Be ka se isịnede

Be ka se isịnede

 MBỤK EYOUWEM

“Mmama Ukwọrọikọ Idahaemi!”

“Mmama Ukwọrọikọ Idahaemi!”

N̄KOKPON ke obio Balclutha, ke South Island, ke New Zealand. Ini ndide eyenọwọn̄, mma mma Jehovah, ama onyụn̄ enem mi ndidiọn̄ọ akpanikọ. N̄kesikaha mbono esop ke nnam-didie. Esop nnyịn ama enem tutu, ndịk ikonyụn̄ inamke mi mma ndu ye nditọete. Kpa ye emi n̄kedide owo o-bụt, mma nsitiene n̄kwọrọ ikọ kpukpru urua. Idem ikesinyekke mi ndikwọrọ ikọ nnọ nditọ ufọkn̄wed nnyịn ye mbon en̄wen. N̄kadaha ami ndidi Ntiense Jehovah nte n̄kpọ o-bụt. Oro akanam nyak idem mi nnọ Abasi ini ndide isua 11.

ESỊT IKADATKE MI ABA

Ini n̄kedide n̄kpọ nte isua 13, n̄kenen̄ekede n̄kpere Jehovah aba. Eketie mi nte nditọ ufọkn̄wed nnyịn ẹnyene ifụre ndinam se mmọ ẹkpemama, ama ọdọn̄ mi nditie ntre n̄ko. Ibet emi ete ye eka mi ẹkenịmde ke ufọk, ye nte Bible ọdọhọde ẹdu uwem ẹkeditie nte ẹbọbọp mi, n̄konyụn̄ nda ndinam n̄kpọ Jehovah nte ufen. N̄kosụk nnenịm ke Jehovah do, edi n̄kekpereke enye aba.

Mma nsidomo n̄kwọrọ ikọ ekpri man iditie nte mmetre ofụri ofụri. N̄kesitịmke idem mbemiso n̄kade ukwọrọikọ, ntre ama esisọn̄ mi nditọn̄ọ nneme ye owo. N̄kponyụn̄ ntọn̄ọ, se n̄kesitịn̄de ikesinyeneke ibuot. Ke ntak oro, n̄kesinyeneke mfiakn̄ka, nnyeneke owo ndomokiet se n̄kpepde Bible, n̄kponyụn̄ n̄ka ukwọrọikọ, ekesitie mi ntre ntre ke idem. Kpukpru oro ama anam ukwọrọikọ etetịm odorode mi. Mma mbụp idemmi nte, ‘Mme owo ẹsinanam didie ẹkwọrọ ikọ kwa urua, kwa ọfiọn̄?’

Ini nsịmde isua 17, n̄koyomke ndisịne ke idak owo ndomokiet aba. Ntre mma ntan̄ n̄kpọ n̄kpọn̄ ufọk n̄kodụn̄ ke Australia. Ama afịna ete ye eka mi nte n̄kọwọrọde, edi mmọ ẹma ẹkere ke ekeme ndidi nyaka iso nnam n̄kpọ Jehovah mma nsịm do.

 Ini ndude ke Australia, n̄kesịnke-sịn idem aba ke n̄kpọ Abasi. Ekesidi ẹma ẹkụt mi ke mbono esop mfịn, n̄kpọn̄ owo ikwe. N̄kadian idem ye mme uyen emi ẹketiede nte ami. Mbubreyo mfịn, oyokụt nnyịn ke mbono esop; okoneyo edem usen, edikụt nnyịn ke club, ke in̄wọn̄ n̄kpọ, ke inek unek. Mma nti se n̄kesinamde oro, mmokụt ke n̄kedi, ikpat kiet ke esop Abasi, ikpat kiet ke ererimbot. Edi n̄kekemeke ndida idemmi nte Ntiense Jehovah, n̄konyụn̄ ndụkke nnyịne ke ererimbot ofụri ofụri.

MMA N̄KPEP AKPAN N̄KPỌ KE INI MMEN̄KODORIKE ENYỊN

Ke n̄kpọ nte isua iba ama ekebe, mma ndụn̄ usen ifan̄ ye sista kiet emi akanamde mi n̄kere m̀mê utọ uwem emi n̄kodude edida mi ikesịm m̀mọ̀n̄. Sista oro ama an̄wam mi, edi idiọn̄ọke. Ini oro n̄kodụn̄ ufọk kiet ye nditọete iban inan̄ emi mîkọdọhọ ebe kan̄a, ima inyụn̄ idọhọ esenyịn circuit kiet ye Tamara an̄wan esie ẹditiene nnyịn ẹdụn̄ urua kiet. Tamara edi sista emi akan̄wamde mi do. Ekesidi ini ebe esie anamde n̄kpọ esop, enye eyeditie ye nnyịn eneme nneme, asak. Mma mma se enye akanamde oro. Enye ikesinamke n̄kpọ n̄kari n̄kari, ikonyụn̄ isọn̄ke ndineme nneme ye enye. Ama akpa mi idem nte owo emi ekenen̄erede esịn idem ke n̄kpọ Abasi ekemede ndinem itie ntre.

Ini ekededi emi okụtde Tamara, oyokụt ke uwem enem enye. Okpodu ye enye, inyeneke nte mûdumaha esop Abasi ye ukwọrọikọ. Tamara emi ekesịnde idem anam n̄kpọ Jehovah ama okop inemesịt, edi ami emi n̄kanamde ekpri ekpri n̄kokopke. Nte enye ekesikerede nti n̄kpọ kpukpru ini onyụn̄ enen̄erede okop inemesịt ama anam nnen̄ede nse uwem mi. Uwem esie ama anam n̄kere akpan n̄kpọ kiet emi Bible etịn̄de ke Psalm 100:2 ete ke Jehovah oyom kpukpru nnyịn inam n̄kpọ esie “ye idatesịt,” ke enye onyụn̄ oyom ndikop “n̄kpo idara” nnyịn.

SE IKANAMDE MFIAK NTỌN̄Ọ NDIMA UKWỌRỌIKỌ

Mma nyom esịt enem mi nte ekenemde Tamara, edi ama enyene mme n̄kpọ emi akanade n̄kpụhọde ke uwem mi kan̄a. Ikedịghe mbọp enyịn ntat ami n̄kpụhọde. Ekedi sụn̄sụn̄ sụn̄sụn̄. Mma ntọn̄ọ nditịm idem mbemiso n̄kade ukwọrọikọ, ndien ke ini ke ini, mma nsinam utom usiakusụn̄ unọ un̄wam. Oro ama anam ndịk ukwọrọikọ odon̄ode mi onyụn̄ anam etie mi ke idem nte mmọdiọn̄ọ se nnamde. Nte n̄kenen̄erede nda Bible n̄kwọrọ ikọ, ntre ke  ukwọrọikọ ekenem mi akan. Ibịghike, mma ntọn̄ọ ndinam usiakusụn̄ unọ un̄wam kpukpru ọfiọn̄.

Mma ntọn̄ọ ndinam ufan ye mbon emi ẹkesọn̄de idem ke esop, emi okonyụn̄ enemde mmọ ndinam n̄kpọ Jehovah. Mma nsọn̄ọ ndusụk mmọ, ndusụk ẹnyụn̄ ẹsọn̄ọ mi. Eti uwụtn̄kpọ mmọ ama anam mfiak nse se ndade nte akpa n̄kpọ, onyụn̄ anam mfiak ntọn̄ọ ndikot Bible kpukpru usen. Ukwọrọikọ ama ọtọn̄ọ ndinem mi n̄kan nte ekesinemde. Ekem ko, mma ndidi asiakusụn̄ ofụri ini. Ke mma n̄kesịne ediwak isua ke esop n̄kopke inem, esịt ama afiak ọtọn̄ọ ndinem mi, ama onyụn̄ afiak enem mi ndidu ye nditọete.

MMENYENE OWO EMI NDISAN̄ADE KIET NNAM USIAKUSỤN̄ OFỤRI EYOUWEM MI

Ke isua kiet ama ekebe, mma n̄kụt brọda kiet emi ekekerede Alex. Alex ama ama Jehovah, ama ukwọrọikọ, ọfọn ido, inyụn̄ idịghe owo n̄kari. Enye ekedi asan̄autom unamutom, ama onyụn̄ anam utom usiakusụn̄ isua itiokiet ini oro. Enyene ini emi enye okodude ke Malawi ọkwọrọ ikọ ke ebiet emi ẹkenen̄erede ẹyom mme ọkwọrọikọ. Ini enye okodude do, enye ama esisan̄a ye mme isụn̄utom ọkwọrọ ikọ. Mme isụn̄utom oro ẹma ẹnịm eti uwụtn̄kpọ ẹnọ enye, ẹnyụn̄ ẹdọhọ enye ada n̄kpọ Jehovah nte akpa ke uwem esie.

Ami ye Alex ima inam ndọ ke 2003. Ke inanam utom uyọhọ ini tutu emi. Imekpep ata ediwak nti n̄kpọ, edidiọn̄ Jehovah onyụn̄ awak tutu nnyịn ikemeke ndibat aba.

JEHOVAH AMA AFIAK ỌDIỌN̄ NNYỊN

Ini n̄kade ukwọrọikọ ke Gleno, ke Timor-Leste

Ke 2009, ẹma ẹdọhọ nnyịn ikedi isụn̄utom ke Timor-Leste. Timor-Leste edi ekpri idụt ke otu mme isuo Indonesia. Ini ikokopde etop oro, idem ama akpa nnyịn. Kpa ke ukem ini oro, esịt ama enem nnyịn, ndịk onyụn̄ anam nnyịn. Ke ọfiọn̄ ition ẹbede, ima idisịm Dili emi edide ibuot obio idụt oro.

Nte uwem eketiede ke Timor-Leste ama enen̄ede okpụhọde ye nte uwem eketiede ke Australia. Akana ikpep ndinam n̄kpọ nte mbon n̄kan̄ oro, ikpep obufa usem, ikpep ndidia udia mmọ, inyụn̄ ikpep ndidụn̄ nte ẹdụn̄de do. Ima ika ukwọrọikọ, ata ediwak ini ima isikụt mme ubuene, mbon emi mîkenen̄ekede  ika n̄wed, ye mbon emi ẹkefịkde. Ima isikụt ediwak mbon emi ẹkebiomode ndo ẹnyụn̄ ẹdade unan ke ini ekọn̄ ye afai emi okodude ke idụt oro. Ima isinyụn̄ ikụt mbon emi ẹkedide mmọ ẹma ẹti se iketịbede ini oro, esịt etịmede mmọ, mmọ ẹnyụn̄ ẹfụhọ. *

Ukwọrọikọ ama enem utọ oro idụhe! Yak nnọ mbufo uwụtn̄kpọ kiet. Usen kiet mma n̄kwọrọ ikọ nnọ eyenan̄wan isua 13 emi ekekerede Maria. * Maria eketie mfụhọ mfụhọ. Eka esie ama akpa isua ifan̄ ke edem, enye ikesinyụn̄ isọpke ikụt ete esie sia mmọ ikodụn̄ke kiet. Maria ikomụmke ibuot se enye oyomde ndida uwem esie nnam, ukem nte ediwak nditọwọn̄ idaha isua emana esie. Mmeti usen kiet emi enye okosụk an̄wanade nditịn̄ nte etiede enye ke idem nnọ mi. Ekedi ke etịn̄, ke atua. Se enye eketịn̄de ikan̄wan̄ake mi, sia n̄kenen̄ekede ndiọn̄ọ usem mmọ ini oro. Mma mbọn̄ akam ndọhọ Jehovah an̄wam mi ndọn̄ enye esịt, nnyụn̄ ntọn̄ọ ndikot mme itie Bible emi ẹdidọn̄de enye esịt nnọ enye. Ekedi isua abahade, ke n̄kụt nte akpanikọ an̄wamde Maria okpụhọde nte enye esinamde n̄kpọ, nte enye akamade idem, ye nte enye adade uwem emi. Enye ama edina baptism. Idahaemi, enye ke idemesie enyene mme owo emi enye esikpepde Bible. Idahaemi Maria edide asan̄autom Jehovah mi, mme ete, ye eka, ye nditọeka ẹyọyọhọ enye idem. Enye onyụn̄ okụt ke ẹma imọ.

Jehovah ke ọdiọn̄ utom ukwọrọikọ ke Timor-Leste. Kpa ye emi mîyọhọke isua duop kan̄a ata ediwak mme asuanetop ẹkena baptism, ediwak mmọ ẹdi mme asiakusụn̄ ofụri ini, mme asan̄autom unamutom, m̀mê mbiowo. Ndusụk mmọ ẹnam utom ke itie ukabade n̄wed. Mmọ ẹsin̄wam ẹkabade mme n̄wed Ikọ Abasi ẹsịn ke nsio nsio usem ke idụt oro. Esinem mi etieti ndikop nte mmọ ẹkwọde ikwọ ke mbono esop, ndikụt nte esịt enemde mmọ, nnyụn̄ n̄kụt nte mmọ ẹkade iso ẹkpere Jehovah.

Ini ami ye Alex idahade ndikot mme owo Editi ke efakutom emi owo mîbahakede inọ esop

N̄KWE SE IKPEKENEMDE MI IKAN EMI

Uwem ke Timor-Leste ama enen̄ede okpụhọde ye uwem ke Australia, edi n̄kwe se n̄kpakanamde yak enem mi akan emi. Ndusụk ini, imesitiene idụk ifaha ke ekpri bọs emi mme owo ẹma ẹkedọn̄ọ ẹyọhọ; nsat iyak, ikọn̄, ye mfri emi ẹdepde ke urua, ẹsụk ẹdọn̄ọ kpa ke esịt bọs oro. Ndusụk usen, imesitie ke ekpri mfafaha ufọk ikpep owo Bible. Ufọk oro ke ofiop, isọn̄ owo iyọn̄ọke ke simen, unen ke ẹdi ẹfefehe ẹdọk, ẹfefehe ẹsụhọde. Kpa ye kpukpru oro, mmesiwak ndidọhọ idemmi, ‘Idụhe se inemde nte se nnamde emi!’

Efakutom nnyịn ke idụk bọs ika oro

Mma nti nte n̄kpọ ekesitiede ye ami, mmenen̄ede n̄kọm Abasi nte ete ye eka mi ẹkedomode ofụri ukeme mmọ ẹkpep mi usụn̄ Jehovah ẹnyụn̄ ẹn̄wamde mi, idem ke ini mmen̄kenen̄ekede nsịn idem nnam n̄kpọ Jehovah. Se Mme N̄ke 22:6 etịn̄de osu mi ke idem. Esinem ete ye eka mi ndikụt mi ye Alex, onyụn̄ enem mmọ ndikụt nte inamde n̄kpọ Jehovah. Ọtọn̄ọde ke 2016, ami ye Alex imanam utom circuit ke mme itie emi n̄kọk itieutom Australasia ẹsede ẹban̄a.

Ke mbre vidio Kokoete ye Nene nnọ nditọwọn̄ ke idụt oro. Enem mmọ ndise vidio oro

Se do-o! Ukwọrọikọ ama esidorode mi akpa akpa. Idahaemi edinenem mi! Mmedikụt ke inamke n̄kpọ m̀mê nso ke ikụt ke uwem emi, ke n̄kukụre se ikemede ndinam ikop ata inemesịt edi ndinam n̄kpọ Abasi. Tọn̄ọ n̄kamana, isua 18 emi nsan̄ade ye Alex ebe mi nnam n̄kpọ Jehovah ke uwem enem mi akan. Mmokụt idahaemi ke se David eketịn̄de ye Jehovah ke Psalm 5:11 edi akpanikọ. Enye ọkọdọhọ ete: “Kpukpru mbon emi ẹdade fi ke ebiet ubọhọ ẹyedara; mmọ ẹyesio n̄kpo idara ke nsinsi. . . . Mmọ eke ẹmade enyịn̄ fo ẹyenyụn̄ ẹdara ke afo.”

Enem mi etieti ndikpep Bible ye utọ mme owo emi ẹsụhọrede idem ntem!

^ ikp. 21 Ke 1975 ke ẹketọn̄ọ ndin̄wana ke Timor-Leste nyom ukaraidem. Ekọn̄ oro ama ebe isua 20.

^ ikp. 22 Ẹkpụhọ enyịn̄.