuot inọ Jehovah edi oro. Ntak efen edi ke Jehovah esikpep nnyịn n̄kpọ do. Mbon emi ẹtan̄de idem isinịmke ke imoyom ẹkpep mmimọ n̄kpọ. (3 John 9) Nnyịn itiehe ntre, ikam iyoyom Jehovah ye  esop esie ẹkpep nnyịn n̄kpọ.—Isa. 30:20; John 6:45.

4 Nnyịn ndidụk mbono esop owụt ke imosụhọde idem, inyụn̄ iyom ẹkpep nnyịn n̄kpọ. Ama esịm mbubreyo usen Editi n̄kpa Jesus, imesitiene idụk akpan edinam emi sia edi n̄kpọ emi anade inam. Ntak efen edi ke isụhọde idem inam se Jesus okowụkde nnyịn ete: “Ẹka iso ẹnam emi nditi mi.” (Kot 1 Corinth 11:23-26.) Mbono esop oro esinam itetịm inim ke se Jehovah ọn̄wọn̄ọde ọnọ nnyịn oyosu, onyụn̄ eti nnyịn adan̄a nte Jehovah amade nnyịn. Edi Jehovah ọdiọn̄ọ ke ini kiet kpọt ke isua ikemke ndida nsọn̄ọ nnyịn idem nnyụn̄ ndọn̄ nnyịn esịt. Oro anam enye odiomi mbono esop kpukpru urua ọnọ nnyịn. Nsụhọdeidem esinam idụk mme mbono esop oro. Kpukpru urua, imesida ediwak hour itịm idem inọ mbono esop emi inyụn̄ idụk.

5. Nso inam mbon emi ẹsụhọrede idem ẹsinyịme Jehovah ekpep mmọ n̄kpọ?

5 Kpukpru isua, ediwak mbon emi ẹsụhọrede idem ẹsinyịme Jehovah ekpep mmimọ n̄kpọ. (Isa. 50:4) Mmọ ẹsibem iso ẹdụk Editi, ekem ẹtọn̄ọ ndidụk mme mbono esop eken. (Zech. 8:20-23) Esinem nnyịn emi ima ikododu ke esop ye mbufa owo oro nte Jehovah emi edide andin̄wam ye andinyan̄a nnyịn ekpepde nnyịn n̄kpọ onyụn̄ adade nnyịn usụn̄. (Ps. 40:17) Kere ise, nso ikpenem nnyịn ikan m̀mê ikpedi akpan n̄kpọ ikan nnyịn ndinyịme Jehovah ye edima Eyen esie ẹkpep nnyịn n̄kpọ?—Matt. 17:5; 18:20; 28:20.

6. Didie ke nsụhọdeidem akan̄wam ete kiet edidụk Editi?

6 Imesidomo ndikot adan̄a ediwak owo nte ikekeme ẹdidụk Editi n̄kpa Christ kpukpru isua. Ediwak mbon emi ẹsụhọrede idem ẹsinyịme ndidi, mmọ ẹsinyụn̄ ẹbọ ufọn ẹma ẹdi. Se uwụtn̄kpọ kiet mi. Isua ifan̄ ko, Brọda kiet ama ọnọ ete kiet n̄wedikot ete edidụk Editi. Ete oro ama ọdọhọ enye ke imọ idikemeke ndidi. Edi ama akpa Brọda oro idem ndikụt ete oro ke Ufọkmbono Obio Ubọn̄ mbubreyo usen Editi oro. Ete oro ama ama nte mme owo ẹkekọmde enye tutu enye ọtọn̄ọ ndidụk mme mbono esop emi isinịmde kpukpru urua. Mbono esop ita kpọt ke enye mîkodụkke ke ofụri isua kiet. Nso ikanam enye ebiere ndidụk kpukpru mbono esop? Enye ama osụhọde idem, oro akanam enye okpụhọ ekikere edidụk Editi. Brọda emi okokotde enye Editi ọkọdọhọ ke “ete oro osụhọde idem etieti.” Imenịm ke Jehovah akanam ete oro edikpono Enye. Ete oro ama ana baptism; idahaemi enye edidi eyenete nnyịn.—2 Sam. 22:28; John 6:44.

7. Didie ke se isikpepde ke mbono esop ye se isikotde ke Bible ẹkeme ndin̄wam nnyịn isụhọde idem?

7 Se isikpepde ke mbono esop ye se isikotde ke Bible ẹkeme ndin̄wam nnyịn isụhọde idem. Urua ifan̄ mbemiso Editi, ẹsineme uwụtn̄kpọ Jesus ye nte enye okosụhọrede idem akpa ke ibuot nnyịn ke mbono esop. Usen ifan̄ mbemiso Editi, ẹsidọhọ ikot mme itie Bible emi ẹbụkde se iketịbede mbemiso Jesus akpade ye ke enye ama ekeset. Se isikpepde ke mbono esop ye se isikotde ke mme mbụk oro ẹsinam itetịm ima se Jesus akanamde ọnọ nnyịn. Emi esinam isụhọde idem nte enye inyụn̄ inam se Jehovah ọdọhọde, idem ke ini mîmemke inọ nnyịn.—Luke 22:41, 42.

UKO ESINAM IDỤK

8. Didie ke Jesus okowụt ke imọ imenyene uko?

8 Imesidomo ndinyene uko nte Jesus.  Ti nte enye okowụtde ke imenyene uko usen ifan̄ mbemiso enye akpade. Enye ama ọdiọn̄ọ ke ibịghike mme asua ẹmọn̄ ẹsuene imọ, ẹmia imọ, ẹnyụn̄ ẹwot imọ. (Matt. 20:17-19) Kpa ye oro, enye ama enyịme ndikpa. Ke ama ekekpere ini emi ẹyomde ndimụm enye, enye ama ọdọhọ mme apostle esie emi ẹkedude ye enye ke Gethsemane ete: “Ẹdaha ke enyọn̄, ẹyak inyọn̄ọ. Sese! Andida mi nnọ asan̄a ekpere.” (Matt. 26:36, 46) Ke ini ẹkedide ndimụm enye, enye ama asan̄a ebịne mmọ, ọkọdọhọ ke imọ ke mmọ ẹyom, yak mbonekọn̄ ẹyak mme apostle imọ ẹnyọn̄ọ. (John 18:3-8) Jesus ama enyene uko etieti! Mme Christian emi ẹyetde aran ye mme erọn̄ en̄wen ẹdomo ndiwụt ke imenyene uko nte Jesus. Didie ke mmọ ẹsinam emi?

Afo ndinyene uko ndụk mbono esop esisọn̄ọ mbon en̄wen idem (Se ikpehe 9) *

9. (a) Ntak emi oyomde inyene uko man ikeme ndisidụk mbono esop kpukpru ini? (b) Didie ke uwụtn̄kpọ nnyịn ekeme ndin̄wam nditọete emi ẹsịnde ke ufọk-n̄kpọkọbi ke ntak se mmọ ẹnịmde?

9 Ke ini isobode mfịna, esiyom inyene uko man ikeme ndisidụk mbono esop kpukpru ini. Ndusụk nditọete nnyịn ẹsidụk mbono esop kpa ye emi ẹfụhọde, idem ememde, m̀mê idem mîsọn̄ke. Mbon en̄wen ẹdụk kpa ye emi mbon mmọ m̀mê ukara ẹkọbọde mmọ. Kere nte se nnyịn inamde esin̄wamde nditọete nnyịn emi ẹsịnde ke ufọk-n̄kpọkọbi ke ntak se mmọ ẹnịmde. (Heb. 13:3) Mmọ ẹma ẹkop ke nnyịn ke ika iso inam n̄kpọ Jehovah kpa ye kpukpru se isobode, emi esinam mmọ ẹbiere ndika iso mbuọt idem ye Jehovah, nnyene uko, nnyụn̄ nsọn̄ọ nda ye Jehovah. Se ikan̄wamde apostle Paul edi oro. Ini enye okodude ke ufọk-n̄kpọkọbi ke Rome, esịt ama esinem enye ini ekededi emi enye okokopde ke nditọete ke ẹka iso ẹnam n̄kpọ Jehovah. (Phil. 1:3-5, 12-14) Enye ama ewet leta ọnọ nditọete emi ẹkedide mme Hebrew. Etie nte enye ekewet leta emi esisịt ini mbemiso ẹsana enye ẹyak mîdịghe edi esisịt ini ke ẹma ẹkesana enye ẹyak. Enye ama ọdọhọ mmọ “ẹyak ima nditọete” mmọ “osụk akaka iso,” ẹkûnyụn̄ utre ndisisop idem ọtọkiet.—Heb. 10:24, 25; 13:1.

10-11. (a) Mmanie ke ikpokot ẹdidụk Editi? (b) Didie ke Ephesus 1:7 owụt ntak emi ikpokotde mmọ?

10 Imesiwụt ke imenyene uko ima ikot iman nnyịn, mbon itieutom nnyịn, ye mme mbọhọidụn̄ nnyịn ẹdidụk Editi. Ntak emi isikotde mmọ? Imenen̄ede ima se Jehovah ye Jesus ẹkenamde ẹnọ nnyịn tutu ọdọn̄ nnyịn ndikot mbon en̄wen ẹditiene ẹdụk Editi. Iyom mmọ ẹdiọn̄ọ se mmọ ẹkemede ndinam man ẹtiene ẹbọ ufọn “mfọnido [Jehovah] oro owo mîdotke,” emi ufak anamde inyene.—Kot Ephesus 1:7; Edi. 22:17.

11 Ndidụk mbono esop owụt ke imenyene uko, onyụn̄ owụt ke imenyene ata ediye edu en̄wen emi Jehovah Abasi ye Eyen esie ẹsiwụtde ke nsio nsio usụn̄.

 IMA ESINAM IDỤK

12. (a) Didie ke mbono esop esinam itetịm ima Jehovah ye Jesus? (b) Nso ke 2 Corinth 5:14, 15 ọdọhọ inam ukem nte Jesus akanamde?

12 Ima emi imade Jehovah ye Jesus esinam idụk mbono esop. Se isikpepde ke mbono esop esinyụn̄ anam itetịm ima Jehovah ye Eyen esie. Do ke ẹsiwak nditi nnyịn se mmọ mbiba ẹnamde ẹnọ nnyịn. (Rome 5:8) Edi Editi esinen̄ede eti nnyịn adan̄a nte mmọ ẹmade nnyịn ye idem mbon emi mîdiọn̄ọke kan̄a ufọn ufak emi ẹkekpede. Idatesịt emi inyenede esinam idomo ndikpebe Jesus kpukpru usen. (Kot 2 Corinth 5:14, 15.) N̄kpọ efen edi ke inemesịt esinam nnyịn itoro Jehovah ke ufak emi enye ọkọnọde ke ibuot nnyịn. Usụn̄ kiet emi isitorode enye edi ndibọrọ mbụme ke mbono esop.

13. Didie ke ikeme ndiwụt adan̄a nte imade Jehovah ye Eyen esie? Nam an̄wan̄a.

13 Imekeme ndiwụt adan̄a nte imade Jehovah ye Eyen esie ke ndiyak n̄kpọ atak nnyịn man inam se ededi emi mmọ ẹdọhọde. Ediwak ini, imesiyak nsio nsio n̄kpọ atak nnyịn man ikeme ndidụk mbono esop. Ediwak esop ẹsinịm mbono esop kiet ke utom ama akasuana, ini oro idem esimem ediwak owo, ẹnyụn̄ ẹnịm mbono esop efen ke utịturua emi mme owo ẹsiduọkde odudu. Ndi Jehovah esikụt nte idụkde mme mbono esop emi kpa ye emi akakde nnyịn ke idem? Esikụt! Se idude edi ke nte ikam isịnde ukeme ndidụk mme mbono esop emi, ntre ke Jehovah okụt ke imama imọ, emi esinyụn̄ enem enye esịt.—Mark 12:41-44.

14. Didie ke Jesus ekenịm uwụtn̄kpọ ke nte ikpesibemde iso ikere se idifọnde ye mbon en̄wen?

14 Jesus ama enịm ata eti uwụtn̄kpọ ọnọ nnyịn ke ndikesibem iso n̄kere se idifọnde ye mbon en̄wen. Enye ama enyịme ndikpa nnọ mbet esie, edi nte enye ekesinamde n̄kpọ kpukpru usen ama owụt n̄ko ke enye ekesibem iso ekere se idifọnde ye mmọ. Ke uwụtn̄kpọ, enye okosụk enyenyene ini odu ye mbet esie idem ke ini akakakde enye m̀mê ke ini n̄kpọ eketịmerede enye ekikere. (Luke 22:39-46) Enye ekesikere se enye akpanamde ọnọ mbon en̄wen, idịghe se mme owo ẹkpenamde ẹnọ enye. (Matt. 20:28) Ima inen̄ede ima Jehovah ye nditọete nnyịn, iyanam se ikekeme  man idụk Udia Mbubreyo Ọbọn̄ ye kpukpru mbono esop eken.

15. Mmanie ke isinen̄ede iyom ndin̄wam?

15 Esop Jehovah edi n̄kukụre esop emi ẹkpepde akpanikọ; nnyịn inyụn̄ itie nte ata nditọeka. Esinenem nnyịn ndinam se ededi emi ikemede man in̄wam mbufa owo ẹtiene ẹdidụk esop emi. Edi inen̄ede iyom ndin̄wam mbon emi “ẹbuanade n̄kpọ ye nnyịn ke mbuọtidem,” emi ẹma ẹketre ndidụk mbono esop m̀mê ndika ukwọrọikọ. (Gal. 6:10) Isiwụt ke imama mmọ ke ndin̄wam mmọ ẹdụk mme mbono esop, akpan akpan Editi. Esinem nnyịn ke ini mmọ ẹfiakde ẹbịne Jehovah emi edide edima Ete nnyịn ye andikpeme nnyịn, ukem nte esinemde Jehovah ye Jesus.—Matt. 18:14.

16. (a) Didie ke ikeme ndisọn̄ọ kiet eken idem? Nso ufọn ke mme mbono esop ẹdinam inọ nnyịn? (b) Nso inam ini emi edi eti ini nditi se Jesus eketịn̄de ke John 3:16?

16 Urua ifan̄ mbemiso Editi, kot adan̄a ediwak owo nte ekekeme ẹdidụk Editi emi ẹdinịmde mbubreyo Friday, April 19, 2019. (Se ekebe oro “ Ndi Oyokot Mmọ?”) Ẹyak isidụk kpukpru mbono esop emi Jehovah odiomide ọnọ nnyịn man isọn̄ọ kiet eken idem. Nte utịt ererimbot emi ekperede, mme mbono esop nnyịn ẹdin̄wam nnyịn isụhọde idem, inyene uko, inyụn̄ ima mme owo. (1 Thess. 5:8-11) Ẹyak iwụt Jehovah ye Eyen esie ke ofụri esịt ke imenen̄ede ima nte mmọ ẹmade nnyịn!—Kot John 3:16.

ỌYỌHỌ IKWỌ 126 Sọn̄ọ Da Nam N̄kpọ Jehovah

^ ikp. 5 SE IDIKPEPDE N̄kponn̄kan mbono esop emi ẹdinịmde isua emi edidi Editi n̄kpa Christ emi ẹdinịmde mbubreyo Friday April 19, 2019. Nso isinam idụk Editi? Isidụk man inem Jehovah esịt. Ke ibuotikọ emi, imọn̄ ikụt ke nnyịn ndidụk Editi ye mbono esop emi ẹsinịmde kpukpru urua owụt utọ owo emi idide.

^ ikp. 50 NDISE IKPAEDEM: Ẹdara ediwak miliọn owo emi ẹdụkde Udia Mbubreyo Ọbọn̄ ke ofụri ererimbot

^ ikp. 52 MME NDISE: Leta emi n̄wan ye eyen Brọda kiet ẹwetde ẹnọ ẹsọk enye ke ufọk-n̄kpọkọbi ọsọn̄ọ enye idem. Enem enye ndikụt ke mmọ ifreke imọ, ke mmọ ke ẹka iso ẹnam n̄kpọ Jehovah kpa ye ndutịme emi odude ke edem mmọ.