Be ka se isịnede

Be ka se isịnede

 IBUOTIKỌ UKPEPN̄KPỌ 14

‘Tiene Nde Ikpat Christ Ketket’

‘Tiene Nde Ikpat Christ Ketket’

Christ ama okụt ukụt ke ntak mbufo, onyụn̄ ọkpọn̄ uwụtn̄kpọ ọnọ mbufo man mbufo ẹkpetiene nde ikpat esie ketket.”1 PET. 2:21.

ỌYỌHỌ IKWỌ 13 Kpebe Jesus Christ

SE IDIKPEPDE *

Jesus ama obono nde ikpat ọnọ nnyịn man ikeme nditiene ketket (Se ikpehe 1-2)

1-2. Nso inam ikeme nditiene nde ikpat Jesus? Efe uwụtn̄kpọ idinam emi an̄wan̄a nnyịn?

DA NTE ke ẹsan̄a ke usụn̄ emi n̄kpọndịk odude ẹka n̄kpọ. Usụn̄ oro onyụn̄ etie utatan utatan, ndien owo kiet kpọt ke otu mbufo ọdiọn̄ọ usụn̄; enye asan̄a iso ọnọ mbufo. Nte enye asan̄ade aka, nde ikpat esie ke obono ke utatan oro. Edi aka ko, mbufo ikwe enye aba! Kpa ye oro, idem inyekke mbufo. Mbufo ẹka iso ẹtiene nde ikpat esie ke utatan oro ket ket ket nte ẹkekeme!

2 Idiọk ererimbot emi etie nte usụn̄ isan̄ emi n̄kpọndịk ọyọhọde do, ndien nnyịn mme ata Christian itie nte mme akaisan̄ oro. Edi idem inyekke nnyịn sia Jehovah ọnọ nnyịn Jesus Christ Eyen esie emi enen̄erede ọdiọn̄ọ usụn̄, man ikeme nditiene nde ikpat esie ketket. (1 Pet. 2:21) N̄wed kiet emi etịn̄de n̄kpọ aban̄a Bible ọdọhọ ke Peter ekemen Jesus odomo ye owo emi adade owo usụn̄ isan̄. Ukem nte owo emi adade owo usụn̄ isan̄ esidide asan̄a aka enịm idiọn̄ọ man mbon emi ẹtienede enye ke edem ẹdiọn̄ọ itie ẹdidụkde, Jesus ama obono nde ikpat esie man ikeme nditiene enye. Ẹyak ibọrọ mbụme ita emi aban̄ade nditiene nde ikpat Jesus: (1) Ọwọrọ nso nditiene nde ikpat Jesus? (2) Ntak anade itiene nde ikpat Jesus? (3) Didie ke ikeme ndinam oro?

ỌWỌRỌ NSO NDITIENE NDE IKPAT JESUS?

3. Ọwọrọ nso nditiene nde ikpat owo?

3 Ọwọrọ nso nditiene nde ikpat owo? Ndusụk ini emi Bible etịn̄de aban̄a “ikpat” ye “ndisan̄a,” esida aban̄a nte owo odude uwem. (Gen. 6:9; Ps. 44:18) Ẹkeme ndidọhọ ke nte owo odude uwem etie nte enye ndidi ke asan̄a aka, ke obono nde ikpat esie. Ntre, nditiene nde ikpat owo ọwọrọ ndikpebe owo oro, oro edi, ndidu uwem nte owo oro odude.

4. Ọwọrọ nso nditiene nde ikpat Jesus?

 4 Ọwọrọ nso ndien nditiene nde ikpat Jesus? Ke nditịn̄ ibio ibio, ọwọrọ ndikpebe Jesus. Ke 1 Peter 2:21 emi ẹdade ibuotikọ emi ẹto, apostle Peter eketịn̄ aban̄a nte Jesus ọkọsọn̄ọde ada ọyọ onyụn̄ enịmde uwụtn̄kpọ ọnọ nnyịn ndikpebe. Edi, ediwak n̄kpọ en̄wen do emi Jesus akanamde emi ikemede ndikpebe. (1 Pet. 2:18-25) Se idude edi ke kpukpru se Jesus akanamde onyụn̄ etịn̄de ẹdodot se ikpebede.

5. Ndi owo emi mîfọnke ima osụk ekeme ndikpebe Jesus emi ọfọnde ama? Nso inam ọdọhọ ntre?

5 Sia nnyịn mîfọnke ima, ndi imosụk ikeme ndikpebe Jesus? Imekeme. Kûfre ke Peter ọkọdọhọ itiene “nde ikpat [Jesus] ketket,” ikọdọhọke itiene enye nte imọfọn ima. Edieke itịn̄de enyịn itiene nde ikpat Jesus, oro edi, idomode ofụri ukeme nnyịn ndikpebe enye kpa ye emi nnyịn mîfọnke ima, ọwọrọ ‘imaka iso isan̄a nte Jesus akasan̄ade,’ nte apostle John ekewetde ke 1 John 2:6.

NTAK ANADE ITIENE NDE IKPAT JESUS?

6-7. Nso inam idọhọ ke nnyịn nditiene nde ikpat Jesus ayanam inen̄ede ikpere Jehovah?

6 Nditiene nde ikpat Jesus ayanam inen̄ede ikpere Jehovah. Nso inam idọhọ ntre? Akpa ntak edi ke Jesus anam yak inen̄ede ikụt nte ikpodude uwem yak Abasi ama. (John 8:29) Ntre edieke ikpebede Jesus, ọwọrọ iyanam esịt enem Jehovah. Ndien imenen̄ede inịm ke Ete nnyịn eke heaven eyekpere mbon emi ẹdomode ofụri ukeme mmọ ndidi ufan esie.—Jas. 4:8.

7 Ọyọhọ ntak iba edi ke Jesus ama ekpebe Ete esie n̄kpọ isụhọke. Oro akanam Jesus ọdọhọ ke ‘owo eke okụtde imọ okụt Ete n̄ko.’ (John 14:9) Imekeme ndikpebe nti edu Jesus inyụn̄ inam n̄kpọ ye mme owo nte enye ekesinamde. Ke uwụtn̄kpọ, mbọm owo emi ọkọdọn̄ọde akpamfia, ye  n̄wan emi ọkọdọn̄ọde idiọk udọn̄ọ ama anam enye. Mbọm mbon emi mbon mmọ ẹkekpade ama esinyụn̄ anam enye n̄ko. Ima ikpebe Jesus, Jehovah ke ikpebe oro. (Mark 1:40, 41; 5:25-34; John 11:33-35) Nte ikpebede Jehovah ika, ntre ke ididọdiọn̄ idi ufan esie.

8. Tịn̄ nte nnyịn nditiene nde ikpat Jesus edin̄wamde nnyịn ‘ikan’ ererimbot.

8 Nditiene nde ikpat Jesus ayan̄wam nnyịn ikûyak ererimbot ẹnam nnyịn itre ndinam n̄kpọ Jehovah nte ikpanamde. Akpatre okoneyo emi Jesus okodude ke isọn̄ mbemiso ẹwotde enye, enye ama ọdọhọ ete: “Ami mmakan ererimbot.” (John 16:33) Ikọ esie ọkọwọrọ ke enye iketieneke ererimbot ikere n̄kpọ nte mmọ ẹsikerede, iyom se mmọ ẹyomde, ikonyụn̄ inamke se mmọ ẹnamde. Jesus ikefreke ke Jehovah ọkọdọn̄ imọ idi isọn̄ man idinam enyịn̄ Jehovah asana. Nso kaban̄a nnyịn? Enyene ediwak n̄kpọ ke ererimbot emi ẹkemede ndinam itre ndikpono Jehovah nte ikpokponode. Edi ukem nte Jesus, edieke iyakde n̄kpọ Abasi edi akpa ke uwem nnyịn, nnyịn n̄ko ‘iyakan’ ererimbot.—1 John 5:5.

9. Nso ke ana inam man ika iso isan̄a ke usụn̄ emi adade esịm nsinsi uwem?

9 Nditiene nde ikpat Jesus ayanam idu uwem ke nsinsi. Ini akparawa kiet emi ekedide imọ owo okobụpde Jesus se imọ ikpanamde man inyene nsinsi uwem, Jesus ama ọdọhọ enye ete: “Ditiene mi.” (Matt. 19:16-21) Ini enye eketịn̄de ikọ ye ndusụk mme Jew emi mîkenịmke ke enye edi Christ, enye ama ọdọhọ mmọ ete: “Mme erọn̄ mi . . . ẹtiene mi. Ami nnyụn̄ nnọ mmọ nsinsi uwem.” (John 10:24-29) Ini Jesus etịn̄de ikọ ye Nicodemus owo Sanhedrin emi ekenen̄erede oyom ndidiọn̄ọ se Jesus ekpepde, Jesus ama ọdọhọ enye ke ‘mbon oro ẹbuọtde idem ye imọ ẹyenyene nsinsi uwem.’ (John 3:16) Nnyịn ndinam se Jesus ekekpepde nnyụn̄ ndu uwem nte enye okodude owụt ke imọbuọt idem ye enye. Edieke inamde oro, iyaka iso isan̄a ke usụn̄ emi adade esịm nsinsi uwem.—Matt. 7:14.

DIDIE KE IKEME NDITIENE NDE IKPAT JESUS KETKET?

10. Nso ke ana inam man ikọ ifiọk emi aban̄ade Jesus? (John 17:3)

10 Nnyịn mîdiọn̄ọke Jesus, nnyịn idikemeke nditiene nde ikpat esie ketket. (Kot John 17:3.) “Ndikọ ifiọk” emi aban̄ade Jesus idịghe n̄kpọ usen kiet. Ana ika iso ikpep n̄kpọ iban̄a enye man inen̄ede idiọn̄ọ mme edu esie, nte enye esikerede n̄kpọ, ye nte enye esinamde n̄kpọ. Inamke n̄kpọ m̀mê ebịghi didie ikodụk esop Abasi, ana ika iso ‘ikọ ifiọk’ emi aban̄ade Jehovah ye Eyen esie.

11. Gospel mbinan̄ ẹtịn̄ ẹban̄a nso?

11 Ima akanam Jehovah anam ẹwet Gospel mbinan̄ ẹsịn ke Bible man ikeme ndidiọn̄ọ Eyen esie. Ẹwet ke mme Gospel oro  nte Jesus okodude uwem ye nte enye ọkọkwọrọde ikọ. Ẹwet n̄ko se Jesus eketịn̄de, se enye akanamde, ye nte enye ekesidade n̄kpọ. N̄wed Bible inan̄ oro ẹn̄wam nnyịn ‘itịm ikere’ uwụtn̄kpọ Jesus. (Heb. 12:3) Se ẹwetde ke Gospel mbinan̄ oro etie nte nde ikpat emi Jesus okobonode. Ima itịm ikpep mme Gospel, iyọdiọn̄ọ Jesus ọfọn akan nte ikọdiọn̄ọde. Ndien oro ayan̄wam nnyịn itiene nde ikpat esie ketket.

12. Nso ke ikpanam man mme Gospel ẹnen̄ede ẹnyene ufọn ẹnọ nnyịn?

12 Edieke iyomde se idude ke mme Gospel ẹnen̄ede ẹnyene ufọn ẹnọ nnyịn, inaha ikokot kpọt idaha. Ana ida ini inen̄ede ikpep mmọ inyụn̄ itịm itie ikere se ikpepde. (Men Joshua 1:8 domo.) Ẹyak ineme n̄kpọ iba emi ẹdin̄wamde nnyịn inen̄ede itie ikere se ikotde ke mme Gospel, inyụn̄ inanam se ikotde.

13. Nso ke akpanam man se okotde ke Gospel enen̄ede an̄wan̄a fi?

13 Akpa, nam mbụk emi okotde ke Gospel enen̄ede an̄wan̄a fi. Da nte ke ama odu okụt onyụn̄ okop se iketịbede, nyụn̄ yak etie fi ke idem nte eketiede mme owo emi okotde aban̄a. Se idin̄wamde fi anam emi edi ndida mme n̄wed emi esop Abasi ẹsion̄ode nnam ndụn̄ọde mban̄a se okotde oro. Se se iketịbede mbemiso se afo okotde oro etịbede, ye se iketịbede ke oro ebede. Nam ndụn̄ọde man enen̄ede ọdiọn̄ọ n̄kpọ aban̄a mme owo ye mme itie oro ẹsiakde ke mbụk oro. Men se okotde ke Gospel kiet domo ye ukem mbụk oro ke Gospel en̄wen. Ndusụk ini, andiwet Gospel kiet esitịn̄ n̄kpọ emi enye oko mîketịn̄ke.

14-15. Nso idin̄wam nnyịn inanam se ikotde ke mme Gospel?

14 Ọyọhọ iba, nam se okotde ke mme Gospel. (John 13:17) Ama ada ini enen̄ede ekpep mbụk kiet ke Gospel, bụp idemfo: ‘Ndi enyene n̄kpọ emi n̄kemede ndida n̄n̄wam idemmi ke mbụk emi? Didie ke n̄keme ndida se n̄kpepde ke mbụk emi n̄n̄wam owo efen?’ Kere ise m̀mê enyene owo emi  ekemede ndida mbụk oro n̄n̄wam. Ndien ama okụt eti ini, dọhọ enye se ekekpepde ke mbụk oro, edi diọn̄ọ nte etịn̄de, nyụn̄ nam ke usụn̄ emi owụtde ke amama enye.

15 Yak isio mbụk kiet ke Gospel ineme man ikụt nte ikemede ndinam n̄kpọ iba emi itịn̄de mi. Iyom ndineme mban̄a ubuene ebeakpa emi Jesus okokụtde ke temple.

UBUENE EBEAKPA KE TEMPLE

16. Tịn̄ se idude ke Mark 12:41 nte ama odu ini eketịbede.

16 Nam mbụk oro enen̄ede an̄wan̄a fi. (Kot Mark 12:41.) Nam nte ke odu ke itie emi n̄kpọ oro etịbede. Nisan 11 isua 33 eyo Jesus edi emi, ndien ẹmọn̄ ẹwot Jesus ke ufan̄ usen ifan̄ kpọt. Jesus odu ke temple ebịghi usen oro ekpep mme owo n̄kpọ. Ofụri emi, ikpọ owo ido ukpono ke ẹkefịna enye uwem. Ndusụk mmọ ẹma ẹbụp enye m̀mê enye ada odudu ke m̀mọ̀n̄ anam se enye anamde. Ndusụk mmọ ẹbụp enye mbụme emi mmọ ẹkerede ke enye idikemeke ndibọrọ. (Mark 11:27-33; 12:13-34) Idahaemi, Jesus adaha aka ikpehe en̄wen ke temple. Etie nte enye aka ikpehe emi ẹsikotde Okụre Iban. Enye okụt mme n̄kpọ usịn okụk emi ẹbonode ke n̄kan̄ oro, onyụn̄ osụhọde etetie ese nte mme owo ẹsịnde okụk do. Enye okụt ediwak imọ owo ẹdọn̄de ediwak okụk. Etie nte enye enen̄ede etie ekpere n̄kpọ usịn okụk oro tutu enye ekeme ndikop uyom okụk emi mmọ ẹn̄wan̄ade ẹdọn̄.

17. Nso ke ubuene ebeakpa oro ke Mark 12:42 akanam?

17 Kot Mark 12:42. Nte mme owo ẹsụk ẹsịnde okụk ẹka, Jesus okụt n̄wan kiet etienede edisịn okụk. Enye edi “ubuene ebeakpa.” Uwem ọsọn̄ ye mma oro etieti; etie nte imemke inọ enye ndikụt se adade ubọk aka inua. Kpa ye oro, enye asan̄a aka kiet ke otu n̄kpọ usịn okụk oro, akayak n̄kpri okudọk okụk iba esịn, isịnke-sịn editịm; ekeme ndidi idem okụk emi enye esịnde mi inamke-nam uyom nte eke mme imọ owo oko. Jesus ọdiọn̄ọ ke n̄kpri okudọk okụk iba emi mma oro esịnde do ẹdi lepton. Lepton ekekpri akan ke otu okụk emi mme Jew ẹkekamade ini oro. Okụk esie oro ikekemke ndida ndep ukpọk akaran̄abasi kiet, emi ekememde urua akan ke otu inuen emi ẹsidepde ẹda ẹnam udia.

18. Nso ke Jesus eketịn̄ ke Mark 12:43, 44 aban̄a okụk emi ebeakpa oro ekesịnde?

18 Kot Mark 12:43, 44. Jesus ama se ebeakpa oro anamde ata etieti. Ntre enye okot mme mbet esie anyan ubọk owụt ebeakpa oro ete: “Ubuene ebeakpa emi ama esịn okụk akan kpukpru mmọ.” Ekem enye etịn̄ se inamde imọ idọhọ ntre ete: “Kpukpru mmọ [akpan akpan mme imọ owo oro] ẹkesio n̄kpọ ke nyọhọ-nsụhọ mmọ ẹsịn, edi enye, ke unana esie, ekesịn kpukpru se enye enyenede, kpa ofụri se enye akpadade odu uwem.” Ebeakpa oro ndikakwat ufọk mmen n̄kesịn ke n̄kpọ usịn etịbe ama owụt ke enye ama enen̄ede enịm ke Jehovah eyese aban̄a imọ.—Ps. 26:3.

Ukem nte Jesus, toro mbon emi ẹsịnde ofụri ukeme mmọ ẹnam n̄kpọ Jehovah (Se ikpehe 19-20) *

19. Nso akpan n̄kpọ ke ikeme ndikpep nto se Jesus eketịn̄de aban̄a ubuene ebeakpa oro?

19 Nanam se okotde. Bụp idemfo, ‘Nso ke n̄keme ndikpep nto se Jesus eketịn̄de aban̄a ubuene ebeakpa oro?’ Kere nte eketiede ebeakpa oro ke idem. Ekeme ndidi enye ama ọdọhọ, ‘Ubaha nte ekpedide mmekeme ndinọ Jehovah n̄kan emi.’ Kpa ye oro, enye ama anam se enye ekemede, enye ama ọnọ Jehovah kpukpru se enye ekenyenede. Jesus ama onyụn̄ ọdiọn̄ọ ke enọ esie ọsọn̄ urua ke enyịn Ete imọ. Se akpan n̄kpọ emi ikemede ndikpep mi: Esịt esinem Jehovah ima inam n̄kpọ esie ke ofụri esịt ye ke ofụri ukpọn̄. (Matt. 22:37; Col. 3:23) Esịt esinem  Jehovah ndikụt nnyịn inamde kpukpru se ikemede! Ntre ke edi ye udomo ini ye odudu emi idade ika ukwọrọikọ, idụk mbono esop, inyụn̄ inam mme n̄kpọ eken inọ Abasi.

20. Didie ke afo ekeme ndida se ekpepde ke mbụk ebeakpa oro n̄n̄wam owo? Nọ uwụtn̄kpọ.

20 Didie ke afo ekeme ndida se ekpepde ke mbụk ebeakpa oro n̄n̄wam owo? Kere owo emi akpadade mbụk oro an̄wam yak okụt ke Jehovah ama se enye anamde ọnọ imọ. Ndi ọmọdiọn̄ọ eyenete an̄wan emi ama okokpon owo, emi esịt etịmerede m̀mê emi ekerede ke imọ iwọrọke n̄kpọ ke ntak emi enye mînyeneke ibifịk ikwọrọ ikọ aba nte ekesikwọrọde, m̀mê ke ntak emi udọn̄ọ mîyakke enye anam n̄kpọ Abasi nte ekesinamde? Ndi ọmọdiọn̄ọ eyenete eren emi mîkemeke ndidụk kpukpru mbono esop ke Ufọkmbono Obio Ubọn̄ ke ntak idiọk udọn̄ọ emi odụn̄de-dụn̄ enye ke idem, ndien oro anam idem emem enye? Usụn̄ kiet emi afo ekemede ndin̄wam utọ mme owo oro edi nditịn̄ ikọ emi edisọn̄ọde mmọ idem. (Eph. 4:29) Men se ekpepde oto mbụk ubuene ebeakpa oro neme ye mmọ. Se afo etịn̄de oro ọyọsọn̄ọ mmọ idem onyụn̄ anam mmọ ẹti ke esịt esinem Jehovah ima inam ofụri ukeme nnyịn. (N̄ke 15:23; 1 Thess. 5:11) Ama otoro mme owo ke se mmọ ẹdade ofụri ukeme mmọ ẹnam ẹnọ Jehovah, ekpedi ekpekpri, ọwọrọ afo emetiene nde ikpat Jesus ketket.

21. Nso ke afo ebiere ndinam?

21 Esịt enem nnyịn etieti nte ẹwetde ediwak n̄kpọ ke mme Gospel ẹban̄a Jesus, sia se ẹwetde do an̄wam nnyịn ikeme ndikpebe enye, oro edi, itiene nde ikpat esie ketket! Ndi ukereke ke ọkpọfọn yak ada ini emi esidade ekpep Bible ke idemfo m̀mê ini Utuakibuot Ubon mbufo ekpep mme Gospel emi? Edi yak iti ke edieke iyomde se ikpepde enen̄ede enyene ufọn ọnọ nnyịn, ke ana se ikpepde enen̄ede an̄wan̄a nnyịn, ana inyụn̄ inanam se ikpepde. Imetịn̄ ke ana inam n̄kpọ nte Jesus ekesinamde, edi ana ikpan̄ utọn̄ n̄ko ikop se enye eketịn̄de. Ntre ke ibuotikọ emi etienede, iyese se ikemede ndikpep nto mme ikọ emi Jesus eketịn̄de esisịt ini mbemiso enye akpade.

ỌYỌHỌ IKWỌ 15 Yak Itoro Jesus!

^ ikp. 5 Ana nnyịn mme ata Christian ‘itiene nde ikpat Jesus ketket.’ Ọwọrọ nso nditiene “nde ikpat” Jesus? Iyọbọrọ mbụme oro ke ibuotikọ emi. Iyeneme n̄ko ntak emi anade itiene nde ikpat Jesus ketket ye nte ikpanamde oro.

^ ikp. 60 NDISE: Ke sista kiet ama eketie ekere se Jesus eketịn̄de aban̄a ubuene ebeakpa oro, enye aka okotoro akamba sista kiet nte enye adade ofụri ukeme esie anam n̄kpọ Abasi.