▪ Edieke emi ekpedide akpanikọ, uwem nnyịn ekpetie didie? Eyenete kiet emi eyen esie okowotde idem ama obụp ete: ‘Ndi Jehovah ama ada okụt ke eyen nnyịn oyowot idem, onyụn̄ ọfiọk ke ami ye n̄wan mi iyekeme ndiyọ n̄kpọ emi? Ndi se inamde utọ n̄kpọ emi ọwọrọ nnyịn edi emi?’ Ndi emi ọwọrọ ke Jehovah esitie ebiere kpukpru n̄kpọ oro ẹditịbede inọ nnyịn?

Ke ini idụn̄ọrede 1 Corinth 10:​13, iyokụt ke Bible idọhọke ke Jehovah esitie odụn̄ọde idomo kiet kiet oro nnyịn ikemede ndiyọ, onyụn̄ ayak enye oro enye ọfiọkde ke iyekeme ndiyọ esịm nnyịn. Ẹyak ineme n̄kpọ inan̄ oro anamde idọhọ ke Abasi isinamke utọ n̄kpọ emi.

Akpa, Jehovah ọnọ nnyịn ifụre ndimek ndinam se imade. Enye oyom nnyịn imek nte ididude uwem. (Deut. 30:​19, 20; Josh. 24:15) Edieke imekde ndinam se Abasi amade, enye ayada nnyịn usụn̄. (N̄ke 16:⁠9) Edi, edieke imekde ndinam se idiọkde, nnyịn iyọdọk se itọde. (Gal. 6:⁠7) Ntem, edieke Jehovah ekpesitiede ebiere utọ idomo oro edisịmde nnyịn, ndi imekeme ndidọhọ ke enye ọnọ nnyịn ifụre ndimek ndinam se imade?

Ọyọhọ iba, Jehovah isikpanke “ini ye n̄kpọntịbe unana idotenyịn” nditịbe nnọ nnyịn. (Eccl. 9:11) Ata idiọk aksiden ekeme nditịbe nnọ owo ke ntak emi enye odude ke idiọk itie ke idiọk ini. Jesus ama etịn̄ nte tọwa okowụrede ọtọ owo 18 owot, edi enye ọkọdọhọ ke idịghe Abasi ekedi ntak. (Luke 13:​1-5) Inenke ndidọhọ ke Abasi esibiere mbon emi ẹdibọhọde ye mbon emi ẹdikpade ke ini n̄kpọ emi owo mîdorike enyịn etịbede.

Ọyọhọ ita, ana nnyịn kiet kiet ibiere eke idade inọ. Satan ọdọhọ ke nnyịn ituak ibuot inọ Jehovah ke ntak se enye anamde ọnọ nnyịn, ndien ke nnyịn idisọn̄ọke ida ye enye ke ini idomọ. (Job 1:​9-11; 2:4; Edi. 12:10) Edieke Jehovah mîyakke idomo esịm nnyịn ke ntak emi enye ekerede ke nnyịn idikemeke ndiyọ, emi ọkpọwọrọ ke Satan etịn̄ akpanikọ.

 Ọyọhọ inan̄, idịghe kpukpru n̄kpọ oro ẹditịbede inọ nnyịn ke Jehovah esiyom ndifiọk. Edieke Jehovah esiyakde sụk idomo emi enye ekerede ke iyekeme ndiyọ esịm nnyịn, emi ọkpọwọrọ ke enye ọfiọk kpukpru n̄kpọ oro ẹditịbede inọ nnyịn. Jehovah isinamke utọ n̄kpọ oro. Imọdiọn̄ọ ke enye ekeme ndifiọk se iditịbede ke ini iso edieke enye oyomde ndifiọk. (Isa. 46:10) Edi, Bible owụt ke enye esimemek se enye oyomde ndifiọk. (Gen. 18:​20, 21; 22:12) Kpa ye oro Jehovah ekemede ndifiọk se iditịbede edieke enye amade, enye isibiereke se nnyịn idinamde, edi esiyak ida ifụre oro enye ọnọde nnyịn imek nte ididude uwem. Idem ikpaha nnyịn ndikụt Jehovah anamde emi, sia enye ama mme owo ẹnyene ifụre, esinyụn̄ anam se inende kpukpru ini.​—⁠Deut. 32:4; 2 Cor. 3:⁠17.

Nso ndien ke ikọ Paul emi, “Abasi . . . idinyụn̄ iyakke ẹdomo mbufo ẹbe se mbufo ẹkemede ndiyọ” ọwọrọ? Paul etịn̄ aban̄a se Jehovah esinamde ke ini isobode idomo, idịghe se enye esinamde mbemiso isobode idomo. Ikọ esie ọwọrọ ke Jehovah ayan̄wam nnyịn iyọ se ededi emi ọwọrọde nnyịn edieke ibuọtde idem ye enye. (Ps. 55:22) Yak ineme n̄kpọ iba emi anamde Paul etịn̄ emi.

Akpa, idomo oro isisobode edi “se isiwakde nditịbe nnọ owo.” Ntem, idụhe idomo emi isobode idahaemi, emi mbon en̄wen mîkosoboke. Idomo ndomokiet idisọn̄ke ikan nnyịn ndiyọ edieke ibuọtde idem ye Abasi. (1 Pet. 5:​8, 9) Ke 1 Corinth 10:​6-11, Paul ekebem iso etịn̄ aban̄a idomo oro ekesịmde nditọ Israel ke wilderness mbemiso enye etịn̄de se idude ke 1 Corinth 10:13. Mme idomo oro ẹkesịmde nditọ Israel ke wilderness ikedịghe obufa, ikonyụn̄ isọn̄ke ikan mmọ ndiyọ, sia idịghe kpukpru nditọ Israel ẹkesọn̄ ibuot ye Abasi. Edi Paul ama ọdọhọ ofụri ikanan̄ ete ke “ndusụk mmọ” ẹma ẹsọn̄ ibuot. Mmọ ẹkesọn̄ ibuot ye Abasi ke ntak emi mmọ mîkọbuọtke idem ye enye.

Udiana, “Abasi edi anam-akpanikọ.” Nte Abasi akanamde n̄kpọ ye ikọt esie owụt ke enye ama “mbon oro ẹmade enye ẹnyụn̄ ẹnịmde mme ibet esie.” (Deut. 7:⁠9) Emi owụt n̄ko ke enye esinam se enye ọn̄wọn̄ọde. (Josh. 23:14) Sia Abasi mîsitreke ndinam se enye ọn̄wọn̄ọde, mbon oro ẹmade enye ẹnyụn̄ ẹnịmde ibet esie, ẹnen̄ede ẹfiọk ke edieke mmimọ isobode idomo, ke enye iditreke-tre ndinam n̄kpọ iba emi: (1) Enye idiyakke ẹdomo mmimọ ẹbe se mmimọ ikemede ndiyọ, ye (2) “enye oyosio usụn̄ ubọhọ ọnọ” mmimọ.

Didie ke Jehovah esisio usụn̄ ubọhọ ọnọ mbon oro ẹbuọtde idem ye enye, ke ini mmọ ẹsobode idomo? Edieke edide uduak Abasi, enye ekeme ndimen idomo oro mfep. Edi kûfre ke Paul ama onyụn̄ ọdọhọ ke “[Jehovah] oyosio usụn̄ ubọhọ ọnọ mbufo ke ini idomo man mbufo ẹkeme ndiyọ enye.” Edi, ediwak ini, nte Jehovah ‘esisiode usụn̄ ubọhọ ọnọ nnyịn’ edi ndinọ nnyịn mme n̄kpọ oro ẹdin̄wamde nnyịn iyọ idomo. Ẹyak ise nte Jehovah esisiode usụn̄ ubọhọ ọnọ nnyịn:

• Enye “[esidọn̄] nnyịn esịt ke kpukpru ukụt nnyịn.” (2 Cor. 1:​3, 4) Jehovah ekeme ndida Ikọ esie, edisana spirit, ye mme n̄kpọ emi ofụn emi anamde akpanikọ onyụn̄ enyenede ọniọn̄ osion̄ode, an̄wam nnyịn. Emi esinam ekikere ye esịt nnyịn ana sụn̄.​—⁠Matt. 24:45; John 14:16; Rome 15:⁠4.

• Enye ekeme ndinam edisana spirit esie ada nnyịn usụn̄. (John 14:26) Ke ini isobode idomo, edisana spirit ekeme ndin̄wam nnyịn iti mme itien̄wed Abasi emi ẹkemede ndin̄wam nnyịn ibiere nnennen n̄kpọ oro ikpanamde.

• Enye ekeme ndinam mme angel esie ẹdin̄wam nnyịn.​—⁠Heb. 1:⁠14.

• Enye ekeme ndinam nditọete nnyịn ẹtịn̄ m̀mê ẹnam n̄kpọ emi ‘ẹsọn̄ọde nnyịn idem.’​—⁠Col. 4:⁠11.

Nso ke ikọ Paul ke 1 Corinth 10:13 ekpep nnyịn? Jehovah isibiereke utọ idomo oro edisịmde nnyịn. Edi edieke idomo esịmde nnyịn, imenen̄ede inịm ke edieke ibuọtde idem ye Jehovah, enye idiyakke ẹdomo nnyịn ẹbe se ikemede ndiyọ, edi enye oyosio usụn̄ ubọhọ ọnọ nnyịn ke ini idomo, man nnyịn ikeme ndiyọ. N̄kpọ emi enen̄ede ọdọn̄ nnyịn esịt!