Be ka se isịnede

Be ka se isịnede

 STUDY ARTICLE 7

Imama Ete Nnyịn Jehovah Etieti

Imama Ete Nnyịn Jehovah Etieti

“Nnyịn ima ima, koro enye ekebemde iso ama nnyịn.”—1 JOHN 4:19.

ỌYỌHỌ IKWỌ 3 Jehovah Ọnọ Nnyịn Idotenyịn ye Uko

SE IDIKPEPDE *

1-2. Nso ikanam Jehovah anam nnyịn ikeme ndisịne ke ubon esie? Didie ke enye akanam oro?

JEHOVAH okot nnyịn esịn ke ubon esie emi ẹtuakde ibuot ẹnọ enye. Idụhe ikot emi okponde ntre! Mbon emi ẹdude ke ubon nnyịn emi ẹdi mbon emi ẹma ẹkeyak idem ẹnọ enye ẹnyụn̄ ẹbuọt idem ke uwa ufak Eyen esie. Ubon nnyịn enem etieti. Uwem nnyịn enyene ibuot idahaemi, imonyụn̄ idori enyịn ndidu uwem ke nsinsi, edide ke heaven m̀mê ke Paradise ke isọn̄.

2 Jehovah akanam nnyịn ikeme ndisịne ke ubon esie sia enye amade nnyịn ata etieti. Edi, ndinam oro ama akpa enye ata akamba n̄kpọ. (John 3:16) “Ẹkedep [nnyịn] ke ekọmurua.” (1 Cor. 6:20) Ufak ke Jehovah akada anam nnyịn ikeme ndikpere enye. Imekeme ndikot n̄kon̄n̄kan Owo ke ekondo Ete nnyịn; ata n̄kpọ ukpono edi oro. Ndien nte ikekpepde ke ibuotikọ emi ekebede, Jehovah edi mfọnn̄kan Ete.

3. Mme mbụme ewe ke ikeme ndibụp? (Se n̄ko ekebe emi “ Ndi Jehovah Ọdiọn̄ọ Mi?”)

3 Imekeme nditiene owo kiet emi eketienede ewet Bible ibụp ite: “Nso ke ami ndinọ Jehovah ke usiene ke kpukpru mfọn emi enye ọfọnde ye ami?” (Ps. 116:12) Ibọrọ edi ke nnyịn idikemeke ndinọ Ete nnyịn eke heaven usiene tutu amama. Edi, ima emi enye amade nnyịn anam nnyịn iyom ndima enye n̄ko. Apostle John ekewet ete: “Nnyịn ima ima, koro enye ekebemde iso ama nnyịn.” (1 John 4:19) Nso ye nso ke ikeme ndinam n̄wụt Ete nnyịn eke heaven ke imama enye?

 KA ISO KPERE JEHOVAH

Iwụt ke imenen̄ede ima Ete nnyịn eke heaven Jehovah ke ini ikade iso ibọn̄ akam inọ enye, ikopde uyo esie, inyụn̄ in̄wamde mme owo ẹma enye (Se ikpehe 4-14)

4. Nte James 4:8 owụtde, ntak emi ikpesịnde ukeme man ikpere Jehovah?

4 Jehovah oyom nnyịn ikpere imọ inyụn̄ ineme nneme ye imọ. (Kot James 4:8.) Enye ọdọhọ nnyịn ‘ikọbọ ke akam,’ enye esinyụn̄ akpan̄ utọn̄ okop akam nnyịn kpukpru ini. (Rome 12:12) N̄kpọ isikakke enye, enye isinyụn̄ inanake ini tutu edi se enye mîkemeke ndikop akam nnyịn. Nnyịn n̄ko imesikpan̄ utọn̄ inọ enye ke ini ikotde Bible emi edide Ikọ esie ye mme n̄wed emi ẹnamde Bible an̄wan̄a nnyịn. Usụn̄ en̄wen emi ikpan̄de utọn̄ inọ enye edi nditịm n̄kpan̄ utọn̄ ke mbono esop. Ukem nte ete ye eka ye nditọ ndisineme nneme esinamde mmọ ẹkpere kiet eken, ndisineme nneme ye Jehovah ayan̄wam nnyịn ika iso ikpere enye.

Se ikpehe 5

5. Nso ke ikpanam man Jehovah ọdọdiọn̄ okop akam nnyịn?

5 Fiak kere nte akam fo esitiede. Jehovah oyom nnyịn in̄wan̄a esịt nnyịn inọ imọ. (Ps. 62:8) Ọkpọfọn ibụp idem nnyịn: ‘Ndi akam mi esidi enyọn̄ enyọn̄, nte n̄kpọ eke nsion̄ode se owo en̄wen ekewetde n̄wet, m̀mê esito mi esịt, nte leta emi n̄wetde ke idemmi?’ Imọfiọk ke amama Jehovah etieti, ke omonyụn̄ oyom ndika iso nnen̄ede n̄kpere enye. Edi nso idin̄wam fi? Ana esineme nneme ye enye kpukpru ini. Dọhọ enye se mûkpumaha ndidọhọ owo ndomokiet. Dọhọ enye se inamde esịt enem fi ye se inamde fi ofụhọ. Nen̄ede nịm ke emekeme ndidọhọ enye an̄wam fi ke n̄kpọ ekededi.

6. Nso ke ana inam man ika iso ikpere Ete nnyịn eke heaven?

6 Edieke iyomde ndika iso n̄kpere Ete nnyịn eke heaven, ana isiwụt ke imama se enye anamde ọnọ nnyịn. Imenyịme se owo kiet emi ekewetde psalm ekewetde ete: “Afo amanam ediwak n̄kpọ, O Jehovah Abasi mi, idem mme utịbe utom fo ye ekikere fo kaban̄a nnyịn; idụhe owo eke ẹkemede ndimen ndomo ye afo. N̄kpoyom nditịn̄ nnyụn̄ mbụk mmọ, mmọ ẹwak ẹkan nte n̄kemede ndibụk.” (Ps. 40:5) Edi nnyịn isinyụn̄ imaha-ma ke esịt nnyịn kpọt se Jehovah anamde, imesitịn̄ inyụn̄ inam mme n̄kpọ emi ẹwụtde ke imama se enye anamde. Emi anam nnyịn ikpụhọde ye ediwak owo mfịn. Ata ediwak owo iwụtke ke imama se Abasi anamde ọnọ mmọ. Mme owo ndinana esịtekọm akam edi n̄kpọ kiet emi owụtde ke idu ke “mme akpatre usen.” (2 Tim. 3:1, 2) Nnyịn iyomke nditie ntre!

7. Nso ke Jehovah oyom nnyịn inam? Ntak-a?

7 Mme ete ye eka isiyomke nditọ mmọ ẹn̄wana, ẹsiyom mmọ ẹdi ufan. Jehovah onyụn̄ oyom kpukpru nditọ esie ẹdi ufan n̄ko. Nnyịn ndima kiet eken akam anam mme owo ẹdiọn̄ọ ke nnyịn idi ata mme Christian. (John 13:35) Imenyịme se owo kiet emi ekewetde psalm ekewetde ete: “Ọfọn didie onyụn̄ enem didie ntem nditọete ndidụn̄ ọtọkiet ke edidianakiet!” (Ps. 133:1) Ima ima nditọete nnyịn, ida oro iwụt Jehovah ke imama enye. (1 John 4:20) Enem tutu ndisịne ke utọ ubon emi mme owo ẹfọnde ido ẹnyụn̄ ẹtuade kiet eken mbọm!—Eph. 4:32.

KOP ITEM MAN OWỤT KE AMAMA JEHOVAH

Se ikpehe 8

8. Akpa John 5:3 owụt ke nso ikpedi ata akpan ntak emi ikpokopde uyo Jehovah?

8 Jehovah oyom nditọ ẹkop uyo mme ete ye eka mmọ, se enye onyụn̄ oyomde nnyịn inam ye imọ edi oro. (Eph. 6:1) Enye odot se ikopde uyo inọ sia  enye edi Andibot nnyịn, enye enịm nnyịn uwem, enye onyụn̄ enyene ọniọn̄ akan ete ye eka ekededi. Edi ata akpan ntak emi akpanamde ikop uyo esie ekpedi sia imade enye. (Kot 1 John 5:3.) Kpa ye emi inyenede ediwak ntak ndikop uyo Jehovah, enye inyịkke-nyịk nnyịn ikop uyo esie. Jehovah ọnọ nnyịn ifụre ndimek se idinamde, ntre esinem enye ke ini imekde ndikop uyo esie ke ntak emi imade enye.

9-10. Ntak emi edide akpan n̄kpọ nnyịn ndifiọk ibet Abasi nnyụn̄ nnam mmọ?

9 Mme ete ye eka isiyomke n̄kpọ anam nditọ mmọ. Oro esinam mmọ ẹnọ nditọ mmọ mme ibet emi ẹdikpemede mmọ. Nditọ ndinịm mme ibet oro owụt ke mmọ ẹkpono mmọ ẹnyụn̄ ẹberi edem ke mmọ. Ntre ndi ukereke ke nnyịn ndifiọk mme ibet emi Ete nnyịn eke heaven enịmde nnyụn̄ nnam mmọ edi akpan n̄kpọ akan? Nnyịn ndinịm ibet Jehovah ke isida iwụt enye ke imama enye inyụn̄ ikpono enye, emi esinyụn̄ ọfọn ye nnyịn. (Isa. 48:17, 18) Edi mbon emi mîmaha Jehovah mînyụn̄ inịmke ibet esie ẹsida mfịna ẹsọk idemmọ.—Gal. 6:7, 8.

10 Nnyịn ndidu uwem nte Jehovah amade ididaha mfịna isọk nnyịn, idiyakke esịt etịmede nnyịn, idinyụn̄ iyakke inam mme n̄kpọ emi ẹkemede ndinam itre ndikpere Jehovah. Jehovah ọfiọk se ifọnde ye nnyịn ikan. Sista Aurora emi odụn̄de ke United States ọdọhọ ete: “Mmọfiọk ke ndinam se Jehovah ọdọhọde esinam  uwem enem owo akan.” Nte esitiede edi oro. Nso ufọn ke afo ndikop uyo Jehovah anam ọnọ fi?

11. Didie ke akam esin̄wam nnyịn?

11 Akam esin̄wam nnyịn ikop uyo Jehovah, idem ke ini mîmemke ndinam ntre. Esisọn̄ ndinam se Jehovah ọdọhọde ndusụk ini sia nnyịn ifọnke ima, edi ana ika iso in̄wana mbak nnyịn idinam se enye asuade. Owo kiet emi eketienede ewet psalm ekekpe Abasi ubọk ete: “Nam mi mfiọk, man n̄kpeme ibet fo nnyụn̄ nnịm enye ke ofụri esịt mi.” (Ps. 119:34) Sista Denise emi edide asiakusụn̄ ofụri ini ọdọhọ ete: “Edieke ọsọn̄de mi ndinam se Jehovah ọdọhọde, mmesibọn̄ akam mben̄e enye an̄wam mi nnam se inende.” Imenịm ke Jehovah esibọrọ utọ akam oro.—Luke 11:9-13.

N̄WAM MBON EN̄WEN ẸMA ETE NNYỊN

12. Nso ke Ephesus 5:1 ọdọhọ inam?

12 Kot Ephesus 5:1. Sia idide “ndima nditọ” Jehovah, imesidomo ofụri ukeme nnyịn ndikpebe enye. Ke ini imade mme owo, ifọnde ido, inyụn̄ ifende inọ owo, Jehovah ke ikpebe oro. Mbon emi mîfiọkke Abasi ẹma ẹkụt eti edu uwem nnyịn, oro ekeme ndinam mmọ ẹyom ndikpep mban̄a enye. (1 Pet. 2:12) Mme ete ye eka emi ẹdide mme Christian ẹkpenyene ndidomo ndikpebe Jehovah ke nte mmọ ẹnamde n̄kpọ ye nditọ mmọ. Oro ekeme ndinam nditọ mmọ ẹyom ndikpere edima Ete nnyịn ke idemmọ.

Se ikpehe 13

13. Nso ke ikpanam man inyene uko?

 13 Ekpri eyen esida ete esie obụre mbụre, esinyụn̄ enenem enye nditịn̄ mban̄a ete esie nnọ mme owo. Nnyịn n̄ko isida Jehovah emi edide Ete nnyịn eke heaven ibụre mbụre, imesinyụn̄ iyom mbon en̄wen ẹfiọk enye. Ke esịt nnyịn, esitie kpukpru nnyịn nte eketiede Edidem David emi ekewetde ete: “Ukpọn̄ mi oyobụre mbụre ke Jehovah.” (Ps. 34:2) Edi nso ke ikpanam ekpedi idi mbon o-bụt? Ikpanam didie inyene uko? Iyenyene uko edieke itide nte edinam nnyịn edinemde Jehovah esịt ye ufọn emi mme owo ẹdibọde edieke mmọ ẹfiọkde enye. Jehovah ayanam nnyịn inyene uko inam n̄kpọ esie. Enye ama an̄wam nditọete nnyịn ke eyo mme apostle ẹnyene uko, oyonyụn̄ an̄wam nnyịn n̄ko.—1 Thess. 2:2.

14. Nso idi ndusụk ntak emi anamde nnyịn ndinam mme owo ẹdi mbet Christ edi akpan n̄kpọ?

14 Jehovah isinamke asari, esinyụn̄ enem enye ndikụt nnyịn imade kpukpru owo, inamke n̄kpọ m̀mê mmọ ẹto m̀mọ̀n̄. (Utom 10:34, 35) Kiet ke otu mfọnn̄kan n̄kpọ emi ikemede ndinam n̄wụt ke imama mme owo edi ndikwọrọ eti mbụk nnọ mmọ. (Matt. 28:19, 20) Nso ikeme ndidi ufọn? Ekeme ndinam mbon emi ẹkpan̄de utọn̄ ẹnọ nnyịn ẹdu eti uwem ẹnyụn̄ ẹdori enyịn ndidu uwem ke nsinsi ke ini iso.—1 Tim. 4:16.

MA ETE NNYỊN MAN ESỊT ENEM FI

15-16. Mme ntak ewe ke inyene ndikop inemesịt?

15 Jehovah edi edima Ete, ntre enye oyom ubon esie ẹkop inemesịt. (Isa. 65:14) Imenyene ediwak ntak emi ẹkpenamde esịt enem nnyịn idahaemi, ekpededi uwem ọsọn̄ ye nnyịn. Ke uwụtn̄kpọ, imenịm ke Ete nnyịn eke heaven ama nnyịn etieti. Imọfiọk nnennen se isịnede ke Bible emi edide Ikọ Abasi. (Jer. 15:16) Inyụn̄ isịne ke ata san̄asan̄a ubon; mbon emi ẹdude ke ubon emi ẹma Jehovah, ẹma ibet esie, ẹnyụn̄ ẹma kiet eken.—Ps. 106:4, 5.

16 Imekeme ndika iso n̄kop inemesịt sia imenen̄ede inịm se Abasi ọn̄wọn̄ọde ete ke uwem ọyọfọn akan emi ke ini iso. Imọfiọk ke ibịghike Jehovah oyosobo kpukpru ndiọi owo efep, onyụn̄ ada Obio Ubọn̄ esie anam isọn̄ afiak edi Paradise. Imonyụn̄ idori enyịn n̄ko ke ẹyenam mbon emi ẹkekpade ẹset ẹfiak ẹdidiana ye mbon mmọ. (John 5:28, 29) Eyenem tutu! N̄kponn̄kan edi ke imenịm ke kpukpru mme angel ke heaven ye kpukpru owo ke isọn̄ ẹyenọ Jehovah ukpono, ye ubọn̄, ye utuakibuot oro enye odotde ndibọ.

ỌYỌHỌ IKWỌ 12 Jehovah Edi Ata Ọkpọsọn̄ Abasi

^ ikp. 5 Imọfiọk ke Ete nnyịn Jehovah ama nnyịn etieti onyụn̄ anam nnyịn idisịne ke ubon esie emi ẹtuakde ibuot ẹnọ enye. Oro anam nnyịn ima enye n̄ko. Didie ke ikeme ndiwụt edima Ete nnyịn ke imama enye? Imọn̄ ineme ndusụk se ikemede ndinam ke ibuotikọ emi.